Ukuqondisisa Izindaba

“Ukuthumba Imivubukulo”

Ngaphansi kwalesosihloko, iphephandaba lesiFulentshi iMonde labika indaba kasosayensi othile wemivubukulo eNdiya lowo “iminyaka engama-20 . . . ngokusobala owakhohlisa asebenza nabo ngokuqondene nemvelaphi yemivubukulo abanika yona ukuba bayihlole.” Kuthiwa lokhu “kuthumba” kwahlanganisa nokubathumelela imivubukulo etholakale eUnited States, eAfrika, eCzechoslovakia, nakumaBritish Isle, ethi itholakale eziNtabeni zaseHimalaya. Lososayensi wasakaza lokho akutholile ezihlokweni ezingaphezu kwama-300. Lokhu kukhohlisa kwavezwa usosayensi waseAustralia kumagazini wesayensi waseBritani iNature. Wazibuza ukuthi ‘kwakungenzeka kanjani ukuthi inani elikhulu kangaka lemivubukulo engabazisayo kungashiwo lutho ngalo isikhathi eside kangaka.’

Okunye okungenzeka kube isizathu, ngokweMonde, kwakungumthetho wokungakhulumi olalelwa amalungu amaningi omphakathi wezesayensi. Lesosihloko saphawula ukuthi lokhu ‘kuthunjwa’ kwemivubukulo kuye “kwenza ukuba cishe wonke amaqiniso anqwatshelwanisiwe [eminyakeni eyi-20 edlule] kuyisayensi yokwakheka komhlaba yaseHimalaya angabi namsebenzi.”

Ngokusobala, lendaba entsha yokukhohlisa kwezesayensi ayifaki kungabaza kuwo wonke umhlaba wezesayensi. Nokho, inikeza ubufakazi obengeziwe bokuthi izinkulumo zososayensi bemivubukulo lapho ziqhathaniswa nokunemba komlando weBhayibheli ongahluleki ngokuvamile ziyilokho umphostoli uPawulu akubiza ngokuthi “ukuphikisana ‘kolwazi’ olungelona neze ulwazi.”—1 Thimothewu 6:20, The New Jerusalem Bible.

“Zigcwele Igazi”

EColombia, eNingizimu Melika, izikhulu zezidakamizwa ezinonya zenza izivumelwano nezinsizwa ezithile ukuba ziqede izimbangi noma zitshale ingebhe kwabezombangazwe nakuso bonke abantu. Enye isicario, enjalo, noma umbulali okhokhelwayo, yatshela izintatheli zeTiempo, umagazini wezindaba ewesiPanishi, ukuthi ‘ukubulala ngenhloso kunzima.’ Iwuthoba kanjani unembeza wayo? Yachaza: “Ngiyazi ukuthi omunye wemiyalo kaNkulunkulu uthi akufanele ubulale, kodwa esimweni sami yindaba yomuntu obulala ngenjongo yokuphila. Ngibulala ngokukhululeka ngoba ngidinga imali. Aniboni yini ukuthi ngisabenza ngoba kufanele ngiphile ngandlela-thile? . . . Ngaphambi kokuba ngihambe ngiyobulala othile, ngithandaza kuNkulunkulu naseNcasakazini ukuba bangivikele.”

Nakuba loluhlobo lokuzithethelela ngokungangabazeki belungalahlwa ngokuqondile izazi zenkolo zobuKatolika, abaholi benkolo baye bawenza waba semthethweni umzabalazo owenziwa kuhlonyiwe “njengezaba zokugcina abangazenza ukuze baqede noma yibuphi ubushiqela obusobala nobuqhubekayo.” Izazi zenkolo zithethelela ubudlova ngenxa yokungalungi okungokwezombangazwe, ingabe kufanele kumangaze ukuthi amaKatolika athile, njengalesicario, athethelela ukubulala ngenxa yokungalungi okungokwezomnotho? Yeka ukuthi kuyingozi kanjani ukululaza iZwi likaNkulunkulu!

Ngobusuku okwase kuzokwenziwa ngabo ukungalungi okukhulu kunakho konke okwake kwenziwa—okwakuhilela ukuboshwa, ukuquliswa, nokubulawa kukaJesu Kristu—uJesu ngokwakhe wenqaba ukucabangela ubudlova banoma yiluphi uhlobo. Watshela uPetru: “Bonke abasebenzisa inkemba bayobhubha ngenkemba.” (Mathewu 26:52, Revised Standard Version, uhlelo lwamaKatolika) Ngokunengqondo, labo abaphendukela ebudloveni bangalindela kanjani ukuba uNkulunkulu uMninimandla onke abalalele ngaphansi kwanoma yiziphi izimo, njengoba isiprofetho sikaIsaya sikubeka ngokucacile: “Ngisho noma nenza imithandazo eminingi, angiyikulalela; izandla zenu zigcwele igazi”?—Isaya 1:15, RS, uhlelo lwamaKatolika.

‘OkukaKesari KuKesari’

Ukubalekela ukukhokha intela kuyinkinga eyandayo emazweni amaningi. Ngokwesibonelo, eSpain, iphephandaba iDiario Vasco libika ukuthi kokubili abathengi nabathengisi banomkhuba wokuyifihla ngabomu intengo yangempela yezimpahla. Nakuba umthengi nomthengisi bengase bavumelane ngentengo ethile yaleyompahla, kubhalwa intengo engaphansi kakhulu etayiteleni. Lapho ukuthengiselana sekuqediwe, intela ikhokhwa ngokwemali yempahla ebhalwe phansi. IDiario Vasco, ibika inkulumo yesikhulu esigunyaza izivumelwano zezentengiselwano uJosé María Segura Zurbano yokuthi nakuba abagunyazi bezivumelwano zezentengiselwano bengahlanganyeli ekukhwabaniseni, bayazi ukuthi imali ebhalwayo yaleyompahla akuyona eyangempela. Ephawula okuwukuphela kwabantu abangawenzi lomkhuba wokungathembeki, uZurbano wathi: “Kulelizwe wonke umuntu nomakhelwane wakhe bakhuluma amanga, oFakazi BakaJehova kuphela abahlukile. Lapho bethenga noma bethengisa, imali [yempahla] abayibizayo iyiqiniso elimsulwa.”

OFakazi BakaJehova bayaziwa ngokuba neqiniso kwabo nokuthembeka kwabo. Bayaqaphela ukuthi uJehova uNkulunkulu ulindele ukuba izinceku zakhe zibonise izimfanelo ezinjalo kukho konke ezikwenzayo. UNkulunkulu uyaluzonda ‘ulimi lwamanga’ “nofakazi wamanga ophafuza inkohliso.” Endabeni yokukhokha izintela, uJesu Kristu wabekela abalandeli bakhe beqiniso indinganiso lapho ethi: “Nikani uKesari okukaKesari noNkulunkulu okukaNkulunkulu.”—IzAga 6:6-19; Marku 12:17.