Luti Tulik Nutum in Lungse Jeova
“Oana pusr in poun sie met ku, ou inge tulik in pal elos fwusr.”—SAM 127:4.
1, 2. Fuka tulik elos pupulyukkinyuk nu ke “me pusr ke poun met ku”?
SIE MET el akola in orekmakin me pusr natul in sun ma se su el lungse in tungalye. El filiye ma inge nu ke aa ke sakan me pusr, a ke ku lun paul el ulya sakan me pusr lal inge. Fwinne upa kutu in ulya a sruokye ma inge, el orekmakin pal in liye la me pusr soko inge el sumwos na paye nu ke ma se su el lungse in sun. Ke el liye la ma inge sumwos tari nu ka, el pusrkela ma inge nu ke an se su el lungse in sun! Ya me pusr soko a ku in sun target sa? Oasr ma puspus su ku in sang kasru nu ka, wekunang utuftuf in orekma lun met se su orekmakin me pusr, eng upa, a oiya lun me pusr.
2 Togusra Solomon el pupulyukkin tulik nu ke “me pusr nu ke poun sie met ku.” (Sam 127:4) Nunku ke me pupulyuk inge la e ku in orekmakinyuk fuka. Sie met su orekmakin me pusr a sakan pusr inge el enenu in akola me pusr nu ke sakan pusr ke pal na sa. In sun target lal, el enenu in sa fulela me pusr inge. Ke luma sepana inge, oasr kitin pal na fototo lun papa a nine in akkeye lungse paye lun tulik natulos nu sin Jeova. Tokin ke kitin pal, tulik elos matula a som liki loom selos. (Mattu 19:5) Ya elos fwa sun target lalos, kalme pa, ya tulik elos fwa tafwela na in lungse a kulansapu God tokin elos som liki loom selos? Oasr ma puspus su ku in sang kasru ku sang me akkoluk nu ka fwin tulik elos ku in tafwela na in lungse God. Oasr ma tolu su ku in sang kasru, ma se meet pa kuiyen papa a nine, oiya ke loom su tulik elos kapkapek we, a ke oiya su akkalemyeyuk sin tulik, su pupulyukkinyuk nu ke ‘me pusr,’ nu ke me akpa su elos eis. Lela kut in tuni ke kais sie oiya inge ke inkanek yok. Ma se meet, kut fwa akuteye ke kutu oiya mwomwo lun sie papa ku nine su etu a sumat in karungin tulik natulos.
Papa a Nine su Sumat Elos Akkalemye Me Srikasrak Mwomwo
3. Efu ku kas lun papa a nine enenu in akpayeyuk ke orekma?
3 Jisus el akkalemye me srikasrak nu sin papa a nine nukewa ke el orekmakin ma el luti nu ke moul lal. (Jon 13:15) Ke oiya saye, el selngawi met Farisi, ke elos “fwak” kutena ma tusruktu “tia akpayeye.” (Mattu 23:3) In akkeye tulik natulos in lungse Jeova, kas a orekma lun papa a nine enenu in fwal nu sin sie sin sie. Kas su tia akpayeyuk ke orekma el tia ku in sang kasru oana ke sie sakan me pusr su wangin aa ku sul ka.—1 Jon 3:18.
4. Kusensiyuk puspus fuka papa a nine elos enenu in siyuk selos sifwana, a efu?
4 Efu ku me srikasrak lun papa a nine arulana yok sripe? Oana ke met matu elos ku in lutlutkin in lungse Jeova ke elos liye ke me srikasrak lun Jisus, tulik srisrik elos ku in lutlutkin in lungse Jeova ke elos etawi me srikasrak mwomwo lun papa a nine kiyelos. Me asrouki lun tulik srisrik ku in akkeye ku “akkolukye oiya mwo.” (1 Korint 15:33) Ma inge arulana yok sripe yokna ke pal se su el srakna tulik srisrik su enenu me kasru mwomwo in akkeye ella a oiya lal, me asrouki mwo emeet su ku in sang kasru yok nu sin tulik srisrik pa papa a nine kiyel. Ke ma inge, papa a nine elos enenu in siyuk selos sifwana: ‘Kain in met asrouki fuka se su Nga u? Ya me srikasrak luk akkeye tulik nutik in akkeye ella a oiya mwomwo? Kain in me srikasrak fuka nga akkalemye ke ma yok sripe puspus oana ke pre a lutlut Baibel?’
Papa a Nine Su Sumat Elos Pre Wi Tulik Natulos
5. Mea tulik elos ku in lotela ke pre lun papa a nine kiyelos?
5 Tulik nutumwos elos ku in lutlut yok kel Jeova ke elos long ke pre lomwos. Fwin elos long la kom sang kulo nu sin God ke pal in mongo a kom pre ke pal in lutlut Baibel, mea ma inge ku in oru nu selos? Elos fwa lotela la Jeova el ase nu sesr ma enenu nukewa lasr ke mano a el luti kut ke ma paye su oasr in Baibel su tulik enenu in sang kulo nu sel ka. Ma inge el me lutlut yok sripe.—Jemes 1:17.
6. Fuka papa a nine elos ku in kasru tulik natulos in pula pa la Jeova el nunku a karunginelos oana met se met se?
6 Tusruktu, kom fwin pre yurin sou lom ke kutupa pal sayen pal in mongo a lutlut lun sou ke Baibel a kom fwin sramsramkin ma puspus su sang kasru nu sum a nu sin tulik nutum, orekma lom inge ku in sang kasru na yok nu selos. Kom ku in kasru tulik nutum in pulakin la Jeova el wi ke sou lom, a el nunku yok a karungin kom oana sie met. (Efesus 6:18; 1 Piter 5:6, 7) Oasr sie papa el fwak: “Mutamwauk ke pal se an natusr el isusla, el wi kut ke kut pre. A ke el kapkapek, kut pre ke oiyen asrouki yurin met puspus a kutupa ma su ku in sang kasru nu sel. Nu ke pal se su el enenu in som liki loom sesr meyen el payukyak, len nukewa kut tukeni pre.” Ya kom ku in pre pa wi tulik nutum len nukewa? Ya kom ku in kasrel in liye Jeova oana sie Met Kawuk, su sang ma enenu lalos nu ke ikwe a ke orekma in alu nu sin God, a sayen ma inge el nunku pa ke ma enenu nu ke nunak a pulakin lalos?—Filippai 4:6, 7.
7. Fwin pre lalos sumwos a fwal nu ke ma eneneyuk, mea papa a nine elos enenu in oru?
7 Aok, in kasre kom tu pre lom in fwal, kom enenu in etu la mea sikyak nu ke moul lun tulik nutum. Loang nu ke ma sie papa el fwak su karungin tulik luo natul: “Ke saflaiyen week nukewa, Nga siyuk kusensiyuk luo nu sik sifwana: ‘Ma puspus fuka oasr ke nunak lun tulik luo nutik inge ke week se inge? A ma mwo puspus fuka sikyak nu ke moul lalos?’” Papa a nine ya komwos ku in siyuk sumwos sifwana kusensiyuk puspus inge a tokin ma inge komwos ku in akkalemye kutu me top nu ka ke pre lomwos yurin tulik nutumwos? Fwin oinge, kom fwa lotelos tia in pre mukena nu sin Jeova—su Long pre nukewa—a kom lotelos pa in lungse el.—Sam 65:2.
Papa a Nine Su Sumat Elos Akkeye Oiya Mwomwo in Lutlutkin Kas lun God
8. Efu ku papa a nine elos enenu in kasru tulik natulos in akkeye oiya mwo in lutlutkin Kas lun God?
8 Fuka oiya lun papa a nine nu ke lutlut Baibel el sang kasru nu ke fototo lun sie tulik nu sin God? Fwin met luo elos lungse in akkeye fototo lalos nu sin sie sin sie, elos enenu in sramsram a elos enenu in loang akmwoye nu sin sie sin sie. Sie inkanek su kut ku in porongo Jeova ka pa ke kut lutlutkin Baibel ke kasru lun me rid nukewa su orekla sin ‘met kulansap oaru.’ (Mattu 24:45-47; Soakas 4:1, 2) Ke ma inge, in kasru tulik natulos in akkeye fototo mwomwo nu sin Jeova pal nukewa, papa a nine elos enenu in akkeyelos in akkeye oiya mwomwo lalos in lutlutkin kas lun God.
9. Fuka tulik elos ku in eis me kasru in akkeye sie oiya mwomwo in lutlutkin kas lun God?
9 Fuka tulik elos ku in eis kasru in akkeye sie oiya mwo in lutlutkin kas lun God? Inkanek mwo emeet in kasru tulik pa ke me srikasrak lun papa a nine. Ya tulik nutum elos liye la kom engankin pal nukewa lutlut lom a rid lom sifwana ke Baibel? Paye, kom arulana kafofo in karungin tulik nutum, a saap kom nunku la piya pal kom ku in orala akwuk in rid a lutlut ke Baibel. Tusruktu, siyuk sum sifwana, ‘Ya tulik nutik el liye yu pal nukewa la nga lungse in liye television?’ Fwin aok, ya kom ku in orekmakin pal inge in akkalemye me srikasrak mwo nu selos ke lutlut lom sifwana?
10, 11. Efu ku papa a nine elos enenu in oru lutlut lun sou ke Baible pal nukewa yurin tulik natulos?
10 Siepa inkanek yok sripe su papa a nine elos ku in luti tulik natulos in porongo Jeova pa ke lutlut lun sou ke Baibel pal nukewa. (Isaia 30:21) Tusruktu, saap kutu met elos siyuk, ‘Efu ku tulik elos enenu in wi ke sie lutlut lun sou fwin papa a nine kiyelos uselos pal nukewa nu ke meeting nukewa lun congregation?’ Oasr sripe mwomwo puspus ka. Jeova el sang nu sin papa a nine kunokon su yok emeet in luti tulik natulos. (Soakas 1:8; Efesus 6:4) Lutlut lun sou ke Baibel el sang me luti nu sin tulik la orekma in alu, el tia orek mukena ye mutun met puspus, a ma inge enenu in orek in masrlon sou.—Duteronomi 6:6-9.
11 In wekunang, sie lutlut lun sou ku in sang pal mwomwo nu sin papa a nine in etu ke nunak lun tulik ke oiyen nasnas a ke orekma in alu nu sin God. Ke sie me pupulyuk, fwin tulik elos srakna tulik srisrik, papa a nine ku in orekmakin me rid puspus su oana Buk in Sramsram lun Baibel Nutik.a Ke kais sie paragraph ke buk inge, papa a nine ku in siyuk tulik natulos in akkalemye nunak lalos sifwana nu ke me lutlut su akuteyuki. Papa a nine elos ku in kasru tulik natulos in akkeye kuiyen nunak lalos “in akilen ma mwo a ma koluk,” fwin elos orekmakin me akuteye mwomwo ke ma simusla su oasr ke buk inge.—Hibru 5:14.
12. Fuka papa a nine elos ku in akfwalye lutlut lun sou nu ke ma enenu lun tulik, a ke inkanek fuka kom liye mu arulana mwo in orekmakinyuk nu ke lutlut lun sou?
12 Ke tulik nutum elos kapkapek, akfwalye lutlut nu ke ma enenu lalos. Loang akmwoye nu ke inkanek su sie siyanyen elos orekmakin in sang kasru an fwusr natulos in akkalemye nunak lalos ke tulik natulos siyuk fwin elos ku in som wi ke sie toeni ke loom lutlut in dance. Papa sa el fwak: “Kut akkalemye nu sin an luo natusr inge la ke lutlut lun sou toko, Nga a nine kiyelos fwa orek me lumala la kut fwa ekla in oana tulik a tulik luo natusr elos ku in orek me lumala la elos pa papa a nine. Tulik luo inge elos ku in sifwana sulela la su fwa lumeyukla nu ke Papa ku Nine, tusruktu tulik luo natusr inge elos enenu in tukeni oru lutlut yok lalos ke sifwe inge a tokin ma inge elos in akkalemye ke kas in kasru la efu ku oasr ma tia mwo fwin kut wi ke dance ke loom lutlut.” Mea fwokin ma inge? “Kut lut na paye ka la tulik luo natusr inge elos ku in akilen ma mwo a ma koluk ke elos akuteye nu sesr ke sripe puspus lalos fwal nu ke Baibel la efu ku tia mwo in wi ke akwuk lun dance in loom lutlut,” papa se inge el fwak. “Ma su aklutye kut u pa ke elos akkalemye kas in kasru ke orekma saye su kut ku in wi ka sayen in wi ke dance. Ma inge kasre kut in etu na paye ma oasr ke nunak lalos a ke ma elos lungse.” Paye, mongfusesr a in nunku ke oiya puspus eneneyuk in orek ke inkanek in lutlut lun sou a in orek pal nukewa a fwal nu ke ma enenu lun sou, tusruktu oasr me insemwomwo puspus su tuku ke kafweang yok ka.—Soakas 23:15.
Orala in Oasr Sie An Misla
13, 14. (a) Fuka papa a nine elos ku in orala oiyen misla ke loom? (b) Mea ma lane su ku in tuku fwin sie papa ku nine el akkalemye la el tafongla?
13 Sie me pusr el ku in sun target fwin met su orekmakin ma inge el pusrkela ma inge ke pal se su mwo nu ke pulanpal u. Oapana, tulik elos ku in lotela in lungse Jeova fwin papa a nine elos kafweang in orala akwuk mwomwo in oasr misla in loom selos. “A fwako lun sumwosmwos eoki tari in misla nu selos su orek misla,” met sap Jemes el simusla. (Jemes 3:18) Fuka papa a nine elos ku in orala oiyen misla ke loom selos? Sie siyanyen elos enenu in oasr fototo mwomwo lalos pal nukewa. Sie mokul payuk a mutan payuk su lungse a akkalemye sunak nu sin sie sin sie oasr pal mwomwo lalos in luti tulik natulos in lungse a akkalemye sunak nu sin met puspus, yokna nu sin Jeova God. (Galetia 6:7; Efesus 5:33) Lungse a sunak akkeye oiyen misla. A sie siyanyen su oasr misla in masrlolos elos ku in aksumwosye ma upa puspus su ku in sikyak in masrlon sou.
14 Paye la, ke sripen wangin siyanyen su sumwosmwos, paenang wanginla pa sou sumwosmwos fwin fwalu ke pal inge. Saap oasr pal papa a nine elos tia akkalemye fwako lun ngun mutal ke elos sramsram nu sin tulik natulos. (Galetia 5:22, 23) Fwin ma inge sikyak, mea papa a nine elos enenu in oru? Fwin elos akkalemye la elos tafongla, ya ma inge ku in aksrikyela sunak lun tulik natulos nu selos? Nunku ke me srikasrak lal met sap Poul. El oana sie papa nu sin met puspus. (1 Korint 4:15) Ne oinge, el akkalemye pal nukewa la el tafongla pa pal nukewa. (Rom 7:21-25) Fwinne oasr pal el tafongla, pusisel a oiyen oaru lal akyokye sunak lasr nu sel a tia aksrikyeyukla. Fwinne oasr ma tafongla lal, Poul el simusla nu sin congregation fwin an Korint: “Komwos in met etawi yu, oana nga ouyepa met etawi Kraist.” (1 Korint 11:1) Kom fwin akkalemye pa ma tafongla lom, tulik nutum elos ku in tia loang nu ke ma tafongla puspus lom.
15, 16. Efu ku papa a nine elos enenu in sang akpa nu sin tulik natulos in lungse met lili Kristian wiyelos, a fuka ma inge ku in orek?
15 Mea pa inkanek saye su papa a nine elos ku in oru in orala oiyen misla su tulik natulos elos ku in akkeye ke lungse lalos nu sin Jeova? Met sap Jon el simusla: “Kutena met fwin fwak: ‘Nga lungse God,’ a srunga met lel, el sie met kikiap. Tu el su tia lungse met lel, su el liye, el koflanu lungse God su el tia liye.” (1 Jon 4:20, 21) Ke ma inge, fwin kom sang akpa nu sin tulik nutum in lungse met lili Kristian wiyelos, kom lotelos in lungse Jeova. Arulana fwal nu sin papa a nine nukewa in siyuk ke kusensiyuk inge nu selos sifwana, ‘Ya koanon me sramsram luk pal nukewa ke congregation el ku in sang me akkeye ku me akkolukye?’ Kom ku in etu la fuka? Loang akmwoye nu ke inkanek su tulik nutum elos kaskaskin ke meeting nukewa a ke met nukewa su wi ke congregation. Paye la kom ku in akilen nunak lom ke oiyen kaskas lalos.
16 Mea papa a nine elos ku in oru in kasru tulik natulos in lungse met lili wiyelos? Piter, su sie papa tumun tulik mokul fwusr luo, el fwak: “Mutamwauk ke pal se tulik natusr elos srik, kut orala akwuk in oasr met lili puspus su fokoko ke orekma in kulansap lalos nu sin God elos in tuku nu in loom sesr in wi kut mongo a orekmakin pal in muta yurosr, a kut engankin in oru ma inge. Tulik luo natusr elos matula a engankin asrouki mwomwo lalos yurin met puspus su lungse Jeova, a elos liye a akilen ke pal inge la orekma in kulansap nu sin Jeova el sie inkanek mwomwo nu ke moul.” Dennis, sie papa tumun tulik mutan limekosr, el fwak, “Kut akkeye an natusr elos in orek kawuk nu sin pioneer puspus su matu ke congregation lasr, a ke pal mwomwo nukewa kut engankin in suli a paing nu in loom sesr traveling overseer puspus a mutan kiyelos.” Ya kom ku in kasru tulik nutum in nunku ke congregation oana sie ipen sou lomwos?—Mark 10:29, 30.
Kunokon lun Sie Tulik
17. Sulela fuka tulik elos fwa oru ke moul lalos?
17 Sifwil nunku ke me pupulyuk su orek ke sie met su orekmakin me pusr. Fwinne el arulana sumat, el tia ku in sun target lal fwin me pusr su el pusrkin el kurula ku kolukla. Aok, oana ke kas in pupulyuk, papa a nine elos fwa kafweang yok in aksumwosye me pusr su kurula, kalme pa elos kafweang in aksumwosye nunak koluk lun sie tulik. Tusruktu tulik elos fwa oru sulela lalos sifwana fwin elos lela akwuk lun fwal se inge in kufusla nunak lalos ku elos fwa lela Jeova in aksumwosye ku “akkalemye inkanek lalos.”—Soakas 3:5, 6; Rom 12:2.
18. Mea sulela lun tulik ku in oru nu sin met puspus?
18 Aok oasr kunokon yok sripe lun papa a nine in karungin tulik natulos ke “kai a kaiyuk lun Leum [“Jeova,” New World Translation],” tusruktu sulela safla ke oiyen moul su tulik el fwa moulkin fwin el matula el suleyukla sin tulik se sifwana. (Efesus 6:4) Ke ma inge, tulik nukewa, komwos siyuk sumwos sifwana, ‘Ya Nga fwa eis me akpa mwomwo su papa a nine elos oru nu sik?’ Kom fwin oru, kom sulela inkanek mwo emeet lun moul. Kom fwa oru papa a nine kiyom in arulana engan. Yok liki nukewa, kom fwa oru insien Jeova in engan.—Soakas 27:11.
[Footnote]
a Orekla sin Met Lo lun Jeova.
Ya Kom Esam?
• Fuka papa a nine elos ku in akkalemye me srikasrak mwomwo ke pre a ke lutlut lun Baibel?
• Fuka papa a nine elos ku in orala oiyen misla ke sou?
• Sulela fuka tulik elos enenu in oru, a mea sulela su elos ku in oru nu sin papa a nine kiyelos?
[Picture on page 10]
Ya kom akkalemye me srikasrak mwomwo nu sin tulik nutum ke inkanek in sifwana lutlut?
[Picture on page 11]
Sie oiya lun misla ke sou el sang kasru yok nu ke me insemwomwo lun sou