Ahwowo uh Ekuhllah Moul in Pahyuck uh

Isuslac luhn sie tuhlihk mwe engan se nuh sin siacnyacn se. Kom ac kuh in lut kac lah inkaiyen pacl ac kuh lom uh som nuh ke karihngihnyen tuhlihk nuhtum an. Ke srihpen srihklac pacl in mutul lom ac puhlakihn lom an ac wac ekyek, ma inge ac kuh in ma upac se nuh ke moul in pahyuck lom an. Kom ac mukul tuhmom kuh muhtwacn kiyom an kewa na ac enenuh in ekuhllah ma pucspucs ke moul lomtacl an tuh komtacl in karihngihn ahwowo nuhtumtacl an ac karuhnguhnwacng moul in pahyuck lomtacl an. Kahs in kahsruh ke Bible uh ac kahsre kom fuhkah in kuhtanglah ma upac inge?

1 SRIHKE IN KAHLWEM KAC LAH TUHLIHK UH EKUHLAH MOUL LOM UH FUHKAH

MA BIBLE UH FAHK KAC: “Luhngse el mongfihsracsr ac kuhlwacng.” Oacyacpac, luhngse “el tiac nuhnkuh kacl sifacna, el tiac sa in muhlat.” (Sie Corinth 13:4, 5) Ke srihpen kom eklac sie ninac, kom ac arlacna lohacng nuh sin ahwowo se nuhtum an. Tuhsruhktuh, mukul tuhmom an ac kuh in puhla muh wacngihnlac pacl lom nuh sel. Pwacnacng, nik kom muhlkuhnlah lah el enenuh pac kom in lohacng nuh sel. Ahkkahlwemye ohiyen mongfihsracsr ac kuhlwacng ke pacl se kom kahsrel in puhla lah kom enenwacl ac el enenuh pac in karihngihn tuhlihk nuhtumtacl an.

“Mukul pahyuck uh kowos in muhta yurin muhtwacn kiowos, . . . oraclos in wo.” (Sie Peter 3:7) Kom enenuh in kahlwem kac lah muhtwacn kiyom an ac enenuh in sang inkaiyen pacl lal an nuh sin ahwowo se nuhtumtacl ingacn. Ke oasri kunohkohn sasuc se lal ingacn, oasr pacl el ac puhla muh el ullac, tohtohlah ac kuhtuh pacl uh el ac suhpwacr. Ke kais kuhtuh pacl, el ac kuh pacna in foloyak sum. Tuhsruhktuh, srihke kom in oruh in mislac inmahsrlomtacl mweyen in “mongfihsracsr wo liki orek kuh.” (Soakas 16:32) Oruh kom in liyactwen ac sang kahsruh kuh ahkkweyacl ke pacl ma el enenuh an.​—Soakas 14:29.

MA KOM KUH IN ORUH:

• Pahpah: Kahsruh muhtwacn kiyom an in karihngihn ahwowo nuhtumtacl an, finne ke fong. Ahksrihkyelah pacl ma kom sislah ke kuhtwena ma sahyac tuh kom in kuh in sang pacl lom nuh sin muhtwacn kiyom ac ahwowo nuhtum an

• Ninac: Ke pacl se mukul tuhmom an siyuck elan kahsre kom in wi karihngihn ahwowo sacn, nik kom fohlohkihn. El fin tiacna oraclah wo, nik kom ahkkulukyacl. Tuhsruhktuh, ahkkahlwemye kuhlwacng ke pacl se kom oruh elan liye lah ac orek fuhkah

2 AHKFOTOTOYE INMAHSRLOMTACL

MA BIBLE UH FAHK KAC: “Eltahl ma sefannalac.” (Genesis 2:24) Finne oasri mwet sasuc se ke sucu lomtacl an, esam lah kom ac mukul tuhmom kuh muhtwacn kiyom an srackna “ma sefanna.” Kwacfeacng in ahkfototoye inmahsrlomtacl in muh kuh pacl nuhkewa.

Muhtwacn kiyac, ahkkahlwemye lah kom srui ke kahsruh ac ahkkweye luhn mukul tuhmom an. Ke kom ahkkahlwemye nuh sel srui lom an, ac fah kuh in “unwelah” kuh ahkfototoye inmahsrlomtacl. (Soakas 12:18) Mukul tuhma, ahkkahlwemye nuh sin muhtwacn kiyom an luhpan luhngse lom nuh sel ac lah kom ahksacohkyacl. Kaksakuhnuhl ke ma el oruh in sang karihngihn sucu lomtacl an.​—Soakas 31:10, 28.

“Wacngihn sie mwet in suk ma ac wo nuh sel sifacna, a elan suk ma ac wo nuh sin mwet ngiac.” (Sie Corinth 10:24) Pacl nuhkewa, oruh ma ac wo emeet nuh sin mukul tuhmom kuh muhtwacn kiyom an. Oraclah pacl komtacl in tuhkweni muhta sramsram, kaksakihn ac porongo sie sin sie. Nik kom nuhnkuh keim sifacna ke pacl in tuhkweni lomtacl ke mahno. Nuhnkuh ke mwe enenuh luhn mwet se sahyac an. Bible uh fahk: “Nimet srahngesr in ahkfalye enenuh luhn sie sin sie, sahyacn komtacl fin inseselac.” (Sie Corinth 7:3-5) Pwacnacng, tuhkweni sramsramkihn ma inge ac fahk nuh sin sie sin sie ke ma komtacl puhla na pwacye kac uh. Ke kom mongfihsracsr ac ahkkahlwemye lah kom kahlwem ke puhlakihn luhn mwet se sahyac an, ma inge ac ahkfototoye inmahsrlomtacl.

MA KOM KUH IN ORUH:

• Nik kom muhlkuhnlah in oraclah pacl nuh sumtacl sifacna

• Kom kuh in ahkkahlwemye luhngse nuh sin mukul tuhmom kuh muhtwacn kiyom an ke kom oruh kais kuhtuh ma oacna ke kom suhmuhslah sie pohloh kahs kuh sie mwe sang srihsrihk an nuh sel

3 AHKPAHYE AHWOWO NUHTUM AN

MA BIBLE UH FAHK KAC: “Ke pacl se kom tuhlihk me kom nuh na etuh ke Ma Suhmuhslah muhtahl, suc kuh in acsot nuh sum lahlmwetmwet in kol kom nuh ke molwelah.” (Luo Timothy 3:15) Ahkolah nuh ke ma kom ac oruh in luti tuhlihk nuhtum an. El kuh in lotwelah ma pucspucs, meet liki pacna el isuslac. Ke pacl se ahwowo nuhtum an srackna oan ke insiom, el ac kuh in akihlen puhsremtacl ac tihpihr kuh mukwi nuh kac. Rit nuh sel ke el srackna tuhlihk. El finne tiac kahlwem ke ma kom riti an, ma inge ac kuh in kahsrel in pwacr in rit ke pacl se el mahtuhlah uh.

Tuhlihk se el finne srackna ahwowo, kom srackna kuh in sramsram nuh sel ke God. Oruh elan lohng ke pacl se kom puhruhe nuh sin Jeova uh. (Deuteronomy 11:19) Ke pacl ma komtacl tuhkweni sritacl uh, sramsram nuh sel ke ma pucspucs ma God el oraclah uh. (Psalm 78:3, 4) Ke tuhlihk nuhtum an kapkapack, el ac puhla luhngse lom nuh sin Jeova ac etwaclah in luhngse pac el.

MA KOM KUH IN ORUH:

• Puhruhe ac siyuck ke lahlmwetmwet tuh kom in ahkpahye ahwowo nuhtum an

• Kalweni kahs ma yohk srihpac uh nuh sin ahwowo nuhtum an tuh elan sa na etwaclah