Okuhle Nokubi: IBhayibheli Liyisiqondiso Esingasethemba
Ukusekela izinqumo zethu endleleni esizizwa ngayo noma endleleni abanye abazizwa ngayo akuqinisekisi ukuthi ziyophumelela. IBhayibheli liyasitshela ukuthi kungani, kodwa aligcini lapho. Linesiqondiso esingasethemba esisisiza sihlukanise okubi nokuhle. Liyasisiza sibe nokuphila okujabulisayo nokwanelisayo.
ISIQONDISO ESISIDINGAYO
EBhayibhelini, uJehovaa uNkulunkulu usitshela ukuthi wayehlose ukuba abantu basifune kuye isiqondiso, bangaziqondisi bona. (Jeremiya 10:23) Yingakho esinikeze iziqondiso zendlela okufanele siziphathe ngayo eBhayibhelini. Uyabathanda abantu futhi ufuna bagweme ukungaqiniseki lapho benza izinqumo ezibalulekile ekuphileni ezizobenza bezwe ubuhlungu futhi badumazeke. (Duteronomi 5:29; 1 Johane 4:8) Ngaphezu kwalokho, njengoMdali wethu, uhlakaniphile futhi unolwazi oludingekayo ukuze asinikeze iseluleko sokuhlukanisa phakathi kokuhle nokubi. (IHubo 100:3; 104:24) Nokho, uNkulunkulu akaphoqi muntu ukuba aphile ngemithetho yakhe.
UJehova wanikeza indoda nowesifazane bokuqala, u-Adamu no-Eva, konke ababekudinga ukuze bahlale bejabule. (Genesise 1:28, 29; 2:8, 15) Wabanikeza imithetho ecacile ayelindele ukuba bayilandele. Nokho, wabayeka bazikhethela ukuthi babezoyilalela yini leyo mithetho noma cha. (Genesise 2:9, 16, 17) Ngokudabukisayo, u-Adamu no-Eva bakhetha ukuphila ngeyabo imithetho kunokulalela ekaNkulunkulu. (Genesise 3:6) Waba yini umphumela? Ingabe kungcono ukuba abantu bazinqumele bona ukuthi yini enhle noma embi? Cha. Umlando ubonisa ukuthi ukungayinaki imithetho kaNkulunkulu akuyilethi injabulo nokuthula okuhlala njalo.—UmShumayeli 8:9.
IBhayibheli lisinikeza iseluleko esihlakaniphile esisisiza senze izinqumo ezinhle, kungakhathaliseki ukuthi siphuma emndenini onjani. (2 Thimothewu 3:16, 17; bheka ibhokisi elithi “Incwadi Esiza Wonke Umuntu.”) Ake sibone ukuthi iBhayibheli likwenza kanjani lokhu.
Funda okwengeziwe, uthole ukuthi kungani iBhayibheli libizwa ngokuthi “izwi likaNkulunkulu.”—1 Thesalonika 2:13. Bukela ividiyo ethi Ngubani Umlobi WeBhayibheli? ku-jw.org.
IBHAYIBHELI LIYASITSHELA UKUTHI YINI UNKULUNKULU AFUNA SIYENZE
IBhayibheli liyincwadi enembile futhi enomlando obonisa indlela uJehova ayesebenzelana ngayo nabantu. Elikuqukethe kungasisiza sibone ukuthi yini uNkulunkulu ayibheka njengelungile nengalungile, ezuzisayo neyingozi. (IHubo 19:7, 11) Sithola imithetho engaphelelwa isikhathi esisiza senze izinqumo ezihlakaniphile lapho sikhetha phakathi kokuhle nokubi nsuku zonke.
Ngokwesibonelo, cabanga ngeseluleko esisithola encwadini yezAga 13:20: “Ohamba nabahlakaniphile uyohlakanipha, kodwa osebenzelana neziphukuphuku kuyomhambela kabi.” Lesi seluleko sisasebenza esikhathini sethu njengoba sasisebenza endulo. Ziningi izeluleko eziwusizo njengalezi eBhayibhelini.—Bheka ibhokisi elithi “Ukuhlakanipha OkuseBhayibhelini Akuphelelwa Isikhathi.”
Kodwa ungase uzibuze, ‘Izeluleko zeBhayibheli zingangisiza kanjani mina?’ Isihloko esilandelayo sizokhuluma ngezibonelo zabantu abasebenzisa iseluleko seBhayibheli.
a UJehova yigama likaNkulunkulu.—IHubo 83:18.