Imibuzo Evela Kubafundi
■ UMose watshela amaIsrayeli ukuthi “okwambuliweyo kungokwethu nokwabantwana bethu.” (Duteronomi 29:29) Ingabe lokhu “okwambuliweyo” kuye kwahlanganisa ukukhanya okuye kwakhanyiswa eZwini likaNkulunkulu phakathi nalezinsuku zokugcina?
Cha, bekuyoba okungaqondile ukubeka ukuqondwa kweziprofetho okuye kwanikezwa phakathi nalezi nsuku zokugcina ezingeni elifanayo ‘nelokwambuliweyo’ uMose ayekhuluma ngakho.
Ngokomongo wamazwi kaMose, “okwambuliweyo” ayekhuluma ngakho kwakuphathelene nesivumelwano soMthetho. (Duteronomi 29:25) UMose wabonisa ukuthi lokhu okwambuliweyo kwakuphethe imithwalo yemfanelo. Ukwehluleka ukuphila ngokwalemithwalo yemfanelo kwakuyobangela ukuba uJehova ajezise abantu bakhe.
Yebo, isivumelwano soMthetho sasiyisambulo esivela kuJehova uNkulunkulu. Sandulelwa ezinye izambulo ezaziya ezinzalamizini, kuNowa, futhi kuhlehle kuze kufike kuAdamu. UMose wasetshenziselwa ukubhala okwambuliweyo kuze kube sesikhathini sakhe, siye sakugcinelwa ezincwadini eziyisihlanu zokuqala zeBhayibheli. Kamuva, njengoba isihloko esithi “Okwambuliweyo Kungokwethu” (INqabayokulinda, kaMay 15, 1986) sachaza, lokhu “okwambuliweyo” kwakuhlanganisa konke ukwaziswa okulotshwe eBhayibhelini.—2 Thimothewu 3:16.
Ngakho, iBhayibheli liqukethe “amazwi kaNkulunkulu,” izinto ezambulwe nguye. (Roma 3:2) Lapho amaJuda emvelo ebonakalisa ukungethembeki, amaKristu agcotshiwe aba yizinceku zalokhu “okwambuliweyo,” futhi ibandla lobuKristu laba “insika nesisekelo” sakho.(1 Thimothewu 3:15; 1 Korinte 4:1) Nokho, amalungu alelobandla namuhla angazwakalisa ngokufanelekile amazwi kaMose, athi “okwambuliweyo kungokwethu.”
Namuhla, uJehova uye waveza ukukhanya okukhulu kulokhu “okwambuliweyo.” Njengoba kwaprofethwa nguDaniyeli, abantu bakaJehova baye ‘behla benyuka’ eZwini eliphefumlelwe, futhi ‘ulwazi lweqiniso luye lwaba luningi.’ (Daniyeli 12:4) Ngakho, manje sesiyazazi “ezinye izimvu.” (Johane 10:16) Siyasazi “isixuku esikhulu.” (IsAmbulo 7:9-17) Siyakubona ukugcwaliseka komfanekiso wezimvu nezimbuzi. (Mathewu 25:31-46) Njalonjalo. Lezizinto ziye zembulwa, noma zenziwa zazeka kithi kodwa hhayi ngomqondo ‘wokwambuliweyo’ njengoba kulotshwe eZwini likaJehova eliphefumlelwe.
Khona-ke, bekuyoba okungalungile ukubeka ukuqondwa kwalezizinto ezingeni elifanayo nezambulo eziphefumlelwe ezenza “okwambuliweyo” okulotshwe eBhayibhelini. Kunalokho, ngokutadishisisa iBhayibheli, abantu bakaJehova ngomthandazo baye bafuna ukuqondwa okuyiqiniso kwalokho “okwambuliweyo.” Ngomoya ongcwele, uJehova uye wanikeza lokho kuqonda ngesikhathi sakhe esifanele.
IBhayibheli lisitshela ukuthi “umkhondo wabalungileyo unjengokukhanya kokusa okuqhubeka ngokukhanya njalo kuze kube-semini.” (IzAga 4:18) Ukukhanya okwandayo uJehova aye wakukhanyisa ‘kokwambuliweyo’ kubonisa ukuthi ‘lolosuku’ luyasondela, futhi kubonisa ukuthi isibusiso sakhe sisebandleni lobuKristu namuhla.