‘Som A Oru Met Tuma Lutlut, Baptaiselosla’
“Ke ma inge komwos som, a oru met in mutanfwal nu kemwa tu elos in met Tumal lutlut, baptaiselosla . . . , luti nu selos in liaung ma nu kemwa Nga sapkin nu sumwos.”—MATTU 28:19, 20.
1. Sulela fuka met Israel elos oru ke Eol Sainai?
YEA 3,500 kutu somla, kais sie met ke sie mutanfwal elos orala mwulela lalos nu sin God. Ke pal se elos tukeni muta ke Eol Sainai, met Israel elos akkalemye: “Ma nu kemwa Jeova El fwak kut fwa oru.” Mutamwauk ke pal se ingo fwasru, met Israel elos ekla met su mwuleyukla nu sin God, “ma saok” lal. (Exodus 19:5, 8; 24:3) Elos engan in tupan ke me karunginyuk lal a moul ke lusen pal loes in sie fwal “su suror ke milk a unni.”—Livitikus 20:24.
2. Kain in futoto fuka nu sin God metu elos ku in engankin ke pal inge?
2 Tusruktu, in oana ke met sim lun sam Asaph el akilen, met Israel elos “tia liaung mwuleung lun God, a srangesr fwasr in masap Lal.” (Sam 78:10) Elos tia akos mwulela su papa matu tumalos orala nu sin Jeova. Ke saflaiye, mutanfwal se inge tula fototo mwomwo lalos su engankinyuk sin papa matu tumalos yurin God. (Ekklisiastis 5:4; Mattu 23:37, 38) Ke ma inge, God el “liyela met pegan omeet, in eis selos me sie mutanfwal ke el sifwana.” (Orekma 15:14) A ke len safla inge, el orani nu sie “u lulap su wangin met ku in oekla, sin mutanfwal nu kemwa, a sin sruf nu kemwa, a fwil nu kemwa, a loa nu kemwa,” a u lulap inge elos akkalemye ke engun: “Lango nu sin God lasr, su muta fwin tron, a nu sin Lam.”—Fwakyuk 7:9, 10.
3. Step puspus fuka enenu in orek sin sie met elan engankin futoto lal sifwana nu sin God?
3 Fwin sie met el lungse in sie sin met puspus su engankin fototo mwomwo lalos nu sin God, el enenu in mwulela moul lal nu sin Jeova a el enenu in akkalemye mwulela lal inge nu sin met puspus ke inkanek lun baptais ke kof. Orekma inge in mwulela a baptais pa inkanek in akos nu ke masap lun Jisus nu sin met tuma lutlut nukemwa lal: “Ke ma inge komwos som, a oru met in mutanfwal nu kemwa tu elos in met Tumal lutlut, baptaiselosla in En Papa, a Mwen, a ngun mutal, luti nu selos in liaung ma nu kemwa Nga sapkin nu sumwos.” (Mattu 28:19, 20) Met Israel elos long ke pal se Moses el ridi “buk in mwuleung.” (Exodus 24:3, 7, 8) Ke sripe se inge, elos kalem ke kunokon nukemwa lalos nu sin Jeova. Ke pal inge, in oasr etauk sumwos ke akwuk lun God su koneayukyak ke Kas lal, Baibel, el yok sripe in eis etauk ka meet liki sie met el eis baptais.
4. Ke inkanek fuka sie met el ku in fwal nu ke baptais? (Wekunang pok oasr lung.)
4 Aok, Jisus el lungse met tuma lutlut lal in oasr lulalfongi se su oasr pelung mwomwo ka meet liki elos fwa eis baptais. El sapkin met tuma lutlut lal in som a oru met tuma lutlut, a in lotelos pa in ‘liaung ma nukemwa su el sapkin nu selos.’ (Mattu 7:24, 25; Efesus 3:17-19) Ke ma inge, oasr pal puspus met nukemwa su fwal in eis baptais elos eis lutlut lalos ke Baibel ke lusen malem puspus ku ke lusen yea se ku luo, ke oiya inge elos ku in orekmakin pal yok in nunku ke oiyen baptais fwin elos ku in orala sulela mwomwo nu ka. Ke pal in baptais, met nukemwa su fwa eis baptais elos fwak aok nu ke kusensiyuk yok sripe luo. Ke sripen Jisus el akkalemye yok la ‘Aok lasr in Aok, Mo, mo,’ paenang arulanu yok sripe nu sesr nukemwa in kalweni ke yok sripaiyen kusensiyuk luo inge ke pal in baptais.—Mattu 5:37.
Auliyuk a Oru Mwulela
5. Inkanek yok sripe fuka luo akkalemyeyuk yok nu ke kusensiyuk se meet ke baptais?
5 Kusensiyuk se meet nu ke baptais el siyuk sin met se su fwa eis baptais fwin el auliyuk tari liki inkanek lal meet a ke oiyen moul a fwin el mwulela moul lal nu sin Jeova in oru ma lungse lal. Kusensiyuk inge el akkalemye ke inkanek yok sripe luo su eneneyuk in orek meet liki baptais, pa inge ke orekma in auliyuk a oru mwulela.
6, 7. (a) Efu ku auliyuk paye eneneyuk nu sin met nukemwa su fwal in eis baptais? (b) Kain in ekla fuka enenu in orek tokin sie met el auliyuk?
6 Efu ku sie met el enenu in auliyuk met liki el eis baptais? Met sap Poul el aketeye: “Kut nu kemwa ouyepa muta a moul in lung lun ikwe meeta.” (Efesus 2:3) Meet liki kut eis sie etauk sumwos ke ma lungse lun God, kut moulkin sie moul oana moul lun met puspus, fwal nu ke oiya a akwuk nukemwa lun fwalu. Inkanek lun moul lasr on ke kolyuk lun god lun fwal se inge, su Setan. (2 Korint 4:4) Tusruktu, tokin kut lotela ma lungse lun God, kut sulela in moulkin moul sumwos “in tia sifwil muta pat in orekma koluk lun met, a nu ke lungse lun God.”—1 Piter 4:2.
7 Inkanek sasu lun moul inge orala me insemwomwo puspus. Yok liki ma nukemwa, sie met el ku in engankin futoto mwomwo lal nu sin Jeova, su Devid el srike nu ke sie me solsol nu ke “loom nuknuk” a “eol mutal” lun God—sie kunokon su arulana mwo. (Sam 15:1) Paye la, Jeova el tia suli met nukemwa, a el fwa suli met puspus na “su fwafwasryesr in sumwos, a orekma sumwosmwos, a kaskas paye insielos.” (Sam 15:2) Ke sripen oasr oiya puspus lasr meet liki kut eis etauk lun ma paye, paenang orekma nukemwa ma fwal nu ke ma eneneyuk su akkalemyeyuk ke fus se inge ku in kalmekin la kut enenu in oru me aksumwos—nu ke oiya a ella lasr nukemwa. (1 Korint 6:9-11; Kolosse 3:5-10) Me kasru nu sin sie met in ku in oru me aksumwos pa ke inkanek lal wi orekma in auliyuk—in akkalemye asor paye nu ke pulakinyen inkanek koluk lun moul lal meet a el arulanu lungse in akinsemwomwoye Jeova. Ma inge ku in kol nu ke orekma in auliyak a forla—su kalme pa in sisla kutena kain in inkanek lun moul su oasr ke oiyen nunak in nunku kel sifwana, moul koluk, a suk in fwasr ke inkanek mwomwo su me akinsemwomwo nu sin God.—Orekma 3:19.
8. Kut oru fuka mwulela lasr, a mwulela a baptias kupasr ke inkanek fuka nu sin sie sin sie?
8 Ip akluo lun kusensiyuk se meet ke baptais el siyuk sin met nukemwa su fwal in eis baptais fwin elos mwulela moul lalos tari nu sin Jeova in oru ma lungse lal. Mwulela el sie step yok sripe su enenu in orek meet liki baptais. Kut ku in mwulela moul lasr ke inkanek lun pre, kut akkalemye kena lun insiesr in sang moul lasr nu sin Jeova ke inkanek lun Kraist. (Rom 14:7, 8; 2 Korint 5:15) Tokin kut mwulela moul lasr, kut ku in akilen la Jeova pa Leum lasr a kut Ma lal a in oana Jisus kut insemwomwo in oru ma lungse lun God. (Sam 40:8; Efesus 6:6) Mwulela yok sripe inge nu sin Jeova el orek ke pal se sefwanna. Tusruktu, ke sripen orekma in mwulela inge orek inmasrlon Jeova a kut mukefwanna, paenang ke inkanek in eis baptais el sie inkanek su kut ku in etu ka la kut orala tari mwulela yok sripe lasr nu sin Papa tumasr in kosrao.—Rom 10:10.
9, 10. (a) Ma puspus fuka weang orekma in oru ma lungse lun God? (b) Fuka met kol lun Nazi elos akilen mwulela lasr?
9 In etawi me srikasrak lun Jisus in oru ma lungse lun God, mea eneneyuk nu sesr in oru? Jisus el fwak nu sin met tuma lutlut lal: “Kutena met fwin lungsel in tuku fwasr Tukuk, lela lan sifwana lafwekunal, a srukak sak soko lal, a fwasr Tukuk.” (Mattu 16:24, NW) Ke fus inge Jisus el akkalemye ke ma tolu su kut enenu in oru. Ma se meet, kut in “sifwana lafwekin kutla.” Ke kas saye, kut enenu in sisla oiya koluk lasr in nunku kesr sifwana, oiya sesumwos lasr, a kut suk in akos kas in kai a kolyuk lun God. Ma se akluo, kut in ‘srukak sak soko lasr.’ In len lal Jisus sak soko el lumeyuk nu ke me mwekin a keok. In oana met Kristian, kut insese nu ka la oasr pal kut sun keok ke sripen peng mwo. (2 Timote 1:8) Fwinne oasr pal met puspus lun fwalu elos aksruksruk koluk ku fwak kas kou nu sesr, tusruktu in oana Kraist kut ‘pilesru mwekin,’ a kut insemwomwo meyen kut etu la kut akinsemwomwoye God. (Hibru 12:2) Ma se safla, kut fwasr tokin Jisus “pal nukemwa.”—Sam 73:26; 119:44; 145:2.
10 Kalem la, oasr kutu met su lain Met Lo lun Jeova elos akilen mwulela su Met Lo elos orala nu sin God in kulansapul ke inkanek nukemwa. Ke sie me pupulyuk, ke sie niyen prison in an Buchenwald lun Nazi Germany, Met Lo nukemwa su srunga in fuleak lulalfongi lalos elos sapkinyuk in signiya ma simusla inge: “Nga srakna sie sin Baibel Student a Nga fwa tiana kunausla mwulela su nga fulak ka ku akkalemye tari ka nu sin Jeova.” Paye la, ma simusla inge el akkalemye ke oiyen met kulansap nukemwa lun God, su mwulela tari moul lalos nu sel!—Orekma 5:32.
Akilenyuk oana Sie sin Met Lo lun Jeova
11. Kunokon mwomwo fuka sie met baptaisla el eis?
11 Kusensiyuk akluo el siyuk nu sin met su fwal in eis baptais, ke ma se meet, fwin el kalem ka la baptais lal oru met puspus in akilen la el oana sie sin Met Lo lun Jeova. Tokin baptais lal, srusrngiyuki el oana sie met luti peng mwo su us inen Jeova. Ma inge me insemwomwo yok a sie kunokon su arulanu yok sripe. Oasr pa fwinsrak lun met se su eis baptais nu ke molela, fwin el sruokye oaru lal pal nukemwa nu sin Jeova.—Mattu 24:13.
12. Kunokon fuka weang me insemwomwo nu ke orekmakinyen inen God?
12 Aok, sie me insemwomwo yok su wangin ma oana in us inen God kulanu, Jeova. Met palu Maika el fwak: “Tu mutanfwal nu kemwa fwasr, kais sie in en god lal; a kut fwa fwasr in En Jeova God lasr ma patpat a ma patpat.” (Maika 4:5) Ne oinge, oasr sie kunokon su weang me insemwomwo inge. Kut enenu in kaifweang in moulkin moul lasr fwal nu ke sie inkanek su sang mwolena nu ke e su kut us. Oana ke Poul el akesmakinye met Kristian nukemwa in an Rom, la fwin sie met el tia orekmakin ma el luti, inen God fwa “kaskaskouyuk,” ku akkolukyeyuk.—Rom 2:21-24.
13. Efu ku oasr kunokon lun met kulansap nukemwa lun Jeova su mwulela moul lalos nu sel in sang ma lo ke God lalos?
13 Ke pal se sie met el ekla Met Lo lun Jeova, el oayepa eis kunokon in sang ma lo ke God lal. Jeova el suli mutanfwal Israel su mwuleyukla nu sel in kulansapul oana met lo lal in sang me akpayeye ka la el pa God ma patpat. (Isaia 43:10-12, 21) Tusruktu mutanfwal se inge tia akpayeye kunokon lalos inge, a ke saflaiye elos tula liki me insemwomwo lun God ke inkanek nukemwa. Ke pal inge, met Kristian paye elos engan ke kunokon lalos in sang ma lo kel Jeova. Kut oru ma inge ke sripen kut lungse el a lungse inel in akmutalyeyuk. Ya oasr kutena sripe mwo kut fwin muta misla a tia akkalemye nu sin met puspus ma paye ke Papa tumasr in kosrao a ke akwuk lal? Kut ku in pulakin pa pulakin lal Poul ke el fwak: “Tu nga fwin fwakak mwosasu, wangin konkun yuruk ka, tu nga tia ku in tia fwakak. Tu we nu sik nga fwin tia fwakak mwosasu!”—1 Korint 9:16.
14, 15. (a) Fuka u lun Jeova el kasre kut in kapkapek ke orekma nukemwa lasr in alu nu sel? (b) Inkanek puspus fuka ku in kasre kut ke ma lun ngun?
14 Kusensiyuk akluo el akesmakinye pa met su fwal in eis baptais ke kunokon lal in akkalemye akesrui lal nu ke u lun Jeova su oasr kasru lun ngun mutal ka. Kut sifwana tia ku in oru orekma in kulansap lasr nu sin God, a kut enenu me kasru, me kolyuk, a me akkeye su tuku ke u lun “met lili” nukemwa. (1 Piter 2:17; 1 Korint 12:12, 13) Oasr me kasru yok ke u lun God nu ke oiyen kapkapek lasr in ngun. U lal ku in sang me kasru puspus su tuku ke Baibel su ku in kasre kut in eis etauk sumwos, in orekmakin inkanek sumwos a lalmetmet kut fwin sun ma upa puspus, a in akkeye futoto mwomwo lasr nu sin Jeova. Ke kas in pupulyuk, ke sie nine su karungin mwo tulik natul a in oasr me mongo fwal, el oana “met kulansap oaru a lalmetmet” ke elos orala me mongo in ngun ke pal fwal in sang kasre kut in akmwoye futoto lasr nu sin Jeova.—Mattu 24:45-47; 1 Tessalonika 2:7, 8.
15 Ke meeting nukemwa ke kais sie wik, met kulansap lun Jeova elos eis me akpa a me akkeye su eneneyuk in sang kasre kut in ekla Met Lo oaru lun Jeova. (Hibru 10:24, 25) Meeting se inge Theocratic Ministry School el luti kut ke inkanek mwo in sramsram nu sin met puspus, a Service Meeting el kasre kut in oru me akpa nu sesr in ku in akkalemye peng lasr ke inkanek mwo. Ke inkanek lun meeting nukemwa lasr a ke lutlut lasr sifwana ke me rid nukemwa su tuku ke Baibel, kut ku in liye la ngunin Jeova el orekma, a el kol u lal. Ke inkanek lun me kasru puspus inge su oasr pal nukemwa, God el oru kut in loang mwo nu ke me sensen nukemwa, el ase me akpa nu sesr tu kut in ekla met luti mwomwo ke peng mwo, a el kasre kut in tia motul in ngun pal nukemwa.—Sam 19:7, 8, 11; 1 Tessalonika 5:6, 11; 1 Timote 4:13.
Me Kasru In Eis Baptais
16. Mea mokle kut in oru mwulela lun moul lasr sifwana nu sin Jeova?
16 Ke ma inge kusensiyuk luo nu ke baptais el akesmakinye met nukemwa su fwal in eis baptais in etu ke yok sripaiyen baptais ke kof a ke kunokon puspus tokin ma inge. Ke ma inge, mea moklelos in oru sulela in eis baptais? Kut ekla met tuma lutlut su baptaisla, tia ke sripen sie met el patok kut in oru ma inge, a meyen Jeova el “amakin” kut. (Jon 6:44) Ke sripen “God el lung,” El lungse la ma orekla nukemwa lal in aksol meyen elos lungse el a tia ke sripen patokyuk elos. (1 Jon 4:8) Kut amakinyuk sin Jeova ke oiya mwomwo lal a ke ma mwomwo su el akkalemye nu sesr. Jeova el ase Mwen sefwanna natul nu sesr a akkalemye nu sesr la oasr pal fwasru su e fwa mwo emeet. (Jon 3:16) Ke sripe inge, kut akkyeyuk in sang a in mwulela moul lasr nu sel.—Soakas 3:9; 2 Korint 5:14, 15.
17. Nu ke mea kut tia mwulela moul lasr sifwana?
17 Kut mwulela moul lasr, tia nu ke sie akwuk ku nu ke sie orekma ku kunokon, a nu sin Jeova sifwana. Kunokon se su God el sapkin nu sin met kulansap lal ku in ekyek, tusruktu mwulela lalos nu sel el oana sie pal nukemwa. Ke sie me pupulyuk, ma el sapkin nu sel Ebream in oru el siena liki ma el sapkin nu sel Jeremaia in oru. (Genesis 13:17, 18; Jeremaia 1:6, 7) Ne oinge, Ebream a Jeremaia elos akpayeye orekma su God el sapkin nu selos in oru meyen elos lungse Jeova a elos lungse in oru ma lungse lun God ke inkanek oaru a paye. Ke lusen pal in len safla inge, met tuma lutlut nukemwa lun Kraist su baptais tari elos kaifweang in akpayeye masap lun Kraist in sulkakin peng mwo lun Togusrai a in oru met tuma lutlut. (Mattu 24:14; 28:19, 20) In oru orekma inge ke inse kemwa el sie inkanek mwomwo in akkalemye la kut lungse Papa tumasr in kosrao a kut mwuleyukla na paye nu sel.—1 Jon 5:3.
18, 19. (a) Me akkalemye fuka nu sin met puspus ke kut orala akwuk in eis baptais lasr? (b) Mea fwa aketeyuki ke me lutlut toko?
18 Wangin alolo ka, la baptais el ikasla inkanek nu ke me insemwomwo puspus, tusruktu sie met el enenu in nunku yok fwin el eis step se inge. (Luk 14:26-33) Ma inge akkalemyeyuk ke sie sulela lun sie met la el enenu in nunku yok ka liki na kutena orekma ku kunokon. (Luk 9:62) Ke kut eis baptais, kut oru na paye sie me akkalemye nu sin met puspus: “Tu God se inge El God lasr nu tok ma patpat. El fwa Met Kol lasr nu ke pal se kut mise.”—Sam 48:14.
19 Me lutlut toko kut fwa tuni kutupa kusensiyuk su ku in siyuk yok nu ke oiyen baptais ke kof. Ya oasr sripe puspus nu sin sie met elan tia nunku in eis baptais? Ya matwe lun met el sie sripe? Fuka met nukemwa ku in sang kasru nu ke saokiyen pal in baptais?
Ya Kom Ku in Aketeye?
• Efu ku kais sie met Kristian elos enenu in auliyuk meet liki elos eis baptais?
• Mea eneneyuk nu ke orekma in oru mwulela nu sin God?
• Kunokon puspus fuka weang orekma in us inen Jeova?
• Mea ku in akkeye kut in oru sulela in eis baptais?
[Box/Picture on page 13]
Kusensiyuk Luo Nu Ke Baptais
In fwal nu ke me kise lun Jisus Kraist, ya kom auliyuk tari liki ma koluk lom a mwulela moul lom sifwana nu sin Jeova in oru ma lungse lal?
Ya kom kalem ka la mwulela a baptais lom el me akul nu sum la kom ekla oana sie sin Met Lo lun Jeova in wi u lal su oasr me kasru lun ngun mutal ka?
[Petsa ke sra 14]
Mwulela el sie mwulela yok sripe nu sin Jeova ke inkanek lun pre
[Petsa ke sra 16]
Orekma lasr in luti peng mwo el akkalemye mwulela lasr nu sin God