Kristian Nih Awmzia Chu Eng Nge Ni?—Bible-in Eng Nge A Sawi?

Tûn laiah, khawvêla mi tam tak chuan inchhuang takin Kristian an nih thu an sawi a; mah se, mi dangte ti na zâwngin thil an ti fo ṭhîn. Mi ṭhenkhat chu mahni hmasial tak te, rinawm lo te, a nih loh leh ngilneihna nei lote an ni a. Mi dang lehte chuan an nupui pasal chungah rinawmna an lantîr lo pawh a ni thei. An nungchang avângin mi ṭhenkhat chuan: ‘Kristian nih awmzia dik tak chu eng nge ni?’ tiin an ngaihtuah mai thei a ni.

Kristian nih awmzia dik tak chu

Kristian ka ni tia sawi chu thil awlsam tak a ni a. Mahse, chutia sawi mai chu a tâwk lo. Bible sawi dân chuan Kristian chu Isua Krista zirtîr a ni a. (Tirhkohte 11:26) Amah Isua ngeiin: “Ka thu in âwih reng chuan ka zirtîrte in ni tak tak ang,” tiin a sawi. (Johana 8:31) Ni e, tu mahin Isua thusawite chu an zâwm famkim thei lo ngei mai. Mahse, Kristiante chuan Isua zirtîrnate chu theih tâwp chhuaha zawm an tum a, an nî tin nunah Isua miziate chu lantîr an tum hrâm hrâm a ni. Entîrna ṭhenkhat hi han ngaihtuah teh.

Kristiante chuan mahni hmasail lo hmangaihna an lantîr

Isua sawi: “Thupêk thar ka pe a che u, inhmangaih tawn ula; keiin ka hmangaih che u ang bawk hian, nangni pawh inhmangaih tawn rawh u. In inhmangaih tawn chuan, mi zawng zawngin ka zirtîrte in ni tih an hria ang.”—Johana 13:34, 35.

Isua thil tih: Isua chuan mite khawtlâng nihna leh ṭobûlte chu eng pawh ni se, mi zawng zawng chungah mahni hmasail lo hmangaihna a lantîr a. Dam lote a ti dam a, rîlṭamte ei tûr a pe a, ṭhenkhat phei chu thihna ata a kai tho hial a ni.—Matthaia 14:14-21; 20:28.

Kristiante tih dân tûr: Kristiante chuan thilphal tak, thlei bîk nei lo leh, ngaihdamna hmangin mahni hmasail lo hmangaihna an lantîr a. Ṭanpui ngaite an ṭanpui a, mi dangte tân inhuam takin an inpe a ni.—1 Johana 3:16.

Kristiante chu an rinawm

Isua sawi chu: ‘Kei hi thutak ka ni.’—Johana 14:6.

Isua thil tih: Isua chu a thusawi leh thil tih kawng engkimah a rinawm tlat a. Mi dangte chu tih bumin, a hruai kawi ngai lo. Ani chu dodâlna a tawh hunah pawh a rinawm tlat a ni.—Matthaia 22:16; 26:63-67.

Kristiante tih dân tûr: Kristiante chuan dâwt an sawi lo. Anni chuan chhiah an pe a, rûk an ru lo va, an kut hnuaia hnathawkte chu an nî tin hlawh an pe ziah a ni. (Rom 13:5-7; Ephesi 4:28) Mahni hlâwkna atân mi dangte an bum lo va, chanchin dik lo an hrilh hek lo.—Hebrai 13:18.

Kristiante chuan ngilnei takin thil an ti

Isua sawi chu: “Nangni chau leh phurrit phur zawng zawngte u, ka hnênah lo kal ula, ka chawlh hahdamtîr ang che u. Thuhnuairawlh tak leh rilrua inngaitlâwm tak ka nih avângin ka nghâwngkawl bât ula, ka hnên aṭangin inzir rawh u; tichuan, hahdamna in hmu ang. Ka nghâwngkawl chu bah a nuam a, ka phur pawh a zâng a ni.”—Matthaia 11:28-30.

Isua thil tih: Isua chu pan naum tak leh ngilnei tak a ni a. Ani chuan naupangte a lâwmin, rilru hahte a thlamuan a, mi dangte chu zah takin a cheibâwl a ni.—Marka 10:13-15; Luka 9:11.

Kristiante tih dân tûr: Kristiante chuan mi dangte chu ngilneihna nei takin an be tûr a ni a, hawihhâwm tak leh mite sawisêl lo an ni tûr a ni. (Ephesi 4:29, 31, 32) Mi dangte chungah ngaihvenna an lantîrin, ṭanpui theih dân kawngte an zawng tûr a ni.—Galatia 6:10.

Kristiante chu mahni kawppuite chungah an rinawm reng

Isua sawi chu: “Pathianin a zawm tawh chu mihringin ṭhen suh se.”—Marka 10:9.

Isua thil tih: Isua chuan nupui nei ngai lo mah se, inneite chu mahni kawpuite laka rinawm tlat tûrin a fuih a. (Matthaia 19:9) Nupa inṭhen theihna thil tihte chu a vaukhân a ni.—Matthaia 5:28.

Kristiante tih dân tûr: Kristiante chuan inneihna chawimawi lotu nungchang chu a pumpelh tûr a ni. (Hebrai 13:4) Inneite chuan mahni kawppuite chu hmangaihna leh zah takin an cheibâwl tûr a ni.—Ephesi 5:28, 33.