Jeova El Nunku A Karungin Met Kulansap Matou Nukewa Lal

“Tu God el tia sesumwos in mwulkunla orekma lomwos, a lungse su komwos fwakak nu ke el.”​—HIBRU 6:10.

1, 2. (a) In liye met fiyeye aunsifwe el ku in akesmakinye kom nu ke mea? (b) Mea nunak lun Jeova nu sin met Kristian matou?

KE PAL se kom liye met matou puspus ke congregation su fiyeye tari aunsifwelos, ya kom ku in esamak ke ma simusla in buk lal Daniel? Ke sie aruruma su Jeova God el sang nu sel Daniel, el akkalemyel sifwana oana sie met matou su fiyeye tari. Daniel el simusla: “Nga liye nu ke pal tronu filiyuki, a sie su muta omeet me muta fwe. Nuknuk lal fwasrfwasr oana sno, a aunsifwel oana unen sip nasnas.”​—Daniel 7:9.

² Kain in nuknuk fwasrfwasr inge el nasnas a tun ka fwasrfwasr pal nukewa. Ke ma inge, aunsif fwasrfwasr a mwal inge el “Sie Su Muta Omeet Me” el akkalemye nu ke oiyen matou a lalmetmet yok lun God. Ke sripe se inge, mea nunak lun Jeova, su Muta Omeet Me, nu sin met matou mokul a mutan su oaru nu sel? Kas lun God el akkalemye la “sifwe fiyaea sie tefuro lun mwolana, a fwa konoiyukyak inkanek lun sumwosmwos.” (Soakas 16:31) Aok, fwin sie met Kristian el fwasrfwasrla tari aunsifwel, kain in oiya nu ke matou inge el kato ye mutun God. Ya kom akkalemye pa nunak lun Jeova inge ke met lili wiyesr su matou tari?

Efu Ku Elos Aksaokyeyuk Na Paye?

3. Efu ku kut aksaokye met matou wiyesr?

³ In masrlon met kulansap puspus lun God su matou tari elos wi pa ke Governing Body lun Met Lo lun Jeova, met fwufwasryesr puspus in pal meeta a in pal inge, met pioneer su moniyuk, a met orekma puspus lun Togusrai su matu in ngun​—met lili mokul a mutan su kulansap ke congregation lasr ke oaru. Saap kom etu ke kutu pa met su luti peng mwo ke moniyuk ke lusen yea puspus a me srikasrak mwo lalos sang kasru in akkeye met fwusr puspus a aksumwosye moul lalos. Kutu sin met matou wiyesr oasr kunokon yok lalos a elos muteng ke me kalyai ke sripen peng mwo. Jeova a “met kulansap oaru a lalmetmet” elos aksaokye na paye orekma in kasru lalos nukewa ke Togusrai in pal somla a in pal inge.​—Mattu 24:45.

4. Efu ku kut enenu in akkalemye sunak nu sin met Kristian matou a pre kelos?

⁴ Kain in met matou oaru inge elos fwal in eis kaksak a sunak sin met kulansap puspus saye lun Jeova God. Aok, Masap lun God su etukyang nu sel Moses oasr kupasr nu ka ke oiyen kulang a sunak nu sin met matou a in sangeng sin Jeova. (Livitikus 19:32) Kut enenu in pre pal nukewa ke met matou oaru inge nukewa a sang kulo nu sin God ke orekma lalos ke lungse. Met sap Poul el pre ke met fwusr a met matou su welul in orekma.​—Rid 1 Tessalonika 1:2, 3.

5. Me insemwomwo fuka kut ku in eis kut fwin asrouki nu sin met kulansap matou lun Jeova?

⁵ Sayen ma inge, met nukewa ke congregation ku in eis me insemwomwo su tuku ke asrouki nu sin met Kristian matou. Ke inkanek in lutlut, tuni, experience, lun met kulansap oaru puspus lun Jeova su matou elos eis etauk mwomwo inge. Elos lotela in akkalemye mongfusesr a pakoten nu sin met, a ke elos luti ma inge nu sin fwil toko ma inge oru elos in insemwomwo yok a engun. (Sam 71:18) Met fwusr, komwos kafweang in eis lalmetmet a eis ma lane yok ke sropon etauk inge in oana ke kom ut kof ke sie luf in kof.​—Soakas 20:5.

6. Kom ku in akkalemye fuka nu sin met matou puspus la kom aksaokyelos na paye?

⁶ Ya kom akkalemye nu sin met matou la kom aksaokyelos oana Jeova el oru nu selos? Sie inkanek kom ku in oru ma inge nu ka pa ke kom akkalemye nu selos la kom lungselos ke sripen oaru lalos a kom aksaokye na paye nunak lalos. Sayen ma inge, kom fwin orekmakin kas in kasru lalos su elos fwak nu sum, kom akkalemye la oiyen sunak su kom akkalemye nu selos el arulana paye. Met Kristian puspus su matu kutu elos ku in esamak ke kas in kasru mwomwo su elos eis sin met lili puspus su oaru a matou tari a ke elos orekmakin kas in kasru mwomwo inge nu ke moul lalos elos eis me insemwomwo yok ka.a

Akkalemye Kulang Yok Ke Inkanek Mwo Puspus

7. Nu sin su Jeova el sang kunokon in karungin met matou puspus?

⁷ God el sang kunokon nu sin met puspus ke sou lun met matou nukewa in sang ma enenu lalos. (Ridi 1 Timote 5:4, 8.) Jeova el insemwomwo fwin sou puspus elos akpayeye kunokon lalos nu sin sou lalos su matou tari a ke inkanek inge elos akkalemye la elos lungse in karungin met matou puspus oana el oru. God el sang kasru nu sin sou puspus inge a akinsemwomwoyelos ke kafweang lalos a lungse su elos akkalemye nu selos.b

8. Efu ku met nukewa ke congregation elos enenu in akkalemye nunak mwo a pakoten nu sin met Kristian nukewa su matou tari?

⁸ Ke inkanek oinge, Jeova el insemwomwo pa fwin met nukewa ke congregation elos sang kasru nu sin met lili su matou tari su oasr ma enenu yok lalos tusruktu wangin met in sou lalos su wi ke lulalfongi ku kutupa met su lungse in karunginelos. (1 Timote 5:3, 5, 9, 10) Fwin oinge, met nukewa ke congregation elos enenu in akkalemye ‘pakoten nu sin sie sin sie, a lungse oana met lili’ nu sin met matou puspus. (1 Piter 3:8) Nunak mwomwo lalos nu sin met matou ke congregation el pupulyukkinyuk sel Poul ke pal se el akkalemye la fwin sie laan monin met el keok “laa nukewa wi keok.” (1 Korint 12:26) Orekma lasr in sang kasru mwomwo a akkalemye pakoten nu sin met matou nukewa el akkalemye akwuk mwomwo su oasr ke kas in kasru lal Poul inge: “Komwos in wis me toasr lun sie sin sie, a oinge komwos fwa akpayeye masap lun Kraist.”​—Galetia 6:2.

9. Kain in me aktoasr fuka ke oiyen matou ku in sikyak nu sin sie met?

⁹ Kain in me aktoasr fuka met matou elos wis? Pus selos sa in ulle ku totola. Elos pulakin la elos tila pa ku in oru kain in orekma fusrasr su​—oana ke elos som nu yurin doctor, in moli sarom ku som nu ke post office in liye a eis leta lalos, aknasnasye loomu, a in akola a orala mongo. Elos tila engankin emman mongo yuyu ku me nim mwomwo nimelos ke sripen matou lalos, elos nunku mu elos tia enenu in mongo ku nim oana ma eneneyuk su fwal nu selos. Kain in oiya inge ku in sikyak pa ke akwuk lalos in lutlutkin Baibel a elos tia ku in wi pal nukewa ke meeting. Mutalos okla tari a srelos selongkasla su paenang in upala nu selos in rid a long ke pal in meeting nukewa, a ku in upa pa nu selos in akola nu ke meeting nukewa, a ma inge ku in orelos in arulanu totola. Ke ma inge, mea met lili saye ke congregation elos ku in oru nu sin met matou nukewa inge?

Kom Ku In Kasrelos Fuka

10. Mea met elder elos ku in oru in akpayeye la met matou nukewa elos eis me kasru su eneneyuk nu selos?

¹⁰ Ke congregation puspus, met matou elos karunginyuk a kasreyuk ke sie inkanek mwomwo. Met lili puspus elos kasrelos in som nu ke sto in moli ma enenu lalos, orek mongo nelos, a aknasnasye loom selos. Elos sang kasru nu sin met matou in oru lutlut lalos, in akola nu ke meeting, a in wi pal nukewa ke orekma in luti peng mwo. Met Lo puspus su srakna fwusr elos welulos a kasrelos ke me kasrusr. Fwin sie met matou el tia ku in som liki loom sel, elos orala akwuk tu elos ku in long ke program ke telefon, ku oasr sie met lili su recordiya ma srumonyuk ke meeting a akkalemye nu selos. Pal nukewa fwin ku, met elder elos akpayeye la oasr akwuk mwomwo su orek in akfwalye ma enenu lun met matou nukewa ke congregation.c

11. Akkalemye la fuka sie sou elos sang kasru nu sin sie brother su matou tari.

¹¹ Kais sie met Kristian elos ku in akkalemye pa ke oiyen kulang a oiya su lungse in sang ma enenu nu sin met lili. Tokin mutan kiyen sie brother su matou tari el mise, el tia ku in moli rent lun loom su tuku ke pension lun mutan kiyel. El a mutan kiyel elos oru lutlut lun Baibel nu sin sie sou​—nu sin papa, nine, a tulik mutan fwusr luo natulos—​su oasr loom lulap selos. Elos sang nu sel infwokil luo tu elan ku in muta ka. Ke lusen yea 15, elos tukeni mongo, tukeni israsr insemwomwo, a elos akkalemye lungse lun met lili nu sel. Met fwusr inge elos akinsemwomwoyeyuk yok ke elos lotela ma puspus ke lulalfongi lal a experisence yok lal, a el eis me akkeye yok ke asrouki mwomwo nu selos. Brother se inge su matou tari el muta yurolos nu ke pal se el mise ke el yea 89. Sou se inge elos sang kulo nu sin God ke me insemwomwo puspus su elos eis ke elos asrouki nu sel. ‘Me mol lalos tia tula’ lukelos ke elos sang kasru nu sin sie met tuma lutlut lun Jisus Kraist.​—Mattu 10:42.d

12. Mea kom ku in oru in akkalemye la kom nunku a kom lungse in sang kasru nu sin met lili nukewa su matou tari?

¹² Saap wangin pal mwomwo lom in sang kasru nu sin sie met lili su matou tari oana sou se inge elos oru, tusruktu kom ku in sang kasru nu sin met matou elos in ku in wi ke meeting nukewa a in wi ke orekma in sulkakin peng mwo. Kom ku in solelos nu in loom sum a in wi kom in som nu ke sie an in muteta. Kom ku in muteta yurolos, yokna fwin elos mas a tia ku in som liki loom selos. Sayen ma inge kom ku a kom enenu in akkalemye sunak a oiya mwomwo nu selos oana met matou su fukoko lulalfongi lalos. Met Kristian matou su srakna mwo nunak lalos fwal in wi ke kutena akwuk in orala sulela mwomwo su ku in kasrelos. Fwinne elos su munasla tari ke nunak lalos a mulyela la tari elos ku in pula fwin met puspus saye elos akkalemye sunak a oiya mwomwo nu selos.

Jeova el Fwa Tia Mwulkunla Orekma Mwo Lom

13. Efu ku arulana yok sripe in akkalemye nunak mwomwo nu ke pulakin lun met Kristian puspus su matou tari?

¹³ Arulana yok sripe in akkalemye nunak mwomwo nu ke pulakin lun met matou nukewa. Ke pal puspus met matou elos ku in pulakin toasr ku asor yok ke sripen elos tia ku in oru ma nukewa oana ma elos ku in oru ke pal se elos srakna fwusr kutu a oasr mano fukoko lalos. Ke sie me pupulyuk, oasr sie sister su moniyuk in kulansap nu sin Jeova ke lusen yea 50 kutu oana sie regular pioneer el sun mas upa su oru elan munasla kais kutu srisrik a ke sripe inge arulana upa nu sel in wi ke meeting nukewa. Fwin el srike nu ke ma el ku in oru nu ke orekma in luti lal in pal somla a ma el ku in oru ke pal inge, el mutamwauk in tung. El keyak nu lung, a el fwak kas inge ke el tung, “Nga pulakin mu orekma luk inge el wanginla sripe.”

14. Me akkeye fuka met matou nukewa su kulansap nu sin Jeova elos ku in eis ke ma simusla in sam?

¹⁴ Fwin kom sie met su matou tari, ya kom pulakin pa kain in pulakin tia mwo inge? Ku oasr pal kom pulakin mu Jeova el som liki kom a tia kasre kom? Met sim lun sam el pula pa kain in oiya inge ke el matou tari, meyen el siyuk sin Jeova: “Nik kom sisyula in pal nga matou; nik kom filiyuwi ke nga munasla. . . . In pal nga matou a fiyaea, O God, nik kom som liki yu.” (Sam 71:9, 18) Aok, Jeova el tia na som liki met sim lun sam inge, a El fwa tia na som liki kom. Ke sie pa fus in sam, Devid el akkalemye lulalfongi lal ke me kasru lun God. (Ridi Sam 68:19.) Kom ku in lulalfongi la fwin kom sie met Kristian su matou tari, Jeova el fwa wi kom a fwa kasre kom len nu len.

15. Mea ku in kasru met matou elos in sruokye nunak mwomwo lalos in tia asor?

¹⁵ Komwos Met Lo lun Jeova nukewa su matou tari, ma nukewa su komwos oru in pal somla a ke pal inge in sang mwolanu a kaksak nu sin God el tia ku in mwulkinyukla. “Tu God el tia sesumwos in mwulkunla orekma lomwos, a lungse su komwos fwakak nu ke El,” Baibel el akkalemye. (Hibru 6:10) Ke ma inge, nikmet nunku ke ma tia mwo, mu ke sripen komwos matou tari, wanginla sripomwos nu sin Jeova. Komwos sisla kain in nunak tia mwo inge su ku in akmunasye komwos a kafweang in nunku ke ma mwomwo su ku in akkeye komwos. Engankin me insemwomwo puspus su oasr yurom a ke fwinsrak lom nu ke pal fwasru! Oasr pal fwasru a “fwinsrak” mwomwo lasr​—ma se su fwa mwo emeet—​a God su orekutla el mwulela ke ma inge. (Jeremaia 29:11, 12; Orekma 17:31; 1 Timote 6:19) Nunku yok ke fwinsrak lom, kafweang in nunku mu kom srakna fwusr ke insiom a nunak lom, a nunku pal nukewa la oasr me akkeye yok lun kafweang lom in wi ke congregation!e

16. Efu ku sie met elder el nunku mu el enenu in fuleak kunokon lal, tusruktu met elder puspus elos akkeyel fuka?

¹⁶ Nunku kel Johan, su yea 80 matwe el karungin mutan kiyel su oaru nu sin God a ke pal inge mutan kiyel el pa Sannie el munasla a sekapasla.f Oasr sister puspus su kasrel a kais sie selos oasr pal in muta yurol Sannie in karungunul in akmwesasyel Johan elan ku in wi ke meeting a orekma lun forfor. Tusruktu, ke kutu pal somla, Johan el pulakin mu el totola na paye a el nunku mu el enenu in fuleak kunokon lal oana met elder ke congregation. “Me mea ngan kulansap ke congregation oana sie met elder?” el siyuk ma inge ke el tung. “Nga tila akpayeye kunokon mwomwo ke congregation.” Met elder nukewa ke congregation elos fwak nu sel la experience a sulela mwomwo lal el arulana saok. Elos kaifwel elan tafwela in kulansap oana sie met elder, fwinne srikla ma el ku in oru ke pal inge a tia oana in pal somla. Ke sripen el eis me akkeye yok, Johan el tafwela in kulansap oana sie met elder, a el me akkeye yok nu ke congregation.

Jeova el Nunku Keim a Lungse in Karungin Kom

17. Mwulela mwomwo fuka Baibel el akkalemye nu sin met Kristian nukewa su matou tari?

¹⁷ Ma simusla el akkalemye kalem la met matou elos ku in tafwela in isus fwako ke orekma in kulansap lalos nu sin Jeova fwinne elos sun ma upa puspus ke sripen matou. Met sim lun sam el fwak: “Elos su eoki in loom sin Jeova . . . fwa ouyepa isus fwako ke elos matou; elos fwa sesesla ke sroninsak, a fwa folfol.” (Sam 92:13, 14) Met sap Poul, su sun pa mas upa ke mano, ‘el tia fuleak ku mulalla, fwinne manol munasla.’​—Ridi 2 Korint 4:16-18.

18. Efu ku met lili wiyesr su matou tari a met su karunginelos enenu me kasru lun met lili nukewa ke congregation?

¹⁸ Me srikasrak puspus ke pal inge sang me akpayeye la met Kristian matou elos ku in “isus fwako ke elos matou.” Tusruktu ma upa puspus su tuku ke mas upa a oiyen matou oru met matou elos in fosrnga ku sangeng, fwinne oasr sou lalos su karunginelos a kasrelos pal nukewa. Met su karunginelos ku in pulakin ulle ku totola. Ke ma inge oasr kunokon lun met nukewa ke congregation in akkalemye lungse lalos nu sin met matou nukewa a nu sin met in sou lalos su karunginelos. (Galetia 6:10) Kain in orekma inge akkalemye la kut tia oana met su fwak nu sin met inge in som ke inkanek misla a “fwusfwus a kup” tusruktu tia sang me enenu lalos in kasrelos.​—Jemes 2:15-17.

19. Efu ku met Kristian nukewa su matou tari elos ku in ngetla nu ke pal fwasru wi lulalfongi?

¹⁹ Oiyen matou el ku in oru sie met Kristian in munasla ke orekma in kulansap, tusruktu lungse lun Jeova nu sin met kulansap lal su matou tari el tia ku in aksrikyeyukla ku munasla. Met kulansap oaru nukewa inge elos saok na paye ye mutal, a el fwa tia som lukelos pal nukewa. (Sam 37:28; Isaia 46:4) Jeova el fwa sang ma enenu lalos a kololos ke elos matou.​—Sam 48:14.

[Footnotes]

Kom E Topuk Fuka?

• Efu ku kom nunku ke met Kristian nukewa su matou tari la elos saok na paye?

• Kut ku in akkalemye fuka nunak mwomwo nu sin met lili wiyesr nukewa su matou tari?

• Mea ku in kasru met kulansap lun Jeova su matou tari in oasr nunak mwomwo a tia asor?

[Pictures on page 22]

Met nukewa ke congregation elos aksaokye met matou nukewa ke congregation