Middle East-a Indona—Bible-in Eng Nge A Sawi?

Khawvêla mite chu United States, Israel leh, Iran inkâra innghirnghona chuan a ti mangang hle a. He buaina hian indona lian tham zâwk a thlen mai ang em? Sawrkârte chuan chhiatna ti tâwpin remna tluantling an awmtîr thei ang em?

Bible hrilh lâwkna ngaihventute chuan Thu Puan bua târ lan Armageddon indona chu Middle East-a buaina aṭang hian a inṭan an ring pawh a ni thei.

Bible-in eng nge a sawi?

Middle East-a indona hi Sawrkârte’n an ti tâwp thei ang em?

Bible chuan: “Mi liante chu ring suh ula, mihring fapa, ṭanpuina rêng rêng awm lohna chu, ring hek suh u,” tiin a sawi.—Sâm 146:3.

Sawrkârte’n Middle East-a remna an awmtîr theih dâwn leh dâwn loh chu hunin a la hril ang. Amaherawhchu, Bible chuan politics hruaitu, mihring sawrkâr, a nih loh leh mihring din pâwl tute mahin indona ti tâwpin remna tluantling an awmtîr thei ngai lo vang tih chiang takin a sawi a. Pathian chauhvin “indonate chu kâwlkil thlengin a tireh” thei a ni.—Sâm 46:9.

• Hriat belh nân, Vênnainsâng magazine “Indona Tâwp Hun Tûr” tih thu ziak chu chhiar rawh

Middle East-a indona hian hrilh lâwkna a thlen famkimtîr em?

Bible chuan: “Indo thâwmte leh indo thuthangte in hre bawk ang. . . . Hnam hrang leh hnam hrang an indo vang a, ram hrang leh ram hrang an indo vang,” tiin a sawi.—Matthaia 24:6, 7.

Middle East-a indona thleng mêk hi “khawvêl tâwp chhinchhiahna” târ lang tu pakhat a ni a, chu chuan “ni hnuhnûngahte” kan nung tih a finfiah a ni. (Matthaia 24:3; 2 Timothea 3:1) Tûn laia indona kan hmuhte hian Pathianin indona leh mihringte tawh harsatna dangte a ti tâwp thuai dâwn tih a târ lang a ni.

• Hriat belh nân, “‘Ni Hnuhnûng’ A Nih Loh Leh ‘Tâwpna Hun’ Chhinchhiahna Chu Eng Nge Ni?” tih thuziak chu chhiar rawh.

Armageddon indona chu Middle East-ah a inṭan ang em?

Bible chuan: “Hmun pakhat, Hebrai ṭawnga Armageddon an tihah chuan an hruai khâwm ta a,” tiin a sawi.—Thu Puan 16:16.

Armageddon indona chu Middle East-a inṭan mihring sawrkârte indona a ni lo. Chu chu khawvêl pum huap mihring sawrkâr zawng zawngte leh Pathian indona a ni zâwk.

• Hriat belh nân, “Armageddon Indona Chu Eng Nge?” tih thuziak chu chhiar rawh.

Engin nge lungkhamnate hmachhawn tûrin min ṭanpui thei?

Bible chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin a sawi.—Philippi 4:6.

Pathian Jehovaa chuan a hnêna ṭawngṭai tûrin min sâwm a. Pathian chuan min ngaihsak avângin kan ṭawngṭainate min ngaihthlâksakin kan lungkhamnate hmachhawn thei tûrin min ṭanpui ang. (1 Petera 5:7) Chutianga min ṭanpui dân kawng khat chu, indonate a awm reng chhan hre thiam tûra min ṭanpui mai bâkah, indona a tih tâwp dân tûr leh kan natnate leh hrehawm tawrhnate min nuai bosak dâwn tih min hrilhna hmangin a ni.—Thu Puan 21:3, 4.

• Pathianin min ṭanpui dân hriat belh nân, “Bible-ah Thlamuanna Thu Ka Hmu Thei Em?” tih thuziak chu chhiar rawh.