Izincwadi Zokutadisha IBhayibheli: Ingabe Ziphambene NemiBhalo?
NGELINYE iSonto ekuseni eConnecticut, eU.S.A., indoda ethile yaphendula ukungqongqoza emnyango wayo futhi yathola omunye woFakazi BakaJehova emi emnyango wayo. UFakazi wakhuluma nayo ngeBhayibheli futhi wayinikeza izincwadi ezithile ezichaza izindaba ezibalulekile zeBhayibheli. Nokho, indoda ayizithathanga. Yakhomba iBhayibheli elalikudeshibodi yeloli layo futhi yathi: “IBhayibheli kuphela engilidingayo.”
Ingabe ubungavumelana nalendoda? Nokho, uma yayisho ukuthi akukho lutho olungamelela iBhayibheli njengomthombo weqiniso, khona-ke wonke amaKristu abengavumelana nayo. Kodwa izincwadi eziphathwa oFakazi azenzelwanga ukumelela iBhayibheli. Zaklanyelwa ukuchaza iBhayibheli, ukuqokomisa izingxenye zalo ezingase zibe usizo ekuphileni kwaleyondoda futhi kanjalo zakhe inhlonipho ngalo nolwazi lwalencwadi ebalulekile. Ingabe akudingeki noma kungokungalungile ukufunda izincwadi ezinjalo?
ImiBhalo—Ingabe Ngokwayo Yanele?
Ingabe imiBhalo isikisela ukuthi ukufunda iBhayibheli—njengoba kubalulekile—yilokho kuphela esikudingayo ukuze sithole ulwazi oluqondile ngeqiniso? Akunjalo ngempela. Ngokwesibonelo, umfundi uJakobe wathi ngamaJuda: “Ngokuba uMose unabo abashumayelayo emizini yonke kwasezizukulwaneni zasendulo efundwa emasinagogeni amasabatha ngamasabatha.” (IzEnzo 15:21) Kodwa naphezu kwakho konke lokho kufundwa kweBhayibheli, amaJuda amaningi awazange aqonde ukuthi uJesu wayenguMesiya.
Umthenwa wase-Etiyopiya okukhulunywa ngaye kuzEnzo isahluko 8 naye wayengumfundi weBhayibheli. Umfundi uFiliphu wamuzwa efunda encwadini kaIsaya lapho umthenwa ayeya ekhaya lakubo ngenqola yakhe. Ingabe lokho kwakwanele ngaye ukuba athole ulwazi lweqiniso? UFiliphu wambuza: “Uyakuqonda kambe lokhu okufundayo na?” Waphendula: “Ngingakwazi kanjani, uma kungekho ongiholayo na?” (IzEnzo 8:30, 31) Wasiqaphela ngokuzithoba isidingo sakhe sosizo ekuqondeni iBhayibheli.
Khumbula, futhi, umyalo uJesu awushiyela abalandeli bakhe ngaphambi nje kokuba anyukele emazulwini: “Hambani nenze izizwe zonke abafundi, nibabhapathize egameni likaYise neleNdodana nelikaMoya oNgcwele, nibafundise ukugcina konke enginiyale ngakho.” (Mathewu 28:19, 20) Ngokusobala, kwakudingeka ukwenza okwengeziwe kunokumema amakholwa amasha ekufundweni kweBhayibheli eningini noma ukubanikeza iBhayibheli bese kushiyelwa kubo ukuba balifunde. UmKristu kwakumelwe futhi abafundise.
Futhi, umphostoli uPawulu wabona isidingo sokuthile okungaphezu nje kokukhuthaza ukufundwa kweBhayibheli uma ethi kuThimothewu: “Nakekela ukufunda, nokuyala, nokufundisa, ngize ngifike.” (1 Thimothewu 4:13) Ukufunda iBhayibheli kwakubaluleke kakhulu—uPawulu ubeka ukufundela abantu ekuqaleni kohide lwakhe. Kodwa futhi okudingekile kwakuwukusiza izilaleli ukuba ziqonde incazelo yalokho okwakufundwa (ukufundisa) nokuzikhuthaza ukuba zikusebenzise ekuphileni kwazo (ukuyala).
Ekugcineni, encwadini yezEnzo sithola umbono okhanyayo wokuthi abafundi nabaphostoli benza okwengeziwe kakhulu kunokufundela nje abantu iBhayibheli. Babasiza ukuba baliqonde. “OJuda noSila, njengokuba nabo bengabaprofethi, babaduduza abazalwane ngamazwi amaningi, babaqinisa. Kodwa oPawulu noBarnaba bahlala eAntiyokiya, befundisa beshumayela izwi leNkosi kanye nabanye abaningi.”—IzEnzo 15:32, 35.
Usizo Olulotshiwe
‘Kodwa lolo kwakungelona usizo olulotshiwe,’ ungase usho. Kuyiqiniso. Nokho, ingabe ukhona umehluko omkhulu phakathi kwenkulumo ebhalwe phansi nekhulunywayo? Eqinisweni, ngisho nakuba babengenazo izinto eziwusizo zokunyathelisa, abaphostoli namanye amaKristu akuqala akusebenzisa ukubhala ekusakazeni izindaba ezinhle. Babhala izincwadi eziningana bebhalela amabandla ahlukene ukuze baxhumane nawo lapho bengekho. Ezinye zalezi eqinisweni zaba yingxenye yeBhayibheli, kodwa eziningi azifakwanga.
Encwadini yokuqala kaPawulu kwabaseKorinte ekhona eBhayibhelini lethu, sifunda amazwi alandelayo: “Nganilobela encwadini yami ukuba ningahlangani nezifebe; . . . kepha manje nganilobela ukuba ningahlangani nomuntu obizwa ngokuthi ungumzalwane, uma eyisifebe.” (1 Korinte 5:9-11) Lapha, uPawulu ngokusobala ubhekisela encwadini yangaphambili kwabaseKorinte, leyo esingenayo namuhla. Ingabe amaKristu aseKorinte aba nomuzwa wokuthi awayidingi incwadi engabanga yingxenye yeBhayibheli? Ngokusobala akunjalo. Ayazisa njengosizo olubhaliwe lokuwasiza ekuqondeni amaqiniso emiBhalo nokusebenzisa izimiso ezingokomBhalo ekuphileni kwawo.
Lapho ebhalela ibandla laseKolose, umphostoli wabhekisela kwenye incwadi engekho namuhla, kulesikhathi eyayibhekisela emaKristwini aseLawodikeya. Wathi: “Nxa lencwadi isifundiwe kini, bhekani ukuba ifundwe nasebandleni labaseLawodikeya; nani niyifunde leyo evela eLawodikeya.” (Kolose 4:16) Ngakho-ke, izincwadi zazingabhalelwa kuphela amabandla ahlukene kodwa lezozincwadi zazijikeleziswa emabandleni. Ukuba izinto zokunyathelisa zanamuhla zazitholakala ngalezozinsuku, ingabe uyayicabanga nje indlela abaphostoli ababeyozisebenzisa ngayo esikhathini sabo ekusakazeni ukwaziswa ngoJesu emhlabeni wonke?
Nokho, izinto zokunyathelisa ziyatholakala namuhla, futhi oFakazi BakaJehova bayazisebenzisa ekusakazeni amaBhayibheli emhlabeni wonke nezincwadi zeBhayibheli ezinyathelisiwe. Akukho okungamelana nalokhu okungokombhalo. NjengamaKristu uThimothewu awakhonza, nathi namuhla sidinga ukufunda iBhayibheli. Kodwa futhi sidinga ukufundiswa ukuze siliqonde futhi siyalwe ukuze sazi indlela yokulisebenzisa ekuphileni kwethu.
Izincwadi zokutadisha iBhayibheli zingaba wusizo kuphela uma zingaliphendukezeli iZwi likaNkulunkulu futhi uma zidumisa uNkulunkulu, ziqondisa umfundi ekukhulekeleni kweqiniso, zimsiza ukuba ahlukane nezwe futhi zimlekelela ukuba asondele kuNkulunkulu lapho ehamba ezinyathelweni zikaJesu Kristu. Sikholelwa ukuthi uyothola ukuthi izincwadi zeBhayibheli ezisakazwa oFakazi BakaJehova zihlangabezana nazo zonke lezizimfuneko.