Ingabe Ukuziphatha Okubi Kungukukhulekela Kwamanga?
UMAGAZINI wezindaba wesiPanishi ophuma masonto onke iCambio16 wabika ngokwenzeka ezinhlelweni zeziteshi zomshoshaphansi zomsakazo wesiFulentshi. Ngaphansi kwesihloko esithi “Ubulili Emoyeni,” wathi: “Ezinye [iziteshi] ziye zakhetha izincwadi zobulili—noma singathi, ukubukisa ngokuziphatha okubi—futhi zinikela isikhathi sazo ekusakazeni izinkanuko, izinjabulo zobulili nokuwothawothana ngemininingwane yakho ephelele. . . . Ngehora lokuqala kuya ehoreni lesithathu ekuseni [isiteshi] sihlanganisa izilaleli ezingazani ukuze zilandise ngokuqondile ocingweni izenzo zazo zobulili noma ukushaya indlwabu.”
Umbiko waqhubeka ulandisa ngendlela omunye umsakazi amemela ngayo imibhanqwana emsakazweni futhi “aqale ukukhuluma embhobheni izinto ezivusa imizwa yobulili ukuze zihambisane nokukhefuzela nokugquma kwemibhanqwana eye yanquma ukuhlangana ngobulili obala.”
Kuye kwavuswa isithakazelo somphakathi ngaloluhlobo lokusakaza, njengoba kuboniswa izihloko eziqhamile nezinkulumo zabahleli emaphephandabeni ansuku zonke aseParis njengeLe Matin neLe Quotidien.
Uhlobo Oluhlukile Lokukhulekela Izithombe
UmKristu kumelwe awubheke kanjani lomkhuba omusha wokusakaza? Umphostoli uPawulu waluleka amaKristu ase-Efesu: “Ngakho ngisho, ngifakaza eNkosini, ngithi ningabe nisahamba njengalokhu kuhamba abezizwe ebuzeni bengqondo yabo, . . . abathi bebuthuntu, bazinikela emanyaleni, ukuze basebenze ukungcola konke ngokuhuheka.” Noma, njengoba iThe Jerusalem Bible ikubeka: “Baye bazinikela ebulilini futhi ngentshiseko balandelela inkambo yalo lonke uhlobo lwamanyala. Manje lena akuyona indlela enayifunda kuKristu, ngaphandle kokuthi nehluleka ukumuzwa kahle lapho nifundiswa iqiniso elikuJesu.”—Efesu 4:17-21.
Mhlawumbe omunye angaphikisa ngokuthi ukulalela ukuziphatha okubi emsakazweni akufani nokuhlanganyela ezenzweni ezinjalo futhi akumelwe kusolwe. Nokho, okunqumayo ngomKristu kungaphezu kwalokho. Ngokwesibonelo, siyafunda kumaEfesu isahluko 5: “Kepha ubufebe, nakho konke ukungcola, . . . makungaphathwa nangegama phakathi kwenu, njengokuba kufanele abangcwele, nehlazo, nokubheda, nokulawula.” Uma ukungcola kungafanele ngisho nokuphathwa phakathi kwamaKristu, khona-ke ngokuqinisekile ngeke bakhethe ukuba nolwazi lwakho, kungaba ngokufunda, ngethelevishini noma ngomsakazo.—Efesu 5:3, 4.
Kodwa kungani kufanele kube ngokubaluleke kangaka ngomKristu ukuba agweme lonke uhlobo lokuziphatha okubi? Kungani amanyala, kungaba abonakalayo noma azwakalayo, kumelwe agwenywe? UPawulu uyaphendula: “Ngokuba yazini lokhu, nikuqonde ukuthi akukho-sifebe, noma ongcolileyo, noma onesangabe ongokhonza izithombe, onefa embusweni kaKristu noNkulunkulu. Maningakhohliswa-muntu ngamazwi ayize, ngokuba ngenxa yalezozinto ulaka lukaNkulunkulu lwehlela phezu kwabantwana bokungalaleli. Ngakho-ke ningabi-ngabahlanganyeli nabo.”—Efesu 5:5-7.
Ingabe uye waliphawula iphuzu—ukuthi ukuziphatha okubi kuwuhlobo lokukhulekela kwamanga? INew World Translation isebenzisa ngisho igama eliqatha, ithi: “Akukho sifebe noma umuntu ongcolileyo noma umuntu ohahayo—okusho ukuthi okhonza isithombe onefa embusweni kaKristu noNkulunkulu.” Yebo, njengoba iNew World Translation ibonisa, ukuziphatha okubi kungukukhonza isithombe! Kungani kunjalo? Kungoba izifiso ezingcolileyo zenyama, ukulangazelela injabulo engafanele, kuba yindlela yokuzinikela, kungashiyeli ukukhulekela okuhlanzekile indawo. Omunye unkulunkulu uye wangena endleleni yokuphila komuntu—unkulunkulu wesifiso sokuhaha, sobugovu, sokonakala. Kanjalo, izimfanelo ezingokwaphezulu zibekelwa inselele izifiso zobulili ezingafanele. Ngokuphendulela amehlo akhe noma izindlebe ezincwadini zobufebe umuntu ufaka engozini noma ibuphi ubuhlobo angase abe nabo noNkulunkulu ongcwele, uJehova.—Isaya 6:3.
Singazigcina Kanjani Sihlanzekile?
Simelana kanjani nezilingo zeSodoma neGomora lanamuhla? Singakwenza lokho ngokuba nezinzuzo ezingokomoya eziqinile futhi sinamathele kuzo, sizivumele ukuba ziqondise inhliziyo nengqondo. Encwadini ecashunwe ngaphambili kwabase-Efesu, uPawulu wayala akholwa nabo: “Nikhumule umuntu omdala ongowenkambo yokuqala, owonakala ngezinkanuko zenkohliso, nenziwe-basha.” Ngayiphi indlela? “Emoyeni wengqondo yenu.” Lokhu kwenza ukuba kube nokwenzeka ‘ukwembatha umuntu omusha owadalwa ngokukaNkulunkulu ekulungeni nasebungcweleni beqiniso.’—Efesu 4:22-24.
Singawugcina kanjani ‘lowomoya’, oqondisa ingqondo? Ngokujulisa ulwazi lwethu nokwazisa ngeBhayibheli, nangokwamukela ukuqondiswa “inceku ethembekileyo neqondayo” yeNkosi—indikimba yamaKristu enikeza ukuqondisa okukhanyayo kokuphila ngokwesaba uNkulunkulu kulezizikhathi ezimbi nezinzima. Sidinga futhi abangane abakhayo abangatholakala ngokuhlanganyela njalo emihlanganweni efundisa ngeBhayibheli yoFakazi BakaJehova. Uma isifundo esinjalo nabangani kuwumkhuba wethu ovamile—njengokudla—khona-ke umoya oqondisa ingqondo yethu uyobakhona njalo futhi ube namandla. Uyosishukumisela ukuba simelane nezilingo zalesisimiso sezinto esonakele esiye senza ukuzitika ngobulili kwakhathalelwa ngokungafanele njengonkulunkulu wamanga wanamuhla.—Mathewu 24:45-47; IzEnzo 8:30, 31; Heberu 10:24, 25.
[Isithombe ekhasini 27]
Ingabe lokhu kungakuholela ekukhulekeleni kwamanga?