Kas lun Jeova el Moul
Kas Fulat Su Tuku Ke Buk Aklimekosr lun Sam
SAAP oasr sie met kasrup el fwak: “Mwen natusr elos fwa oana sak tusak kapek in len fwusr lalos, a an natusr oana eot in srumwasrik tufwal tari oana fasin in loom sin togusra, ke niyen ma nas sesesla, . . . a sip natusr isus tausen.” Sayen ma inge, met kasrup se inge el ku in fwak: “Insemwomwo mutanfwal su oana inge yurolos!” Tusruktu nu ke oiya saye, met sim lun Sam el fwak: “Insemwomwo mutanfwal se su God el Jeova lalos!” (Sam 144:12-15) Fuka tu in ku in oinge? Jeova el sie God su tingtingi ke insemwomwo, a me insemwomwo el sang nu selos su alu nu sel. (1 Timote 1:11) Ma paye inge ku in liyeyuk ke buk safla ke on inge nukemwa, su mutamwauk ke Sam 107 nu ke 150.
Buk Aklimekosr lun Sam el akkalemye yok pa ke oiya mwomwo lun Jeova, wekunang lung-kulang lal, oiyen paye lal, a pakoten lal. Etauk yok lasr ke oiyen God, ku in kasre kut in akkalemye lungse a sangeng lasr nu sel. Ma inge ku in ase nu sesr me insemwomwo. Oasr sie kas su arulanu saok su kut ku pa in koneak ke Buk Aklimekosr lun Sam!—Hibru 4:12.
INSEMWOMWO KE SRIPEN LUNG-KULANG LUN JEOVA
“O ke met in kaksakin Jeova ke lungkulang Lal, a ke orekma sakuruk lal nu sin tulik nutin met,” pa inge kas su akkalemyeyuk ke on soko lun sie met Ju su folokla liki sruo lal fwin an Babulon. (Sam 107:8, 15, 21, 31) Ke pal se el kaksakin God, Devid el onkakin kas inge: “Tu lungkulang lom yok a fulat liki kosrao.” (Sam 108:4) Ke soko pa on lal, oasr pre lal akkalemyeyuk: “Kasre yu, O Jeova God luk; o moliyula fwal nu ke lungkulang lom.” (Sam 109:18, 19, 26) Sam ak 110 el akkalemye kas palu nu ke kolyuk lun Messaia. “Sangeng sin Jeova mutamweyen lalmetmet,” Sam 111:10 el akkalemye. Fwal nu ke kas lun sam tok an, el akkalemye ke kas inge, “Insemwomwo met se su sangeng sin Jeova.”—Sam 112:1.
Sam ak 113 nu ke 118 pangpang Sam in Hallel, ke sripen sam puspus inge orekmakin ke pal nukemwa kas inge “Hallelujah,” ku “Kaksakin Jah!” Fwal nu ke Mishnah—sie ma simusla ke century aktolu su kas matou in pal meeta simusyukla ka—el akkalemye la on puspus inge on kakinyuk ke pal in akfulat lun Alukela a ke kofwa tolu lun met Ju su orek ke yea nukemwa. Sam se su loes emeet liki sam nukemwa a sapta nukemwa in Baibel pa Sam 119, el akfulatye kas lun Jeova.
Kusensiyuk Puspus Ke Ma Simusla Eis Top Ka:
Sam 109:23—Mea kalmen kas lal Devid inge: “Nga wanginla oana sie ngun su srikeni”? Ke on lal Devid inge el akkalemye pulakin lal ke el pulakin mu mise lal arulanu apkurun.—Sam 102:11.
110:1, 2—Mea “Leum lal [Devid],” Jisus Kraist, el oru ke el muta lepo leyot sin God? Tokin ke sifwil moulyuk lal, Jisus el somwak nu in kosrao a muta ke lepo leyot sin God a sano nu ke yea 1914 in mutamwauk kolyuk lal oana sie Togusra. Ke lusen pal inge, Jisus el oru kolyuk lal nu sin met tuma lutlut akmusrala nukemwa lal, sang me kolyuk nu selos ke orekma in luti lalos a ke orekma lalos in oru met tuma lutlut a akoelosla in welul ke Togusrai lal.—Mattu 24:14; 28:18-20; Luk 22:28-30.
110:4—Ke oiya fuka Jeova el ‘fulak a el fwa tia auli ka’? Kas in fulak se inge pa mwuleang su Jeova el orala nu sin Jisus Kraist in kulansap oana sie Togusra a Met Tol Fulat.—Luk 22:29.
113:3—Ke inkanek fuka inen Jeova e fwa kaksakinyuk “ke fwatu takak nu ke tili”? In oru oiya inge enenu in oasr u puspus lun met su orek alu nu sin God ke kais sie len. Mutamwauk ke pal fwatu takak ke leyen kutulap nu ke el tili leyen roto, kalem lun fwatu sang tolak fwalu nufon. Ke inkanek oinge, Jeova el fwa kaksakinyuk fwin fwalu nufon. Ma inge tia ku in akpayeyuk fwin wangin kaifweang lun sie u orek. Oana Met Lo lun Jeova, oasr kunokon saok lasr in kaksakin God a moniyuk in wi pal nukemwa ke orekma in sulkakin Togusrai.
116:15—Fuka lupan ‘saok ye mutun Jeova mise lun met mwo lal’? Met nukemwa su alu nu sin Jeova elos arulanu yok sripe nu sel paenang el nunku ke mise lalos oana sie u, sie ma su arulanu saok paenang el fwa tia lela met nukemwa lal in mise. Fwin Jeova el lela ma inge in sikyak, e fwa oasr nunkeya mu met lokwalok lal elos ku lukel. Sayen ma inge, e fwa wanginla met kulansap lal lula fwin fwalu oana sie foundeson ku sie u lun metu nu ke fwal sasu.
119:71—Ma mwo fuka ku in tuku ke me keok ku ongoiye? Ma upa puspus ku in luti kut in tupan yok Jeova, in pre nu sel ke inse kemwa lasr, a in alken in lutlutkin Baibel a orekmakin ma el akkalemye. Sayen ma inge, oiya se su kut akkalemye fwin oasr me keok ku oiya sesumwos lasr ma inge ku in aksumwosyeyuk. Me keok fwa tia ku in oru kut in pulakin toasr fwin kut aksumwosyeyuk ke ma inge.
119:96—Mea kalmeyen kas inge ‘saflaiyen sumwosmwos nu kemwa’? Met sim lun sam el kaskaskin oiyen sumwosmwos ke inkanek in liye lun metu. Saap oasr pa ke nunak lal ke oiyen etauk lun metu nu ke oiyen sumwosmwos la el arulana srikla. Ke oiya se su tia oana sie, masap lun God el ku in orekmakinyuk nu ke ma nukemwa. Me kolyuk su tuku ke masap lal ku in orekmakinyuk nu ke inkanek nukemwa lun moul. In oana fus inge ke leng lun Baibel inge su pangpang New International Version el akkalemye, “Nga liye tari saflaiyen sumwosmwos nu kemwa; a ma sap Lom arulana sralup.”
119:164—Mea yok sripaiyen orekma in kaksakin God “pal itkosr in len se”? Numbu se inge itkosr, pal nukemwa el akkalemyeyuk nu ke sie orekma su orek ku akpayeyuk ke inkanek nukemwa. Ke ma nge, met sim lun sam el akkalemye la Jeova el fwal in eis kaksak nukemwa ke oiya nukemwa.
Me Lutlut Nu Sesr:
107:27-31. Lalmetmet lun fwalu e fwa ‘wanginla’ ke pal se Armagedun el sikyak. (Fwakyuk 16:14, 16) Lalmetmet lun fwalu tia ku in molela kutena met liki kunausten. Met nukemwa su ngetak nu sin Jeova mukena ke me molela elos fwa moul in “kaksakin Jeova ke lungkulang lal.”
109:30, 31; 110:5. Lepo leyot lun sie met meun su orekmakin kutlas tia eis me kasru lun me loeyuk nu ka, su oasr ke lepo lese. In oana ke kas in pupulyuk, Jeova el oasr ke “lepo leyot” sin met kulansap nukemwa lal, in kasrelos ke meun. Ke ma inge el sang nu selos me karungin a me kasru—sie sripe mwo nu sesr in “kaksakin [el] ma lulap”!
113:4-9. Jeova el arulanu fulat paenang el enenu in akpusiselyel sifwana in “liye ma in kosrao.” Ne oinge, el akkalemye pakoten nu sin met pusisel, met sekasrup, a nu sin mutan tulap. Leum Jeova el inse pusisel a el lungse met kulansap nukemwa su alu nu sel in akkalemye pa oiya mwo inge nu sin met pusisel, met sekasrup, a nu sin mutan tulap nukemwa.—Jemes 4:6.
114:3-7. In lotela ke orekma mwolena nukemwa su Jeova el orala in sang kasru met kulansap nukemwa lal ke Mwea Srusra, ke Infwal Jordan, a ke Eol Sainai ku in akkeye kut na paye. “Fwalu” su lumeyuk nu sin metu, enenu in akkalemye sunak wi sangeng—oana ke kas in pupulyuk elos “rarrar” ku pulakin ngal upa—ke sripen Leum.
119:97-101. In eis lalmetmet, liyaten, a etauk ke Kas lun God ku in karungin kut liki me sensen lun ngun.
119:105. Kas lun God el sie lam nu ke niyesr ke ma inge el ku in kasre kut in muteng a kutangla kain in ma upa puspus ke pal inge. Ke kas in pupulyuk el sang pa kalem nu ke inkanek lasr, ke sripen el palye akwuk lun God nu ke pal fwasru.
ENGAN FWINNE OASR MA UPA PUSPUS
Fuka kut ku in muteng ke ma sikyak puspus su oasr me srife a in kutangla ma upa puspus? Sam 120 nu ke 134 el sang me top mwomwo nu ke kusensiyuk inge. Kut ku in kutangla kain in ma upa nukemwa a sruokye engan lasr fwin kut ngetak nu sin Jeova in suk kasru lal. Sam puspus inge, su pangpang On puspus su Onkakinyuk ke Elos Fwufwasryesr nu in an fulat inge Jerusalem, saap met Israel elos onkakin ke elos fwufwasryesr nu ke an fulat inge ku in an Jerusalem in akfulatye kofwa lalos su orek ke yea nukemwa.
Sam ak 135 a 136 el akkalemye Jeova oana Met Orala ma nukemwa su akinsemwomwoyel, a tia oana sie nu ke ma srolela su wangin moul yuru a tia ku in oru kutena orekma. Sam ak 136 el orekla nu sin met su orekmakin on puspus, saflaiyen kais sie fus el onkakin me top nu ke ma se meet. Sam toko el akkalemye ke ma su sikyak upa nu sin Met Ju in an Babulon su lungse in orek alu nu sin Jeova in Saion. Sam ak 138 nu ke 145 pa on lal Devid. El lungse in ‘kaksakin Jeova ke insiel kemwa.’ Efu? Meyen “Kom oreyula luman in sie oiyen me aksangeng a me lut,” el fwak. (Sam 138:1; 139:14, NW) Ke sam limekosr toko, Devid el pre ke me karunginyuk liki met koluk puspus, ke me aksumwos mwomwo, ke molela liki met lokwalok, a ke me kolyuk ke nu ke oiya. El akkalemye yok ke me insemwomwo lun met kulansap nukemwa lun Jeova. (Sam 144:15) Tokin el kalweni oiya kulang a yok lun God, Devid el fwak: “Oalik a fwa kaskas a kaksakin Jeova; a lela ikwe nu kemwa in akinsemwomwoye El mutal nu tok ma patpat.”—Sam 145:21.
Kusensiyuk Puspus Ke Ma Simusla Eis Top Ka:
122:3—Ke inkanek fuka Jerusalem el sie siti su “loom we fusus” [tukeni nu sie ke inse sefwanna, NW]? In oana ke oiya su sikyak ke siti puspus in pal meeta, loom puspus in an Jerusalem musaiyukla apkurun nu sin sie sin sie. Loom ke siti inge fusus a tukeni nu sie a ke sripe se inge fusasr in karunginyuk liki met lokwalok. Sayen ma inge, ke sripen loom selos apkurun nu sin sie sin sie paenang oiya inge sang kasru nu sin met nukemwa su muta ke siti in tupan sie sin sie ke me kasru a me loeyuk. Ma inge akkalemye inse sefwanna lun ngun nu sin sruf 12 lun Israel ke pal se elos oru tukeni lalos nu sie in orek alu.
123:2—Me lutlut fuka oasr ke me pupulyuk lun mutun met kulansap puspus? Met kulansap mokul a mutan elos tupan kolyuk lun sie leum ke sripe luo: in etu ma el lungse a in eis me karungin a me enenu lun moul. Ke oiya oinge, kut tupan Jeova in akkalemye ma lungse lal a in eis me insemwomwo lal.
131:1-3—Fuka Devid el ‘mutengla a akmisye ngunal oana sie tulik su liktitla yurin nine kiel’? In oana sie tulik su liktitla el lutlut in suk misla a me insemwomwo ke poun nine kiel, Devid el lotela in akpwarye a akmisye ngunal “oana sie tulik su liktitla yurin nine kiel.” Ke inkanek fuka? Tia ke inkanek in akkalemye inse fulat ke inse a muta fulang a tia in suk ma puspus su arulanu yok sripa nu sel. Devid el tia suk inkanek tu el an pengpeng, a el akilen pal nukemwa me munas lal a el akkalemye inse pusisel. Kut lalmetmet kut fwin etawi oiya lal, yokna ke kut kaifweang in sun ku eis kunokon puspus ke congregation.
Me Lutlut Nu Sesr:
120:1, 2, 6, 7. In orek lesrik akkolukye sie met a angonkas ku in oru ma upa ku asor yok nu sin met puspus. In karungin loasr in tia kaskaskin kas oinge pa sie inkanek in akkalemye la kut “lungse misla.”
120:3, 4. Kut fwin pulakin me asor ku keok ke sripen me akkoluk su tuku ke “loa kutasrik” lun sie met, kut ku in eis me akkeye in etu la Jeova el fwa aksumwosye ma inge ke pal pakiyuki lal. Met lesrik nukemwa fwa sun ongoiye ke poun “sie met ku.” Elos fwa eis nununku upa lun Jeova su pupulyukkinyuk nu ke “molut lun [sak] juniper.”
127:1, 2. Ke kaifweang lasr nukemwa, kut enenu in suk me kasru lun Jeova.
133:1-3. Inse sefwanna lun met kulansap nukemwa lun Jeova el sropon misla, me akinsemwomwo, a me akkeye. Kut tia enenu in akkolukye ma inge ke kut lungse in suk ma tafongla lun met lili, in alein, ku in torkaskas.
137:1, 5, 6. Met nukemwa su alu nu sin Jeova su muta ke sruo lun mutanfwal saye elos lungse na paye in alu nu sel in an Saion—u lun God fwin fwalu in pal ingo. Fuka nu sesr? Ya kut akkalemye oaru lasr in wi pal nukemwa nu ke u su Jeova el orekmakin ke pal inge?
138:2. Jeova el ‘akfulatye kas lal sifwana yok liki inel’ meyen me akpayeyen ma nukemwa su el mwulela ke inel e fwa alukela ma kut tupan ka. Paye la, oasr fwinsrak na mwomwo su sano kut ke pal fwasru.
139:1-6, 15, 16. Jeova el etu orekma nukemwa lasr, nunak lasr, a kas lasr fwinne meet liki kut kaskaskin ma inge. El etekut ke kut orekla in lukma, meet liki laa nukemwa lasr orekla. Etauk lun God kesr in oana met se met se el “arulanu me lut” ku ma sakuruk nu sesr kut fwin kalem ka. Sie me insemomwo in etu la Jeova el tia liye ma sikyak upa mukena su kut sun a el etu pa fwako koluk lun ma inge nu sesr!
139:7-12. Nu ke yen nukemwa kut som nu we ma inge tia arulanu loes nu sin Jeova in akkeye kut.
139:17, 18. Ya etauk lun God me akinsemwomwo nu sesr? (Soakas 2:10) Fwin oinge, kut koneak sie me insemwomwo su oasr pal nukemwa. Nunak lun Jeova “piselos pus liki puku.” Oasr ma puspus pal nukemwa su kut ku in lotela kel.
139:23, 24. Kut lungse Jeova in tuni nunak lasr a insiesr ke oiyen ‘innek koluk’—ku nunak koluk, kena koluk a lungse koluk a in kasre kut in akwanginyela ma inge nukemwa liki kut.
143:4-7. Fuka kut ku in muteng fwinne ke me keok upa puspus? Met sim lun sam el ase nu sesr key mwomwo tu kut in ku in muteng: Nunku ke orekma nukemwa lun Jeova, kut karungin kut sifwana in sang me kasru nu ke orekma nukemwa lal, a pre nu sel in siyuk ke kasru.
“Komwos in Kaksakin Jeova!”
Buk akosr meet lun sam el aksafyeyukla ke kas in kaksak nu sin Jeova. (Sam 41:13; 72:19, 20; 89:52; 106:48) Buk safla ku buk aklimekosr inge el aksafyeyukla pa ke kas in kaksak nu sel. Sam 150:6 el akkalemye: “Lela ma nu kemwa su oasr momong la—in kaksakin Jeova. Komwos in kaksakin Jeova!” Ma inge fwa akpayeyuk ke fwal sasu lun God.
Ke kut tupan ke pal fwasru mwolana inge, oasr sripe mwo puspus lasr in akmutalye God paye a in kaksakin inel. Ke kut nunku ke me insemwomwo su kut pulakin meyen kut etu Jeova a engankin sie oiya nu ke futoto mwomwo lasr nu sel, ya kut tia akkeyeyuk in kaksakunal a sang kulo ke insiesr kemwa?
[Petsa ke sra 29]
Orekma mwolana nukemwa lun Jeova arulana sakuruk
[Petsa ke sra 31]
Nunak lun Jeova el “pus liki puku”