Cikalata Cakutyocela ku Likuga Lyakulongolela

Kwa wosope ŵakusamnonyela Yehofa Mlungu soni Maloŵe gakwe Baibulo:

Yesu ŵatite, “Cacimanyilila usyesyene, soni usyesyene ucagopola.” (Yohane 8:32) Aganicisye muŵapikanile ali atandite kulijiganya usyesyene wa m’Baibulo. Yaliji yakusangalasya kumanyilila kuti, yili yakomboleka kulijiganya usyesyene atamose kuti tukutama m’cilambo cacigumbele ni unami.—2 Timoteo 3:1.

Yehofa Mlungu akusasaka kuti tuwumanyilileje usyesyene. M’wejisoni tukusasacilila kwasalila ŵane usyesyene ligongo lyakuti tukusitwanonyelaga. Nambo kutumicila Mlungu kukusasaka yindu yejinji. Tukuŵeceta yeleyi ligongo lyakuti tukusacimbicisyaga mnope yiwundo ya Yehofa, m’yoyo tukusosekwa kulingalinga kutamaga mpela Aklistu. Yesu ŵasasile litala lyakusosekwa mnope lyampaka tulocesye kuti tukusamnonyela Mlungu. Jwalakwe jwatite, “Naga mkupikanila malamusi gangu, tinjipitilisya kumnonyela jemanja, mpela mundendele une pakupikanila malamusi ga Atati ŵangu, soni akupitilisya kunonyela.”—Yohane 15:10.

Yesu akusiŵanonyelaga yisyesyene Atati ŵakwe, m’yoyo jwalakwe akusatendaga cilicose camsalile Atatigwewo. Naga m’wejisoni tukujigalila cisyasyo ca Yesu paumi wetu, nikuti Yehofa cacitunonyela soni tuciŵa ŵakusangalala yisyesyene. Yeleyi yikamulana ni yaŵaŵecete Yesu kuti, “Naga akumanyilila yindu yeleyi, ali ŵakusangalala naga akuyitenda.”—Yohane 13:17.

Tukulupilila kuti bukuji cijakamucisye wawojo kuti atameje mwakamulana ni usyesyene wa m’Baibulo soni kuŵa paunasi wambone ni Mlungu. Lili lipopelo lyetu kuti cinonyelo cawo pa Mlungu cikule, soni kuti ‘Mlungu ŵanonyeleje kuti akapocele umi wangamala.’—Yuda 21.