Ligongo Chichi Ŵandu Akulepela Kutamilikasya Mtendele?—Ana Baibulo Jikusasala Yamtuli Panganiji?

Achimlongola ŵayilambo yalumo ni mabungwe ga pa chilambo chosope alepele kuyikasya mtendele pa chilambopa. Masiku agano, ngondo soni yachiwawa yikutupila mnope kupundana ni mwayaŵelele kutyochela pangondo jaŵili ja pachilambo chosope. Ŵandu ŵajinji pachilambopa, chiŵandika 2 biliyoni, akusatama m’madela mwele mukutendekwa ngondo nambosoni yachiwawayi.

Ligongo chichi ŵandu nganaŵa ayikasisye mtendele? Ana Baibulo jikusasala yamtuli panganiji?

Magongo gatatu gagakwalepelekasya ŵandu kwikasya mtendele

1. 1. Ŵandu akwete ndamo syasikwalepelekasya kutamilikasya mtendele. Baibulo jasasile kala kuti ndaŵi jetu jino, “ŵandu [chachiŵa] ŵakulinonyela, ŵakunonyela mbiya, ŵakulipikana, ŵakulikwesya, . . . ŵangakulupichika, . . . ŵangasaka kukamulana ni ŵane, . . . ŵangalilekasya, ŵakogoya, . . . ŵangapikana ya ŵane, ŵakunyada.”—2 Timoteyo 3:2-4.

2. 2. Mundu jwalijose pajikapajika kapena mpela gulu, nganaŵa akombwele kumasya yakusawusya pali pangali chikamuchisyo cha Mkupanganya jwawo jwali, Yehofaa Mlungu. Baibulo jasasile kala kuti “mundu ngaŵa mkulilongolela jikape.”—Yelemiya 10:23.

3. 3. Chilambochi chikulamulidwa ni Satana, jwali jwakulamulila jwa machili nambosoni jwakusakala. Jwalakwe ‘akusokonasya chilambo chosope chapasi.’ (Chiwunukuko 12:9) Ni naga “chilambo chosope chili mmyala mwa jwakusalajo,” nikuti ngondo soni yachiwawa chiyipitilisyejepe.—1 Yohane 5:19.

Ana ni ŵani ŵampaka ayikasye mtendele?

Baibulo jikusatusimichisya kuti ŵandu nganaŵa ayikasisye mtendele, nambo Mlungu jikape basi.

•  “‘Une ni jungusamanyilila yinamkolochesye jemanja, yakuti timchiŵa pambone ngaŵaga pakusakala, kuti mkole chembecheyo chisyesyene pa yamsogolo.’”—Yelemiya 29:11.

Ana Mlungu chachikwanilisya mwamtuli yaŵasasileyi? “Mlungu jwakusapeleka mtendele, chamkasanye Satana.” (Aloma 16:20) Mlungu chachikamulichisya masengo boma jakwinani, jele Baibulo jikusawukolanga kuti “Uchimwene wa Mlungu,” wauchiyikasya mtendele pachilambo chosope chapasi. (Luka 4:43) Ŵandu chachijiganyidwa mwampaka atamileje mwamtendele mu ulamusi wa Yesu Klistu, jwachachiŵa Mwenye mu Uchimwenewu.—Yesaya 9:6, 7.

•  Kuti amanyilile yejinji, aŵalanje ngani ja Chichewa ja mtwe wakuti “Kodi Ufumu wa Mulungu Udzachita Chiyani?”