Qabula Izihlobo Zakho Ngamanzi Eqiniso
USOLOMONI wathi: “Njengamanzi aqandayo emphefumulweni owomileyo, unjalo umbiko omuhle ovela ezweni elikude.” (IzAga 25:25) Yeka ukuthi kungokuhlangenwe nakho okushukumisa kanjani ngomphefumulo okhathele ukulalela umbiko wakho wokuphila okuphakade ePharadesi elizayo! Ngalendlela, umlomo wakho uba “umthombo wokuphila.”—IzAga 10:11; Isaya 52:7.
Amanzi amatisa umhlabathi bese ebangela ukukhula, kuyilapho izikhukhula zingase zibangele inhlekelele. Futhi, amanzi asesimweni sesiphuzo esiqandayo ayaqabula, kodwa ubani ongathanda ukuficwa isiphepho esikhulu seqhwa noma isichotho? Njengoba okuphuma emilonyeni yethu kuye kwaqhathaniswa namanzi, kubalulekile ukukunakekela ngokucophelela lokho esikufundisayo. (1 Thimothewu 4:16) Kumelwe siyikhathalele ngokuyinhloko imiphumela ehlukahlukene ‘lamanzi’ angaba nayo lapho sishumayela ezihlotsheni.
‘Ukuphuzisa’ Izihlobo
Ezikhathini zasendulo, uRahabi wavulela umkhaya wakhe indlela eya ekusindisweni, noKorneliyu wanikeza ubufakazi ezihlotsheni zakhe. (Joshuwa 2:13; 6:23; IzEnzo 10:24, 30-33) Umfowabo kaPetru uAndreya wasiza uPetru ukuba abe umfundi kaJesu. (Johane 1:40-42) Futhi namuhla oFakazi BakaJehova abaningi benza iqiniso ligelezele ezihlotsheni zabo. IzAga 11:25 ziyathembisa: “Ophuzisayo uyakuphuziswa naye.”
Owesifazane othile waseYurophu wayefisa ukuhlanganyela ukholo lwakhe olusha nabazali bakhe, abafowabo, nodadewabo abahlala ePhilippines. Uyabika: “Ngenza njalo kuzo zonke izincwadi engangibabhalela zona. Ngaphambi kokuba ngibhapathizwe, ngabathumelela izincwadi futhi ngababuza ukuthi bangathanda yini ukuvakashelwa oFakazi BakaJehova.” Okwamjabulisa kakhulu ukuthi, bavuma ukuvakashelwa, futhi manje abayisishiyagalombili babo bakhulekela uJehova. Abanye oFakazi baye baba nemiphumela emihle ngokuthumela izipho zezikhokhelo zeNqabayokulinda nePhaphama! ezihlotsheni zabo.
Kodwa kuthiwani uma amalungu omkhaya engabonisi sithakazelo? UJesu wabhekana nalesimo, ngoba ngesinye isikhathi “abafowabo babengakholwa nguye.” Nokho, kamuva baphikelela “nganhliziyonye” emthandazweni, kanye nabaphostoli. (Johane 7:5; IzEnzo 1:14) Kungani izinhliziyo zashintsha? Ngokusobala uJesu wanikeza izihlobo zakhe usizo ngaphambi kokuba anyukele ezulwini. Kanjani? Wazisiza ukuba zizuze ukholo ngokuvela kuJakobe umfowabo ngomzali oyedwa. (1 Korinte 15:7) Kanjalo, ungayeki ukuzama ukusiza izihlobo zakho. OFakazi abaningi baye bakwazi ukuxoxa nezihlobo ezingakholwa ngeqiniso leBhayibheli ngemva kokulindela isikhathi esifanelekile ngokubekezela.
Nokho, “ukuphuzisa” izihlobo akusho ukuziminzisa ngamazwi. Omunye umbhangqwana waseYugoslavia uyaphawula: “Ngaso sonke isikhathi kunengozi yokuzishumayeza ngokweqile.” Omunye umbonisi ojikelezayo uyaphawula: “Abazalwane ngokuvamile bakwenza ngokweqile, bebonisa intshiseko engalawuliwe.” ULudwig ukhumbula isikhathi lapho eqala ukutadisha iBhayibheli: “Ngabe sengimhlasela umama amahora amaningi ngingayeki ngezincazelo cishe zakho konke engangikufunde eBhayibhelini, futhi lokhu ngokuvamile kwakuholela ezimpikiswaneni, ikakhulukazi nobaba.”
Yiba “Umthombo Wenhlakanipho”
Sifunda ukuthi “ulimi lwabahlakaniphileyo luveza kahle ukwazi, kepha umlomo weziwula uphafuza ubuwula,” nokuthi “inhliziyo yolungileyo iyacabanga ukuphendula.” (IzAga 15:2, 28) Kanjalo ukuhluzeka kwengqondo, inhlakanipho, nokuqonda kudingekile ukuze amazwi ethu abe aqabulayo nakhayo. Kubalulekile ukuthi sikhuluma nini, nokuthi sikhulumani, nokuthi kungakanani esikukhulumayo.
Ngokwesibonelo, ngosuku olushisayo yeka ukuthi inkomishi yamanzi abandayo imqabula kanjani owomileyo! (Mathewu 10:42) Kodwa akekho obengacabanga ngokumbhunyela ekhanda ngamanzi agcwele ibhakede! Umbonisi wesifunda ocashunwe ngenhla uthi: “Imiphumela engcono kakhulu itholwa yilabo abavusa ilukuluku lokwazi ezihlotsheni zabo ngokufakaza ngezilinganiso ezilinganiselwe.” Lapho isihlobo esiphikisayo soma, uma singakubeka kanjalo, futhi siqale ukubuza imibuzo, ngokuvamile kulandela ingxoxo yeBhayibheli enezithelo.
UHuriye, uFakazi waseTurkey, wafinyela lokhu ekhaya lakhe ngokushiya izincwadi zeBhayibheli zivuleke kuleyondaba eyayingase imthakazelise umyeni wakhe ongakholwa. Wayefundela abantwana izindaba zeBhayibheli, futhi—lapho elalele—wayenikeza izincazelo ezazingamzuzisa. Ngezinye izikhathi uHuriye wayebuza lokhu nje: “Ngifunde ukuthi nokuthi esifundweni sami namuhla. Ucabangani ngakho?” Uphawula futhi nezimiso zokuziphatha ayehlala ezikhumbula: “Hlala uzothile, ungacasuki noma uthukuthele. Ungabi usiyazi. Vele uzithobe futhi ube ngophansi.” Umyeni wakhe ekugcineni walamukela iqiniso loMbuso futhi manje ukhonza njengesikhonzi sesikhathi esigcwele.
UMarijan wasiza izihlobo eziningi ukuba zamukele ukholo lwakhe. Uyeluleka: “Ungaphoqeleli izinto kodwa lindela isikhathi esifanele. Kufanele sibahloniphe lapho besicela ukuba singakhulumi nabo ngeqiniso. Kumelwe sibekezele futhi sibe nothando.” UmShumayeli 3:7 uyasebenza ikakhulukazi lapho izihlobo ziphikisa. Uthi kukhona “isikhathi sokuthula nesikhathi sokukhuluma.” Lokho kusikisela ukuzimisela ukulalela ngokubekezela, ukungaphazamisi, nokuhlonipha eminye imibono. “Akunangqondo ukucasuka lapho uxoxa nezihlobo,” kusho uPetar, owayekade ephikisa kakhulu kodwa oseshintshe isimo sakhe.
Yenza Ukuziphatha Okuhle Kushumayele
Iminyaka eminingi indoda ethile eyayingakholwa yayihlupha umkayo ongumKristu, ngezinye izikhathi imkhiyela ngaphandle. Ngesinye isikhathi yathukuthela kangangokuba yadabula incwadi ayekhohlwe ukuyibeka endaweni yayo. Yini eyashintsha isimo sayo sengqondo? Iyachaza: “Ngangilokhu ngizibuza ukuthi kungani umkami ayebambelele kangaka futhi ehlala ethembele kuJehova. Ngangingenakumbeka isici, njengoba ayeyinakekela kahle indlu, futhi wayengumfazi nomama omuhle wabantwana bethu.” Ngolunye usuku lendoda yayifuna ukwaziswa okufanelekile eyayizokhuluma ngakho emhlanganweni eyayizoba nengxenye yemizuzu emihlanu kuwo, ngakho umkayo wayinikeza omagazini ababili bePhaphama! Yababuka imanqikanqika futhi yamangala ukuthola isihloko esiwusizo mayelana nokwakhiwa kwamapensela. Ngalendlela kwavuswa isithakazelo sayo kulabomagazini. Namuhla, lomkhaya unobunye ekukhulekeleni uJehova.
Iseluleko sikamphostoli uPetru sokuthi umfazi angayizuza indoda yakhe engakholwa ‘ngaphandle kwezwi ngenxa yenkambo yakhe emhlophe esekwesabeni’ siyasebenza nakwamanye amalungu omkhaya. (1 Petru 3:1, 2) Lapho umbhangqwana othile oshadile ushiya isiko nenkolo endala engekho ngokombhalo yabazali bawo baseRomania, izihlobo zawo zaba abaphikisi abanonya. Inkosikazi yaze yahlaselwa ngisho nawumamezala wayo, owazama ukuyibulala. “Asizange sikuvumele lokhu ukuba kusidumaze noma kusicasule. Saphonsa konke ukukhathazeka kwethu kuJehova,” kubika uNikolic. Manje ngemva kweminyaka eyishumi nanye abazali bendoda, bobabili odadewabo, nabayeni bodadewabo bangoFakazi ababhapathiziwe. Yini eyavula indlela? “Isibonelo esihle nokuziphatha kobuKristu. Ngamanye amazwi, asizange sichithe isikhathi esiningi sikhuluma nabo ngeqiniso. Kunalokho, sazama ukulibonisa ngezenzo.”
Ungalilahli Ithemba!
Nakuba kubangela injabulo enkulu ukubona izihlobo ziqala ukukhulekela uNkulunkulu weqiniso, kuthiwani uma ezinye ziphikisa? Kufanele usabele kanjani? UJesu wabona kusengaphambili ukuthi ukukhulekela kweqiniso ngezinye izikhathi kwakuyoletha ukwahlukana okukhulu phakathi kwezihlobo. (Mathewu 10:34-37) UMarica walahlwa yiwo wonke amalungu omkhaya wakubo lapho eba omunye woFakazi BakaJehova. Nakuba engazange ahlehle ekukhulekeleni kwakhe, waqhubeka eqaphela ukuthi “ngisho nezihlobo zinelungelo lokuba nemibono yazo.” Isimo sakhe sengqondo sabangela amalungu omkhaya wakubo ukuba amhloniphe ngendlela ayemhlonipha ngayo ngaphambili.
ULudwig waqaphela ukuthi wayenesibopho sokuthanda abazali bakhe ngisho nakuba bengase bakhethe indlela ehlukile yokuphila. Ngokuphindaphindiwe wakhumbula izindinyana zeBhayibheli ezihlobene nalokho, ezinjengokuthi: “Yazisa uyihlo nonyoko”; “ukukhuluma kwenu makube-nomusa njalo, kuyolisiwe ngosawoti”; “nihlale ningabalungele ukubaphendula . . . ngobumnene nangokwesaba”; nokuthi, “inceku kaKristu ayifanele ukulwa.” (Efesu 6:2; Kolose 4:6; 1 Petru 3:15, 16; 2 Thimothewu 2:24) Uyabika: “Noma nini lapho ngishayela abazali bami ucingo noma ngibavakashela, ngangithandazela inhlakanipho kuJehova, futhi kancane kancane ubuhlobo bethu baba buhle, baba nobungane ngokwengeziwe.”
Ungalilahli ithemba lokuthi izimbewu zeqiniso ekugcineni ziyohluma ezinhliziyweni zezihlobo zakho. Indoda ethile, eyabhapathizwa njengomunye woFakazi BakaJehova ngemva kweminyaka engama-31 umkayo ebhapathiziwe, ithi: “Lapho ngibheka emuva, kumelwe ngivume ukuthi umkami wayengibekezelela kakhulu. Ngangikuqaphela kahle ukuthi ngokuvamile wayengithandazela kuJehova.”
Sengathi amazwi aphuma emlonyeni wakho njalo angaba ngaqabulayo naqeda ukoma njengamanzi amahle! Yebo, hlanganyela “[i]vangeli lenkazimulo kaNkulunkulu obongekayo” nabo bonke abantu, kuhlanganise nezihlobo zakho. (1 Thimothewu 1:11; IsAmbulo 22:17) Khona-ke amazwi kaJesu ayosebenza: “Okholwa yimi, njengokusho kombhalo, esiswini sakhe kuyakugobhoza imifula yamanzi aphilayo.”—Johane 7:38.