alashi/DigitalVision Vectors via Getty Images
AŴEJE MESOPE
Ligongo Chichi Ŵandu Akuŵengana Mnope?—Ana Baibulo Jikusasala Yamti uli Panganiji?
Masiku agano ngani syasiwandile m’manyusipepala sili syakwamba ŵandu ŵakuŵecheta yakulosya uŵengani, kutenda yachiwawa ligongo lya lusagu, nambosoni yakwamba ngondo.
Nyusipepala ja The New York Times, ja pa 15 Nofemba 2023 jatite, “Ŵandu akunonyela kuŵechetana maloŵe gakulosya kuŵengana soni kutendelana yachiwawa pamalo gakunguluchila ga pa intaneti ligongo lya ngondo jajikutendekwa ku Israel ni Gaza.”
Pa 3 Nofemba 2023, Dennis Francis jwali pulesidenti jwa bungwe ja United Nations General Assembly jwatite, “Kwamba kutandila pa 7 Okotoba, ŵandu aŵele alimkuŵecheta maloŵe gakulosya kuti ali pa uŵengani soni kuti yachiwawa yikutendekwa ligongo lya lusagu kupundana ni kalakose.”
Nganiyiŵa yakusimonjesya kwapikana ŵandu ali mkuŵecheta maloŵe gakulosya kuti akuŵengana, akutenda yachiwawa soni ngondo. Sonitu Baibulo jikusalondesya ya ŵandu ŵele kalakala ‘[ŵakosechelaga] kuŵecheta maloŵe gakusoma mwakupweteka mpela mipamba’. (Salimo 64:3; 120:7; 140:1) Nambope, Baibulo jikusasala kuti uŵengani watukuwuwona masiku agano ukwete ngopolelo jakusosekwa mnope.
Uŵengani chili chimanyilo cha ndaŵi jetu jino
Baibulo jikusalondesya magongo gaŵili gagakwatendekasya ŵandu kuti aŵenganeje mnope masiku agano.
1. Jalochesye ya ndaŵi jele “chinonyelo cha ŵandu ŵajinji chichinandipa.” (Mateyu 24:12) M’malo mwakunonyelana, ŵandu chachilosyaga ndamo syakulimbikasya uŵengani.—2 Timoteyo 3:1-5.
2. Uŵengani ukutupilatupilape masiku agano ligongo lya yitendo ya Satana. Baibulo jikusasala kuti “chilambo chosope chili mmyala mwa jwakusakalajo.”—1 Yohane 5:19; Chiwunukuko 12:9, 12.
Nambope, Baibulo jikusasalasoni kuti pachangakaŵapa Mlungu chamasye yindu yosope yayikusatandikasya uŵengani. Konjechesya pelepa, jwalakwe chachimasya kulaga kosope kwakukusayika ligongo lya uŵengani. Baibulo jikusatusalila yindu ayi:
Mlungu “chachipukuta misosi josope m’meso mwa ŵanduwo, mwamti chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka. Yindu yakala yosope yeneyi yichiŵa yili yimasile.”—Chiwunukuko 21:4.