Met Matou Elos—Sie Me Insemwomwo Nu Sin Met Fwusr
“Aok, in pal nga matu a fiyaea, O God, nik kom som liki yu, nu ke pal se nga fwa fwakak ku lom nu sin fwil se su a fwa tuku, a ku lom nu sin met nu kemwa su a fwa tuku.”—SAM 71:18.
1, 2. Mea met kulansap matou nukewa lun God elos enenu in akilen, a mea kut fwa akuteye ingena?
OASR sie met Kristian elder in an West Africa su oru muteta lal nu sin sie met lili akmusrala su matou tari a el siyuk sel, “Kom fuka?” Brother matou se inge el topuk, “Nga ku in kasrusr, Nga ku in srosro,” el srike in lumala kas lal inge ke el fwak ma inge. “Tusruktu,” el tafwela, “Nga tia ku in soksok.” Met elder sa el kalem ke ma el fwak. ‘Ma se su Nga ku in oru, Nga arlanu lungse in oru, tusruktu ke ma se su Nga tia ku in oru, Nga tia oru.’ Met elder sa su oru muteta inge el oasr ke yea 80 matwe ingena, a el srakna esam oiya mwo lun brother se inge su lungse in aksruksruk a ke oiyen oaru lal.
2 Ke pal se met matou elos orekma fwal nu ke masap lun God, ma inge ku in orala me akkeye mwo nu sin met puspus ke pal loeloes. Paye la, matwe mukena el tia orala lalmetmet a oiya mwo puspus oana oiya mwo lun Kraist. (Ekklisiastis 4:13) Baibel el akkalemye: “Sifwe fiyaea sie tefuro lun mwolana a fwa konoiyukyak inkanek lun sumwosmwos.” (Soakas 16:31) Fwin kom matou tari, ya kom akilen la fuka kas lom a orekma lom ku in sang kasru nu sin met puspus? Loang akmwoye nu ke me srikasrak puspus in Baibel su akkalemye ke inkanek su met matou elos oru in sie me insemwomwo paye nu sin met fwusr.
Lulalfongi Su Me Akkeye nu ke Pal Loeloes
3. Mea oiyen oaru lal Noa el oru nu sin met nukewa su muta ke pal inge?
3 Lulalfongi a oaru lal Noa orala ma lane ku me insemwomwo puspus su srakna liyeyuk nu ke pal inge. Noa el apkuran na in sun yea 600 matwe ke el musai oaku, orani ma orakrak puspus, a sulkakin kas lun God nu sin met tulan puspus lal. (Genesis 7:6; 2 Piter 2:5) Ke sripen sangeng lal nu sin God, Noa, wekunang sou lal, elos moulla liki Sronot lulap sa a elos ekla papa matou a nine matou nu sin met nukewa su moul fwin fwalu ke pal inge. Paye, Noa el moul ke pal se su lusen moul lun metu arlanu loes. Ne oinge, ke el matou tari, Noa el sruokye oaru lal, a ma inge orala me insemwomwo yok sripe puspus. Ke inkanek fuka?
4. Fuka oiyen oaru lal Noa pal nukewa el akinsemwomwoye met kulansap nukewa lun God?
4 Noa el apkurun in yea 800 matwe ke pal se Nimrod el mutamwauk in musaela Tauer lun Babel in akkalemye la el srunga in akos masap lun Jeova in “nekla fwalu.” (Genesis 9:1; 11:1-9) Tusruktu, Noa el tia wi ke orekma in lain lal Nimrod. Ke ma inge, kas lal ku in tia ekyek ke pal se kas lun met lain nukewa inge ikulyukelik. Lulalfongi lal Noa a oiyen oaru lal pal nukewa, liyeyuk tia ke pal se el matou tari mukena a liyeyuk ke lusen moul lal, a kain in oiya inge fwal in etawiyuk sin met kulansap nukewa lun God ke kain in matwe nukewa.—Hibru 11:7.
Me Kasru Yok nu sin Sou
5, 6. (a) Ke pal se Ebream el yea 75 matwe, mea Jeova el sapkin nu sel elan oru? (b) Oiya fuka Ebream el akkalemye nu ke masap lun God?
5 Me kasru yok lun met matou puspus nu ke lulalfongi lun met in sou lalos ku in liyeyuk ke moul lun mokul puspus su sifwen sou ku sruf puspus tokin len la Noa. Ebream el yea 75 ke pal se God el fwak nu sel: “Fwala liki fwal sum, a liki sou lom, a liki loom sin papa tumom, nu sie fwal Nga a fwa fwakak nu sum; a Nga fwa ore kom sie mutanfwal lulap, a Nga fwa akinsemwomwoye kom.”—Genesis 12:1, 2.
6 Srike nunku fwin kom sapkinyuk in som liki loom sum, met kawuk lom, a mutanfwal sum su kom isusla we, a ke oiyen misla lun met puspus ke sou lom in som nu ke sie an su kom tia etu. Ebream el sapkinyuk in oru ma inge. El “som oana Jeova el fwak nu sel,” a ke lusen moul lal nufon, el muta in loom nuknuk oana metsa a sie met su muta in Kenan su fwufwasryesr pal nukewa. (Genesis 12:4; Hibru 11:8, 9) Fwinne Jeova el fwak la Ebream el fwa ekla sie “mutanfwal lulap,” el mise tari ke pal loeloes meet liki tulik natul ekla pus. Sera, mutan kiyel, el oswela nu sel mwen sefwanna, su el Isaak, su sikyak mukena tokin Ebream el muta kitin pal in fwal mwulela ke lusen yea 25. (Genesis 21:2, 5) Ne oinge, Ebream el tia fosrngala a tia folokla nu ke siti se su el tuku ka. Sie me srikasrak na paye ke lulalfongi a mongfusesr!
7. Mea mongfusesr lal Ebream el oru nu sin mwen natul Isaak, a mea fwokin ma inge nu sin metu?
7 Mongfusesr lal Ebream el sang kasru na yok nu sin mwen natul Isaak, su orekmakin moul lal nufon—yea 180—oana metsa su muta in an Kenan. Mongfusesr lal Isaak el fwal nu ke lulalfongi nu ke mwulela lun God, kain in lulalfongi su filiyuki ku akkeyeyuk in el sin papa a nine kiyel su matou tari a tok eis me akkeye ke kas sifwana lun Jeova nu sel. (Genesis 26:2-5) Oiyen oaru pal nukewa lal Isaak el sang kasru yok nu ke akpayeyen mwulela lun Jeova ke sie “fute” su fwa akinsemwomwoye met nukewa fwa tuku ke sou lal Ebream. Tokin foko yea puspus somla, Jisus Kraist, su ip yok ke “fute” sa, el ikasla inkanek nu sin met nukewa su akkalemye lulalfongi lalos nu sel elos in ku in sifwilpa fototo nu sin God a eis moul ma patpat.—Galetia 3:16; Jon 3:16.
8. Fuka Jekob el akkalemye lulalfongi fukoko, a mea fwokin ma inge?
8 Isaak el kasru pa mwen natul su pangpang Jekob in akkeye lulalfongi fukoko su kasrel nu ke na el matou tari. Jekob el yea 97 ke pal se el orek apurak nu sin lipufan se ke fong fon se su orala sie me insemwomwo. (Genesis 32:24-28) Meet liki el mise ke el yea 147, Jekob el akkeyel sifwana in akinsemwomwoye kais sie sin mwen 12 natul. (Genesis 47:28) Kas palu nukewa su el fwakyuk, ke pal inge simusyukla in Genesis 49:1-28, el akpayeyuk a kutu srakpana akpayeyuk.
9. Mea ku in fwak ke me kasru yok su met matou puspus su matou pa in ngun ku in oru nu sin sou lalos?
9 Kalem la, met kulansap puspus lun God su matou tari elos ku in sang kasru mwomwo nu sin met puspus in sou lalos. Masap su oasr ke ma Simusla wekunang kas in kai mwomwo a me srikasrak ke mongfusesr ku in sang me kasru yok in etu fwin sie met fwusr el kapek matou oasr lulalfongi paye lal. (Soakas 22:6) Met matou elos tia enenu in aksrikyela kuiyen me kasru lalos su elos ku in oru nu sin sou lalos.
Me Kasru nu sin Met Lili Puspus
10. Mea “masap lal Josef ke srel,” a mea fwako lun ma inge?
10 Met matou elos ku in sang me kasru mwomwo nu sin met lili puspus. Ke el matou tari, Josef mwen natul Jekob el akkalemye sie orekma in lulalfongi su oasr me kasru yok ka nu sin million puspus sin met su wi ke alu paye su moul tokin len lal. El yea 110 ke pal se “el sang masap ke srel,” su ke pal se met Israel elos som liki an Ijipt, elos fwa wisla sri lal welulos. (Hibru 11:22; Genesis 50:25) Masap sa el akkalemye ke kutupa sripe mwo nu ke me fwinsrak su sikyak tokin Josef el mise nu sin met Israel su ke lusen yea puspus oasr ma upa sikyak oana ke elos met sruo, su sang me akpayeye nu selos la molela lalos e fwa tuku.
11. Me akkeye fuka Moses el oru nu sel Josua?
11 Sie sin met puspus su akkeyeyuk ke me akkalemye lulalfongi lal Josef pa Moses. Ke pal se Moses el yea 80 matwe, el eis sri kel Josef a us ma inge ke elos som liki an Ijipt. (Exodus 13:19) Ke pal sepana inge, el aetuila nu sel Josua, su arlanu fwusr lukel. Ke lusen yea 40 toka, Josua el orekma oana met kulansap lal Moses. (Oekyuk 11:28) El welul Moses nu fwin Eol Sainai a sanel nu ke pal se Moses el oatula liki eolu a us eot tupasrpasr luo ke Masap. (Exodus 24:12-18; 32:15-17) Paye la Moses el sropon kas in kasru mwomwo a etauk mwo nu sel Josua!
12. Fuka Josua el akpayeye la el me akkeye nu ke orekma mwo nu sin met Israel ke lusen moul lal nukewa?
12 Ke sripe inge, Josua el sang pa me akkeye nu sin mutanfwal Israel ke lusen moul lal nukewa. Met Nununku 2:7 el akkalemye nu sesr: “A metu orekma nu sin Jeova in len lal Josua nu kemwa, a in len lun met matu su moul pat lukel, su liye orekma lulap lun Jeova nu kemwa su El oru ke Israel.” Tusruktu, tokin Josua a met matou puspus elos mise, pa inge mutamweyen pal se su oasr ke lusen yea 300 ke met Israel elos tia ku in oru sulela inmasrlon alu paye a alu kikiap, su kol nu ke len lal Samuel met palu.
Samuel El “Oru Ma Sumwosmwos”
13. Mea Samuel el orala in ‘oru ma sumwosmwos’?
13 Baibel el tia akkalemye la Samuel el yea ekasr ke el mise, tusruktu ma sikyak nukewa su simusyukla in Samuel Se Meet oasr ke yea 102, a Samuel el liye apkurun ma nukewa su sikyak inge. In Hibru 11:32, 33, kut rid la met nununku puspus a met palu puspus su sumwosmwos elos “oru ma sumwosmwos.” Aok, Samuel el akkeye kutu sin met su moul in len lal in tia oru orekma koluk. (1 Samuel 7:2-4) Ke inkanek fuka? El oaru nu sin Jeova ke lusen moul nukewa lal. (1 Samuel 12:2-5) El tia sangeng in sang kas in kai upa fwinne nu sin togusra. (1 Samuel 15:16-29) In wekunang, Samuel, su “matou a fiyaea sifwel,” el akpayeye la el me srikasrak mwo ke orekma lal in pre ke met puspus. El fwak mu in “loes liki el . . . in oru ma koluk lain Jeova in tila pre” ke met Israel nukewa wiyel.—1 Samuel 12:2, 23.
14, 15. Fuka met matou ke pal inge elos etawi Samuel ke orekma lalos in pre?
14 Ma inge nukewa akkalemye yok ke sie inkanek yok sripe su met matou elos ku in kafweang in oru in me akkeye mwomwo nu sin met kulansap nukewa lun Jeova. Fwinne elos tia ku in oru ma puspus ke sripen mas ku kutupa oiya, nu selos su matou tari elos ku in pre ke met puspus. Komwos met matou, ya komwos etu la pre lomwos yok sripe a sang ma lane na paye nu ke congregation? Ke sripen lulalfongi lomwos ke sran Kraist su aksuroryeyukla, komwos engankin sie oiya mwomwo ye mutun Jeova, a ke sripen mongfusesr lomwos, lulalfongi lomwos el akkeyeyuk a eis “oiya su srikeyuk tari.” (Jemes 1:3; 1 Piter 1:7, NW) Nikmet mulkunla: “Yok na sripen pre lun met sumwosmwos in orekma la.”—Jemes 5:16.
15 Pre lomwos in siyuk ke kasru nu ke orekma in luti peng mwo a ke akwuk mwo lun congregation el eneneyuk. Kutu sin brother wiyesr elos kalbous in niyen prison ke sripen elos met Kristian oaru su srunga in wi ke kutena u su lain sie sin sie. Kutu selos sun ongoiye ke sripen oasr paka ku kusrusr upa, meun, a me lokwalok inmasrlon met puspus. Oasr kutupa, su oasr ke congregation lasr sifwana, elos sun me srifwe puspus ku me lain. (Mattu 10:35, 36) Elos su kol orekma in sulkakin peng mwo a liaung congregation puspus elos enenu pa pre lomwos kelos pal nukewa. (Efesus 6:18, 19; Kolosse 4:2, 3) Arlanu mwo kom fwin siyuk pa ke met lili puspus ke pre lom, oana Epafras el oru!—Kolosse 4:12.
Luti Fwil se su Fwa Tuku
16, 17. Mea Sam 71:18 el palye, a fuka ma inge akpayeyuk?
16 Asrouki nu sin met oaru puspus su wi ke u lun “u srisrik,” nu selos su oasr fwinsrak lalos in som nu in kosrao, elos sang me akpa mwomwo nu selos su wi ke “sip ngie,” su oasr fwinsrak lalos in muta ma patpat fwin fwalu. (Luk 12:32; Jon 10:16) Ma inge palyeyuk tari in Sam 71:18, su akkalemye kas inge: “Aok, in pal nga matu a fiyaea, O God, nik kom som liki yu, nu ke pal se nga fwa fwakak ku lom nu sin fwil se su a fwa tuku, a ku lom nu sin met nu kemwa su a fwa tuku.” Met akmusrala nukewa elos arlanu lungse in sang akpa nu sin sip ngie nukewa su welulos ke kunokon puspus meet liki elos som lukelos nu in kosrao in welul Jisus.
17 Kalem la, ma Sam 71:18 el akkalemye ke orekma in sang me luti “nu selos su fwa tuku” ku in orekmakinyuk pa nu sin sip ngie, su eis me luti ku masap sin met akmusrala puspus lun God. Jeova el sang kunokon nu sin met matou in orek ma lo kel nu selos su ke pal inge elos sruokye pa ma paye. (Joel 1:2, 3) Sip ngie elos pulakin la elos akinsemwomwoyeyuk ke ma elos lotela sin met akmusrala a elos akkeyeyuk in akkalemye etauk lalos ke ma Simusla nu sin met puspus su lungse in kulansap nu sin Jeova.—Fwakyuk 7:9, 10.
18, 19. (a) Etauk saok fuka met kulansap matou puspus lun Jeova elos ku in akkalemye? (b) Ke mea met Kristian matou elos ku in lulalfongi ka?
18 Met kulansap matou nukewa lun Jeova, met akmusrala nukewa a elos nukewa su wi ke u lun sip ngie, elos kupasr nu ke ma sikyak yok sripe puspus. Kutu sin met matou su liye petsa mukuikui inge “Photo Drama of Creation” elos srakna moul ke pal inge. Kutu met lo matou elos etu brother puspus su oru kolyuk a sisila nu in niyen kalbous in yea 1918. Kutu selos wi ke orekma in broadcast ke radio station lun Watchtower, su pangpang WBBR. Met matou puspus elos ku in srumon ke pal se su oasr case puspus ke oiyen sukosok ke alu lun Met Lo lun Jeova elos kafweang in lainyuk ke court su fulat emeet. Pus selos tu na ku ke ma paye ke pal se elos muta ye kolyuk upa lun gufernment. Aok, met matou elos ku in akkalemye la fuka etauk a kalem ke ma paye el akkalemyeyuk kalem kais kutu srisrik. Baibel el akkeye kut in eis ma lane ke experience mwomwo nukewa inge.—Duteronomi 32:7.
19 Met Kristian matou elos kaifweyuk in akkalemye la elos me srikasrak mwomwo nu sin met fwusr. (Taitus 2:2-4) Saap ke pal inge kom tia liye ke fwako mwo lun mongfusesr lom, pre puspus lom, a kas in kasru lom nu sin met puspus. Noa, Ebream, Josef, Moses, a kutu pa selos su tia ku in etu ke me kasru yok lalos su tuku ke oiyen oaru lalos nu sin fwil nukewa su fwa tuku. Ne oinge, ma simusla ke me srikasrak ke lulalfongi a oiyen oaru lalos su oasr ne ke pal lasr inge oasr me kasru na yok nu sesr; a me srikasrak lomwos ke pal inge oasr kasru na yok nu sin met fwusr.
20. Me insemwomwo puspus fuka sanoeyuk nu sin met nukewa su sruokye ku fwinsrak lalos nu ke safla?
20 Kom fwin moliyukla liki “ongoiye lulap” ku kom fwin sifwil akmoulyeyuk, oasr sie me insemwomwo na paye in pulakin ke “moul paye”! (Mattu 24:21; 1 Timote 6:19) Nunku ke lusen pal se su Sie Tausan Yea Kolyuk lun Kraist ke Jeova el fwa akwanginyela ma upa nukewa su tuku ke oiyen matou. Kut fwa tia sifwil pulakin me munas upa ke manosr, a kut fwa ngetalik ke kais sie len a pulakin la oasr ekla lulap ke mano—fukokola, muta mwo tila losr, insrasr ku in long mwo, a atesr mwo liki meeta! (Job 33:25; Isaia 35:5, 6) Nu selos nukewa su akinsemwomwoyeyuk in moulla nu ke fwal sasu lun God elos fwa oana met fwusr pal nukewa ke sripen elos fwa moul ke lusen pal loeloes nu tok ma patpat. (Isaia 65:22) Ke ma inge, lela kut nukewa in sruokye ku fwinsrak lasr nu ke safla a tafwela in kulansap nu sin Jeova ke moul lasr kewa. Kut ku in lulalfongi la Jeova el fwa akpayeye ma nukewa su ke mwulela a ma el fwa oru fwa mwo liki kutena ma kut nunku ka.—Sam 37:4; 145:16.
Kom E Topuk Fuka?
• Fuka oiyen oaru lal Noa su matou tari el orala me insemwomwo nu sin met nukewa?
• Mea lulalfongi lun met patriarch ku sifwen sou puspus in pal meeta el oru nu sin tulik puspus natulos?
• Ke elos matou tari, fuka Josef, Moses, Josua, a Samuel elos akkeye met puspus su alu pa nu sin God?
• Me sang ku me usru fuka met matou elos ku in sang nu sin met fwusr?
[Picture on page 17]
Oasr me kasru yok nu ke mongfusesr lal Ebream nu sel Isaak
[Picture on page 18]
Kas in kasru lal Moses su met matou elos akkeyel Josua
[Picture on page 19]
Pre lom ke met puspus elos ku in orala ma mwomwo puspus
[Picture on page 20]
Met fwusr elos ku in eis ma lane puspus ke elos long ke met matou puspus su oaru