Okuhle Nokubi: Okushiwo IBhayibheli Ngokuhle Nokubi Kungasisiza
IBhayibheli liye lasiza izigidi zabantu ezicini ezine futhi singalethemba.
1. Umshado
Kuningi abantu abakushoyo ngomshado nangalokho okudingekayo ukuze ujabulise.
IBHAYIBHELI LITHI: “Yilowo nalowo kini kumelwe athande umkakhe njengoba ezithanda yena; ngakolunye uhlangothi, umfazi kufanele amhloniphe ngokujulile umyeni wakhe.”—Efesu 5:33.
INCAZELO: Umshado wasungulwa uNkulunkulu, ngakho uyena owaziyo ukuthi yini indoda nomkayo okumele bayenze ukuze bajabule. (Marku 10:6-9) Emshadweni injabulo iba khona uma indoda nomkayo begxila kulokho abangakunikeza omunye nomunye ukuze baqinise umshado wabo, hhayi kulokho bona abangakuthola. Indoda eyithandayo inkosikazi yayo izobonisa ngendlela eyiphatha ngayo nangendlela eyinakekela ngayo. Inkosikazi ehlonipha umyeni wayo ibonisa ngezenzo nangendlela ekhuluma ngayo.
ISELULEKO SEBHAYIBHELI SIYASIZA: UQuang noThi baseVietnam, bazizwa bebophekile emshadweni ongajabulisi. UQuang wayengawubonisi neze umusa. Uthi: “Ngangingenandaba nendlela uThi azizwa ngayo, ngangihlale ngimhlambalaza.” UThi wayefuna idivosi. Wathi: “Ngangingasamethembi futhi ngingamhloniphi umyeni wami.”
UQuang noThi bafunda ukusebenzisa okushiwo yiBhayibheli nokusebenzisa umBhalo wabase-Efesu 5:33 emshadweni wabo. UQuang uthi: “Leli vesi langisiza ngabona ukuthi kudingeka ngibe nomusa nokuthi ngenze uThi azizwe ethandwa, ngimnakekele ngokomzimba nangokomzwelo futhi ngimnike izinto azidingayo. Uma ngenza kanjalo, uyangithanda futhi ungihlonipha ngokwengeziwe.” UThi uthi, “Uma ngilokhu ngisebenzisa eyabase-Efesu 5:33, ngihlonipha umyeni wami, ngizizwa ngithandwa, ngivikelekile futhi nginokuthula.”
Ukuze uthole okwengeziwe ngokuphathelene nomshado, funda i-Phaphama! No. 2 2018, enesihloko esithi “Izinto Ezingu-12 Ezenza Imindeni Iphumelele” ku-jw.org.
2. Indlela Yokuphatha Abanye
Ngokuvamile, abantu baphatha kabi abanye abantu ngenxa yohlanga lwabo, ubuzwe, indlela ababukeka ngayo, inkolo noma ngenxa yobulili babo.
IBHAYIBHELI LITHI: “Hloniphani zonke izinhlobo zabantu.”—1 Petru 2:17.
INCAZELO: IBhayibheli alisifundisi ukuba sizonde abantu bezinye izinhlanga, bakwamanye amazwe noma izitabane. Kunalokho, lisikhuthaza ukuba sihloniphe wonke umuntu, kungakhathaliseki ukuthi uvela kuluphi uhlanga, ubuzwe, ucebile noma uyahlupheka. (IzEnzo 10:34) Ngisho noma singahambisani nalokho abakukholelwayo noma nendlela abaziphatha ngayo, singaqhubeka sibaphatha ngomusa nangenhlonipho.—Mathewu 7:12.
ISELULEKO SEBHAYIBHELI SIYASIZA: UDaniel wafundiswa ukuthi abantu base-Asia bawusongo ezweni lakubo. Wayesezonda noma ubani ovela e-Asia futhi wayebathuka obala. UDaniel uthi: “Ngangizitshela ukuthi ngenzela izwe lakithi. Ngangingaboni nakubona ukuthi indlela engangicabanga ngayo noma engangenza ngayo yayiyimbi.”
UDaniel wagcina ekufundile okushiwo yiBhayibheli. Uthi, “Kwadingeka ngiyishintshe ngokuphelele indlela engangicabanga ngayo. Kwadingeka ngibheke abantu ngendlela uNkulunkulu ababheka ngayo, okuwukuthi, sonke siyafana noma ngabe sivela kuphi.” UDaniel uchaza indlela azizwa ngayo manje uma ehlangana nabantu. Uthi, “Angisakucabangi nokukucabanga ukuthi bavelaphi. Manje ngithanda zonke izinhlobo zabantu futhi nginabangani abaseduze abavela kuwo wonke umhlaba.”
Ukuze uthole okwengeziwe, funda i-Phaphama! No. 3 2020, enesihloko esithi “Likhona Yini Ikhambi Lobandlululo?” ku-jw.org.
3. Imali
Abantu abaningi bazama ukuceba ukuze bajabule futhi babe nekusasa elingcono.
IBHAYIBHELI LITHI: “Ukuhlakanipha kuyisivikelo njengoba nje nemali iyisivikelo, kodwa inzuzo yolwazi yile: Ukuhlakanipha kuyakulonda ukuphila komniniko.”—UmShumayeli 7:12.
INCAZELO: Siyayidinga imali kodwa ukuba nayo akusho ukuthi sizojabula noma ikusasa lethu lizoba ngcono. (IzAga 18:11; 23:4, 5) Kunalokho, injabulo yangempela nekusasa elilondekile singakuthola uma sisebenzisa ukuhlakanipha kukaNkulunkulu okutholakala eBhayibhelini.—1 Thimothewu 6:17-19.
ISELULEKO SEBHAYIBHELI SIYASIZA: UCardo, indoda yase-Indonesia, wagxila ekuqongeleleni ingcebo. Wathi: “Nganginazo zonke izinto abantu abazifisayo. Ngangiya noma kuphi lapho ngangifuna ukuya khona, ngithenga izimpahla ezibizayo, izimoto zikanokusho nezindlu.” Konke lokhu kwaba okomzuzwana nje. UCardo uthi, “Bangigebenga, imali engangiyisebenzele kanzima yonke leyo minyaka yahamba ngokuphazima kweso. Ngachitha ukuphila kwami konke ngiqongelela ingcebo kodwa ekugcineni ngadumazeka ngenxa yokuthi ngangingasenalutho futhi ngazizwa ngingaseyinto yalutho.”
UCardo waqala ukusebenzisa iseluleko seBhayibheli ngokuphathelene nemali. Manje akasachithi isikhathi sakhe eqongelela ingcebo kodwa usephila ukuphila okulula. Uthi, “Manje senginengcebo yangempela ngoba nginobuhlobo obuhle noNkulunkulu. Sengilala njengengane futhi ngijabule ngempela.”
Ukuze uthole umbono weBhayibheli ngemali funda isihloko esithi, “Imfundo Nemali Kungakwenza Yini Ube Nekusasa Elilondekile?” esitholakala kuyi-Nqabayokulinda No. 3 2021, ku-jw.org.
4. Ucansi
Abantu banemibono ehlukahlukene ngokuthi yiziphi izindlela ezamukelekayo zokwenza ucansi.
IBHAYIBHELI LITHI: ‘Dedani ekuziphatheni kabi ngokocansi. Ngamunye wenu kufanele azi ukuthi angawulawula kanjani umzimba wakhe siqu ukuze awugcine ungcwele futhi unodumo, kungabi ngokushisa kwenkanuko yokuya ocansini engalawuleki enjengaleyo izizwe ezingamazi uNkulunkulu ezinayo.’—1 Thesalonika 4:3-5.
INCAZELO: IBhayibheli lisibekela imingcele uma kuziwa endabeni yezifiso zocansi. Inkulumo ethi ‘ukuziphatha kabi ngokocansi’ ihlanganisa ukuphinga, ukuthengisa ngomzimba, ukuya ocansini kwabantu abangashadile, ukuya ocansini nomuntu wobulili obufanayo kanye nokuya ocansini nesilwane. (1 Korinte 6:9, 10) Ucansi luyisipho esivela kuNkulunkulu asibekele kuphela indoda nowesifazane abashadile.—IzAga 5:18, 19.
ISELULEKO SEBHAYIBHELI SIYASIZA: Owesifazane wase-Australia obizwa ngokuthi uKylie uthi: “Njengomuntu ongashadile, ngangicabanga ukuthi ukwenza ucansi kwakuzongenza ngizizwe ngithandwa futhi ngilondekile. Kodwa kwenzeka okuhlukile. Ngazizwa ngilahliwe, inhliziyo yami iphukile.”
Ngokuhamba kwesikhathi, uKylie wafunda futhi wakusebenzisa lokho okufundiswa yiBhayibheli ngocansi. Uthi, “Ngiyabona ukuthi imithetho kaNkulunkulu ihloselwe ukusivikela ebuhlungwini nasekuphathekeni kabi. Manje sengizizwa ngilondekile futhi ngithandwa ngenxa yokuthi ngenza izinto ngendlela uJehova afuna ngizenze ngayo. Ukusebenzisa iseluleko seBhayibheli kungisindise ebuhlungwini obukhulu!”
Ukuze uthole okwengeziwe, funda isihloko esithi “Lithini IBhayibheli Ngokukipita?” esiku-jw.org.
UMdali wethu uyasisiza sazi okuhle nokubi. Nakuba kungelula ukunamathela eziqondisweni zakhe ngaso sonke isikhathi kodwa ukuzama kuyasizuzisa. Singaqiniseka ngokuthi kuyosenza sihlale sijabule.