Cinonyelo Ca Mlungu Cili Cangamala

1, 2. Ligongo cici akusamnonyela Yehofa Mlungu?

ANA akusamnonyela Mlungu? Komboleka kuti akusamnonyela mnope mwamti ayikene pakulipeleka kwa jwalakwe. Soni mwine akusalipikana kuti ali Mjawo jwapamtima. Nambo atamose pandaŵi jaŵatandaga kumnonyela Yehofa, jwalakwe ŵaliji ali ŵanonyele kala wawojo. M’Baibulo tukusaŵalanga kuti, “Tukusamnonyela, ligongo jwalakwe ni juŵatandite kutunonyela.”—1 Yohane 4:19.

² Aganicisye ya matala gosope gele Yehofa atulocesye cinonyelo. Ŵatupele cilambo capasi kuti tutamejemo. Akusatupasoni yindu yosope yakusosecela paumi. (Mateyu 5:43-48; Ciwunukuko 4:11) Yehofa akusaka kuti tuŵe najo paunasi wambone. Soni atesile yiliyose yakomboleka kuti tulijiganye yakwamba jwalakwe. Patukuŵalanga Baibulo tukusaŵa tuli mkumpikanila Yehofa. Nambo patukupopela, jwalakwe akusaŵa ali mkutupikanila. (Salimo 65:2) Akusatulongolela soni kutulimbikasya kupitila mwa msimu wakwe weswela. (Luka 11:13) Jwalakwe ŵayikene pakutupa Mwanagwe jwapamtima kuti atukulupusye ku ulemwa soni ciwa.—Aŵalanje Yohane 3:16; Aloma 5:8.

3. Ana tukusosekwa kutenda cici kuti tujendelecele kuŵa paunasi wambone ni Mlungu?

³ Kwakandaŵi, aganicisye ya mjawo jwapamtima mnope, jwaŵele ali ni wawojo pa ndaŵi jakusawusya soni jakusangalasya. Pakusasosekwa macili kuti mundu uŵe paunasi wakulimba mpela welewu. Yeleyi yili yakulandana ni unasi wetu ni Yehofa. Jwalakwe ali mjetu jusyesyene jwanganaŵa alandene ni jwalijose. Unasi wetu ni jwalakwe komboleka kutama mpaka kalakala. M’yoyo, Baibulo jikusatusalila kuti, “Atendeje yindu yampaka yimtendekasye Mlungu kwanonyela.” (Yuda 21) Ana mpaka tutende wuli yeleyi? Baibulo jikusatusalila kuti, “Pakuŵa kumnonyela Mlungu kukusagopolela kugapikanila malamusi gakwe, soni malamusi gakwego nganigaŵa gakusitopesya.”—1 Yohane 5:3.

“ANA KUMNONYELA MLUNGU KUKUSAGOPOLELA CICI?”

4, 5. (a) Ana “kumnonyela Mlungu” kukusagopolela cici? (b) Ana cinonyelo cawo pa Yehofa catandite kukula camtuli?

⁴ Ana Baibulo jikusagopolela cici pajikusasala kuti “kumnonyela Mlungu”? Yeleyi ngayikugopolela cinonyelo ca Mlungu kwetuwe, nambo cinonyelo cetu kwa jwalakwejo. Ana akusakumbucilaga ndaŵi jaŵatandite kumnonyela Yehofa?

⁵ Akumbucile muŵapikanile mumtima ali alijiganyisye kuti Yehofa akusaka kuti wawojo catame mpaka kalakala m’cilambo casambano. Ŵalijiganyisye yosope yatesile Yehofa kuti akwanilisye yeleyi, soni komboleka kuti amanyilile mtuka watupele Mlungu wawuli Mwanagwe juŵamtumisye pa cilambo capasi. (Mateyu 20:28; Yohane 8:29; Aloma 5:12, 18) Paŵalijiganyisye yakusati Yehofa pakwanonyela, umi wawo wacenjile soni ŵatandite kumnonyela Yehofa.—Aŵalanje 1 Yohane 4:9, 10.

6. Ana kumnonyela mundu jwine kukusapwatikapo cici? Ana kumnonyela kwawo Mlungu kwatendekasisye kutenda cici?

⁶ Kulipikana kuti tukusosekwa kumnonyela Mlungu kweleku kugambile kuŵa pakutandila. Mwambone, pana yejinji yatukusosekwa kutenda pakulosya kuti tukusamnonyela mundu jwine mmalo mwakwamba kuŵeceta kuti, “Ngusinamnonyela.” Cinonyelo cikusatutendekasya kutenda yiliyose yele mjetujo mpaka yimtendekasye kuŵa jwakusangalala. M’yoyosoni, cinonyelo cawo pa Yehofa cikusatendekasya kuti atendeje yindu yakumsangalasya jwalakwe. Cinonyeloci pacakusile, ŵalipelece kwa jwalakwe kaneko ŵabatiswe. Yeleyi yalosisye kuti ŵamsalile Yehofa kuti tacimtumicila mpaka kalakala. (Aŵalanje Aloma 4:7, 8.) Ana yaŵamsalile Yehofayi mpaka ayikwanilisye camtuli?

“KUGAPIKANILA MALAMUSI GAKWE”

7. Ana tukusosekwa kutenda cici naga tukusamnonyela Mlungu? Ana gane mwa malamusi gakwe gali gapi?

⁷ Ligongo lyakuti tukusamnonyela Yehofa, “tukusagapikanila malamusi gakwe.” Ana tukusatenda wuli yeleyi? Tukusatenda yeleyi mwakumpikanila. M’Baibulo, tukusalijiganya yampaka tutende kuti tumsangalasye. Mwacisyasyo, jwalakwe akusatusalila kuti kuli kulemwa kukolelwa, kwiŵa kapena kulambusya. Akusatusalilasoni kuti gonana ni mundu jwanganituŵa najo pa ulombela kuli kulemwa, kapena kulambila mundu jwine kapena cindu cine cakwe kuli kulemwasoni.—1 Akolinto 5:11; 6:18; 10:14; Aefeso 4:28; Akolose 3:9.

8, 9. Ana tukusamanyilila camtuli yakusasaka Yehofa kuti tutendeje pa yakutendekwa yakuti m’Baibulo mwangali malamusi gakwe? Apelece cisyasyo.

⁸ Nambo kuti tumsangalasye Yehofa tukusasosekwa kutenda yejinji ngaŵa kwamba kupikanila malamusi gakwe. Jwalakwe nganatupa ndandanda wosope wa malamusi gakutusalila yampaka tutende ni yiliyose yatusimene nayo paumi. M’yoyo, payakutendekwa yine nganituŵa tugasimene malamusi m’Baibulo gakutusalila yatukusosekwa kutenda. Ana mpaka tusagule camtuli mwakuŵajilwa pa yakutendekwa mpela yeleyi? (Aefeso 5:17) Malamusi ga m’Baibulo gakusatyocela pa yiwundo. Yiwundoyi yikusatujiganya mwakusayiwonela yindu Yehofa. Patukusaŵalanga m’Baibulo ni patukusammanyilila cenene Yehofa kuti ali mundu jwamtuli. Tukusalijiganya mwakusaganicisya, kupwatikapo yakusayinonyela soni yakusayiŵengaga.—Aŵalanje Salimo 97:10; Misyungu 6:16-19; alole Maloŵe Gakumbesi 1.

⁹ Mwacisyasyo, ana tukusasagula camtuli yindu yatukusaka kulolela pa TV kapena pa Intaneti? Panganiji, Yehofa ngakusatusalila yatukusosekwa kutenda. Nambo yiwundo yaŵatupele yikusatukamucisya kuti tusaguleje yindu mwakuŵajilwa. Yakusangalasya ya masiku agano yigumbele ni ya ciwawa soni ya cikululu. M’Baibulo, Yehofa akusatusalila kuti “akusaŵengana ni jwalijose jwakunonyela ya ciwawa” soni kuti “ŵandu ŵa cikululu Mlungu tacalamula.” (Salimo 11:5; Ahebeli 13:4) Ana yiwundo yeleyi mpaka yitukamucisye camtuli kusagula yindu mwakuŵajilwa? Patumanyilile kuti Yehofa akusaŵengana ni cinecakwe, tukusosekwa kuciŵambala.

10, 11. Ligongo cici akusampikanila Yehofa?

¹⁰ Ligongo cici tukusampikanila Yehofa? Ngatukusampikanila ligongo lyakogopa kupegwa cilango kapena yakusawusya yampaka yipagwe ligongo lyakusagula mwangaŵajilwa. (Agalatia 6:7) Nambo, tukusampikanila Yehofa ligongo lyakuti tukusamnonyela. Mpela mwakusatendela ŵanace pakusaka kwasangalasya atati ŵawo, m’wejisoni tukusasaka kwasangalasya Atati ŵetu ŵakwinani. Pangali cakusangalasya kupunda kumanyilila kuti Yehofa akusatunonyela!—Salimo 5:12; Misyungu 12:2; alole Maloŵe Gakumbesi 2.

¹¹ Ngatukusampikanila Yehofa yindu payilipe cenene kapena naga tukuyiwona kuti pangali mwine mwampaka tutendele. Soni ngatukusasagula kupikanila malamusi ni yiwundo yine ni kuleka yine ngayipikanila. (Detulonomo 12:32) M’malo mwakwe, tukusampikanila jwalakwe, mpela jwamalumbo Daudi juŵatite, “Cinjisangalala ni malamusi gawo, pakuŵa ngusaganonyela.” (Salimo 119:47; Aloma 6:17) Tukusaka kuŵa mpela Nowa, juŵalosisye kuti akusamnonyela Yehofa mwakutenda cilicose caŵamlamwile kuti acitende. Baibulo jikusatusalila kuti, Nowa “jwatesile m’momo.” (Genesesi 6:22) Ana akusaka kuti Yehofa aŵecete m’yoyo ya wawojo?

12. Ana mpaka tutende cici kuti tumsangalasye Yehofa?

¹² Ana Yehofa akusapikana wuli mumtima patukumpikanila? Tukusatendekasya ‘mtima wakwe kusangalala.’ (Misyungu 11:20; 27:11) Agambe ganicisya! Tukusamtendekasya Mkupanganya jwa cilambo cosope kuŵa jwakusangalala patukumpikanila. Nambo jwalakwe jwangatukanganicisya kuti tumpikanileje. M’malo mwakwe, atupele ufulu wakusagula yakutenda. Yeleyi yikugopolela kuti tukwete ufulu wakusagula cacili cambone ni cakusakala. Yehofa akusaka kuti tusaguleje yindu mwakuŵajilwa ligongo lyakuti tukusamnonyela. Yeleyi mpaka yitukamucisye kuti tukole umi wambone.—Detulonomo 30:15, 16, 19, 20; alole Maloŵe Gakumbesi 3.

“MALAMUSI GAKWEGO NGANIGAŴA GAKUSITOPESYA”

13, 14. Ana tukumanyilila camtuli kuti malamusi ga Mlungu nganigaŵa gakusawusya kugapikanila? Apelece cisyasyo.

¹³ Ngatukusosekwa kuganisya kuti malamusi ga Yehofa gali gakusawusya kugapikanila kapena kuti jwalakwe akusaka kutusumula ufulu wetu wakusagula yakutenda. Baibulo jikusatusalila mwakupikanika cenene kuti, “Malamusi gakwego nganigaŵa gakusitopesya.” (1 Yohane 5:3) M’malemba gane, maloŵe gakuti “gakusitopesya” akusagakamulicisya masengo pakusala ya malamusi gane gangasosekwa kapena ya ŵandu ŵakusalinga kwalamulila ŵane kapena kwaŵenga. (Mateyu 23:4; Masengo 20:29, 30) Malamusi ga Yehofa nganigaŵa gakusitopesya, yayikugopolela kuti gali gangasawusya kugapikanila. Yiliyose yakusatuŵenda kuti tutende yikusaŵa yambone.

¹⁴ Tuwanicisye kuti akumkamucisya mjawo kusamisya katundu jwakwe kwawula najo ku nyumba jine. Jwalakwe akwete ndundu syejinji. Sine syangali wusito nambo sine syawusito mnope mwamti kuti sinyakulidwe pakusosekwa ŵandu ŵaŵili. Ana mjawojo mpaka ŵasalile kuti ndundu syosope syawusitosyo anyakule jikape? Nganaŵa atesile yeleyi. Ligongo cici? Ligongo lyakuti mjawojo nganaŵa asacile kwawulasya wawojo. Mwelemu ni mwaŵelele Yehofa. Jwalakwe nganaŵa ŵasalile kuti atende cindu canganaŵa akombwele kucitenda. (Detulonomo 30:11-14) Yehofa akusatumanyilila cenene. Jwalakwe “akusamanyilila cenene muŵatupanganyicisye. Akusakumbucila kuti tuli luwundu.”—Salimo 103:14.

15. Ligongo cici tuli ŵakusimicisya kuti malamusi ga Yehofa gali gambone?

¹⁵ Mose ŵawusalile mtundu wa Ayisalayeli kuti malamusi ga Yehofa gapali pakusaka kuti “yindu yajendeleje cenene,” soni kupikanila kwawo ni kukukakamucisye kuti “aŵe ni umi.” (Detulonomo 5:28-33; 6:24) Yeleyi yili yakulandana ni masiku agano. Cilicose cakusatuŵenda Yehofa kutenda cikusatendekasya kuti yindu yitujendeleje cenene. (Aŵalanje Yesaya 48:17.) Ndaŵi syosope, Atati ŵetu, Yehofa akusamanyilila yindu yayili yambone kwetuwe. (Aloma 11:33) Baibulo jikusatusalila kuti, “Mlungu ali cinonyelo.” (1 Yohane 4:8) Yeleyi yikugopolela kuti yiliyose yakusaŵeceta Yehofa soni kutenda yikusalongoleledwa ni cinonyelo.

16. Ana tukumanyilila wuli kuti mpaka tukombole kumpikanila Mlungu atamose kuti tuli ŵandu ŵangali umlama soni tukutama m’cilambo cakusakala?

¹⁶ Yili yakusawusya kuti ndaŵi syosope tumpikanileje Mlungu, ligongo tukutama m’cilambo cakusakala cacikulamulilidwa ni Satana. Jwalakwe akusiŵalimbikasya ŵandu kuti atendeje yakusakala. (1 Yohane 5:19) Tukusosekwa kulimbanasoni ni nganisyo syetu syangali umlamasi, ligongo mpaka situtendekasye kuti tukampikanilaga Mlungu. (Aloma 7:21-25) Nambo cinonyelo cetu pa Yehofa cikusatupa macili kuti tutendeje yindu yayili yakuŵajilwa. Jwalakwe akusakuwona kulingalinga kwetu kwatukusatenda kuti tumpikanile. Ni akusatukamucisya mwakutupa macili ga msimu wakwe weswela. (1 Samuele 15:22, 23; Masengo 5:32) Msimu weswela ukusatukamucisya kusya ndamo syakutukamucisya kuti tumpikanileje mwangasawusya.—Agalatia 5:22, 23.

17, 18. (a) Ana m’bukuji citulijiganye cici? (b) Ana tucilijiganya cici mu mtwe wakuyicisya?

¹⁷ M’bukuji citulijiganye yampaka tutende kuti tumsangalasyeje Yehofa. Soni citulijiganye yampaka tutende kuti tukamulicisyeje masengo yiwundo soni malamusi ga m’Baibulo paumi wetu. Tukumbucileje kuti Yehofa jwangatukanganicisya kuti tumpikanileje. Naga tusagwile kuti citumpikanileje, umi wetu uciŵa wambone soni tucikola sogolo jambone. Cakusosekwa mnope ni cakuti, kupikanila kwetu Yehofa kukusalosya cinonyelo cetu kwa jwalakwe.—Alole Maloŵe Gakumbesi 4.

¹⁸ Pakusaka kutukamucisya kulekanganya cambone ni cakusakala, Yehofa atupele cikumbumtima jwalijose jwetuwe. Cikumbumtima cetu mpaka citukamucisye kuti “tusunjeje malamusi gakwe” naga tukucijiganya cenene. Ana cikumbumtima cili cici, soni ana tukusacijiganya mwamtuli? Mtwe wakuyicisya ucisala yeleyi.