Yakwembecheya Ŵandu mu 2024—Ana Baibulo Jikusasala Yamti uli Panganiji?

Ŵandu ŵajinji pachilambopa, akusaganisya kuti pangali yampaka atende pakumasya yakusawusya yachasimane nayo mu 2024. Nambope yili yakomboleka kola chembecheyo chambone. Ana mpaka achipate kwapi?

Baibulo jikwete kwanga kwakwe

Baibulo jikusatusalila kuti Mlungu chachimasya yakusawusya yayikutendekasya umi wetu masiku agano kuti ukakolaga chembecheyo. Pamkaŵapa, Mlungu “chachipukuta misosi josope m’meso mwa [ŵanduwe], mwamti chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka.”—Chiwunukuko 21:4.

• Kuti amanyilile yejinji yajikusasala Baibulo pakwamba yamsogolo, aŵalanje ngani jakuti “Chembecheyo Chisyesyene Chikusatukamuchisya Kola Sogolo Jambone.”

Ana Baibulo mpaka jakamuchisye chamti uli apano

Baibulo jikusatusalila kuti tukwembecheya yindu yambone kusogoloku. Yeleyi mpaka yakamuchisye kulimbana ni kulagasika nganisyo pakwamba yamsogolo. (Aloma 15:13) Malangiso gakamuchisya gagali m’Baibulo mpaka gakamuchisye kulimbana ni yakusawusya yakusimana nayo apano mpela kusoŵa kwa mbiya, kutendeledwa yindu yangali chilungamo, soni ulwele.

• Alole yachatite chembecheyo cha m’Baibulo pakumkamuchisya jwamlume jwine kuŵa jwakusangalala soni kola mtendele wa mumtima mwangasamala kandu kuti jwakulile mu liŵasa lyakulaga. Alolele fidiyo ja mtwe wakuti Juan Pablo Zermeño: Yehofa Jwangamuchisye Kola umi Wambone.

• Alole yampaka yijile Baibulo pakwakamuchisya wawojo pakutamila kulijimba magambo, kudandawula, kulagasika nganisyo, soni pawililwe. Aŵalanje ngani ja Chichewa ja mtwe wakuti “Kodi M’Baibulo Mungapezeke Mawu Omwe Angandilimbikitse?”

• Apikanile maloŵe ga jwamkongwe juŵalesile usilikali jwakulilondesya kuti jwaliji “mundu jwakusawusya soni jwangasamala ya ŵane.” Alole muŵapatile chembecheyo ligongo lyakulijiganya Baibulo. Alolele fidiyo ja Chichewa ja mtwe wakuti Ndinasiya Usilikali.

Yili yakomboleka kwa wawojo soni liŵasa lyawo kuchiwonaga chaka cha 2024 kuŵa chaka chambone. Kulijiganya yejinji kutyochela m’Baibulo ni kwampaka kwakamuchisye kuyiwona yindu mu litala lyeleli. Atande kulijiganya Baibulo ni m’weji mwalulele mwakulongoleledwa ni mundu jwine. Alijiganye yampaka ajile Mlungu pakwapa ‘yambone’ sambano jino soni “chembecheyo chisyesyene pa yamsogolo.”—Yelemiya 29:11.