Yachachitenda Mlungu Kuti Uŵengani Umale
Atamose tuli tulesile ndamo ja kwaŵenga ŵane, nambope nganituŵa tukombwele kwalekasya ŵandu ŵane ndamoji. Ŵandu ŵangalemwa akusimanape ni yangasa. Ana ŵani ŵampaka amasye ndamo ja kwaŵenga ŵane kuti jikasimanikwasoni pachilambopa?
Yehofa Mlungu ni jwampaka amasye ndamoji. Yeleyi ni yajikusasala Baibulo.—Misyungu 20:22.
MLUNGU CHACHITYOSYA YINDU YAYIKUSIYATENDEKASYA ŴANDU KUTI AŴENGANEJE
1. SATANA. Satana jwali lilayika lyakwimuchila ni jwakusatendekasya kuti ŵandu aŵenganeje. Mlungu chachimjonanga Satana ni ŵandu wosope ŵakusiŵaŵenga ŵane.—Salimo 37:38; Aloma 16:20.
2. CHILAMBO CHA SATANA CHAKUSAKALACHI. Mlungu chachimasya yakusakala yosope, kupwatikapo ŵandale ŵakusatenda yachinyengo soni achimlongola ŵa dini ŵakusalimbikasya uŵengani. Mlungu chachityosyasoni ŵandu ŵakusatenda mabisinesi gachinyengo soni ŵakusiŵalila masuku pamtwe achimjawo pakutenda bisinesi.—2 Petulo 3:13.
3. UNGALI UMLAMA. Ŵandu wosope twajigalile ungali umlama kutyochela kwa Adamu ni Hawa. Yeleyi yikusatutendekasya kuti tuganisyeje soni kutenda yakusakala. (Aloma 5:12) Chimo mwa yindu yakusakalayi chili kwaŵenga ŵane. Mlungu chachakamuchisya ŵandu kumasya nganisyo syakusakala. Yeleyi yichitendekasya kuti uŵengani ukasimanikwasoni pachilambopa.—Yesaya 54:13.
BAIBULO JIKUSASALA YACHILAMBO CHELE NGASIMUSIMANIKWA UŴENGANI
1. PANGALI JUCHACHITENDAGA YANGALI CHILUNGAMO. Uchimwene wa Mlungu ni wawuchilamulaga pachilambopa. Uchimwenewu uchiŵa kwinani soni uchitamilikasya chilungamo mpaka kalakala. (Daniele 2:44) Pachilambopa ngasipapagwasoni lusagu. Mlungu chachityosya yindu yosope yangali chilungamo yakusasimana nayo ŵandu masiku agano.—Luka 18:7.
2. JWALIJOSE CHACHIŴA PAMTENDELE. Ŵandu ngasalagasoni ligongo lya yindu ya chiwawa kapena ngondo. (Salimo 46:9) Chilambochi chichiŵa chambone ligongo chichigumbala ni ŵandu ŵakutenda yamtendele.—Salimo 72:7.
3. JWALIJOSE CHACHITAMAGA NI UMI WAMBONE MPAKA KALAKALA. Ŵandu wosope chachinonyelanaga yisyesyene. (Mateyu 22:39) Pangali juchachilagasikaga nganisyo kapena kukumbuchila yindu yakupweteka yakalakala. (Yesaya 65:17) Pandaŵiji ŵandu ngasaŵenganagasoni mwamti “tachiŵa pa mtendele wakupundanganya.”—Salimo 37:11.
Ana akusaka chatame m’chilambo mpela chelechi? Atamose apanopano, ŵandu ŵajinji akuleka kwaŵenga ŵane pakamulichisya masengo mfundo sya m’Baibulo. (Salimo 37:8) Yeleyi ni yakutenda ŵa Mboni sya Yehofa ŵajinji pachilambo chosope. Atamose kuti jemanjaji akusalekangana yilambo yakutyochela soni ndamo, nambope akusanonyelana soni ali ŵakamulana mpela liŵasa limo.—Yesaya 2:2-4.
Ŵa Mboni sya Yehofa mpaka ŵakamuchisye wawojo kumanyilila yakusatenda jemanjajo kuti akombole kupilila yindu yangali chilungamo soni lusagu. Yachachimanyililayi mpaka yakamuchisye kuleka kwaŵenga ŵane ni kutanda kwanonyela. Chachimanyilila yampaka atende kuti ŵanonyeleje ŵandu ŵane, atamose ŵandu ŵele ali ŵangayamichila soni ŵakusiŵaŵenga wawojo. Yakuyichisya yakwe chachiŵa ŵakusangalala soni chachikamulanaga ni ŵane. Kupunda yosopeyi chachimanyilila yampaka atende kuti chaŵe mu Uchimwene wa Mlungu, mwele ngasimupagwa kuŵengana.—Salimo 37:29.