“Okwambuliweyo Kungokwethu”

“Izimfihlakalo zingezikaJehova uNkulunkulu wethu, kepha okwambuliweyo kungokwethu.”—DUTERONOMI 29:29.

1, 2. (a) Kungani isintu sizidinga kakhulu izambulo zikaJehova? (b) Kumelwe sibe yini isimo sethu sengqondo ngasekwazisweni uJehova aye wakwenza kwatholakala kithi?

UMA umuntu ezithola esendaweni egcwele amabhomu acushiwe kodwa enesiqondiso esibonisa indlela yokuphuma edabula phakathi kwawo ukuze angawanyatheli, ungacabanga yini ukuthi ubengasifundisisa ngokunakekela kangakanani lesosiqondiso futhi alandele zonke iziyalezo zaso? Noma cabanga ngothile ophethwe isifo esingelapheki. Ungacabanga yini ngesithakazelo sakhe esijulile ekulandeleleni intuthuko yamuva yezokwelapha enikeza ithemba lokuthi uyogcina elaphekile? Nokho, iqiniso elidabukisayo liwukuthi sikuzo zombili lezizimo. Siphila ezweni eligcwele izithiyo nezihibe ezingasilimaza. Futhi sibulawa isifo sobuntu esingalapheki sokungapheleli okwazuzwa njengefa. (1 Johane 2:15-17; Roma 7:20, 24) UNkulunkulu kuphela ongasisiza sibone izithiyo futhi sizigweme, futhi nguye kuphela onekhambi lokungapheleli kwethu. Kungakho sidinga izambulo zikaJehova.

² Kungakho futhi umlobi ophefumlelwe wencwadi yezAga aluleka: “Beka indlebe yakho, uzwe amazwi ezihlakaniphi, ubeke ukufundisa kwami enhliziyweni yakho.” (IzAga 22:17) Ngokufanayo, kuzAga 18:15 siyafunda: “Inhliziyo yoqondileyo iyazuza ukwazi, nezindlebe zabalungileyo ziyafuna ukwazi.” Asinakukwazi ukufulathela noma yiluphi ulwazi uJehova alwenza lutholakale.

Izimfihlakalo ZikaJehova Ezambuliweyo

3. Iziphi izambulo zenjongo yakhe uJehova azenza kuAdamu noEva?

³ Ngokujabulisayo, uJehova ubelokhu ekhululeke kakhulu ekwambuleni ulwazi. Kusukela esikhathini sokudala, uNkulunkulu kancane kancane uye wanikeza abakhulekeli bakhe konke ukwaziswa abakudingayo ngaphansi kwezimo ezihlukahlukene. (IzAga 11:9; UmShumayeli 7:12) Ekuqaleni, wachaza ukuthi uAdamu noEva nenzalo yabo bebeyobusa phezu komhlaba nezilwane zawo. (Genesise 1:28, 29) Nokho, uSathane wathonyela uAdamu noEva esonweni, futhi kwaba nzima ukubona indlela injongo yaphezulu eyayingafezeka ngayo kube inkazimulo kuNkulunkulu. Nokho, ngokushesha uJehova waqala ukuchaza izindaba. Wembula ukuthi, ngesikhathi esifanele, kwakuyovela “inzalo” yokulunga eyayiyoqeda imisebenzi kaSathane nabalandeli bakhe.—Genesise 3:15.

4, 5. Iziphi ezinye izambulo uJehova azenza, futhi obani ababeyimizila ayeyisebenzisa?

⁴ Kumelwe ukuba amadoda nabesifazane abesaba uNkulunkulu baba nemibuzo eminingi ngaleyoNzalo. Yayiyoba ubani? Yayiyofika nini? Yayiyosizuzisa kanjani isintu? Njengoba kwakudlula amakhulu eminyaka, uJehova wanikeza izambulo ezengeziwe ngezinjongo zakhe, futhi ekugcineni wayiphendula yonke lemibuzo. Ngaphambi kukaZamcolo, waphefumlela uEnoke ukuba aprofethe ngokubhujiswa okuzayo kwenzalo kaSathane. (Juda 14, 15) Cishe eminyakeni eyizi-2 400 ngaphambi kweSikhathi sethu Esivamile, wanikeza uNowa isambulo sokuthi ukuphila negazi lomuntu kungcwele—iqiniso elalizoba nokubaluleka okuvelele lapho kufika iNzalo ethenjisiwe.—Genesise 9:1-7.

⁵ Ngemva kosuku lukaNowa, uJehova wembula ulwazi olubalulekile ngokusebenzisa ezinye izinzalamizi ezithembekile. Ekhulwini lama-20 B.C.E., uAbrahama wathola ukuthi iNzalo ethenjisiwe yayiyoba omunye wabazukulu bakhe. (Genesise 22:15-18) Lesithembiso saba okuthile okuyigugu kwendodana ka-Abrahama ulsaka nomzukulu wakhe uJakobe (kamuva owabizwa ngokuthi uIsrayeli). (Genesise 26:3-5; 28:13-15) Khona-ke, ngoJakobe, uJehova wembula ukuthi leNzalo, “uShilo,” yayiyoba umbusi onamandla ozalwe ohlwini lwendodana yakhe uJuda.—Genesise 49:8-10, qhathanisa neNW.

6. Ngekhulu le-16 B.C.E., obani ababa umzila ‘wokwambuliweyo,’ futhi iziphi ezinye izinto ezintsha abazithola?

⁶ Ekhulwini le-16 B.C.E., uJehova wenza abantwana bakwaIsrayeli baba isizwe. Kwakungokukabani-ke ukwambulwa okuqhubekayo kweqiniso? UMose wawuphendula ngalamazwi lombuzo kulesosizwe esisha: “Izimfihlakalo zingezikaJehova uNkulunkulu wethu, kepha okwambuliweyo kungokwethu nokwabantwana bethu kuze kube-phakade.” (Duteronomi 29:29) Yebo, ngemva kokuzalwa kwaso ngo-1513 B.C.E., isizwe sakwaIsrayeli saba umzila ‘ophathiswe amazwi kaNkulunkulu.’ (Roma 3:2) Futhi yeka amazwi amaningi! UNkulunkulu wangenisa amaIsrayeli esivumelwaneni soMthetho, esenza kwaba nokwenzeka ngawo ukuba abe yisizwe sabapristi namakhosi. (Eksodusi 19:5, 6) UMthetho wawuhlanganisa isimiso sokuziphatha esasiwasiza ukuba abone futhi agweme izihibe zesono kanye nesimiso semihlatshelo sokusebenzisa igazi lezilwane elingcwele ukuze kumbozwe izono zawo ngendlela engokomfanekiso.

7, 8. (a) Ikuphi okunye ukwaziswa okwengeziwe uJehova akwembula ngeNzalo eyayiza? (b) Kwalondolozwa kanjani “okwambuliweyo,” futhi ubani owembula ukuqondwa okufanelekile kwezinto ezinjalo?

⁷ Ngokuhamba kwesikhathi, uJehova wenza izambulo eziningi ngeNzalo. Ngomhubi, uNkulunkulu wembula ukuthi izizwe zaziyoyenqaba iNzalo yakhe kodwa iNzalo yayiyonqoba ngosizo lukaJehova. (IHubo 2:1-12) NgoIsaya, wembula ukuthi leNzalo yayiyoba “iNkosi yokuthula” kodwa futhi nokuthi yayiyohlupheka ngenxa yezono zabanye. (Isaya 9:6; 53:3-12) Ngekhulu lesishiyagalombili B.C.E., uJehova waze wembula ngisho nendawo okwakuzozalelwa kuyo leNzalo, futhi ekhulwini lesithupha B.C.E., wembula uhlelo lwezikhathi zenkonzo yakhe.—Mika 5:2; Daniyeli 9:24-27.

⁸ Ekugcineni, “okwambuliweyo” kwahlanganiswa kwenza izincwadi ezingama-39 zemiBhalo yesiHeberu. Kodwa ezimweni eziningi, lokho kwakumane kuyisinyathelo sokuqala. Ngokuvamile kwakunzima ukuqonda izinto ezalotshwa, ngisho nakulabo abaziloba! (Daniyeli 12:4, 8; 1 Petru 1:10-12) Nokho, lapho ekugcineni bekhanyiselwa, akuzange kube ngokomhumushi othile ongumuntu. Njengasendabeni yamaphupho angokwesiprofetho, ‘ukuchaza okukaNkulunkulu.’—Genesise 40:8.

Umzila Omusha

9. Kungani uIsrayeli engokwenyama alahlekelwa yilungelo lokuba umzila ‘wokwambuliweyo,’ futhi lokhu kwenzeka nini?

⁹ Lapho uJesu Kristu esemhlabeni, uIsrayeli wayelokhu ewumzila kaNkulunkulu. Noma ubani owayefisa ukukhonza uJehova kwakumelwe enze kanjalo esenhlanganweni yesizwe sakhe esikhethiwe. (Johane 4:22) Kodwa uMose wayebonisile ukuthi ilungelo lokuba abaphathi ‘bokwambuliweyo’ laliza nomthwalo wemfanelo. Wathi: “Izimfihlakalo zingezikaJehova uNkulunkulu wethu, kepha okwambuliweyo kungokwethu nokwabantwana bethu kuze kube-phakade [“isikhathi esinganqunyiwe,” NW] ukuba siwenze onke amazwi alomthetho.” (Duteronomi 29:29) Leso “sikhathi esinganqunyiwe” saphela ngo-33 C.E. Ngani? Ngoba, njengesizwe, amaJuda ehluleka ‘ukuwenza onke amazwi omthetho.’ Ikakhulukazi, ehluleka ukwamukela iNzalo, uJesu Kristu, ngisho nakuba ngamanye amazwi uMthetho ‘wawungumlayi eholela kuKristu.’ (Galathiya 3:24) Ngenxa yalokhu kwehluleka, uJehova wakhetha omunye umzila ‘wokwambuliweyo.’

10. Wawuyini umzila omusha wezambulo zikaJehova?

¹⁰ Wawuyini lomzila omusha? UPawulu wawuchaza kwabase-Efesu lapho eloba ukuthi “baziswe manje ngebandla ukuhlakanipha okuninginingi kukaNkulunkulu, ngokwecebo laphakade alenza ngoKristu Jesu iNkosi yethu.” (Efesu 3:10, 11) Yebo, kwakuyibandla lobuKristu, elaqala ngePentekoste lika-33 C.E., elaphathiswa “okwambuliweyo.” Njengeqembu, amaKristu agcotshiwe akhonza ‘njengenceku ethembekileyo neqondayo’ emiselwe ukunikeza ukudla okungokomoya ngesikhathi esifanele. (Mathewu 24:45) AmaKristu manje ‘ayesengabaphathi bezimfihlakalo zikaNkulunkulu.’—1 Korinte 4:1.

11, 12. Iziphi ezinye izambulo ezimangalisayo ezenziwa ngalomzila omusha?

¹¹ Iqiniso eliyinhloko ‘lalezimfihlakalo’ laliwukuthi uJesu Kristu, iNzalo ethenjisiwe, wayesevelile. (Galathiya 3:16) UJesu ‘wayewuShilo,’ lowo onelungelo lokubusa isintu, futhi uJehova wammisa njengeNkosi yoMbuso ekugcineni owawuyobuyisela iPharadesi kulomhlaba. (Isaya 11:1-9; Luka 1:31-33) UJesu futhi wayewumPristi oMkhulu omiswe uJehova, owanikela ngokuphila kwakhe okumsulwa, okuphelele njengesihlengo sesintu—ukusetshenziswa okumangalisa kakhulu kwesimiso sobungcwele begazi. (Heberu 7:26; 9:26) Kusukela lapho, isintu esikholwayo sasinethemba lokuzuza lokho kuphila kobuntu okuphelele okwalahlwa uAdamu.—1 Johane 2:1, 2.

¹² Futhi leNzalo ethenjisiwe yayiwumlamuleli, yenza isivumelwano esisha esathatha indawo yesivumelwano soMthetho esidala sasebenza phakathi kwabalandeli bayo noYise wasezulwini. (Heberu 8:10-13; 9:15) Ngesisekelo salesivumelwano esisha, ibandla lobuKristu elalisacathula lathatha indawo yesizwe sikaIsrayeli engokwenyama, laba uIsrayeli ongokomoya, “inzalo ka-Abrahama” engokomoya kanye noJesu, nabaphathi ‘bokwambuliweyo.’ (Galathiya 3:29; 6:16; 1 Petru 2:9) Ngokungaphezulu—okuthile amaJuda ayengakucabangi—abeZizwe bamenywa ukuba babe yingxenye yalowoIsrayeli omusha ongokomoya! (Roma 2:28, 29) AmaIsrayeli angokomoya angamaJuda nangewona amaJuda athunywa ndawonye ukuba enze abafundi bakaJesu kuwo wonke umhlaba. (Mathewu 28:19, 20) Ngalokho, “okwambuliweyo” kwaba yinto yezizwe zonke.

13. Lokhu “okwambuliweyo” okusha kwalondolozeka kanjani izizukulwane zesikhathi esizayo?

¹³ Ngesikhathi esifanele, lokhu “okwambuliweyo” ngebandla lobuKristu kwalotshwa ezincwadini ezingama-27 zemiBhalo YamaKristu YesiGreki ezaziphelelisa umbhalo weBhayibheli eliphefumlelwe. Kodwa kwaphinda futhi kwafakwa kulezincwadi iziprofetho eziningi ngokuqondene nenjongo kaJehova eyayiyoqondakala ngokugcwele kuphela emakhulwini amaningi eminyaka kamuva. Eqinisweni, abalobi balemiBhalo babekhonza futhi izizukulwane ezazingakazalwa.

“Okwambuliweyo” Namuhla

14. Ngemva kokuhlubuka okukhulu, uJehova wayeyophinda akukhanyise nini “okwambuliweyo”?

¹⁴ Ngemva kokufa kwabaphostoli, kwavela ukuhlubuka okukhulu phakathi kwamaKristu okuzisholo, njengoba kwakuprofethiwe. (Mathewu 13:36-42; IzEnzo 20:29, 30) Kwase kulandela amakhulu amaningi eminyaka okwafiphala ngayo “okwambuliweyo,” nakuba uJesu engazange abashiye labo ababezama ukuhlala bethembekile. (Mathewu 28:20) Nokho, uJesu wayethembise ukuthi lesisimo sasingeke sihlale phakade. Esiphelweni sesimiso sezinto, ababi nabalungile babeyophinda bahlukaniswe ngokubonakalayo, futhi ‘abalungileyo babeyokhanya njengelanga embusweni kaYise wabo.’ (Mathewu 13:43) Njengoba nje uDaniyeli ayeprofethile, ‘esikhathini sokuphela, ulwazi lweqiniso lwaluyoba luningi.’ (Daniyeli 12:4) “Okwambuliweyo” kwakuyokhanyiswa futhi.

15. Kungani izinkolo zeLobukholwa zabonakala zingakufanelekele ukukhonza njengomzila wokuqondwa kwamuva ‘kokwambuliweyo’?

¹⁵ Kusukela ngo-1914, besiphila esikhathini sesiphelo salesimiso sezinto. Ngakho-ke, kubalulekile ukwazi ukuthi ubani uJehova amsebenzisayo namuhla njengomzila walokhu kukhanya okusha okungokomoya. Ngokuqinisekile, akasebenzisi izinkolo ezimisiwe zeLobukholwa. Lezi ziye zabonakala zingafuni ukuhlukana nezimfundiso ezingalungile ezanqwatshelaniswa ngesikhathi sokuhlubuka okukhulu. Namuhla, abaholi bazo abaningi kungaba ukuthi bavaleleke kakhulu emasikweni nasezinkolelweni zabo kangangokuthi abalwamukeli ulwazi olusha, noma bayizisulu zokungabaza kangangokuthi bangabaza ngisho nokuphefumlelwa kweBhayibheli nokusebenza kwezindinganiso zalo zokuziphatha.

16. Obani abaye babonakala bewumzila kaJehova wosuku lwanamuhla?

¹⁶ UJesu wathi amaJuda ayeyophucwa uMbuso kaNkulunkulu “uphiwe isizwe esiyakuveza izithelo zawo.” (Mathewu 21:43) Ekhulwini lokuqala leminyaka, lesi sabonakala siyibandla lobuKristu eliselincane lamaIsrayeli angokomoya. Namuhla, kuneqembu elilodwa kuphela elithela izithelo ezifana nezebandla lokuqala. LamaIsrayeli angokomoya angamalungu esigaba ‘senceku ethembekileyo neqondayo’ sikaMathewu 24:45-47. NjengamaKristu okuqala, lamaKristu anamuhla awazange esabe ‘ukwenza ukukhanya kwawo kukhanye.’ (Mathewu 5:14-16) Kusukela ngo-1919, athatha ngesibindi umsebenzi wokushumayela izindaba ezinhle zoMbuso kuwo wonke umhlaba ngenjongo yobufakazi. (Mathewu 24:14) Njengoba athela izithelo zoMbuso kaNkulunkulu, uJehova uye wawabusisa ngokucebile ngokuwenza ahambisane “nokuhlakanipha okuninginingi kukaNkulunkulu.”—Efesu 3:10.

17, 18. Ikuphi okunye ukuqonda okuqhubekayo uJehova aye wakwenza kwaba nokwenzeka ngomzila wakhe wosuku lwanamuhla?

¹⁷ Ngakho, ngo-1923 kwaqondwa ngokufanelekile isiprofetho esikhulu sikaJesu esiphathelene nezimvu nezimbuzi, futhi kwaqondakala ukuthi izwe lonke lingaphansi kokwahlulelwa. (Mathewu 25:31-46) Ngo-1925 izinceku zikaNkulunkulu zasemhlabeni zasiqonda ngokuyikho isAmbulo isahluko 12 futhi zakuqonda ngokuthe ngqo lokho okwenzeka ngonyaka ophawuliwe ka-1914. Ngo-1932 ukuqonda kwazo kwajula ngokwengeziwe. UJehova wembula ukuthi iziprofetho ezaziphathelene nokubuyiselwa kwamaJuda eJerusalema zazingabhekiseli kuIsrayeli engokwenyama, owase uzibonakalise kudala ungathembekile waze walahlelwa ngaphandle, kodwa kunalokho kuIsrayeli ongokomoya, ibandla lobuKristu. (Roma 2:28, 29) Khona-ke, ngo-1935 ukuqondwa okulungisiwe kombono kaJohane ‘wesixuku esikhulu’ kusAmbulo isahluko 7 kwenza abagcotshiweyo baqaphela umsebenzi omkhulu wokuqoqa owawusengaphambi kwabo.—IsAmbulo 7:9-17.

¹⁸ Lokhu kwashukumisa umsebenzi wokushumayela emhlabeni wonke, njengoba ekugcineni ukuqoqwa ‘kwezinto ezisemhlabeni’ kwakuqala ngenkuthalo. (Efesu 1:10) Ngo-1939, njengoba amafu empi ayeqoqana eYurophu, impikiswano yokungathathi-hlangothi yenziwa yacaca kunanini ngaphambili. Ngo-1950 “izikhulu” zikaIsaya 32:1, 2 zakhanyiswa ngokuthe ngqo ngokwengeziwe. Ngo-1962 ukubonakaliswa okuyikho “kwamandla ombuso” nenhlonipho efanelekile yomKristu kuwo nakho kwaqondakala ngokusobala ngokwengeziwe ngenxa ‘yokwambuliweyo.’ (Roma 13:1, 2) Futhi ngo-1965 lwaqondakala ngokwengeziwe uvuko lwasemhlabeni nalabo abangase bazuze kulo.—Johane 5:28, 29.

19. Isigaba sikaJehova ‘senceku’ namuhla siye sazibonakalisa kanjani siwumlondolozi ofanelekayo weZwi likaNkulunkulu?

¹⁹ Ngokungaphezulu, ibandla lamaKristu agcotshiwe kulelikhulu lama-20 leminyaka liye labonakala liwumlondolozi ofanelekayo weZwi likaNkulunkulu, umqulu olotshiwe ‘wokwambuliweyo.’ Amalungu angabameleli balelibandla ahumushela iBhayibheli esiNgisini sanamuhla, futhi, kuze kube namuhla, iNew World Translation of the Holy Scriptures iye yatholakala ngezilimi eziyi-11, kanye namakhophi ayizi-40 000 000 anyathelisiwe. Isigaba ‘senceku’ samaKristu agcotshiwe siyahola futhi esimisweni sokufundisa sezizwe zonke futhi sikhipha izincwadi nomagazini abasekelwe eBhayibhelini. Sihlela imihlangano yamasonto onke, imihlangano emikhulu evamile, nezikole ezihlukahlukene—konke lokhu kuhlelelwe ukusiza abafuna iqiniso ukuba bazuze ulwazi oluqondile ‘lokwambuliweyo.’ Ngempela, “abalungileyo” manje ‘bakhanya njengelanga’ ngomqondo ongokomoya, bazibonakalisa bekufanelekele ukuba ngabaphathi.—Mathewu 13:43.

Umthwalo Wethu Wemfanelo

20, 21. (a) Umhubi washukunyiselwa ukuba asabele kanjani eZwini likaJehova elambuliwe? (b) Iziphi izindaba ezizocatshangelwa esihlokweni esilandelayo?

²⁰ Ngakho uJehova akasishiyanga sodwa kulelizwe eligcwele amabhomu acushiwe. Kunalokho, uye wasinikeza iZwi lakhe ukuba likhanyise indlela yethu futhi lisisize sigweme ingozi engokomoya. (IHubo 119:105) UJehova akasishiyanga futhi ukuba sibulawe isono nokungapheleli. Kunalokho, uye wavula ithuba lokuphila okuphakade emhlabeni oyipharadesi futhi wenza Iwatholakala kalula ulwazi ngalelithuba. (Johane 17:3) Akumangalisi ukuthi umhubi, ekhuluma ‘ngokwambuliweyo’ osukwini lwakhe, wathi: “Ngiyawuthanda umthetho wakho kangaka. Usuku lonke ngizindla ngawo.”—IHubo 119:97.

²¹ Ingabe yilendlela ozizwa ngayo ‘ngokwambuliweyo’ nguJehova futhi kwaqondakala osukwini lwethu? Ingabe uwazisa ngokujulile amaqiniso owafundile? Uyasibona yini isidingo salamaqiniso ekukusizeni ukuba wenze isinqumo, ugweme izilingo, futhi ukhonze uJehova? Singakanani ngempela isikhathi osisebenzisa ufunda futhi utadisha lokhu “okwambuliweyo”? Ikhona yini indlela engathuthukisa ngayo imikhuba yakho yokutadisha? Lezindaba zizocatshangelwa esihlokweni esilandelayo.

Uyakhumbula?

◻ Ngaphambi kwesikhathi sikaJesu, yayiyini eminye imizila ‘yokwambuliweyo’?

◻ Kwakungokobani “okwambuliweyo” ngemva kuka-33 C.E.?

◻ Yiziphi ezinye izambulo ezibalulekile ezenziwa ngalomzila omusha?

◻ Kungani “okwambuliweyo” kumelwe kube ngokwamaIsrayeli angokomoya namuhla?

◻ Ibandla lamaKristu agcotshiwe liye lazibonakalisa kanjani lingumlondolozi ofanelekayo weZwi likaJehova?

[Amazwi acashunwe esihlokweni ekhasini 12]

Ibandla lamaKristu agcotshiwe laba abalondolozi abasha bezambulo zikaJehova

[Amazwi acashunwe esihlokweni ekhasini 13]

Isigaba ‘senceku’ sofakazi bakaJehowa abagcotshiwe siye sakhonza kahle njengomlondolozi ofanelekayo weZwi likaNkulunkulu

[Isithombe ekhasini 10]

UJehova wembula ulwazi olubalulekile ngamadoda akudala athembekile