Musaiyuk Sie Sou Su Fukoko In Ngun
“A komwos oakoakelos in kai a kaiyuk lun Jeova.”—EFESUS 6:4.
1. Mea akmwuk lun God ke sou, tusruktu mea sikyuk?
“KOMWOS IN KAPEK, a yokelik a nekla fwalu.” (Genesis 1:28) Ke kas inge nu sel Edam a If, Jeova God el oakiye akmwuk lun sou. (Efesus 3:14, 15) Ke pal se elos ngetla nu ke pal fwasru, seanyen se meet inge elos ku in liye sie arurumu ke sie fwalu su nenela ke tulik nutulos—sou puspis sumwosmwos elos muta insemwomwo ke sie paredais fwin fwalu a srukye inse siefwunnu in alu nu sin Met Pengpeng su Orelosla. Tusruktu, Edam a If elos putatyung nu ke ma koluk, a fwalu se inge tia nenela ke met sumwosmwos, su sangeng sin God. (Rom 5:12) A, moul in sou musalla ke pal sa na, srunga, orekma silolel, a “tia lungse in sou lalos sifwanu” arulanu pengpeng, yokna ke “len safla se inge.”—2 Timote 3:1-5; Genesis 4:8, 23; 6:5, 11, 12.
2. Ku fuka oasr yurin tulik nutul Edam nu kemwa, tusruktu mea ma inge su eneneyuk in musaiyuk sie sou su fukoko in ngun?
2 Edam a If elos orekla in luman God. Elos fwinne ekla sie met koluk ke pal inge, tusruktu Jeova el lela Edam el an orala fwako lal. (Genesis 1:27; 5:1-4) Oanu papa tumalos, tulik nutul Edam nu kemwa oasr oiyen moul a elos ku in lutlut in akilen piye ma mwo a piye ma koluk. Elos ku in lutiyuk in alu nu sin Met Orelosla a ke ma saok su tuku ke lungse lalos nu sel ke insielos kemwa, ngunalos kemwa, a ku lalos kemwa. (Mark 12:30; Jon 4:24; Jemes 1:27) Sayen ma inge, elos ku in eis akpa “in oru ma sumwos, a in lungse kulang a in fwasr wi inse fwokpap yurin . . . God.” (Maika 6:8) Tusruktu, oanu sie met koluk, elos enenu in kaifweung na paye in musaiyuk sie sou su fukoko in ngun.
Molela Pal
3. Fuka papa a nine elos ku in ‘molela pal’ ke orekma in liaung tulik Kristian?
3 Ke pal in ma upa inge, kaifweung yok eneneyuk in kasru tulik nu kemwa in ekla sie met su “lungse Jeova” su “srunga ma koluk.” (Sam 97:10) Papa a nine su lalmetmet elos fwa ‘molela pal’ in oru kunokon upa inge. (Efesus 5:15-17) Kom fwin sie papa ku nine, fuka kom ku in oru ou inge? Ma se meet, oakiye ma yok emeet, loang nu ke “ma mwo emeet,” wekunang orekma in luti a sang akpa nu sin tulik nutum. (Filippai 1:10, 11) Ma se akluo, oru in fwusesr ma nu kemwa ke oiyen moul lom. Saap kom ku in sisla kutu orekma su tianu yok sripe. Ku saap kom enenu in sisla ma puspis lom su wangin sripe su ku in eisla pal lom ke kom liaung ma inge. Oanu papa a nine Kristian, kom fwa tia auli ke kaifweung su kom enenu in oru in kasru tulik nutum in kapek fwal nu ke inkanek lun God.—Soakas 29:15, 17.
4. Fuka sie sou ku in kurunganang in srukye inse siefwunnu?
4 Orekmakinyen pal nu sin tulik nutum, yokna ke ma lun ngun, oasr ma lane yok su kom ku in eis a pa inge inkanek mwo emeet in orala sou lom in tukeni muta inse siefwunnu. Tusruktu, lela kom in tia sano in oasr pal lom kom fwa oru ou inge. A, pakiye pal su kom ku in orekmakin nu selos. Ma inge tia kalme pa komtel in tukeni muta ke sie loom a kais sie oru orekma su akinsemwomwoye met se met se. Tulik srisrik nu kemwa elos kapek mwo fwin oasr kurunginyelos mwo ke len nu kemwa. Lungse a nunuk yok enenu in akkalemye ke inkanek yok. Meet liki elos sulela in oasr fwako lalos, seanyen nu kemwa enenu meet in nunku yok ke kunokon saok inge. (Luk 14:28) Ke ma inge elos tia ku in nunku mu liyeang tulik el tia sie orekma yok. A, lela elos in nunku ma inge oanu sie me sang insemwomwo.—Genesis 33:5; Sam 127:3.
Luti ke Kas a Me Srikasrak
5. (a) Luti nu sin tulik srisrik in lungse Jeova mutamwauk ke mea? (b) Kain in kai fuka etukyung nu sin papa a nine in Duteronomi 6:5-7?
5 In luti tulik nutum in lungse Jeova ku in mutamwauk ke me srikasrak lom sifwanu in lungse God. Sie lungse fukoko nu sin God ku in mokle kom in akos ma sap lal nu kemwa ke paye. In wekunang ma inge pa in kasru tulik ke inkanek in “oakoakelos in kai a kaiyuk lun Jeova.” (Efesus 6:4) God el kai papa a nine in sang me srikasrak mwo nu sin tulik nutulos, in sramsram nu selos ke insielos, a in luti nu selos. Duteronomi 6:5-7 el fwak: “A kom fwa lungse Jeova God lom ke insiom kemwa, a ke ngunom kemwa, a ke ku lom kemwa. A kas inge, su Nga sapkin nu sum misinge, fwa on insiom; a kom fwa alken in luti ma inge nu sin tulik nutum, a kom fwa kaskas ka ke kom muta in loom sum, a ke kom fwasr inkaneku, a ke kom onu, a ke kom tukakek.” Ke inkanek in kalweni su kom oru pal nu kemwa, kom ku in filiye ma sap lun God ke insien tulik nutum. Ke ma inge, tulik nutum elos ku in akilen lungse lom nu sin Jeova a, elos ouyepa etawi in akyokye moul futoto lalos nu sel.—Soakas 20:7.
6. Fuka papa a nine elos ku in orekmakin pal mwo ke ma paye la tulik nutulos ku in lutlut ke me srikasrak lalos?
6 Tulik srisrik nu kemwa insemwomwo in lutlut, elos lungse in long a tuni a sa in srukye ku etawi me srikasrak lom. Ke pal se elos liye la kom tia lungse ma lun fwalu, ma inge ku in kasrelos in lutlut in akos kas in kai lal Jisus. Kom luti nu selos in tia fosrnga alukela ma fwal ke ma puspis lun fwalu, a elos in ‘suk meet togusrai lun God.’ (Mattu 6:25-33) Kut fwin sramsram nu selos ke me sramsram su ku in akkeyelos ke ma paye lun Baibel, congregation lun God, a met elder su pakiyuki, na kom luti tulik nutum in akfulatye Jeova a aksaokye me sang lal nu kemwa in ngun. Ke sripen tulik srisrik nu kemwa elos sa in akilen orekma sufwal, paenang kas in luti nu kemwa enenu in akkeyeyuk ke orekma a oiye su akkalemye insemwomwo yok lom ke ma lun ngun. Sie me insemwomwo na paye ke pal se papa a nine liye la me srikasrak mwo lalos sang kasru nu sin tulik nutulos in akkalemye lungse paye nu sin Jeova!—Soakas 23:24, 25.
7, 8. Kain in me pupulyuk fuka akkalemye ma saok su tuku ke orekma in sang akpa nu sin tulik srisrik ke pal se elos srakna srik, a mwolanu su tuku ke kutangla in oru ou inge som nu yurin su?
7 Ma saok su tuku ke akpa lun tulik srisrik ke el srakna srik ku in liyeyuk ke sie me srikasrak su tuku fwin an Venezuela. (2 Timote 3:15) Ma inge el sramsram ke seanyen fwusr se, Félix a Mayerlín. Elos kemwanu oru kulansap lun pioneer. Ke pal se tulik mokul se nutulos pangpang Felito el isusla, elos arulanu pwar in oru ma nu kemwa ke ku lalos in kasrel in kapek oanu sie met su alu nu sin Jeova. Mayerlín el mutamwauk in rid ke pusra lulap nu sel Felito ke me sramsram su tuku ke buk inge Buk In Sramsram lun Baibel Nutik su orekla sin Met Lo lun Jeova. Fwinne el srakna srik, Felito el akilenul Moses a kutu met su akkalemyeyuk ke buk inge.
8 Ke pal in fwusr lal, Felito el mutamwauk in sifwanu orek ma lo. El akpayeye kena lal in ekla sie met su fwakelik ke Togusrai, a tok el baptaisla. Tokin sie pal, Felito el ekla sie regular pioneer. Papa a nine kiel elos fwak: “Ke kut liye kapkapek lun tulik nutusr, kut akilen la ma inge nu kemwa sowemol lasr nu sin Jeova a ke kas in luti lal.”
Kasru Tulik Srisrik in Kapkapek in Ngun
9. Efu kut enenu in sang kulo ke kas in luti in ngun su kut ku in eis ke inkanek lun met kulansap oaru a lalmetmet?
9 Oasr magasin puspis, buk puspis, a tausen puspis ke Internet Web sites su sang kai puspis fuka in kurunganang tulik. Pal nu kemwa “kas in kai su elos sang tia oanu sie a lain sie sin sie,” pa inge ma Newsweek special issue ke tulik el fwak. “Sie me asor na paye pa ke pal se kom eis sie me lutlut su kom nunku mu kom ku in lalalfongi tusruktu tok kom konaok la ma inge arulanu sito.” Arulanu yok kulo lasr meyen Jeova el ase nu sesr kas in luti puspis su ku in kasru in akkapye a akkeye sou lasr ke ma lun ngun! Ya kom eis me sang inge nu kemwa su etuku nu sesr ke inkanek lun met kulansap oaru a lalmetmet?—Mattu 24:45-47.
10. Ke inkanek fuka sie lutlut mwo lun sou ke Baibel sang ma lane nu sin papa a nine a tulik?
10 Sie me enenu yok pa, lutlut lun sou ke Baibel pal nu kemwa su orekla ke pal fwal a mwo. In oru ma inge tu in sie me lutlut mwo, me akinsemwomwo, a me akkeye, enenu in akola mwo. Ke inkanek lun me purakak mwo nu sin tulik, papa a nine enenu in etu la mea oasr ke insie a nunuk lun tulik nutulos. Sie inkanek in akilen la fukoko lutlut lun sou ke Baibel pa fwin kais sie met in sou elos akola mwo a sano pal in lutlut inge.
11. (a) Papa a nine elos ku in kasru tulik nutulos in oakiye kain in nien sun fuka? (b) Mea sikyuk ke pal se sie tulik mutan Japan el kaifweung ke nien sun lal?
11 Nien sun ke ma lun ngun sang kasru pa ke ku lun sou nu ke ma lun ngun, a papa a nine elos enenu in kasru tulik nutulos in oakiye ma inge. In wekunang nu ke nien sun mwo pa in rid Baibel len nu kemwa, met orekma in sulkakin peng mwo pal nu kemwa, a in kapkapek nu ke mwolela a baptais. Kutupa sin nien sun inge pa in sroang nu ke orekma lun pioneer, orekma ke Bethel, ku in ekla sie missionary. Ke pal se el srakna lutlut ke elementary school, sie tulik mutan pangpang Ayumi el orala sie nien sun in sang ma lo nu sin met nu kemwa ke class lal. In paenang pwar lun met luti lal a classmate lal, el siyuk a elos fulela el an filiye kutu me rid ke Baibel ke library. Ke sripe se inge, Baibel study 13 pa Ayumi el eis ke lusen yiu onkosr ke lutlut lal ke elementary school. Sie sin tulik lutlut Baibel inge wekunang met tolu ke sou lal elos ekla met Kristian a elos eis baptais.
12. Fuka tulik srisrik elos ku in eis ma lane yok su tuku ke meeting lun met Kristian?
12 Me kasru pe yok in akkeye moul in ngun pa in wi meeting pal nu kemwa. Met sap Poul el kaifwe nu sin met lili wiel in lalalfongi in ‘tia likiye tukeni nu sie lalos in alu, oanu lia lun kutena.’ Lela ma inge in tia oanu fasin se lasr, meyen met fwusr a met matu elos ku in tukeni eis ma lane yok elos fwin wi meeting lun met Kristian pal nu kemwa. (Hibru 10:24, 25; Duteronomi 31:12) Tulik srisrik nu kemwa enenu in lutiyuk in porongo. Akola ke meeting arulanu yok sripe pa, meyen ma lane yok emeet ku in tuku ke akesrui in top. Fwinne tulik srisrik elos ku in mutamwauk ke pal se elos topuk ke inkanek lun kas se ku luo ku in ridi ip srisrik ke sie paragraph, tusruktu, arulanu yok sripe fwin lutiyukyung nu sin tulik in suk top a akkalemye ma inge ke kas lalos sifwanu. Ya komwos nu kemwa su papa a nine sang me srikasrak mwo ke comment mwomwo su komwos oru? Arulanu mwo pa fwin oasr Baibel lun kais sie met in sou, buk in on, a kais sie met oasr copy lun me rid su orekmakinyuk ke pal in lutlut ke Baibel.
13, 14. (a) Efu papa a nine elos enenu in oru orekma lun forfor yurin tulik nutulos? (b) Me kasru fuka ku in oru orekma lun forfor in yok sripe a me insemwomwo nu sin tulik srisrik?
13 Papa a nine lalmetmet elos purakak tulik nutulos in orekmakin ku lalos oanu sie met fwusr in kulansap nu sin Jeova, elos kasrelos in oru orekma in luti oana ma yok se emeet ke moul lalos. (Hibru 13:15) Papa a nine elos ku in lalalfongi na paye la tulik nutulos elos eis akpa su eneneyuk in ekla sie met orekma “su tia enenu in mwekin, su orekmakin sumwosna kas lun God,” fwin elos oru orekma lun forfor wi tulik nutulos. (2 Timote 2:15) Ke ma inge, fuka kom? Kom fwin sie papa ku nine, ya kom kasru tulik nutum in akola nu ke orekma lun forfor? In oru ou inge ku in sang kasru in orala orekma lun forfor sie me insemwomwo yok, oasr kalme, a oasr kapkapek na paye lalos.
14 Efu arulanu yok sripe nu sin papa a nine a tulik nutulos in tukeni oru orekma lun forfor? Meyen ke inkanek inge, tulik nu kemwa elos ku in liye a etawi me srikasrak mwo lun papa a nine kielos. In pal se na, papa a nine elos ku in liye oiye, orekma, a ku lun tulik nutulos. Kaifweung in wis tulik nutum nu ke kain in orekma lun forfor in luti nu kemwa. Fwin ku, lela kais sie tulik in wis bag nutulos ke orekma lun forfor, a luti nu selos in kurunganang ma inge in nasnas a mwo. Ke inkanek lun akpa mwo in pal nu kemwa a kas in akkeye, insemwomwo na paye nu ke orekma lun forfor ku in akkeyeyuk, a tulik srisrik elos fwa liye la orekma in luti pa sie inkanek in akkalemye lungse nu sin God a met tulan.—Mattu 22:37-39; 28:19, 20.
Sie Moul Futoto nu Sin God
15. Ke sripen orekma in srukye ku lun ngun lun sie sou arulanu yok sripe, paenang mea inkanek puspis su ku in kasru in oru ou inge?
15 Sie moul futoto lun sou nu sin God pal nu kemwa arulanu yok sripe (Sam 119:93) Sie inkanek in oru ou inge pa in sramsramkin ma lun ngun ke sou lom pal nu kemwa. Ya kom sramsramkin nu selos text ke len nu kemwa? Ya sie fasin lom in sromon experience ke orekma lun forfor ku me lutlut sasu su tuku ke magasin inge Tauer In San a Awake! “ke kom fwasr inkaneku”? Ya kom esam in sang kulo nu sin Jeova ke pre ke moul lom ke len nu kemwa a ke me kite mwo “ke kom onu, a ke kom tukakek”? (Duteronomi 6:6-9) Ke pal se tulik nutum elos liye lungse lom nu sin God ke ma nu kemwa kom oru, ma inge ku in kasrelos in srukye ma paye ke moul lalos.
16. Ma lane fuka ku in tuku fwin akkeyeyuk tulik in oru lutlut lalos sifwanu in suk?
16 Kutupal, tulik nu kemwa enenu kas in kai elos in mu ku in kutangla ke ma upa su sikyuk. Lela kom in tia fwak pal nu kemwa ma elos enenu in oru, a efu kom tia akkalemye nu selos in etu nunuk lun God ke ma puspis ke kom kaifwe nu selos in sifwanu oru lutlut lalos? Lutlut nu sin tulik in orekmakin mwo kofwen me orekma nu kemwa a me rid nu kemwa su etuku nu sesr ke inkanek lun ‘met kulansap oaru’ ku in kasrelos in akkapye sie moul futoto nu sin Jeova. (1 Samuel 2:21b) A ke pal se elos akkalemye me lane puspis su elos eis ke lutlut lalos ke Baibel nu sin kutu met in sou, ku lun ngun lun sou arulanu akkeyeyuk.
Lalalfongi Yok Nu Sin Jeova
17. Efu papa ku nine su mukena muta elos tia enenu in asor ke orekma in kurunganang tulik oanu sie met Kristian?
17 A fuka papa ku nine su mukena muta elos ku in musaiyuk moul in sou su fukoko in ngun? Ma inge tia fwusesr fwin kut sramsram ke inkanek in kurunganang tulik. Tusruktu, lela papa ku nine su mukena muta a liaung tulik nutulos in tia asor! Komwos ku in kutangla, oanu ma sikyuk nu sin papa ku nine puspis su wangin mokul ku mutan kielos tusruktu filiye lalalfongi lalos nu sin God, akos ma sap lal, na oru tulik nutulos in kapek mwo, a fukoko in ngun. (Soakas 22:6) Paye, papa ku nine Kristian nu kemwa su mukena muta elos enenu in filiye lalalfongi na paye lalos nu sin Jeova. Elos enenu in lalalfongel la el ku in kasru.—Sam 121:1-3.
18. Papa a nine elos enenu in loang nu ke ma enenu fuka ke mano a nunuk lun tulik nutulos, tusruktu elos enenu in nunku yok ke mea?
18 Papa a nine su lalmetmet elos akilen la oasr ‘sie pal in isrusr, a sie pal in onsrosro.’ (Ekklisiastis 3:1, 4) Sie me kasru yok ke kapek lun nunuk a mano lun tulik srisrik pa pal in mongle a me akengun fwal a mwo. On su ku in akkeyelos, a on kin on in sang kaksak nu sin God ku in kasru sie tulik in akkapye sie oiye mwo su ku in kasrel in akkeye futoto lal nu sin Jeova. (Kolosse 3:16) Pal in fwusr pa sie pal in akola sie met in ekla met matu su sangeng sin God, a ku in kasrel in tafwela in engunkin moul nu ke sie paredais fwin fwalu.—Galetia 6:8.
19. Efu papa a nine elos ku in lalalfongi ke me insemwomwo lun Jeova ke kaifweung lalos in kurunganang tulik nutulos?
19 Jeova el lungse sou Kristian nu kemwa in kutangla oanu sie u su fukoko in ngun a srukye inse siefwunnu. Kut fwin lungse na paye God a oru ma nu kemwa ke ku lasr in akos Kas lal, el akinsemwomwoye kaifweung lasr a el ase nu sesr ku su eneneyuk in fwasr tokin kolyuk mutal lal. (Isaia 48:17; Filippai 4:13) Esam la pal mwo lom misinge in luti tulik nutum arulanu srik a kom tia ku in sifwil kalweni. Oru ma nu kemwa ke ku lom in orekmakin kas in kai su tuku ke Kas lun God, a Jeova el akinsemwomwoye kaifweung lom in musaiyuk sie sou su fukoko in ngun.
Mea Kut Lotela Tari?
• Efu in molela pal arulanu yok sripe ke pal se kut sang akpa nu sin tulik srisrik?
• Efu me srikasrak mwo lun papa a nine arulanu yok sripe?
• Mea inkanek mwo puspis su ku in orekmakin in kasru tulik srisrik in kapkapek in ngun?
• Fuka ku lun sou in ngun ku in srukye na?
[Pictures on page 18, 19]
Sou fukoko in ngun elos lutlut pal nu kemwa ke Kas lun God, wi meeting lun met Kristian pal nu kemwa, a tukeni akesrui ke orekma lun forfor