Fwasr Liki Alu Kikiap!
“‘Komwos in illa liki in maslolos, a komwos in srikomwosla,’ Jeova el fwak, ‘a tia kalye kutena ma tia nasnas.’”—2 KORINT 6:17.
1. Mea met puspus elos enenu in etu na paye?
MET oaru puspus elos nukin ma paye ke God a ke pal fwasru lun metu. Ke sripen elos tia koneak me top su eneneyuk nu ke ma paye ke God a ke pal fwasru lun metu, paenang elos fosek na paye a nukin la piya ma paye nu ka. Million puspus sin met elos oana met kos nu ke kain in alialu puspus, fasin puspus, a me akfulat puspus meyen elos tia etu la ma inge ku in akkolukyelos fwin elos oru ma inge, a orekma nukemwa inge tia ku in akinsemwomwoye Met Orekutla. Aok, oasr met tulan puspus lom, a sou puspus su lulalfongi ke e in hell, ke met tolu in God sefwanna, ngun su tia ku in mise, ku ke kutupa me luti kikiap.
2. Mea met kol puspus ke alu elos orala, a mea fwokin orekma lalos inge?
2 Mea paenang in oasr losr lun ngun yen nukemwa? Lela in oasr kalem mwomwo nu ka la sropon ma inge tuku ke alu kikiap—yokna alu puspus a met kol puspus su luti nunak puspus su tia sumwos a lain nunak lun God. (Mark 7:7, 8) Ke sripe se inge, met puspus elos kiapeyukla in lulalfongi mu elos alu nu sin God paye, tusruktu payeiye u elos akkasrkusrakyel. Alu kikiap pa paenang in oasr ma puspus su sikyak tia mwo.
3. Su met se emeet su akkeye alu kikiap, a el akkalemyeyuk fuka in Baibel?
3 Oasr sie met su tia liyeyuk su sang kasru nu ke alu kikiap. Met sap Poul el akkalemye kas inge kel: “In elos su god lun fwal se inge el akkunye nunak lun met selalalfongi tu kalem lun mwosasu lun mwolanu lun Kraist, su luman God, tia tololosyuk.” (2 Korint 4:4) “God lun fwal se inge” pa Setan su Devil. El pa met se emeet su akkeye alu kikiap. Poul el simusla: “Setan el sifwana oral sie lipufon lun kalem. Ke ma inge, tia ma yok tu met orekma lal ouyepa sifwana oralos oana met orekma lun ma sumwosmwos.” (2 Korint 11:14, 15) Setan el ku in oru ma koluk puspus in oana ma mwomwo a el kiapela metu in lulalfongi ke ma kikiap puspus.
4. Mea Masap lun God nu sin met Israel in pal meeta el akkalemye ke met palu kikiap?
4 Ke ma inge arulanu kalem la efu ku Baibel el selngawi na paye alu kikiap! Ke sie me pupulyuk, Masap lal Moses el sang kas in sensen nu sin met sulela nukemwa lun God ke met palu kikiap. Kutena met su luti me luti kikiap a akkeye orekma in alu nu sin God kikiap el ‘fwa anwuki, meyen el kaskas tunyuna lain Jeova God.’ Met Israel elos sapkinyuk in ‘sisla ma koluk liki in masloltal.’ (Duteronomi 13:1-5) Aok, Jeova el liye alu kikiap oana ma se su arulanu koluk.—Ezikiel 13:3.
5. Kas in sensen fuka kut enenu in porongo ke pal inge?
5 Jisus Kraist a met sap nu kemwa lal elos akkalemye pa nunak lun Jeova ke alu kikiap. Jisus el sang kas in sensen nu sin met tuma lutlut nukemwa lal: “Sismouk met palu kikiap, su tuku nu yurumwos in luman sipu, a elos wolf lemnak insielos.” (Mattu 7:15; Mark 13:22, 23) Poul el simusla “koskusrok lun God sikme in kosrao me lain ma koluk a ma sufwal nu kemwa lun met, su tanye ma paye ke ma koluk.” (Rom 1:18) Arulanu yok sripe nu sin met Kristian paye nukemwa elos in porongo kas in sensen inge nukemwa a in fwasr liki kutena met su tia akkalemye ma paye ke Kas lun God ku fwakak met luti kikiap puspus!—1 Jon 4:1.
Illa Liki “Babulon Lulap”
6. Fuka “Babulon Lulap” el akkalemyeyuk in Baibel?
6 Nunku ke buk se in Baibel inge su pangpang Fwakyuk la fuka el akkalemye ke alu kikiap. Alu kikiap el akkalemyeyuk oana sie mutan kosro su srui a oasr ku lal fwin togusrai puspus a ke met puspus su wi ke togusrai inge. Mutan se inge ke me pupulyuk el orek kosro nu sin togusra puspus a el srui ke sran met puspus su alu nu sin God paye. (Fwakyuk 17:1, 2, 6, 18) Oasr inel simusyukla ke mutonsrol a e inge fwal nu ke oiya fokfok a oiya lal su me srungeyuk na paye. E se inge pa: “Babulon Lulap, nine kien mutan kosro a me srunga lun fwalu.”—Fwakyuk 17:5.
7, 8. Fuka alu kikiap el sifwana oru orekma lun kosro, a mea fwokin ma inge?
7 Me aketeye lun Ma Simusla ke Babulon Lulap el fwal nu ke alu kikiap nukemwa. Fwinne tausen puspus ke alu elos tia tukeni nu ke sie u, tusruktu elos tukeni nu sie ke akwuk a orekma. In oana ke ma akkalemyeyuk sin mutan kosro se in Fwakyuk inge, oasr ku lulap lun alu kikiap fwin gufernment nukemwa. In oana ke sie mutan su tia oaru nu sin mokul tumal, ke kas in pupulyuk alu kikiap el tia paye a el orek kosro ke el orala oiyen kawuk lal nu ke akwuk lun politic nu ke gufernment puspus. Met tuma lutlut Jemes el simusla: “Komwos met kosro, ya komwos tia etu tu lungse lun fwalu, me meun lain God? Ke ma inge kutena met su lungse in kawuk lun fwalu, el sifwana oral met lain God.”—Jemes 4:4.
8 Orekma in asrouki lun alu kikiap nu sin gufernment pa paenang me keok upa puspus lun metu. Met Africa se inge Dr. Xolela Mangcu su orekma oana political analyst se ke el liye la “oasr me srikasrak puspus ke orekma in uniye met puspus ke me sramsram lun fwalu su sikyak ke sripen tukeni lun alu a politic.” Sie newspaper el tufwana akkalemye: “Orekma in alein su arulanu sensen a arulanu yok sran met su aksuroryeyukla ka in pal inge . . . ma inge orekla yok sin alu.” Million puspus sin met elos anwuki ke meun puspus su oasr kasru lun alu ka. Babulon Lulap el oru me kalyai a uniye met kulansap paye lun God, paenang ke kas pupulyuk, el srui ke sran met puspus inge.—Fwakyuk 18:24.
9. Srunga lun Jeova nu ke alu kikiap el akkalemyeyuk fuka ke buk lun Fwakyuk?
9 Me akpayeye la Jeova el srunga alu kikiap el kalem ke ma Baibel el akkalemye ke ma e fwa sikyak nu sin Babulon Lulap. Fwakyuk 17:16 el akkalemye: “A ko siengoul kom liye, a kosro soko ingo, elos fwa srunga mutan kosro sa, a elos fwa oru tu lan mukena muta koflufol, a elos fwa kangla ikwel, a fwa arulanu eskulak in e.” Ma se meet, kosro lemnak lulap sogo fwa kunausella nu ke el mise a kangla ikwel. Tokin ma inge, kutena ma lula kel fwa isisyak in e. Kalmen ma inge pa, tia pat gufernment puspus lun fwalu fwa oru kain in orekma puspus in sang lain alu kikiap nukemwa. God el fwa moklelos in oru orekma inge. (Fwakyuk 17:17) Babulon Lulap, ku alu kikiap nukemwa fwin fwalu e fwa kunausyukla. “El fwa tia na sifwilpa koneyukyak.”—Fwakyuk 18:21, NW.
10. Nunak fuka kut fwa akkalemye ke alu kikiap?
10 Nunak fuka enenu in akkalemyeyuk sin met puspus su wi ke alu paye nu ke Babulon Lulap? Arlana kalem, ke Baibel el sapkin: “Illa lukel, met Luk, tu komwos in tia eis ipen ma koluk lal, a tu komwos in tia eis ma lokwalok lal.” (Fwakyuk 18:4) Met nukemwa su lungse in moliyukla elos enenu in illa liki alu kikiap meet liki len in kunausten lal tuku. Ke pal se el oasr fwin fwalu, Jisus Kraist el palye la in len safla, met puspus elos fwa fwak mu elos aksol. (Mattu 24:3-5) Nu sin met puspus inge, el fwak: “Nga tia etu komwos! Fwala liki Yu, komwos su orek ma koluk.” (Mattu 7:23) Jisus Kraist su ke pal inge el eis tari kunokon lal oana sie togusra el pilesru alu kikiap.
Fuka in Fwasr Liki Alu Kikiap?
11. Mea kut enenu in oru in fwasr liki alu kikiap?
11 Met Kristian paye elos fwasr liki alu kikiap, a sisla me luti nukemwa lun alu kikiap. Kalmen ma inge pa kut fwasr liki ku tia long ke kutena program lun alu kikiap ke radio a television oapana ke me rid nukemwa lun alu su luti ma kikiap ke God a ke Kas lal. (Sam 119:37) Sie pa inkanek lalmetmet nu sesr pa kut in fwasr liki in tia wi ke tukeni a me akengan nukemwa su oasr kasru lun kutena u ka su kupasr nu ke alu kikiap. Oayepa, kut tia kasru alu kikiap ke kutena inkanek. (1 Korint 10:21) In fwasr liki ma puspus inge kut enenu in karungin kut in tia kiapeyukla sin kutena met in “eis insiesr ke luti in lalmetmet lal a kutasrik lusrongten, oana sramsram matu lun met, oana srumtauk lun fwalu, a tia oana Kraist.”—Kolosse 2:8.
12. Ke inkanek fuka sie met el aksukosokyella liki kupasr nukemwa lal nu ke kutena kain in alu kikiap?
12 Fuka fwin sie met su lungse in ekla sie sin Met Lo lun Jeova tusruktu srakna simusyukla inel ke sie alu kikiap? Ke pal puspus, enenu in oasr sie leta lun resignation orekla in me akpayeye la sie met el srungela in nunkeyuk el oana sie met su wi ke sie alu kikiap. Arulanu yok sripe sie met in orala sulela lal in fwasr liki kutena me akkoluk lun alu kikiap. Orekma nukemwa lun sie met su lungse in ekla Met Lo enenu in akkalemyeyuk nu sin alu inge a nu sin met puspus la el kunausla kain in akwuk nukemwa su paenang in oasr kupasr lal nu selos ka.
13. Kas in kai fuka lun Baibel el akkalemye ke ma enenu nu ke oiyen fwasr liki alu kikiap?
13 “Komwos in tia awi komwosi nu ke met selalalfongi,” met sap Poul el simusla. “Tu aenguni su yurin ma sumwosmwos a ma koluk? Ku sie nu sin sie su yurin kalem a losr? Ya inse siefwanna su lun Kraist yurin Bilial? Ku ip su lun met lalalfongi yurin met selalalfongi? A oana sie su yurin tempel lun God a yurin me srulela? . . . ‘Ke ma inge, komwos in illa liki in maslolos, a komwos in srikomwosla,’ Leum el fwak, ‘a tia kalye kutena ma tia nasnas; a Nga fwa eis komwos.’” (2 Korint 6:14-17) Kut enenu in porongo kas inge ke kut fwasr liki alu kikiap. Ya kas in kai lal Poul akkalemye la kut enenu pa in fwasr liki met puspus su wi ke alu kikiap?
“Fwufwasryesr Ke Lalmetmet Pal Nukemwa”
14. Ya kut enenu in fwasr liki inkanek nukemwa lalos su wi ke alu kikiap? Aketeye.
14 Ya met nukemwa su wi ke alu paye enenu in tia wi ke inkanek nukemwa lun met su wi ke alu kikiap? Ya kut enenu in tia asrouki nu ke inkanek nukemwa lun met su tia wi ke alu lasr? Me top nu ka pa mo. Ma se akluo oasr ke masap yok luo emeet su akkalemye: “Kom fwa lungsum met tulan lom oanu kom sifwana.” (Mattu 22:39) Paye la kut akkalemye lungse nu sin met tulan lasr ke kut sulkakin nu selos peng mwo lun Togusrai. Lungse lasr nu selos akkalemyeyuk pa ke kut lutlut Baibel nu selos a kasrelos in etu ke me enenu tu elos fwa ku in fwasr liki ku sisla alu kikiap.
15. Mea kalmen in “tia ma lun fwalu”?
15 Fwinne kut sulkakin peng mwo nu sin met tulan lasr, oana met tuma lutlut lun Jisus kut “tia ma lun fwalu.” (Jon 15:19) Kas se inge “fwalu” ke fus inge el sramsramkin ke met nukemwa su tia wi alu nu sin God. (Efesus 4:17-19; 1 Jon 5:19) Kut tia ma lun fwalu ke kut sisla ella, kas, a oiya su aktoasrye Jeova. (1 Jon 2:15-17) Sayen ma inge, in fwal nu ke akwuk inge la “met asrouki koluk akkolukye oiye mwo,” paenang kut enenu in fwasr liki oiyen kawuk nu sin met puspus su tia moulkin akwuk mwo lun met Kristian. (1 Korint 15:33) Oiya inge in tia ma lun fwalu kalme pa in karungin moul in “tia oasr tunum ke fwalu.” (Jemes 1:27) Ke ma inge, oiya inge in srela liki fwalu tia kalme pa kut enenu in fwasr liki inkanek nukemwa fwin osun nu sin met puspus.—Jon 17:15, 16; 1 Korint 5:9, 10.
16, 17. Oiya fuka met Kristian elos enenu in akkalemye nu sin met nukemwa su tia etu ke ma paye lun Baibel?
16 Ke ma inge, oiya fuka kut enenu in akkalemye nu sin met puspus su tia etu ma paye lun Baibel? Nu sin met lili ke congregation in an Kolosse, met sap Poul el simusla: “Komwos in fwasr in lalmetmet nu selos su muta lik; a karunganang pal. Lela kas lomwos in kulang pal e nu kemwa, solela ke sol, tu komwos fwa ku in etu fuka fwal in topuk nu sin kais sie met.” (Kolosse 4:5, 6) Met sap Piter el simusla: “A komwos in akmutalye Kraist oana Leum insiomwos, a komwos in akola pal nu kemwa in topuk nu sin met nu kemwa su siyuk sumwos sripen fwinsrak se su on in komwos, a ke fulpap a sangeng.” (1 Piter 3:15) Met sap Poul el sang kas in kai nu sin met Kristian “elos in tia kaskas koluk ke kutena met, in tia met akukuin, in okak, in fwakak fwokpap nu kemwa nu sin met nu kemwa.”—Taitus 3:2.
17 In oana Met Lo lun Jeova, kut enenu in fwasr liki oiya koluk a sulallel nukemwa nu sin met nukemwa. Paye la kut tia orekmakin kas in akkoluk in sang akkalemye oiyen met puspus su wi ke alu puspus saye. A, kut kaskas ke inkanek mwomwo fwinne met in loomu, ku met tulan, ku met su wi kut ke orekma elos akkalemye oiya sekulang ku elos orekmakin kas su tia mwo.—Kolosse 4:6; 2 Timote 2:24.
“Sruokye Ku Me Srikasrak lun Kas Sumwos”
18. Kain in ma sikyak upa in ngun fuka ku in pulakinyuk sin met puspus su folokla nu ke alu kikiap?
18 Tokin sie met el lotela ke ma paye lun Baibel, sie me asor yok fwin el sifwil folokla nu ke oiya koluk lun alu kikiap! Baibel el akkalemye ke ma puspus su ku in sikyak fwin oiya tia mwo inge orek ke el fwak: “Tu fwin, tokin elos kaengla liki ma koluk lun fwalu ke etu Leum a Met Lango Jisus Kraist, elos sifwil sremla in ma inge a kutangyukla, safla lalos tok koluk liki nu selos liki meeta. . . . Tu sikyuk nu selos oana kas su paye: ‘Kosro ngalngul el sifwil pa folokla nu ke mwut el mwutela, a pig su owola tari sifwil folokla a ipippip yen furarrar.’”—2 Piter 2:20-22.
19. Efu ku arulanu yok sripe in loang akmwoye pal nukemwa nu ke kutena ma su ku in akkolukye moul in ngun lasr?
19 Kut enenu in loang akmwoye nu ke kutena ma su ku in akkolukye moul in ngun lasr. Oasr na paye me sensen puspus! Met sap el sang kas in sensen: “Tu Ngun El fwakak lemtulaiuk, tu in pal toka kutu fwa putatla liki lalalfongi, a porongo ngun kikiap a me luti lun dimonu.” (1 Timote 4:1) Kut oasr ke “pal toka” inge. Met nukemwa su tia fwasr liki alu kikiap ku in “ikik ke nua a mukuikui ke eng in lutlut nu kemwa, ke sruf lun met, in kutasrik, kolla nu ke me kikiap lun ma koluk.”—Efesus 4:13, 14.
20. Ke inkanek fuka kut ku in karungin kut sifwana liki me akkoluk lun alu kikiap?
20 Fuka kut ku in karungin kut sifwana liki me akkoluk lun alu kikiap? Nunku ke ma nukemwa su Jeova el ase nu sesr. Oasr yurosr Kas lun God, Baibel. (2 Timote 3:16, 17) Jeova el ase pa me mongo puspus lun ngun ke inkanek lun “met kulansap oaru a lalmetmet.” (Mattu 24:45) Ke kut kapkapek ke ma paye, ya kut tia akkeye oiyesr in engankin me ‘mongo upa fwal nu sin met matu’ a lungse in wi pal nukemwa ke meeting lasr su kut ku in lotela ma paye nukemwa ke God? (Hibru 5:13, 14; Sam 26:8) Lela kut in akkalemye la kut lungse in orekmakin inkanek nukemwa lun Jeova in luti kut tu kut fwa ku in “sruokye me srikasrak lun kas sumwos” su kut long tari. (2 Timote 1:13) Ke inkanek inge kut ku in fwasr liki alu kikiap.
Mea Kom Lotela?
• Mea se inge “Babulon Lulap”?
• Mea kut enenu in oru in fwasr liki alu kikiap?
• Me sensen fuka nu ke moul in ngun lasr kut enenu in fwasr liki?
[Petsa ke sra 4]
Ya kom etu la efu ku “Babulon Lulap” el akkalemyeyuk oana sie mutan kosro?
[Petsa ke sra 5]
“Babulon Lulap” el fwa kunausyukla
[Petsa ke sra 7]
Kut akkalemye “sie oiya kulang a sunak” nu sin met puspus su tia wi ke ma kut lulalfongi