Kom ac Luti Fuhkah Tuhlihk Nuhtum An

Ke pacl se Jeova el oakiyac moul in sucu uh el oraclah tuh tuhlihk uh in muhta ye karihngihnyuck luhn pahpah ac ninac se. (Colossae 3:20) Pahpah ac ninac, ma kunomtacl pa in ahkpahye tuhlihk nuhtumtacl an in luhngse Jeova ac in eklac sie mwet mahtuh suc pah in nuhnak ac orekma. (Luo Timothy 1:5; 3:15) Kom enenuh pac in etuh ma oan ke insiacn tuhlihk nuhtum an. Pwacye lah mwe srihkasrak lom an arlacna yohk srihpac pac. Inkacnek se ma wo emeet kom in luti tuhlihk nuhtum an kac uh, pa ke kom fihliyac meet Kahs luhn Jeova ke insiom.​—Psalm 40:8.

1 ORUH IN FIHSRACSR NUH SIN TUHLIHK NUHTUM AN IN SRAMSRAM NUH SUM

MA BIBLE UH FAHK KAC: “Enenuh in sa lohng, ac tiac sa in kahskahs.” (James 1:19) Ma kom ke uh pa tuhlihk nuhtum an in sukohsohk in sramsram nuh sum ke kuhtwena ma. El enenuh in etuh lah kom ahkolah in porongo ke pacl el enenuh in sramsram nuh sum an. Oruh elan puhla mislac tuh in fihsracsr nuh sel in fahk ma el puhla an. (James 3:18) El fin puhla muh kom ac kohu kuh nuhnuhnkwacl ke ma el ac fahk uh, sahp ac upac nuh sel in fahk ma el puhla na pwacye uh. Sikaleni in ahkkahlwemye luhngse ac mongfihsracsr nuh sin tuhlihk nuhtum an.​—Matthew 3:17; Sie Corinth 8:1.

MA KOM KUH IN ORUH:

• Sackuhnlah pacl lom nuh sin tuhlihk nuhtum an el fin enenuh in sramsram nuh sum

• Sramsram nuh sin tuhlihk nuhtum an pacl nuhkewa, a in tiac ke pacl na ma oasr ma upac lal

2 SRIHKE KOM IN KAHLWEM KE MA ELTAHL KE FAHK NA PWACYE AN

MA BIBLE UH FAHK KAC: “Sie mwet lahlmwetmwet akihlenyuck ke etwacack lal . . . ac insewowo.” (Soakas 16:20) Kuhtuh pacl uh kom enenuh in lohacng ac kahlwem ke ma el fahk an tuh kom in etuh na pwacye ke ma el puhla uh. Tuhlihk uh kwacna laheslah ma na pwacye uh kuh fahk ma eltahl tiac puhla na pwacye. “Porongo meet liki kom topuk. Kom fin tiac oruh ohinge, kom oacna sie mwet lahlfon.” (Soakas 18:13) Nik kom sa in foloyak.​—Soakas 19:11.

MA KOM KUH IN ORUH:

• Finne meac tuhlihk nuhtum an fahk, nik kom tulokihnyac sramsram lal an kuh ahkkahlwemye ma kom puhla an

• Srihke kom in esam ma kom puhla ke kom oacna matwacl ac ma yohk srihpac nuh sum in pacl sac

3 AHKKAHLWEMYE LAH KOMTACL INSESE

MA BIBLE UH FAHK KAC: “Tuhlihk nuhtihk, lohng kahs in luti luhn pahpah tuhmom ac ninac kiyom.” (Soakas 1:8) Jeova el sang kuh nuh sin pahpah ac ninac fin tuhlihk nahtuhltahl uh. Kom enenuh in luti tuhlihk nuhtum an in suhnakihn kom ac ahkos ma kom fahk uh. (Ephesus 6:1-3) Tuhlihk uh kuh in akihlen fin pahpah ac ninac uh tiac “nunak sefanna.” (Sie Corinth 1:10) Kom fin tiac insese nuh sin sie sin sie, nik kom oruh ma inge in kahlwem ye muhtuhn tuhlihk nuhtum an mweyen ac kuh in wacngihnlac suhnak lal nuh sumtacl.

MA KOM KUH IN ORUH:

• Tuhkweni sramsram ac inseselac lah komtacl ac kai fuhkah tuhlihk nuhtumtacl an

• Fin nuhnak lomtacl nuh ke ahkpahyeyacn tuhlihk nuhtumtacl an tiac oacna sie, kwacfeacng kom in kahlwem ke liye luhn mwet se sahyac an

4 ORUH IN OASR OAKWUCK LOMTACL

MA BIBLE UH FAHK KAC: “Luti nuh sin sie tuhlihk inkacnek fal elan fahsr kac.” (Soakas 22:6) Tiac kuh in oasr etwacack luhn tuhlihk nuhtumtacl an kom fin tiac lotweltahl. Enenuh in oasr oakwuck lomtacl in ahkpahye ac kai tuhlihk nuhtumtacl an. (Psalm 127:4; Soakas 29:17) Tiac kalmen kai pa kom in oneltahl, a kom in ahkuhtweyac in kahlwem srihpac pwacnacng kom oraclah oakwuck sacn. (Soakas 28:7) Oacyacpac, lotweltahl in ahksacohkye ac in kahlwem ke kahs in kahsruh luhn Jeova ke Bible uh. (Psalm 1:2) Pa inge ma ac kahsreltahl in ahkkapye nuhnak ac puhlakihn (conscience) laltahl uh.​—Hebrew 5:14.

MA KOM KUH IN ORUH:

• Kahsruh tuhlihk nuhtumtacl an in luhlahlfongi God oacna sie mwet na pwacye ma eltahl ngwetack nuh se

• Kahsreltahl in etwaclah in akihlen ac fahsr liki mwe sensen, oacna ma oan ke website pucspucs ke internet. Lotweltahl in sensenkihn ac fahsr liki mwet suc ac kuh in ahkkulukye mahnoltahl