Kas lun Jeova el Moul

Kas Fulat Su Tuku Ke Buk Aktolu a Akakosr lun Sam

IN ORU sie pre nu sin God, met sim lun Sam el siyuk: “Ya lungkulang lom fwa fwakyuk in luf lun met mise, ku oaru Lom in an kunausten?” (Sam 88:11) Paye la, me top nu ke kusensiyuk inge pa, mo. Meyen fwin wangin moul, kut tia ku in kaksakin Jeova. Orekma in kaksakin Jeova el sie sripe mwomwo nu sesr ke moul lasr, a ke sripen kut moulkin ma inge enenu in mokle kut in kaksakinul.

Buk Aktolu a Akakosr lun Sam, mutamwauk ke Sam 73 nu ke 106, el use nu sesr sripe mwomwo puspus in kaksakin Met Orala ma nukemwa a in akinsemwomwoyel. In nunku ke sam puspus inge ku in akyokye kulo lasr nu ke “kas lun God” a mokle kut in akyokye a akmwoye orekma lasr in kaksakinul. (Hibru 4:12) Lela kut in akkalemye insemwomwo lasr, ke kut loang mwo nu ke Buk Aktolu lun Sam.

“MWO NU SIK IN KALUKYUNG NU SIN GOD”

(Sam 73:1–89:52)

Sam 11 pa emeet ke sam aktolu su orekla sin Asaph ku sin met in loom sel Asaph. On in mutamwauk ka el sang aketeye la mea sang molella Asaph liki me akkoluk lun nunak koluk lal. El orala sie sulela mwomwo. El on: “A mwo nu sik in kalukyang nu sin God.” (Sam 73:28) Oasr soko on in eoksra ke kunanela lun an Jerusalem su akkalemyeyuk in Sam 74. Sam 75, 76, a 77 akkalemye kel Jeova oana sie Met Nununku sumwos, Met Molela lun met pusisel, a Met Long pre. Sam 78 el kalweni me sramsram ke Met Israel elos mutamwauk in len lal Moses nu ke len lal Devid. Sam ak 79 el on in eoksra soko nu ke kunanula lun temple. Sam ak 80 el pre soko nu ke sifwil folokla lun met kulansap lun God. Sam 81 el kas in akkeye in akos Jeova. Sam 82 a 83 el pre in siyuk God in oru nununku lal nu sin met nununku koluk puspus a nu sin met lokwalok puspus lun God.

“Ngunik asor, aok, mulalla ke kalkal lun Jeova,” kas inge akkalemyeyuk ke on soko lun tulik puspus natul Kora. (Sam 84:2) Sam 85 el akkalemye me siyuk nu ke me insemwomwo lun God nu sin met puspus su folokla liki sruo lalos in an saye. Sam inge el akkalemye yok ke me insemwomwo lun ngun su yok sripe liki me insemwomwo nukemwa lun ikwe. In Sam 86, Devid el siyuk sin God in karunganul a lotel. Sam 87, el on soko ke an Saion wikin met nukemwa su isusla we, a tokin ma inge oasr pre soko orek nu sin Jeova su akkalemyeyuk in Sam 88. Lung-kulang lun Jeova su oasr ke mwuleang lal Devid el akkalemyeyuk yok in Sam 89, on soko inge orekla sel Ethan, saap mokul se inge el sie sin mokul lalmetmet in len lal Solomon.​—1 Togusra 4:31.

Kusensiyuk Puspus Ke Ma Simusla Eis Top Ka:

73:9​—Ke inkanek fuka met koluk elos “filiye oalulos in kosrao, a loalos fwufwasryesr in fwalu”? Ke sripen met koluk elos tia sunakin kutena met in kosrao ku fwin fwalu, paenang elos kaskaskou ke God ke oalulos. Elos akkolukye pa met puspus ke kaskas koluk lun loalos.

74:13, 14​—Nge pal se Jeova el ‘foglelik sifwen dragon in kofu a fogulye sifwen livaiatan’? “Fero, togusra lun an Ijipt,” el pangpang “dragon lulap se su on in masrlon infwal lal.” (Ezikiel 29:3) Livaiatan el ku in lumeyuk nu sin “met ku puspus lal Fero.” (Sam 74:14, footnote, NW) Orekma in fukulye sifwelos el sramsramkinyuk nu ke kunausyukla lal Fero a met meun nukemwa lal ke pal se Jeova el molela met Israel liki sruo lalos yurin met Ijipt.

75:4, 5, 10​—Mea kalmen kas se inge “ko”? Ko lukwe ke kosro soko el lumeyuk nu ke kofwen me meun fukoko. Ke ma inge, kas se inge “ko” ke kas pupulyuk el lumeyuk nu ke ku, ku fukokoiyen sie ma. Jeova el tulokunak ko lun met kulansap lal, oralos in akfulatyeyuk, tusruktu el ‘pakela ko lun met koluk.’ Kas in sensen pa inge nu sesr in tia ‘akfulatye ko lasr nu lung’ ku kut tia enenu in akkalemye oiya lun fulang ku insefulat. Ke sripen Jeova el pa oru orekma in akfulat, paenang kunokon nukemwa ke congregation enenu in liyeyuk oana ma mwomwo puspus su tuku sel me.​—Sam 75:7.

76:10​—Fuka “mulat lun met” ku in kaksakin Jeova? Ke pal puspus su Jeova el lela met puspus in akkalemye mulat ku kasrkusrak lalos in lain kut meyen kut met kulansap lal, oasr ma mwomwo ku in sikyak tok. Kutena ma upa su kut ku in sun ku in oru me akpa nu sesr ke kutu oiya. Jeova el lela me keok in sun kut fwin kut ku in muteng a fwin ma inge oru me akpa nu sesr. (1 Piter 5:10) ‘God fwa loskomi in ma lula lun mulat’ lun met. Fuka kut fwin keok ne ke kut mise? Ma inge ku in kaksakinyuk pa sin Jeova meyen elos nukemwa su liye kut la kut oaru in muteng elos ku in mutamwauk pa in kaksakin God.

78:24, 25​—Efu ku manna el pangpang “korn in kosrao” a “bread lun met ku, [bread nen lipufon, footnote, NW]”? Pulo kas luo inge tia akkalemye la manna el me mongo nen lipufon. Ma inge el pangpang “korn in kosrao” meyen ma inge tuku lung me. (Sam 105:40) Ke sripen lipufon puspus, ku “met ku puspus,” elos muta in kosrao, paenang kalmeyen kas inge “bread nen lipufon puspus” akkalemyeyuk ke sripen God pa sang ma inge, el su muta in kosrao. (Sam 11:4) Ku pa Jeova el an orekmakin lipufon puspus in sang manna nu sin met Israel.

82:1, 6​—Su pangonyuk inge “god puspus” a “mwen puspus nutin El su Fulatlanu”? Kas luo inge sramsramkin ke met nununku nukemwa lun met Israel. Ma inge fwal, meyen elos oru orekma oana met kaskas a met tutafpo lun God.​—Jon 10:33-36.

83:2​—Mea kalmen in ‘kekakunak sifwelos’? Kas inge akkalemye la sie met el akola in orekmakin ku lal ku in oru orekma, ke pal puspus in lain, in anwuk, ku in aksangengye ku akkolukye kutu met.

Me Lutlut Nu Sesr:

73:2-5, 18-20, 25, 28. Kut tia enenu in sok ke met koluk elos kapkapek ku eis me insemwomwo puspus a etawi inkanek koluk lalos. In oana ke kas pupulyuk met koluk elos fwasr ke an musresre. Paye elos fwa “sisila nu ke kunausten.” Sayen ma inge, ke sripen ma koluk su tia ku in akwanginyeyukla ye koko lun met sesumwos, paenang orekma lasr in srike akwanginyela ma koluk el wangin sripe. In oana Asaph, kut fwin muteng ke ma koluk kut lalmetmet ke kut “kalukyang nu yurin God” a insemwomwokin futoto mwomwo lasr nu Sel.

73:3, 6, 8, 27. Kut enenu in karungin kut liki oiyen konkun, inse fulat, kaskas koluk, a orekma kikiap nukemwa. Kut enenu in fwasr liki oiya inge fwinne orekmakinyen oiya koluk inge oasr me insemwomwo ka.

73:15-17. Fwin oasr pal kut fosek, kut tia enenu in akkalemye me fosrnga lasr nu sin met puspus. In srumon “me sramsram inge” nu sin kutu met ku in akmunasyelos. Kut enenu in muta misla a nunku ke me fosrnga lasr a kaifweang in aksumwosye ma inge yurin met lili wiyesr.​—Soakas 18:1.

73:21-24. Fwin oasr pulakinyen ‘toasr lun inse’ ke sripen ma mwomwo su sikyak nu sin met koluk ma inge ku in pupulyukinyuk nu ke oiyen orekma lun kosro nukemwa su wangin ku lalos in orekmakin nunak mwomwo. Oiya se inge fwin wangin orekmakinyen nunak mwomwo el lumeyuk mukena in fwal nu ke pulakin ku nunak. Kut tia enenu in oru oinge, a kut enenu in kolyuk sin Jeova a kas in kai lal, akkalemye lulalfongi yok la el fwa ‘sruokye lepausr leyot’ a el fwa kasre kut. Sayen ma inge, Jeova el ‘fwa eis kut nu ke mwolena,’ su kalme pa, el fwa kasre kut in oasr futoto mwomwo nu sel.

77:6. In akkalemye nunak mwo a in eis ma paye nukemwa lun ngun a in suk ma inge nukemwa kut enenu in orekmakin pal yok in oru lutlut a sifwilpa nunku ka. Arulanu yok sripe kut in orekmakin pal tu kut fwa ku in sifwana muta misla in lutlut a sifwilpa nunku ke ma kut lotela tari.

79:9. Jeova el long pre lasr, yokna fwin kut pre ke orekma in akmutalye inel.

81:13, 16. In long pusren Jeova a in fwasr ke inkanek lal ku in kol nu ke me insemwomwo yok.​—Soakas 10:22.

82:2, 5. Orekma sesumwos nukemwa oru “foundeson nukemwa lun fwalu” in mukuikui. Orekma sesumwos nukemwa akkolukye akwuk nu kemwa lun metu.

84:1-4, 10-12. Oiya lun met sim puspus lun sam ke elos aksaokye an se su orekma in alu lun Jeova orek we a ke pulakin lalos in engankin kunokon nukemwa lalos akkalemye me srikasrak mwo nu sesr.

86:5. Kut arulanu insemwomwo meyen Jeova el “lungsum in nunak munas”! El suk kutena me akpayeye su fwa akkeyel in akkalemye nunak munas nu sin sie met su orala ma koluk a auliyuk ke paye.

87:5, 6. Ya met nukemwa su fwa eis moul fwin fwalu elos etu inen met nukemwa su fwa akmoulyeyukyak in eis moul in kosrao? Fus se inge akkalemye la pa inge oiya se su ku in sikyak.

88:13, 14. Kut fwin pre a patla in eis me top nu ke ma upa lasr, ma inge ku in sikyak ke sripen Jeova el lungse kut in akkalemye oiya paye lasr nu ke lulalfongi lasr nu sel.

“SANG KULO NU SEL A KAKSAKIN EL”

(Sam 90:1–106:48)

Loang akmwoye nu ke sripe puspus su eneneyuk nu ke akfulatyeyen Jeova su simusyukla in buk akakosr lun sam. In Sam 90, Moses el simusla ma tia oana sie su oasr inmasrlon “Togusra Ma patpat” a moul lun met su arulanu fototo. (1 Timote 1:17) In fwal nu ke Sam 91:2, Moses el sramsramkin Jeova oana ‘me loeyuk lal a me seng lal’​—Sropon misla lal. Ke Sam puspus tok el sramsramkin ke oiya mwomwo, nunak mwolena, a orekma sakuruk puspus lun God. Oasr on tolkoe su mutamwauk ke kas inge “Jeova el Togusra.” (Sam 93:1; 97:1; 99:1) In sramsramkin Jeova oana met Orekutla, met sim lun sam el suli kut in ‘sang kulo nu sel, a kaksakin el.”​—Sam 100:4.

Fuka sie met kol su sangeng sin Jeova el oru orekma lal? Sam 101, orekla sel Togusra Devid, el sang me top. Sam 102 el akkalemye nu sesr la Jeova el “fwa lipsre pre lun met enenu, a tia pilesru pre lalos.” (Sam 102:17) Sam ak 103 el akkalemye yok ke oiya mwo lun Jeova ke lung-kulang a pakoten lal. Met sim lun sam el sramsramkin ma puspus su God el orala fwin fwalu, el fwak: “O Jeova, pukantenlanu orekma Lom! In lalmetmet Kom orala nu kemwa.” (Sam 104:24) On safla lukwe ke Buk Akakosr el kaksakin Jeova ke orekma mwolena a sakuruk nukemwa lal.​—Sam 105:2, 5; 106:7, 22.

Kusensiyuk Puspus Ke Ma Simusla Eis Top Ka:

91:1, 2​—Mea se inge “an in lukma sin El su Fulatlannu,” a fuka kut ku in “muta” we? An se inge el pupulyukkin nu ke misla a oiya mwomwo su wangin me akkoluk nu ka​—sie oiya su fwa oasr me karungin nu ka in tia akkolukyeyuk nu ke ma lun ngun. An se inge an lukma se meyen met nukemwa su wangin lulalfongi lalos nu sin God elos tia ku in etu ke an se inge. Kut oru Jeova oana an in muta lasr ke kut ngetak nu sel oana me loeyuk lasr a me seng lasr, ke inkanek in kaksakinul oana Met Kol Fulatlanu in kosrao a fwalu, a ke inkanek in orekma in sulkakin peng mwo lun Togusrai. Kut engankin misla meyen kut etu la Jeova el akola pal nukemwa in kasre kut.​—Sam 90:1.

92:12​—Ke inkanek fuka met sumwosmwos elos “kapkapek oana sak pam”? Sak pam el eteyuk ke fwako pukanten el fwokla ke yea nukemwa. Sie met sumwosmwos el oana soko sak pam su oasr oiya sumwosmwos la ye mutun Jeova a isus “fwako mwomwo” pal nukemwa wekunang orekma mwo nukemwa.​—Mattu 7:17-20.

Me Lutlut Nu Sesr:

90:7, 8, 13, 14. Orekma koluk lasr pal nukemwa el kunausla futoto lasr nu sin God paye. A ma koluk orek in lukma tia ku in mwukunyukla ye mutal. Tusruktu, kut fwin akkalemye auliyuk paye a forla liki inkanek koluk nukemwa lasr, Jeova el fwa sifwilpa akkalemye insemwomwo lal nu sesr, ‘el akkalemye lung-kulang nu sesr.’

90:10, 12. Ke sripen lusen moul el fototo, kut enenu in “oekla len lasr.” Ke inkanek fuka? Ke el ase “sie inse lalmetmet,’ kut ku in orekmakin lalmetmet in kasre kut in tia aklusrongtenye kutena len lula lasr, a kut in orekmakin ma inge ke sie inkanek su ku in akinsemwomwoye Jeova. Oasr ma eneneyuk sesr in orala nu ke akwuk mwomwo in oru ma lun ngun meet a orekmakin pal lasr ke inkanek sumwos a lalmetmet.​—Efesus 5:15, 16; Filippai 1:10.

90:17. Arulanu fwal kut in pre nu sin Jeova el an “oakiye ku . . . orekma lun pausr” a in akinsemwomwoye kaifweang lasr ke orekma lun forfor.

92:14, 15. Met matu nukemwa elos ku in tafwela in “isus fwako ke elos matoa, sesesla ke sroninsak a folfol”​—ku ke ma lun ngun—​a me srikasrak mwomwo nu ke congregation, ke elos moniyuk in lutlutkin Kas lun God a ke inkanek in asrouki pal nukemwa lalos yurin met kulansap puspus lun Jeova.

94:19. Fwin oasr kutena sripe in mokle “nunak puspus insiesr,” orekma in rid a sifwilpa nunku ke “kas in pwarak” su koneyukyak in Baibel fwa akkeye kut.

95:7, 8. In long ke kas in kai su tuku ke Ma Simusla, a loang akmwoye nu ka, a porongo ke ma inge fwa kosre kut la in tia ekla oana met se su lungse in seakos.​—Hibru 3:7, 8.

106:36, 37. Fus puspus inge akkalemye la orekma in alu nu ke ma srolela el kupasr nu ke orekma in sang me kise nu sin dimon puspus. Ma inge akkalemye la sie met fwin orekmakin ma srolela el ku in akkolukyeyuk sin dimon puspus. Baibel el kaifwe kut: “Komwos in liyekomwosyung liki me srolela.”​—1 Jon 5:21.

“Komwos in Kaksakin Jeova!”

On safla tolkoe ke Buk Akakosr lun Sam aksafyeyukla ke kas in kaifwe inge: Komwos in kaksakin Jeova, [Jah, NW]!” A on safla ke buk akakosr el mutamwauk pa ke kas inge. (Sam 104:35; 105:45; 106:1, 48) Kas inge “Komwos kaksakin Jah!” sikyak ke pal puspus ke Buk Akakosr lun sam inge ku Sam 90 nu ke 106.

Aok, oasr sripe mwomwo puspus lasr in kaksakin Jeova. Sam ak 73 nu ke 106 el akkalemye ma puspus nu sesr su kut ku in nunku ka, in nekla insiyesr ke oiyen kulo lulap lasr nu sin Papa tumasr in kosrao. Ke kut nunku ke ma nukemwa su el orala tari in akinsemwomwoye kut a ke ma nukemwa su el fwa oru nu sesr ke pal fwasru, ya kut tia mokleyuk ku akkeyeyuk in “kaksakin Jeova” ke ku lasr kemwa?

[Petsa ke sra 8]

In oana Asaph, kut ku in muteng a kutangla ma koluk puspus ke kut kaifweang in “futoto nu sin Jeova”

[Petsa ke sra 9]

Fero el tia eis kutangla ke Mwea Srusra

[Petsa ke sra 9]

Ya kom etu la efu ku manna el pangpang “bread nen met ku”?

[Petsa ke sra 11]

Mea ku in kasre kut in akwanginyela “nunak puspus lun insiesr”?