Ke Pacl Ma Upac uh Sikyak

Kom finne kwacfeacng in oruh moul in pahyuck ac sucu lom an in insewowo, oasr pacl ma kom tiac motko muh ma uh ac sikyak a sikyak. Ac ma inge kuh in ahkahsorye kom. (Ecclesiastes 9:11) Ke srihpen luhngse luhn God, el use mwe kahsruh nuh sesr ke pacl kuht sun ma upac uh. Kom fin ukwe kahs in kahsruh ke Bible uh, kom ac sucu lom an ac kuh in muhtwacnglah ke kain in ma na upac.

1 LUHLAHLFONGI JEOVA

MA BIBLE UH FAHK KAC: “Sang mwe fosrngah lowos nuhkewa nuh sel, mweyen el nuhnke kowos.” (Sie Peter 5:7) Nik kom muhlkuhnlah lah tiac God pa sropon ma upac lom an. (James 1:13) Ke kom fototoyang nuh sel, el ac fah kahsre kom ke inkacnek se ma wo emeet uh. (Isaiah 41:10) “Fahkwacng mwe fosrngah lowos nuhkewa nuh sel.”​—Psalm 62:8.

Kom ac kuh pac in puhla mislac ke kom riti ac lutlutkihn Bible nuhtum an lwen nuhkewa. Ma wo kac uh pa kuht ac kuh in puhla inkacnek luhn Jeova ke el “kahsre kuht in mwe lokoalok nuhkewa lasr.” (Luo Corinth 1:3, 4; Rome 15:4) God el wuhlelah muh el ac usot ‘mislac lal, suc yohk liki ma mwet uh kuh in kahlwem kac.’​—Philippi 4:6, 7, 13.

MA KOM KUH IN ORUH:

• Puhruhe ac siyuck Jeova elan kahsre kom in nuhnkuh ahkwoyac ac in tiac fosrngah

• Nuhnkuh ke inkacnek nuhkewa ma ikacklah nuh sum an ac sulaclah ma se ma wo emeet uh

2 KARIHNGIHN KOM AC SUCU LOM AN

MA BIBLE UH FAHK KAC: “Sie mwet lahlmwetmwet el suk in ahkyohkye etwacack lal pacl nuhkewa.” (Soakas 18:15) Srihke kom in kahlwem ke ma nuhkewa ma sikyak an. Konwacack lah meac kais sie mwet in sucu lom an enenuh. Sramsram nuh seltahl ac lohacng nuh ke ma eltahl ac fahk uh.​—Soakas 20:5.

Ac fuhkah fin sie mwet lom misac? Nik kom sruok kuh wihkkihn ahsor lom an. Esam lah “Jesus el tuhng” pac. (John 11:35; Ecclesiastes 3:4) Yohk srihpac in oraclah pacl fal nuh ke monglac ac mutul lom an. (Ecclesiastes 4:6) Ma inge ac oruh in tiac upac nuh sum in muhtwacnglah kuhtwena ma upac kom sun uh.

MA KOM KUH IN ORUH:

• Oruh sucu lom an in pahlah ke tuhkweni muhta sramsram uh. Pwacnacng, ke pacl se ma upac uh sikyak ac fihsracsr nuh seltahl in sramsram nuh sum kac

• Sramsram nuh sin kuhtuh pac mwet sahyac suc sun tari ma upac ingacn

3 EIS KAHSRUH MA KOM ENENUH AN

MA BIBLE UH FAHK KAC: “Mwet kawuck uh ahkkahlwemye luhngse lalos pacl nuhkewa. Ma kunen sucu [mwet lili] uh in akacsruhi ke pacl upac.” (Soakas 17:17) Kawuck lom uh arlac ke kahsre kom, tuh sahp eltahl tiac etuh lah meac eltahl kuh in kahsre kom kac. Pwacnacng, fahk ma kom enenuh na pwacye an. (Soakas 12:25) Oacyacpac, suk kahsruh sin mwet suc kahlwem na pwacye ke Bible uh, lah kom ac orekmakihn fuhkah kahs in kahsruh inge ke moul lom an. Kahs in kahsruh ma eltahl ac usot nuh sum ke Bible uh ac kahsre kom.​—James 5:14.

Kom ac kuh in konwacack kahsruh ma kom enenuh uh ke pacl ma kom asruoki pacl nuhkewa nuh sin mwet suc oasr na pwacye luhlahlfongi la nuh sin God ac ke wuhlelah pucspucs lal uh. Kom ac fah oacyacpac puhla mislac ac engan ke pacl ma kom kahsruh mwet sahyac suc enenuh mwe ahkkweye. Ahkkahlwemye luhlahlfongi lom kacl Jeova ac ke wuhlelah pucspucs lal uh nuh seltahl. Oruh kom in kahfofo ke kom kahsruh mwet sahyac suc enenuh ac nikmet srikomlac liki mwet suc luhngse kom ac nuhnkuh yohk keim.​—Soakas 18:1; Sie Corinth 15:58.

MA KOM KUH IN ORUH:

• Sramsram nuh sin sie mwet suc kom fototo nuh se an ac eis kahsruh sel

• Fahk in kahlwem ac suwohs ma kom enenuh an