Isonto Elashintsha Umhlaba

“Ubusisiwe ozayo egameni leNkosi.”—MATHEWU 21:9.

1. Yimaphi amaqembu amabili angafani athintwa yizenzakalo ezithile ngoAugust odlule?

“IZINSUKU EZINTATHU ZOSIZI EZASHUKUMISA UMHLABA.” NgoAugust 1991, izihloko ezinkulu zamaphephandaba njengalesi zagcizelela iqiniso lokuthi umhlaba ungase unyakaziswe ngezinsukwana nje ezimbalwa. Ngempela, izinsuku zokugcina zika-August zazingezona ezinezigigaba ezinkulu kakhulu ezweni nje kuphela kodwa futhi naseqenjini uJesu athi ngalo: ‘Abasibo abezwe.’ Leliqembu namuhla laziwa ngokuthi oFakazi BakaJehova.—Johane 17:14.

2, 3. (a) Inkululeko yaqokonyiswa kanjani eZagreb naphezu kokusongela kwempi? (b) Ukholo oluqinile lwavuzwa kanjani eOdessa?

² Umhlangano wezizwe zonke woFakazi BakaJehova owawungowokuqala ngqá ukuba uhlelelwe iYugoslavia wawumiselwe ukuba ube ngoAugust 16 kuya ku-18. Njengoba kwaba njalo, kwakuzoba futhi umhlangano wokuqala omkhulu wabantu bakaJehova esizweni esisonqenqemeni lwempi yombango. OFakazi bendawo, kanye nezisebenzi zokuzithandela ezivela emazweni angomakhelwane, zazisebenze kanzima izinyanga ezimbili ziyivuselela ngokuphelele inkundla yebhola likanobhutshuzwayo iHAŠK Građanski yaseZagreb. Yayingahlalwa mpukane, iyindawo efanelekayo yoMhlangano “Wabathandi Benkululeko Esiyinikwe UNkulunkulu.” Izinkulungwane zezihambeli zezizwe ezihlukahlukene zahlela ukuba khona, kuhlanganise nezingu-600 ezivela eUnited States. Njengoba kwakusongela impi yombango, kwakunenkulumo ethi: “AmaMelika Awasoze Afika.” Kodwa afika, kanye nezihambeli ezivela kwamanye amazwe amaningi. Kwakulindelwe inani labangu-10 000, kodwa enkundleni kwakunabangu-14 684 ngosuku lokugcina! Bonke babusiswa ngokucebile ngoba abazange ‘bayeke ukuhlangana ndawonye.’—Heberu 10:25.

³ Phakathi nezinsuku ezintathu ngemva komhlangano waseZagreb, kwaba nokugumbuqelwa kombuso okungaphumelelanga eSoviet Union. Ngalesosikhathi, abathandi benkululeko yokwesaba uNkulunkulu babenza amalungiselelo okugcina omhlangano wabo eOdessa eUkraine. Ingabe wawungase uqhutshwe umhlangano? Ngokholo oluqinile abazalwane benza imininingwane yokugcina ekuvuselelweni okuphelele kwenkundla, futhi izihambeli zaziqhubeka zifika. Njengokungathi ngomlingo, ukugumbuqelwa kombuso kwaphela. Kwaqhutshwa umhlangano ojabulisayo ngoAugust 24, 25, kwaba nabangu-12-115 ababa khona nabangu-1 943—amaphesenti angu-16 enani eliphakeme lababekhona—ababhapathizwa! LaboFakazi abasha, kanye nabagcini bobuqotho abangomakadebona, bathokoza ngokuthi babezile kulowomhlangano bethembele ngokugcwele kuJehova.—IzAga 3:5, 6.

4. OFakazi eMpumalanga Yurophu bebelokhu belandela siphi isibonelo esabekwa uJesu?

⁴ LaboFakazi abathembekile babelandela isibonelo esabekwa yiSibonelo sethu, uJesu Kristu. Wayengakaze akushalazele ukuba khona emikhosini eyayiyalelwe uJehova, ngisho nalapho amaJuda ayefuna ukumbulala. Njengoba ayenyukela eJerusalema eya ePhasikeni lakhe lokugcina, lamaJuda ayemi ethempelini, ebuza: “Nithini na? Akayikuza nempela emkhosini na?” (Johane 11:56) Kodwa weza! Lokhu kwalungisa inkundla yesonto elafinyelela umvuthwandaba ngokuguqulwa kwenkambo yomlando wesintu. Singabukeza yini manje amanye amaphuzu avelele alelosonto—uNisan 8 kuya ku-14 ekhalendeni lamaJuda?

UNisan 8

5. Yini uJesu ayeyiqaphela njengoba ayeya eBethaniya ngoNisan 8, 33 C.E.?

⁵ Ngalolusuku uJesu nabafundi bayafika eBethaniya. Lapha, uJesu uzolala izinsuku eziyisithupha ekhaya lomngane wakhe othandekayo uLazaru, asanda kumvusa kwabafileyo. IBethaniya liseduze neJerusalema. Ngasese, uJesu usebaxwayisile kakade abafundi bakhe: “Bhekani, sikhuphukela eJerusalema; iNdodana yomuntu izakukhashelwa kubapristi abakhulu nababhali; bazakuyinqumela ukuba ife, bayikhaphele kwabezizwe ukuba iklolodelwe, ishaywe, ibethelwe [esigxotsheni sokuhlushwa, NW]; kepha ngosuku lwesithathu izakuvuswa.” (Mathewu 20:18, 19) UJesu uqaphela ngokugcwele ukuthi manje kumelwe abhekane novivinyo olubuhlungu kakhulu. Nokho, njengoba lesosikhathi sokuvivinywa okukhulu sisondela, wenza yonke imizamo ukuze akhonze abafowabo ngothando. Kwangathi ngaso sonke isikhathi singaba “[na]lowomqondo owawukhona nakuKristu Jesu.”—Filipi 2:1-5; 1 Johane 3:16.

UNisan 9

6. Ebusuku bangoNisan 9, uMariya wenzani, futhi yini uJesu ayisho kuJuda?

⁶ Ngemva kokushona kwelanga, njengoba kuqala uNisan 9, uJesu ujabulela isidlo ekhaya likaSimoni owayekade enochoko. Kulapha lapho udadewabo kaLazaru uMariya ethela khona amafutha abizayo anamakha ekhanda nasezinyaweni zikaJesu futhi ngokuzithoba emsula izinyawo ngezinwele zakhe. Lapho uJuda enqaba, uJesu uthi: “Myeke ukuba awalondolozele usuku lokumbelwa kwami.” Lapho bezwa ukuthi amaJuda amaningi aya eBethaniya futhi aba nokholo kuJesu, abapristi abakhulu benza icebo lokubulala yena noLazaru.—Johane 12:1-7.

7. Ekuseni ngoNisan 9, igama likaJehova ladunyiswa kanjani, futhi yini uJesu ayibikezela?

⁷ Ekuseni kakhulu, uJesu uqala uhambo oluya eJerusalema. Izixuku ziyaphuma ukumhlangabeza, ziphephezelisa amagatsha esundu futhi ziyamemeza: “Hosiyana! Ubusisiwe ozayo egameni leNkosi, yebo, iNkosi kaIsrayeli.” Khona-ke uJesu ugcwalisa isiprofetho sikaZakariya 9:9 ngokunyukela emzini egibele imbongolo. Njengoba esondela eJerusalema, uyalikhalela, ebikezela ukuthi amaRoma azolizungeza ngezigxobo ezicijile futhi alibhubhise ngokuphelele—isiprofetho esasizogcwaliseka ngokuphawulekayo eminyakeni engu-37 kamuva. (Lokhu futhi kubikezela inkathazo ngeLobukholwa, eliye lahlubuka lilandela isibonelo seJerusalema lasendulo.) Ababusi bamaJuda abafuni uJesu ukuba abe inkosi yabo. Bamemeza ngokuthukuthela: “Bheka, izwe lonke liyamlandela.”—Johane 12:13, 19.

UNisan 10

8. NgoNisan 10, uJesu wayibonisa kanjani inhlonipho ejulile ngendlu kaJehova yokuthandaza, futhi yini eyalandela?

⁸ UJesu uyaphinda uvakashela ethempelini. Ngokwesibili, ukhiphela ngaphandle abahwebi abahahayo nabashintshiselana ngemali. Ukuhweba—“ukuthanda imali”—akufanele kwenzeke endlini kaJehova yokuthandaza! (1 Thimothewu 6:9, 10) Ngokushesha uJesu uzokufa. Ukhuluma ngokutshalwa kwembewu ukuze afanekise lokhu. Imbewu yokuqala iyafa, kodwa iyamila ukuze iveze isikhwebu esiveza izinhlamvu eziningi. Ngokufanayo, ukufa kukaJesu kuzophumela ekuphileni okuphakade ngezixuku ezibonisa ukholo kuye. Ekhathazwe umcabango wokufa kwakhe okusondelayo, uJesu uthandazela ukuba igama likaYise likhazinyuliswe ngakho. Ekuphenduleni, izwi likaNkulunkulu liyaduma ezulwini ukuze bonke abakhona bezwe: “Ngilikhazimulisile, ngobuye ngilikhazimulise.”—Johane 12:27, 28.

UNisan 11—Usuku Olumatasa

9. (a) Ekuseni ngosuku lwangoNisan 11, uJesu wayisebenzisa kanjani imifanekiso ekulahleni amaJuda ayizihlubuki? (b) Ngokuvumelana nomfanekiso kaJesu, obani abaye balahlekelwa yithuba elimangalisayo?

⁹ UJesu nabafundi bakhe bayasuka futhi eBethaniya ukuze benze umsebenzi wosuku lonke. UJesu usebenzisa imifanekiso emithathu ukuze abonise ukuthi kungani umphakathi wamaJuda ohlubukayo ulahlwa. Wayeqalekise umkhiwane ongatheli, futhi isimo sawo samanje sokubuna sifanekisela isizwe samaJuda esingenalukholo, esingenazithelo. Lapho engena ethempelini, uchaza indlela abalimi abangafaneleki besivini senkosi ekugcineni ababulala ngayo ngisho nalowo oyindodana nendlalifa yenkosi—ebonisa ukungakunaki kwamaJuda lokho ayekuphathiswe uJehova, okuzofinyelela umvuthwandaba ngokubulala kwawo uJesu. Uchaza idili lomshado elihlelwe yinkosi—uJehova—ezimenywa zayo (amaJuda) zixolisa ngobugovu zithi ngeke zibe khona. Ngalokho, isimemo siya kwabangaphandle—abeZizwe—abanye babo abasamukelayo. Kodwa umuntu otholakala engayigqokile ingubo yomshado ukhishelwa ngaphandle. Ufanekisela amaKristu-mbumbulu eLobukholwa. AmaJuda amaningi osuku lukaJesu ayemenyiwe ‘kodwa ayeyingcosana ayekhethwe’ ukuba abe phakathi kwabangu-144 000 ababekwe uphawu abadla ifa loMbuso wasezulwini.—Mathewu 22:14; IsAmbulo 7:4.

10-12. (a) Kungani uJesu asola abefundisi bamaJuda, futhi yikuphi ukubalahla okubuhlungu akufumbela kulabobazenzisi? (b) Ekugcineni sakhishwa kanjani isahlulelo emphakathini wamaJuda ohlubukayo?

¹⁰ Abefundisi bamaJuda abangabazenzisi bafuna ithuba lokubamba uJesu, kodwa uphendula eminingi yemibuzo yabo yokumcupha futhi ubasambathekisa phambi kwabantu. Oh, yilawomaJuda enkolo angamambuka! Yeka ukuthi uJesu uwasola ngokungafihli kanjani! Ahahela ukuvelela, izingubo eziphambili, neziqu ezizwakala kamnandi, njengokuthi “Rabi” nokuthi “Baba,” njengabefundisi abaningi bosuku lwethu. UJesu ubeka umthetho: “Kepha yilowo nalowo oziphakamisayo uzakuthotshiswa, nalowo ozithobayo uzakuphakanyiswa.”—Mathewu 23:12.

¹¹ UJesu ubalahla kabuhlungu labo baholi benkolo. Izikhathi eziyisikhombisa uthi: “Maye kinina!” ebabiza ngokuthi abaholi abayizimpumputhe nangokuthi abazenzisi. Futhi isikhathi ngasinye unikeza isizathu esicacile salokhu kubalahla. Bavimba indlela engena eMbusweni wamazulu. Lapho beyenga iproselithe, liba eleGehena ngokuphindiwe, njengoba ngokunokwenzeka beselilindelwe ukubhujiswa kakade ngenxa yesono esikhulu noma ukushiseka okungenangqondo. “Ziwula, zimpumputhe!” kusho uJesu, ngoba abaFarisi bagxila egolideni lethempeli kunasekulondolozeni ukukhulekela okuhlanzekile lapho. Ababunaki ubulungisa, isihe, nokwethembeka njengoba bekhokha okweshumi kwesinkuntshane, okwentshungu, nokodonqa, kodwa bengazinaki izinto ezisindayo zoMthetho. Ukugeza okuwumcikilisho akusoze kwakususa ukungcola kwabo kwangaphakathi—kuphela inhliziyo ehlanzwe ngokuba nokholo emhlatshelweni kaJesu osondelayo engafeza lokho. Ubuzenzisi babo bangaphakathi nokungabi-namthetho kuphikisa noma yiliphi ingaphandle ‘elicakiweyo.’—Mathewu 23:13-29.

¹² Yebo, kungumaye ngempela kubaFarisi, ngokuqinisekile “amadodana ababulala abaprofethi” basendulo! Bayizinyoka, inzalo yamabululu, bamiselwe iGehena, ngoba ngeke babulale uJesu kuphela kodwa futhi nalabo abathumayo. Lesi isahlulelo esizokhishwa “phezu kwalesisizukulwane.” Ekugcwalisekeni kwaso, iJerusalema labhujiswa ngokuphelele eminyakeni engu-37 kamuva.—Mathewu 23:30-36.

13. Amazwi kaJesu ngeminikelo yethempeli abonakala kuziphi izimo namuhla?

¹³ Ngaphambi kokuba ahambe ethempelini, uJesu ukhuluma ngokutusayo ngomfelokazi ompofu ofaka emphongolweni womnikelo amafadingi amabili—“konke abephila ngakho.” Kungokuphambene ngempela nabacebile abahahayo, abafaka kuphela iminikelo yokugcina icala! Njengalowomfelokazi ompofu, oFakazi BakaJehova namuhla badela ngokuzithandela isikhathi, amandla, nezimali ukuze basekele futhi bandise umsebenzi woMbuso womhlaba wonke. Yeka indlela abahluke ngayo kulabobavangeli beTV abonakele abaphanga imihlambi yabo futhi baziqongelele bona siqu umcebo omkhulukazi!—Luka 20:45–21:4.

Njengoba UNisan 11 Uphela

14. Yikuphi ukudabuka uJesu akuveza, futhi wawuphendula kanjani omunye umbuzo wabafundi bakhe?

¹⁴ UJesu uyalikhalela iJerusalema nabantu balo futhi uyamemezela: “Anisayikungibona nize nithi: Ubusisiwe ozayo egameni leNkosi.” (Mathewu 23:37-39) Kamuva, lapho behlezi eNtabeni Yeminqumo abafundi bakaJesu abaseduze naye bayabuza ngalokhu, futhi ekubaphenduleni uJesu uchaza isibonakaliso esiyophawula ukuba khona kwakhe emandleni oMbuso nesiphelo sesimiso sezinto esibi sikaSathane.—Mathewu 24:1–25:46; Marku 13:1-37; Luka 21:5-36.

15. Yisiphi isibonakaliso uJesu asinikeza ngokuphathelene nokuba khona kwakhe ngenjongo yokwahlulela, futhi sigcwaliseka kusukela nini?

¹⁵ Ebhekisela esahlulelweni sikaJehova esizokhishwa ngokushesha ethempelini, uJesu uyabonisa ukuthi lokhu kufanekisela izenzakalo zesikhathi esizayo eziyinhlekelele esiphelweni saso sonke isimiso sezinto. Lesosikhathi sokuba khona kwakhe siyophawulwa ukugqashuka kwempi ngezinga elingakaze libonwe, kanye nendlala, ukuzamazama komhlaba, nezifo, kanye nokungabi-naluthando nokungabi-namthetho. Yeka ukuthi lokhu kuye kwaba yiqiniso kanjani ngezwe lethu lekhulu lama-20 leminyaka kusukela ngo-1914!

16, 17. Yiziphi izenzakalo zezwe uJesu azichaza, futhi amaKristu kufanele asabele kanjani esiprofethweni?

¹⁶ Kuyofinyelelwa umvuthwandaba ‘osizini olukhulu olungazange lube-khona kwasekuqaleni kwezwe kuze kube-manje nolungasayikuba-khona.’ Njengoba lolu luyoba olubhubhisa njengoZamcolo wosuku lukaNowa, uJesu uxwayisa ngokuphishekela iminako yezwe. “Ngakho-ke lindani, ngokuba anazi ukuthi iNkosi yenu iyakufika ngaluphi usuku.” Yeka indlela esingajabula ngayo ngokuthi iNkosi iye yamisa “inceku ethembekileyo neqondayo” egcotshiwe ukuba imemezele isixwayiso nokuba ilungiselele ukudla okungokomoya okuyinala kulolusuku lokuba khona kwayo!—Mathewu 24:21, 42, 45-47.

¹⁷ Ekhulwini lethu lama-20 leminyaka, siye sabona ‘emhlabeni usizi lwehlela izizwe, zixakeka, abantu bephela amandla ngokwesaba nangokubheka okuvelela umhlaba.’ Kodwa uJesu uyasitshela: “Nxa kuqala ukuvela lokho, lulamani, niphakamise amakhanda enu, ngokuba kusondele ukukhululwa kwenu.” Futhi uyasixwayisa: “Xwayani ukuba izinhliziyo zenu zingasindwa ngukuminza nokudakwa nokunaka okwalokhukuphila, lunizume lolosuku ningazelele.” Ukuhlala siqaphile kuphela okungasenza sime samukelekile phambi kukaJesu, “iNdodana yomuntu,” ekubeni khona kwakhe.—Luka 21:25-28, 34-36.

18. Yisiphi isikhuthazo esingasithola emfanekisweni kaJesu wezintombi eziyishumi nowamathalenta?

¹⁸ Ekuphetheni ukubukeza kwakhe kobuciko izenzakalo zosuku lwanamuhla, uJesu unikeza imifanekiso emithathu. Okokuqala, emfanekisweni wezintombi eziyishumi, uphinde futhi agcizelele isidingo ‘sokuhlala silindile.’ Khona-ke, emfanekisweni wezinceku namathalenta, ubonisa indlela ukukhuthala okuvuzwa ngayo ngesimemo ‘sokungena ekuthokozeni kweNkosi.’ AmaKristu agcotshiwe, afanekiselwayo kulemifanekiso, kanye nezinye izimvu angathola isikhuthazo esikhulu kulezincazelo ezicacile.—Mathewu 25:1-30.

19, 20. Yibuphi ubuhlobo obujabulisayo bosuku lwanamuhla obuqokonyiswa emfanekisweni kaJesu wezimvu nezimbuzi?

¹⁹ Umfanekiso wesithathu ubhekisela ekubeni khona kukaJesu emandleni oMbuso ngemva kokuba efike wahlala esihlalweni sakhe sobukhosi esikhazimulayo sasezulwini. Yisikhathi sokwahlulela izizwe nesokwahlukanisa abantu bomhlaba babe amaqembu amabili, elinye elakhiwa abantu abathobekile abanjengezimvu kanye nelinye, elakhiwa abantu abanenkani abanjengezimbuzi. Izimvu zenza konke okusemandleni azo ukuze zizibonakalise zibasekela abafowabo beNkosi—abagcotshiwe abasasele emhlabeni kulesikhathi sokuphela kwezwe. Lezizimvu zivuzwa ngokuphila, kuyilapho izimbuzi ezingenakwazisa ziya ekubhujisweni kwaphakade.—Mathewu 25:31-46.

²⁰ Yeka ubuhlobo obumangalisayo esibubonayo phakathi kwezinye izimvu nabafowabo beNkosi kulesiphelo sesimiso sezinto! Nakuba insali egcotshiwe yathwala ingxenye esindayo yomsebenzi ekuqaleni kokuba khona kweNkosi, izigidi zezinye izimvu ezishisekayo manje zakha amaphesenti angu-99,8 ezinceku zikaNkulunkulu emhlabeni. (Johane 10:16) Nazo futhi ziye zazibonakalisa zizimisele ukukhuthazelela ‘ukulamba, ukoma, ukuhamba-ze, ukugula, nokuboshwa’ njengabangane babagcotshiwe abagcina ubuqotho.a

UNisan 12

21. Yini eyaya iqina ngoNisan 12, futhi kanjani?

²¹ Icebo lokubulala uJesu liya liqina. UJuda uvakashela abapristi abakhulu ethempelini, evuma ukukhaphela uJesu ngezinhlamvu zesiliva ezingu-30. Ngisho nalokhu kwakuprofethiwe.—Zakariya 11:12.

UNisan 13

22. Yikuphi ukulungiselela okwenziwa ngoNisan 13?

²² UJesu, oqhubeka eseBethaniya, mhlawumbe ngenjongo yokuthandaza nokuzindla, uthumela abafundi bakhe eJerusalema ukuba bayofuna “uSibanibani” othile. Ekhaya lalendoda, ekamelweni elikhulu eliphezulu, balungiselela iPhasika. (Mathewu 26:17-19, qhathanisa neNW.) Njengoba ilanga lishona ngoNisan 13, uJesu ubafica lapho ahlanganyele nabo ekugubheni umkhosi owaba nezigigaba ezinkulu kakhulu kuwo wonke umlando. Yini manje ezokwenzeka ngoNisan 14? Isihloko sethu esilandelayo sizosho.

[Umbhalo waphansi]

Ubungathini Ngamafuphi?

◻ Yikuphi ukungenisa nokwamukela izihambi abanye abakwenza kuJesu phakathi noNisan 8 kuya ku-10?

◻ UJesu wabadalula kanjani abefundisi abangabazenzisi ngoNisan 11?

◻ Yisiphi isiprofetho esikhulu uJesu asinikeza, futhi sigcwaliseka kanjani namuhla?

◻ Izenzakalo zathuthukela kanjani emvuthwandaba ngoNisan 12 no-13?

[Isithombe ekhasini 12]

UJesu utusa umfelokazi ompofu owanikela ngamafadingi amabili—konke ayenakho