Tharum Thawhna Chu Harsatna Chinfel Dân Dik A Ni Lo

Tûn laiah mi tam tak chuan tharum thawhna chu innghirnghona, a nih loh leh harsatnate chinfel dân niin an ring a. Mahse, chutiang ngaihtuah dân chu Isua Krista zirtîr dân leh thil tih dân nên chuan a inpersan hle. Isua thusawi leh thil tih ṭhenkhat chu i lo ngaihtuah ta ila.

Isua thusawi

Isua chuan Tlâng Chunga a Thusawi lâr takah thinurna, inhmêlmâkna leh, tharum thawhnate chu inrem lohnate chinfel dân a ni lo tih a zirtîr a ni. Entîrna tlêm azâwng lo ngaihtuah ta ila.

• “Miin in chunga an tiha in duh tûr ang chiah chu mi chungah pawh in ti tûr a ni.” (Matthaia 7:12; Luka 6:31) Dân Rangkachaka tia sawi he thurâwn hian mite chu cheibâwl kan duh anga cheibâwl tûrin min fuih a. Mi tu mahin râwng taka cheibâwl nih kan duh loh avângin, mite nên kan thu a inhmuh loh hunah pawh zah tak leh ngilnei takin mite kan cheibâwl tûr a ni lâwm ni?

• “In biang lehlama bêngtu hnênah chuan a lehlam pawh dawh rawh u.” (Matthaia 5:38, 39; Luka 6:29) Isua chuan mite chu dik lo takin kan incheibâwltîr tûr a tihna a ni lo va. Chu aiin, sakhaw hruaitu ṭhenkhatte zirtîrna nia lang, phuba lâk chu a thiang tih ngaih dân dik lo a siam ṭhatna zâwk a ni. A hnungzuitute chu miin an tih lungnih loh hunah pawh thungrûl lo va,b nunnêm taka chhânglêt zâwk tûrin a zirtîr a ni.

• “In hmêlmate chu hmangaih zawm zêl ula.” (Matthaia 5:43, 44; Luka 6:27) Isua chuan min hawtute leh dik lo taka min cheibâwltute chungah ngilnei tûrin min zirtîr a. An nungchang ṭha lotec chu kan pawmpui tûr a tihna a ni lo va. Mahse, min hawtute chunga ngilneihna lantîrna hmangin an thinrimna kan ti dai thei a, ngilnei taka min chhâng lêt tûrin kan chêttîr hial thei a ni.

Isua thil tihte leh a la tih tûrte

Isua chuan tharum thawhna chu harsatna chinfel dân dik tak a ni lo tih a zirtîr a—a thu hrilte milin a nung a ni. Man a nih zâna a hnungzuitute zînga pakhatin vênhim a tum khân Isua chuan: “I ngûnhnâm kha a paiah thun rawh, ngûnhnâm hmangtu zawng zawngte chu ngûnhnâma tih boral an ni ang,” tiin a sawi a. (Matthaia 26:52) Isua chuan a hmêlmate a hmangaihna chu amah ti duhdahtute ngaihdamna hmangin leh ṭawngṭaisakna hmangin a lantîr a ni—Luka 23:33, 34; 1 Petera 2:23.

Bible chuan Remna Lal Isua’n tharum thawhna zawng zawng a ti tâwp thuai dâwn tih min tiam a ni. (Isaia 9:6, 7) He hma lam hun phûrawm tak chungchâng hriat belh nân “Indona Tâwp Dân Tûr” tih thuziak chu chhiar rawh.