Usuku Okumelwe Lukhunjulwe

“Lokho ngikukhulumé kini ukuba nibe-nokuthula kimi. Ezweni niyakuba-lusizi, kepha yimani isibindi, mina ngilinqobile izwe.”—JOHANE 16:33.

1, 2. Yiluphi usuku olulodwa emlandweni oluvelele kunazo zonke ezinye izinsuku, futhi ngani?

IZWE namuhla likhuluma okuningi ngokuthula. Ekupheleni kweMpi Yezwe II, ukuthula kwakuhlanganiswe noSuku LweV-E kanye noSuku LweV-J.a Unyaka ngamunye, uKhisimusi wenza abantu bacabange ‘ngokuthula emhlabeni.’ (Luka 2:14) Kodwa kunosuku olulodwa kuwo wonke umlando wesintu oluvelele kunazo zonke ezinye. Luwusuku uJesu Kristu akhuluma ngalo amazwi acashunwe ngenhla. Ezinsukwini eziyizigidi ezimbili nangaphezulu isintu sikhona lapha emhlabeni, yilolusuku olulodwa olwayishintsha ngokuphelele inkambo yesintu ngenjongo yenzuzo yaso yaphakade.

² Lolosuku olubalulekile kwakuwuNisan 14 ekhalendeni lamaJuda. Ngonyaka ka-33 weSikhathi sethu Esivamile, uNisan 14 waqala ekushoneni kwelanga ngoApril 1. Ake sicabangele izenzakalo zangalolosuku oluyingqopha-mlando.

UNisan 14!

3. UJesu wawasebenzisa kanjani lamahora okugcina?

³ Njengoba kuhwalala, ngokunokwenzeka kukhanya inyanga enhle egcwele njengesikhumbuzo sokuthi uJehova unquma izikhathi nezinkathi. (IzEnzo 1:7) Futhi yini eyenzekayo kulelokamelo eliphezulu lapho uJesu nabaphostoli bakhe abangu-12 behlangene khona ukuze bagubhe iPhasika lamaJuda laminyaka yonke? Njengoba uJesu elungiselela ‘ukumuka kulelizwe, aye kuYise, ubonisa uthando ngabakhe kuze kube sekupheleni.’ (Johane 13:1) Ukwenza kanjani lokhu? Ngezwi nangesibonelo, uJesu uyaqhubeka efaka kubafundi bakhe izimfanelo ezizobasiza banqobe izwe.

Ukwembatha Ukuthobeka Nothando

4. (a) UJesu wayibonisa kanjani imfanelo eyisisekelo kubafundi bakhe? (b) Sazi kanjani ukuthi uPetru wafunda ukubaluleka kokuthobeka?

⁴ Abaphostoli kusadingeka bayeke umhawu wokuvelela nokuqhosha abanakho. Ngakho uJesu ubhinca ithawula abese egeza izinyawo zabo. Lokhu akukhona ukuboniswa kokuthobeka kokuzenzisa, njengoba kwenziwa eRome unyaka ngamunye upapa weLobukholwa. Lutho neze! Ukuthobeka kwangempela kuwukuzidela okuvela ‘ekuthobekeni okushaya sengathi abanye bakhulu.’ (Filipi 2:2-5) Ekuqaleni, uPetru akalitholi iphuzu, enqaba ukuvumela uJesu amgeze izinyawo. Lapho elungiswa, ucela uJesu ukuba amgeze umzimba wonke. (Johane 13:1-10) Nokho, kumelwe ukuba uPetru wafunda isifundo. Eminyakeni eminingi kamuva, simthola eluleka abanye kahle. (1 Petru 3:8, 9; 5:5) Yeka ukuthi kubaluleke kangakanani namuhla ukuba sonke sisebenzele uKristu ngokuthobeka!—Bheka futhi nezAga 22:4; Mathewu 23:8-12.

5. Yimuphi umyalo kaJesu owabonisa ukubaluleka kwenye imfanelo eyinhloko?

⁵ Omunye wabangu-12 akazuzi eselulekweni sikaJesu. Lona uJuda Iskariyothe. Njengoba isidlo sePhasika siqhubeka, umoya kaJesu uyakhathazeka, ubiza uJuda ngokuthi umkhapheli wakhe, futhi uyamxosha. Kungemva kwalokhu kuphela lapho uJesu etshela khona abafundi bakhe abangu-11 abathembekile: “Ngininika umyalo omusha wokuba nithandane; njengalokho nginithandile, nani nithandane. Ngalokho bonke bayakukwazi ukuthi ningabafundi bami, uma nithandana.” (Johane 13:34, 35) Lona umyalo omusha ngempela, oboniswe ngesibonelo sikaJesu siqu esihle kakhulu! Njengoba ihora lokufa kwakhe okuwumhlatshelo lisondela, uJesu ubonisa uthando oluvelele. Usebenzisa umzuzu ngamunye oyigugu efundisa futhi ekhuthaza labo bafundi. Kamuva, ugcizelela ukubaluleka kothando, ethi: “Yiló umyalo wami wokuba nithandane, njengalokho nginithandile. Akakho onothando olukhulu kunalolo lokuba adele ukuphila kwakhe ngenxa yabahlobo bakhe.”—Johane 15:12, 13.

“Indlela, Neqiniso, Nokuphila”

6. Yimuphi umgomo uJesu awubeka phambi kwabafundi bakhe abaseduze?

⁶ UJesu utshela abangu-11 abathembekile: “Inhliziyo yenu mayingakhathazeki. Kholwani nguNkulunkulu, nikholwe nayimi. Ekhaya likaBaba kukhona izindlu eziningi; uma bekungenjalo, bengiyakunitshela ukuthi ngiya ukunilungisela indawo.” (Johane 14:1, 2) Lendawo iyoba ‘sembusweni wezulu.’ (Mathewu 7:21) UJesu uveza indlela leliqembu eliseduze naye labafundi abathembekile elingafinyelela ngayo umgomo walo. Uthi: “Mina ngiyindlela, neqiniso, nokuphila; akakho oza kuBaba ngaphandle kwami.” (Johane 14:6) Lokhu kuyasebenza futhi nakulabo besintu abazuza ukuphila okuphakade emhlabeni.—IsAmbulo 7:9, 10; 21:1-4.

7-9. Kungani uJesu azichaza ngokuthi ‘uyindlela neqiniso nokuphila’?

⁷ UJesu ‘uyindlela.’ Indlela eyodwa newukuphela kwayo yokusondela kuNkulunkulu ngomthandazo ingoJesu Kristu. UJesu ngokwakhe uqinisekisa abafundi bakhe ukuthi uBaba uyobanika noma yini abayicela egameni likaJesu. (Johane 15:16) Imithandazo eqondiswa ezithombeni noma “kosanta” benkolo noma egcwele oMakabongwe uMariya namaculo aphindwaphindwayo—akukho kulokhu okuzwiwayo nokwamukelwayo uBaba. (Mathewu 6:5-8) Ngaphezu kwalokho, ngokuphathelene noJesu, siyafunda kuzEnzo 4:12: “Alikho futhi elinye igama phansi kwezulu elinikiwe ebantwini, esimelwe ukusindiswa ngalo.”

⁸ UJesu ‘uyiqiniso.’ Umphostoli uJohane wathi ngaye: “ULizwi waba-yinyama, wakha phakathi kwethu, sabona inkazimulo yakhe, inkazimulo njengeyozelwe yedwa kuYise, egcwele umusa neqiniso.” (Johane 1:14) UJesu wenza ukuba amakhulu eziprofetho ezisemiBhalweni YesiHeberu zibe yiqiniso ngokuzigcwalisa. (2 Korinte 1:20; IsAmbulo 19:10) Wenza iqiniso laziwa ekukhulumeni nabafundi bakhe kanye nezixuku ezazilalela, ekuphikisaneni kwakhe nabefundisi abangabazenzisi, nangesibonelo sakhe esiphilayo.

⁹ UJesu ‘ungukuphila.’ NjengeNdodana kaNkulunkulu, uJesu wathi: “Okholwa yiNdodana unokuphila okuphakade; kepha ongakholwa yiNdodana kayikubona ukuphila, kodwa intukuthelo kaNkulunkulu ihlezi phezu kwakhe.” (Johane 3:36) Ukholo oluboniswa emhlatshelweni kaJesu luholela ekuphileni okuphakade—ukuphila okungenakufa ezulwini ‘ngomhlambi omncane’ wamaKristu agcotshiwe nokuphila okuphakade emhlabeni oyipharadesi ngesixuku esikhulu ‘sezinye izimvu.’—Luka 12:32; 23:43; Johane 10:16.

Ukukhuthazelela Ushushiso

10. Kungani kudingeka ukuba ‘sinqobe izwe,’ futhi yisiphi isikhuthazo uJesu asinikeza kulokhu?

¹⁰ Labo abanethemba lokuphila esimisweni esisha sikaJehova kumelwe balwe nezwe ‘elisemandleni omubi,’ uSathane uDeveli. (1 Johane 5:19, NW) Khona-ke, yeka ukuthi akhuthaza kanjani amazwi kaJesu akuJohane 15:17-19! Uthi: “Nginiyala ngalezozinto, ukuze nithandane. Uma izwe linizonda, niyazi ukuthi langizonda mina ngaphambi kwenu. Uma beningabezwe, izwe belizakuthanda okwalo, kepha lokhu ningesibo abezwe kodwa nganikhetha mina ezweni, kungalokho izwe linizonda.” AmaKristu eqiniso abelokhu ezondwa kuze kube yilonyaka ka-1992, futhi yeka indlela esijabula ngayo ngezibonelo ezinhle zalabo abaqhubeka bemi beqinile, bethola ngokuthobeka amandla ngaphansi kwesandla sikaNkulunkulu esinamandla! (1 Petru 5:6-10) Sonke singakhuthazelela izilingo ngokubonisa ukholo kuJesu, ophetha ingxoxo yakhe ngalamazwi athokozisayo: “Ezweni niyakuba-lusizi, kepha yimani isibindi, mina ngilinqobile izwe.”—Johane 16:33.

Ukungenisa Isivumelwano Esisha

11. Yini uJeremiya ayiprofetha ngokuphathelene nesivumelwano esisha?

¹¹ Phakathi nalobobusuku, ngemva kokuba umkhosi wePhasika usuphelile, uJesu ukhuluma ngesivumelwano esisha. Umprofethi uJeremiya wabikezela lokhu emakhulwini eminyaka kusengaphambili, ethi: “Bheka, izinsuku ziyeza, usho uJehova, lapho ngiyakwenza isivumelwano esisha nendlu kaIsrayeli nendlu kaJuda . . . ngiyakufaka umthetho wami ezibilinini zabo, ngiwulobe ezinhliziyweni zabo, ngibe-nguNkulunkulu wabo, bona babe-ngabantu bami. . . . ngiyakuthethelela ububi babo, nesono sabo angisayikusikhumbula.” (Jeremiya 31:31-34) NgoNisan 14, 33 C.E., kuzokwenziwa umhlatshelo owenza lesivumelwano esisha sisebenze!

12. UJesu wasimisa kanjani isivumelwano esisha, futhi sifezani?

¹² UJesu utshela abangu-11 abathembekile ukuthi uye wakunxanela kakhulu ukudla leliPhasika kanye nabo. Khona-ke uthatha isinkwa, abonge, asihlephule, futhi abanike sona, ethi: “Lokhu kungumzimba wami onikelwa nina; yenzani lokhu ukuba ningikhumbule.” Ngendlela efanayo, udlulisa indebe yewayini elibomvu kubo, ethi: “Lesisitsha siyisivumelwano esisha egazini lami elithululelwa nina.” (Luka 22:15, 19, 20) Isivumelwano esisha senziwa sisebenze “ngegazi elinqabileyo” likaJesu, elibaluleke kakhulu kunegazi lezilwane elalifafazwa ukuze kwenziwe isivumelwano soMthetho sikaIsrayeli sisebenze! (1 Petru 1:19; Heberu 9:13, 14) Labo abangeniswa esivumelwaneni esisha bajabulela ukuthethelelwa okuphelele kwezono. Ngakho-ke, bangakufanelekela ukuba kwabangu-144 000, abamukela ifa laphakade njengoIsrayeli ongokomoya.—Galathiya 6:16; Heberu 9:15-18; 13:20; IsAmbulo 14:1.

“Ukuba Ningikhumbule”

13. (a) Yini okufanele sicabange ngayo ngesikhathi seSikhumbuzo? (b) Obani kuphela okufanele badle ezifanekiselweni, futhi ngani?

¹³ ISikhumbuzo saminyaka yonke se-1 960 sokufa kukaJesu sizoba ngoApril 17, 1992. Njengoba lolosuku lusondela, senza kahle ngokucabanga ngakho konke lokho umhlatshelo kaJesu ophelele okufezayo. Lelilungiselelo liphakamisa ukuhlakanipha kukaJehova nothando lwakhe olujulile ngesintu. Ubuqotho bukaJesu obungenaphutha, kuze kube ngisho nasekufeni okubuhlungu, bulwela uJehova ekuhlambalazeni kukaSathane kokuthi indalo yaKhe engabantu inesici futhi iyokwehluleka ngaphansi kokuvivinywa. (Jobe 1:8-11; IzAga 27:11) Ngegazi lakhe eliwumhlatshelo, uJesu ungumlamuleli wesivumelwano esisha, ithuluzi likaJehova lokukhetha “uhlanga olukhethiweyo, ubupristi obobukhosi, isizwe esingcwele, abantu abazuziweyo.” Lapho besesemhlabeni, laba ‘bashumayela ubukhosi’ bukaNkulunkulu wabo, uJehova, oye ‘wababiza baphuma ebumnyameni, bangena ekukhanyeni kwakhe okumangalisayo.’ (1 Petru 2:9; qhathanisa noEksodusi 19:5, 6.) Ngokufanelekile, yibo kuphela abadlayo ezifanekiselweni zeSikhumbuzo unyaka ngamunye.

14. Izigidi zezibukeli zicetshiswa kanjani?

¹⁴ ESikhumbuzweni sangonyaka odlule, abangu-10 650 158 baba khona emhlabeni wonke, kodwa phakathi kwalaba bangu-8 850 kuphela—abangaphansi kwengxenye eyodwa kweziyishumi zephesenti elilodwa—abadla ezifanekiselweni. Khona-ke, unayiphi inzuzo lomkhosi ezigidini zezibukeli? Unenzuzo enkulu! Nakuba zingadli, ziyacetshiswa ngokomoya yilokhu kuhlangana nobuzalwane obukhulu bomhlaba wonke, njengoba zizwa ngazo zonke izinto ezinhle kakhulu uJehova azifezayo ngomhlatshelo weNdodana yakhe.

15. Abanye ngaphandle kwabagcotshiwe bazuza kanjani emhlatshelweni kaJesu?

¹⁵ Ngaphezu kwalokho, umphostoli uyasazisa kweyoku-1 Johane 2:1, 2: “SinoMmeli kuYise, uJesu Kristu olungileyo; yena uyinhlawulo ngezono zethu, kungengezethu zodwa kodwa nangezezwe lonke.” Yebo, umhlatshelo kaJesu, nakuba uzuzisa kuqala isigaba sikaJohane esingeniswa esivumelwaneni esisha, ulungiselela futhi nokuthethelelwa kwezono “zezwe lonke.” “Uyinhlawulo” ngezono zabo bonke abanye bezwe lesintu ababonisa ukholo egazini likaJesu elachitheka, elibavulela ithemba elijabulisayo lokuphila okuphakade emhlabeni oyipharadesi.—Mathewu 20:28.

“Embusweni KaBaba”

16. (a) Yini manje uJesu nezindlalifa ezikanye naye ababonakala behlanganyela kuyo? (b) Yini edingekayo namuhla kokubili ensalini egcotshiwe nasesixukwini esikhulu?

¹⁶ Eqhubeka ekhuthaza abaphostoli bakhe, uJesu ukhomba osukwini lapho ngendlela engokomfanekiso eyophuza khona isithelo somvini sisisha nabafundi bakhe eMbusweni kaYise. (Mathewu 26:29) Uyabatshela: “Nina-ke ningababekhuthazela nami ekulingweni kwami; nanjengokuba uBaba engimisele umbuso, nami nginimisela wona ukuba nidle, niphuze etafuleni lami embusweni wami; niyakuhlala ezihlalweni zobukhosi, nahlulele izizwe eziyishumi nambili zakwaIsrayeli.” (Luka 22:28-30) Njengoba uJesu athatha amandla oMbuso emazulwini ngo-1914, singaphetha ngokuthi isibalo esikhulu sezindlalifa ezikanye noJesu, eziqoqwe phakathi namakhulu eminyaka, sesivusiwe kakade, ukuba ‘sihlale ezihlalweni zobukhosi’ kanye naye. (1 Thesalonika 4:15, 16) Lusondela ngokushesha usuku lokuba izingelosi zidedele “imimoya emine” ‘yosizi olukhulu’! Ngalesosikhathi, ukubekwa uphawu kwabangu-144 000 bakaIsrayeli ongokomoya nokuqoqwa kwezigidi zesixuku esikhulu kuyobe sekuphelile. Bonke laba kumelwe bagcine ubuqotho, njengoba kwenza uJesu, ukuze bazuze umklomelo wokuphila okuphakade.—IsAmbulo 2:10; 7:1-4, 9.

17 nebhokisi. (a) Uma ogcotshiwe engase enqatshwe njengongathembekile, ubani ngokunengqondo ongase avale isikhala sakhe? (b) Izihloko zeNqabayokulinda ngo-1938 zaveza kuphi ukukhanya okuthakazelisayo ngokwakhiwa nokwanda kwakamuva kokuhleleka okungokwasezulwini emhlabeni?

¹⁷ Kuthiwani uma abanye abagcotshiwe behluleka ukuba abagcini bobuqotho? Kulelihora lokugcina, ngokungangabazeki isibalo sabanjalo abangathembekile siyoba sincane. Ngokunengqondo, noma yiziphi izikhala ngeke zivalwe ngabathathwe phakathi kwabasanda kubhapathizwa, kodwa ziyovalwa ngabathathwe phakathi kwalabo abaye bakhuthazela noJesu ekulingweni kwakhe eminyakeni eminingi yenkonzo yokwethembeka. Ukubaneka okukhazimulayo kokukhanya okungokomoya okwavela ngeNqabayokulinda ngawo-1920 nawo-1930 kubonisa ukuthi ukuqoqwa kwensali yabagcotshiwe kwaphela ngokoqobo phakathi naleyonkathi. Labo ‘abahlanza izingubo zabo, bazenza zaba-mhlophe egazini leWundlu’ kusukela ngalesosikhathi banethemba elihlukile elijabulisayo. NgoKristu, umoya kaJehova ubaholela “emithonjeni yamanzi okuphila” emhlabeni oyiPharadesi.—IsAmbulo 7:10, 14, 17.

Umthandazo Oqotho Kakhulu

18. Yiziphi izifundo ezinamandla esizifundayo emthandazweni kaJesu okuJohane isahluko 17?

¹⁸ UJesu uphetha umhlangano wakhe weSikhumbuzo nabafundi bakhe ngokwenza umthandazo oqotho olotshwe kuJohane 17:1-26. Okokuqala uthandazela ukuba uYise amkhazimulise njengoba egcina ubuqotho kuze kube sekupheleni. Ngalendlela uJehova naye uzokhazinyuliswa, igama lakhe lingcweliswe—lisuswe sonke isihlamba. Ngoba, ngempela, umuntu ophelele uJesu uyabonisa ukuthi indalo kaNkulunkulu engabantu ingaba engenasici, ngisho nangaphansi kovivinyo olunzima kakhulu. (Duteronomi 32:4, 5; Heberu 4:15) Ngaphezu kwalokho, ukufa kukaJesu okuwumhlatshelo kuvula ithuba elimangalisayo ngenzalo ka-Adamu. UJesu uthi: “Ukuphila okuphakade yilokhu ukuba bazi wena-Nkulunkulu wedwa oqinisileyo, nomthumileyo, uJesu Kristu.” Yeka ukuthi kubaluleke kanjani ukuba sizuze ulwazi oluqondile ngoJehova uNkulunkulu nangeNdodana yakhe, iWundlu likaNkulunkulu, eyanikela ngokuphila kwayo ukuze kulwelwe uJehova futhi kusindiswe isintu! (Johane 1:29; 1 Petru 2:22-25) Ingabe lokho kuzidela kothando olukhulu ukwazisa kakhulu kangangokuba uze uzinikezele ngokuphelele kuJehova nasenkonzweni yakhe eyigugu?

19. Abensali nabesixuku esikhulu bangabujabulela kanjani ubunye obuyigugu?

¹⁹ Ngaphezu kwalokho, uJesu uthandaza kuYise oNgcwele ukuba alonde abafundi njengoba bezibonakalisa bengeyona ingxenye yezwe, benamathela ezwini laKhe njengeliyiqiniso, futhi belondoloza ubunye obuyigugu noBaba neNdodana. Ingabe lomthandazo ubungaphendulwa yini kahle kakhulu kuze kube yilolusuku lwanamuhla njengoba abensali egcotshiwe nabesixuku esikhulu bekhonza ndawonye ngobunye ezibophweni zothando, kuyilapho begcina ukungathathi-hlangothi ezweni, ebudloveni balo, nasebubini balo? Yeka indlela ayigugu ngayo amazwi kaJesu okuphetha kuYise, uJehova! “Ngibazisile igama lakho, ngizakubazisa lona,” kusho uJesu, “ukuba uthando ongithandé ngalo lube-kubo, nami ngibe-kubo.”—Johane 17:14, 16, 26.

20. Kungani uNisan 14, 33 C.E., ngokuqinisekile ewusuku okumelwe lukhunjulwe?

²⁰ Njengoba eya ensimini yaseGetsemane, uJesu uba nokunye ukuhlangana okufushane, okwakhayo nabafundi bakhe. Khona-ke izitha zakhe ziyambamba! Awekho amazwi angachaza ubuhlungu bukaJesu obungokomzimba, ukudabuka kwakhe kalusizi ngesihlamba esilethwa kuJehova, nobuqotho bakhe obuyisibonelo kukho konke lokhu. UJesu uyakhuthazela kuze kube sekupheleni, phakathi nobusuku nakuyo yonke ingxenye enkulu yamahora emini yangalolosuku. Ubonisa ngokucacile ukuthi uMbuso wakhe awuyona ingxenye yezwe. Futhi ngomoya wakhe wokugcina, uyamemeza: “Kufeziwe!” (Johane 18:36, 37; 19:30) Ukunqoba kwakhe izwe kuphelile. UNisan 14, 33 C.E., ngokuqinisekile uwusuku okumelwe lukhunjulwe!

[Umbhalo waphansi]

Ubungaphendula Kanjani?

◻ Yini uJesu ayifundisa ngokuphathelene nokuthobeka nothando?

◻ UJesu waba kanjani “indlela, neqiniso, nokuphila”?

◻ Iyini injongo yesivumelwano esisha?

◻ Yibuphi ubunye nothando okuhlanganyelwa insali egcotshiwe nesixuku esikhulu?

[Ibhokisi ekhasini 20]

Ukuhlakanipha KukaSolomoni Omkhulu

Izihloko ezazithi “Ukuhleleka” ezazikomagazini beNqabayokulinda yesiNgisi kaJune 1, noJune 15, 1938, zaqokomisa ilungiselelo elingokwasezulwini eliyisisekelo elilandelwa oFakazi BaJehova kuze kube namuhla. Zaletha emvuthwandaba isikhathi esiphawulekayo sokulungiswa kabusha okwaqala ngo-1919 kwezimfundiso nokuhlelwa. (Isaya 60:17) Lapho iqhathanisa lesosikhathi esiyiminyaka engu-20 neminyaka engu-20 uSolomoni akha ngayo ithempeli nendlu yenkosi eJerusalema, INqabayokulinda yathi: “Imibhalo ibonisa ukuthi, ngemva kweminyaka engamashumi amabili yesimiso sikaSolomoni sokwakha . . . , wangenela isimiso sokwakha sezwe lonke. (1 AmaKh. 9:10, 17-23; 2 IziKr. 8:1-10) Kwase kufika inkosikazi yaseSheba ‘ivela emikhawulweni yomhlaba izakuzwa ukuhlakanipha kukaSolomoni.’ (Math. 12:42; 1 AmaKh. 10:1-10; 2 IziKr. 9:1-9, 12) Lokhu kuphakamisa lombuzo: Yini elindele abantu bakaJehova emhlabeni esikhathini esiseduze esizayo? Ngethemba eligcwele sizolinda, futhi sizobona.” Lelothemba lalingelona ize. Ngaphansi kokuhleleka okungokwasezulwini isimiso esikhulu kakhulu sokwakha okungokomoya komhlaba wonke siye saqoqa abangaphezu kwezigidi ezine besixuku esikhulu. Njengenkosikazi yaseSheba, laba baye bavela emikhawulweni yomhlaba ukuze bezwe ukuhlakanipha kukaSolomoni Omkhulu, uKristu Jesu—oxhunyaniswa nabo ‘ngenceku ethembekileyo neqondayo.’—Mathewu 24:45-47.