Landela UKristu Ngokubonisa Inhlonipho

1. Isihloko somhlangano walo nyaka sihlangana kanjani nokubonisa inhlonipho?

¹ IBhayibheli lichaza uMbusi Wendawo Yonke, uJehova, njengombethe isithunzi. (IHu. 104:1) Njalo uJesu wayekhuluma futhi enze izinto ngendlela eyayidumisa uYise namalungiselelo aKhe. (Joh. 17:4) Ngamunye wethu uyoba nethuba lokulingisa uJesu futhi adumise uJehova eMihlanganweni Yesigodi ezayo enesihloko esithi “Landela UKristu!”

2. Ukuzilungiselela ukuba khona esimisweni ngasinye kumdumisa kanjani uJehova?

² Ukukhulekela Okuhloniphekile: Singadumisa uJehova ngokuhlela ukuba sibe khona kuleli dili elingokomoya asilungiselele lona. Ingabe usukhulumile nomqashi wakho futhi wahlela izimo zakho ukuze ube khona usuku ngalunye lwalo mhlangano, kuhlanganise noLwesihlanu? Ingabe usukuhlelile ukufika kusenesikhathi esanele ukuze uthole indawo yokuhlala futhi uhlanganyele engomeni nasemthandazweni wokuvula? Ingabe usuhlelile ukuthi uyodlani emini ukuze ukwazi ukudlela endaweni yomhlangano kanye nabafowenu? Ekuqaleni kwesimiso ngasinye, lapho usihlalo esicela ngomusa ukuba sihlale phansi ngaphambi kokuba kuqale umculo, kufanele sizinqamule ngokushesha izingxoxo zethu bese sihlala phansi silungele ukuqala kwesimiso.

3. Ukulalelisisa isimiso kukwenza kanjani ukukhulekela kwethu kuhlonipheke?

³ Ukulalelisisa isimiso nakho kudumisa uBaba wethu wasezulwini. Ngemva kokuqaphela okwakwenziwa emhlanganweni wesigodi wendawo, enye intatheli yabhala ukuthi izibukeli zaziyohlatshwa umxhwele “ukuziphatha okuyisibonelo kwalabo ababekhona, njengoba babethule belalele ngenhlonipho lokho okwakushiwo futhi bebonakala ukuthi banesithakazelo ezintweni ezingokomoya.” Yabuye yakhuluma “ngezingane eziningi kakhulu . . . , zonke ezaziziphethe kahle ngendlela engavamile futhi zimatasa zivula namavesi eBhayibhelini Elingcwele.” Lapho isimiso siqhubeka, akusona isikhathi sokuxoxa ngokungadingekile, sokuthumelelana imiyalezo ngomakhalekhukhwini, sokudla, noma sokuzulazula emaphasishi. Intsha kufanele ihlale nabazali bayo ukuze bayisize izuze esimisweni. (Dut. 31:12; IzAga 29:15) Imizamo enjalo ibonisa ukuthi siyabahlonipha abanye nokuthi siyakwazisa ukudla okungokomoya okubalulekile esikuphakelwayo.

4. Kungani kufanele sibukeke ngendlela ehloniphekile lapho sisemhlanganweni?

⁴ Ukubukeka Okuhloniphekile: Abaningi bazwakalisa ukwazisa ngezikhumbuzo zenkulumo yanyakenye yomhlangano wesigodi ethi “Bonisa Inhlonipho YobuKristu Zikhathi Zonke,” eyagcizelela ukuthi izinceku zikaNkulunkulu kufanele zilwele ukubonisa inhlonipho yobuKristu endleleni ezigqoka futhi zizilungise ngayo. Nakulo nyaka kufanele siyicabangele ngokungathí sina le ndaba. Ukubukeka kwethu kubonisa imizwa yethu ngoJehova nangelungelo lokuba oFakazi bakhe. Kufanele njalo sigqoke njengabantu “abathi bahlonipha uNkulunkulu.”—1 Thim. 2:9, 10.

5. Singakulondoloza kanjani ukubukeka okuhloniphekile lapho siziphumulele edolobheni lomhlangano?

⁵ Ingabe kufanele sibukeke ngendlela ehloniphekile kuphela phakathi nesimiso? Khumbula ukuthi abaningi bayosibona sigqoke amabheji omhlangano njengoba sisedolobheni lomhlangano. Indlela esibukeka ngayo kufanele isenze sihluke emphakathini. Ngakho-ke, ngisho nalapho siziphumulele, njengalapho siye ezindaweni zokudlela ngemva kwesimiso, kufanele sigqoke ngendlela efanele izikhonzi ezikuleli dolobha ukuzothamela umhlangano wamaKristu futhi akufanele sigqoke izingubo ezinjengamabhulukwe obhogadi, izikhindi, noma izikibha. Yeka ukuthi lokhu kuyonikeza ubufakazi obukhulu kangakanani emphakathini! UJehova uyajabula lapho ukubukeka kwethu kubonisa indima yethu njengezikhonzi.

6. Yimiphi imiphumela emihle yokubonisa inhlonipho yobuKristu?

⁶ Imiphumela Egculisayo: Ukubonisa inhlonipho yobuKristu emihlanganweni yethu kuvula amathuba okufakaza ngokwethukela futhi kwenze abasibukele babe nombono omuhle ngathi. Ekupheleni komunye umhlangano, isikhulu esithile sathi: “Asikaze sibabone abantu abaziphethe kahle ngale ndlela. Niziphatha ngendlela uNkulunkulu alindele ukuba siziphathe ngayo.” Ukuba nenhlonipho kubonisa ukuthi siyahloniphana, siyathandana futhi kukhazimulisa uJehova. (1 Pet. 2:12) Kubonisa ukwesaba kokuhlonipha uNkulunkulu nokwazisa kwethu ilungelo lokufundiswa uBaba wethu. (Heb. 12:28) Kwangathi singalwela ukubonisa inhlonipho njengoba siwubheke ngabomvu uMhlangano Wesigodi walo nyaka onesihloko esithi “Landela UKristu!”

[Ibhokisi ekhasini 5]

Esikukhunjuzwa Ngomhlangano Wesigodi

◼ Izikhathi Zesimiso: Isimiso sizoqala ngo-9:00 ekuseni zontathu izinsuku. Kusasele imizuzu embalwa isimiso siqale, usihlalo uyohlala epulatifomu ngesikhathi kudlala umculo wezingoma zoMbuso owandulela isimiso. Kufanele sonke sihlale ezindaweni zethu ngaleso sikhathi ukuze isimiso siqale ngendlela ehloniphekile. NgoLwesihlanu nangoMgqibelo, isimiso sizophela ngo-4:15 ntambama, bese ngeSonto siphele ngo-3:20 ntambama.

◼ Indawo Yokupaka: Kuzo zonke izindawo zomhlangano esinegunya lokupaka kuzo, indawo yokupaka iyotholwa yilabo abasheshe bafika, futhi iyotholakala ngaphandle kwenkokhiso. Kuyodingeka nibe namabheji omhlangano ukuze ninikezwe indawo yokupaka. Njengoba ngokuvamile indawo yokupaka ingabi ningi kangako, kufanele sizame ukugcwalisa imoto uma kunokwenzeka, kunokuba kube nomuntu oyedwa noma ababili emotweni.

◼ Ukugcina Izihlalo: Izihlalo zingagcinelwa kuphela labo ohamba nabo emotweni noma ohlala nabo ekhaya.

◼ Ukudla Kwasemini: Sicela niphathe ukudla kunokuba niphume endaweni yomhlangano niyokufuna ngesikhathi sekhefu. Ningaphatha i-cooler bag encane engangena ngaphansi kwesihlalo. Ama-cool­er bag amakhulu anjengawamapikiniki angagcinwa lapho abalindi bethi mawagcinwe khona. Izitsha ezifayo notshwala akuvunyelwe endaweni yomhlangano.

◼ Iminikelo: Ukulungiselela umhlangano wesigodi kuyizindleko ezinkulu. Singabonisa ukwazisa kwethu ngokunikela ngokuzithandela emsebenzini womhlaba wonke eHholo lethu LoMbuso noma emhlanganweni. Uma ufisa ukunikela ngesheke, sicela ubuze eKomitini Yomhlangano ukuthi ubhale ukuthi liyaphi.

◼ Izingozi Nezimo Eziphuthumayo: Uma kuphakama isimo sempilo esiphuthumayo endaweni yomhlangano, sizani nithinte umlindi oseduze, oyothinta uMnyango Wosizo Lokuqala ngokushesha ukuze izisebenzi zethu eziqeqeshiwe zosizo lokuqala zikwazi ukuhlola isimo bese zinikeza usizo.

◼ Ukuqopha: Imishini yokuqopha yanoma iluphi uhlobo akufanele ixhunywe kugesi wenkundla yomhlangano noma esimisweni se-sound futhi le mishini kumelwe isetshenziswe kuphela ngendlela engeke ithikameze abanye.

◼ Ukuthatha Izithombe: Uma nithatha izithombe phakathi nesimiso, sicela ningayisebenzisi i-flash.

◼ Ama-pager Nomakhalekhukhwini: Kufanele kucushwe ngendlela yokuba kungaphazamisi.

◼ Amafomu Okulandelela: Ifomu elithi Siza Ulandelele (S-43) kufanele lisetshenziselwe ukubhala noma ikuphi ukwaziswa nganoma ubani obonisa isithakazelo lapho sishumayela ngokwethukela phakathi nomhlangano. Abamemezeli kufanele baphathe ifomu elilodwa noma amabili emhlanganweni. La mafomu azotholakala naseMnyangweni Wezincwadi emhlanganweni. Amafomu agcwalisiwe angayiswa eMnyangweni Wezincwadi noma anganikezwa unobhala webandla lenu lapho senibuyele emakhaya.—Bheka INkonzo Yethu YoMbuso ka-April 2005, k. 5.

◼ Izitolo Zokudlela: Ezindaweni eziningi kuyinkambiso ukukhipha ithiphu engamaphesenti ayishumi kuya kwangu-15, kuye ngenkonzo eniyenzelwe.

◼ Izingoma: Amabandla angase athande ukuprakthiza izingoma zomhlangano kusenesikhathi.

Izingoma zangoLwesihlanu: 105, 91, 168, 205, 150 no-11.

Izingoma zangoMgqibelo: 181, 31, 42, 191, 38 no-34.

Izingoma zangeSonto: 160, 207, 200, 224, 209 no-4.