Tukusiŵanonyela Mnope Atati Ŵetu Yehofa

1-2. Ana Yehofa jwatesile yamtuli kuti tuŵe m’liŵasa lyakwe, soni jwatesile yeleyi ligongo chichi?

YEHOFA atukundile kuti tuŵe m’liŵasa lya ŵandu ŵakusamlambilaga jwalakwe. Kusala yisyene, yaŵatesile Yehofayi yili yakusangalasya. M’liŵasali mwana ŵandu ŵaŵalipeleche kwa Mlungu soni ŵakusakulupilila mbopesi ja Mwanache jwakwe. M’weji tuli m’liŵasa lyakusangalala, soni tukusangalala ni umi wambone. Tukusasangalalasoni ni chembecheyo chatukwete chakutama ni umi wangamala, chinga kwinani kapena m’Paladaiso pachilambo chapasi.

² Ligongo lya chinonyelo, Yehofa ŵatesile yakomboleka kuti m’weji tuŵe m’liŵasa lyakwe. Yeleyi yakomboleche ligongo lya mbopesi japenani jaŵapeleche jwalakwe. (Yoh. 3:16) Ŵanduwe ‘twasumidwe ni mtengo wapenani.’ (1 Akoli. 6:20) Kupitila mu mbopesiji, Yehofa jwatendekasisye kuti yiŵe yakomboleka kuwa najo paunasi wambone. Uli upile wekulungwa kumkolanga Mundu jwamkulungwa jwakulamulila chilambo chosope kuti ali Atati ŵetu. Mpela mwatwayiwonele mungani jajipite jila, Yehofa ali Atati ŵambone mnope.

3. Ana mpaka tuliwusye yiwusyo yapi? (Alole libokosi lyakuti “Ana Yehofa Akusamanyilila Chenene Uneji?”)

³ Mwakulandana ni jwakulemba Baibulo jwine, mpaka tuliwusye kuti, ‘Tinawuchisye chichi Ambuje, kwa yindu yambone yosope yandendele?’ (Sal. 116:12) Kwanga kwa chiwusyochi kuli kwakuti nganituŵa twawuchisye chilichose Atati ŵetu ŵakwinani. Nambope atamose yili myoyo, tukusanonyelaga Atati ŵetuŵa. Ndumetume Yohane jwalembile kuti, ‘Uwe tukusalosya chinonyelo ligongo lyakuti Mlungu ŵatunonyele uwe pandanda.’ (1 Yoh. 4:19) Ana mpaka tulosye chamtuli kuti tukusanonyela Atati ŵetu ŵakwinani?

TUMŴANDICHILEJE YEHOFA

4. Mwakamulana ni Yakobo 4:8, ligongo chichi tukusosekwa kulingalinga kuti tumŵandichileje Yehofa?

⁴ Yehofa akusasaka kuti tumŵandichileje soni tuŵechetaneje najo. (Aŵalanje Yakobo 4:8.) Jwalakwe akutuŵenda kuti ‘tupopeleje ndaŵi syosope,’ soni akusatupikanilaga ndaŵi syosope. (Alo. 12:12) Yehofa ngakusaŵa jwakutanganidwa mnope kapena kugawona mapopelo getu kuŵa gakupesya. Tukusampikanila Mlungu mwakuŵalanga Maloŵe gakwe Baibulo soni mabuku gagakusatukamuchisya kujipikanichisya chenene. Tukusalosyasoni kumpikanila jwalakwe patukupikanila chenene pamisongano ja Chiklistu. Mpela mwayikusaŵela kuti kuŵechetana kwambone kukusakamuchisya kuti ŵanache aŵe paunasi wambone ni achinangolo, nombesoni kuŵecheta ni Yehofa ndaŵi syosope kukusakamuchisya kuti tumŵandichileje.

5. Ana mpaka tupopeleje mwamtuli kuti Yehofa atujanje?

⁵ Tuganichisyeje mwagakusaŵelaga mapopelo getu kwa Mlungu. Yehofa akusasaka kuti tumsalileje yakusawusya yetu yosope kupitila mwipopelo. (Sal. 62:8) Tukusosekwa tuliwusyeje kuti, ‘Ana mapopelo gangu gakusagamba kuŵa gakwinjisya mumtwe kapena gakutyochela pasi pamtima?’ Yili yangakayikasya kuti tukusamnonyela Yehofa mnope, soni tukusasaka kuti unasi wetu ni jwalakwe uŵe wakulimba. Kuti yeleyi yikomboleche tukusosekwa kuŵechetanaga najo mwakutamilichika. Tukusosekwa kumsalila chilichose kupwatikapo yindu yachimsisi. Tumsalileje yindu yayikusatusangalasya nambosoni yayikusatutendekasya kuti tukasangalalaga. Tukakayichilaga kuti jwalakwe mpaka atukamuchisye.

6. Ana tukusosekwa kutenda chichi kuti twaŵandichile Atati ŵetu ŵakwinani?

⁶ Kuti twaŵandichile Atati ŵetu ŵakwinani, tukusosekwa kuŵa ŵakuyamichila ndaŵi syosope. Yajwaŵechete jwamasalimo yili yisyene, jwalakwe jwatite, “Ŵalakwe Ambuje Mlungu jwangu atutendele yakusimonjesya yejinji, ni atukolochesye yambone yejinji yamsogolo. Pangali jwine jwakulandana ni ŵalakwe, naga kuti nayilongosole ni kuyisala ya yeleyo, nganipakombola kuyiŵalanga ligongo lya winji wakwe.” (Sal. 40:5) Mmalo mwagamba kuyamichila ni pakamwape, yitendo yetu soni yatukusaŵecheta yilosyeje kuti tukusamyamichila yisyesyene Yehofa. Yeleyi yikusalosya kuti tukusatenda yindu mwakulekanga ni mwakusatendela ŵane masiku agano. Tukutama m’chilambo chele ŵandu ŵakwe ŵangayamichila yindu yosope yakusiŵatendela Mlungu. Chindu chine chachikusalosya kuti tuli “m’masiku gambesi” chili ungayamichila wa ŵandu. (2 Tim. 3:1, 2) Kusala yisyene ngatukusosekwa kujigalila ndamo jeleji.

7. Ana Yehofa akusasaka kuti tutendeje chichi, soni ligongo chichi?

⁷ Achinangolo akusasaka kuti ŵanache ŵawo aŵeje ŵakamulana. Mwakulandana ni yeleyi, nombe Yehofa akusasaka kuti ŵanache ŵakwe akamulaneje mnope. Kusala yisyene, chinonyelo chatukusakola pasikati petu chikusalosya kuti tuli Aklistu ŵasyesyene. (Yoh. 13:35) Yajwasasile jwamasalimo yili yisyene, jwalakwe jwatite, “Alole kusalala ni kunonyelesya kwa ŵandu; pakutama pampepe mwakamulana.” (Sal. 133:1) Patukwanonyela abale ni alongo ŵetu, tukusalosya kuti tukusamnonyela Yehofa. (1 Yoh. 4:20) Kusala yisyene yili yakusangalasya kuŵa mbali ja liŵasa lya abale ni alongo ‘ŵakusanonyelana ni kutendelana chanasa.’​—Aef. 4:32.

AMNONYELEJE YEHOFA MWAKUMPIKANILA

8. Mwakamulana ni 1 Yohane 5:3, ana ni ligongo lyekulungwa lyapi lyalikusatutendekasya kumchimbichisya Yehofa?

⁸ Yehofa akusasaka kuti ŵanache ŵachimbichisyeje achinangolo ŵawo soni akusasaka kuti tumpikanileje jwalakwe. (Aef. 6:1) Tukusasosekwa kumchimbichisya Yehofa ligongo lyakuti ni juŵatupanganyisye. Jwalakwe ni jwakusatupa yakusosechela ya paumi, soni ali nangolo jwalunda mnope kupunda achinangolo wosope. Nambope, ligongo lyekulungwa lyalikusatutendekasya kumpikanila Yehofa lili lyakuti tukusamnonyela mnope. (Aŵalanje 1 Yohane 5:3.) Atamose kuti pana magongo gejinji gakututendekasya kumpikanila Yehofa, jwalakwe jwangatukanganichisya kuti tumpikanileje. Yehofa ŵatupele ufulu wakusagula. Myoyo jwalakwe akusasangalala patukumpikanila ligongo lyakuti tukusamnonyela.

9-10. Ligongo chichi kumanyilila malamusi ga Mlungu soni kugapikanila kuli kwakusosekwa mnope?

⁹ Achinangolo akusiŵachenjela ŵanache ŵawo. Ni ligongo lyakwe akusaŵika malamusi kuti gakamuchisyeje ŵanachewo. Ŵanachewo pakupikanila malamusigo, akusalosya kuti akusiŵadalila soni kwachimbichisya achinangolo ŵawo. Myoyo, yikusaŵa yakamuchisyasoni mnope patukupikanila malamusi gaŵatupele Atati ŵetu ŵakwinani. Patukutenda yeleyi, tukusalosya kuti tukusamnonyela soni kumchimbichisya Yehofa nambosoni yikusatukamuchisyaga mnope m’wejo. (Yes. 48:17, 18) Mwakulekangana ni yeleyi, ŵandu ŵangakusapikanila malamusi ga Yehofa yindu yangajendelaga chenene.​—Aga. 6:7, 8.

¹⁰ Patukutenda yindu yakumsangalasya Yehofa yikusatukamuchisya kuti tuŵambale yindu yampaka yitujonanje mwakuchilu, munganisyo, soni mwausimu. Yehofa akusamanyilila yindu yayili yakusosekwa kwa m’weji. Mlongo jwine jwa ku United States jwatite, “Ngumanyilila kuti kumpikanila Yehofa kukusatendekasya kuti mundu ukole umi wambone mnope.” Wosopewe mpaka tujitichisye yeleyi. Ana wawojo akusayiwona yindu yambone yapatile ligongo lyakumpikanila Yehofa?

11. Ana lipopelo likusatukamuchisya chamtuli?

¹¹ Lipopelo likusatukamuchisya kuti tuŵe ŵakupikanila atamose yili yakuti kutenda yeleyo kuli kwakusawusya. Ndaŵi sine mpaka tuyiwone kuŵa yakusawusya kumpikanila Yehofa ligongo lyakuti tuli ŵandu ŵakulemwa. Nambope tukusosekwa kulingalinga kuti tumpikanileje. Jwamasalimo jwamŵendile Mlungu kuti, “Ambe lunda lwakuti nagasunje malamusi gawo, ni kugakuya ni mtima wangu wosope.” (Sal. 119:34) Mpayiniya jwine lina lyakwe Denise jwatite, “Panguyiwona kuŵa yakusawusya kupikanila malamusi ga Yehofa ngusapopela ndaŵi jijojo kuti angamuchisye kutenda yambone.” Nganituŵa tukayichile kuti Yehofa chachijanga mapopelo mpela gelega.​—Luk. 11:9-13.

TWAKAMUCHISYEJE ŴANE KUTI AMNONYELEJE YEHOFA

12. Mwakamulana ni Aefeso 5:1, ana tukusosekwa kutenda chichi?

¹² Aŵalanje Aefeso 5:1. Mpela “ŵanache ŵakunonyelwa” ŵa Yehofa, tukusalingalinga kumsyasya jwalakwe. Tukusasyasya ndamo sya Yehofa mwakuŵa ŵandu ŵachinonyelo, ŵachanasa soni mwakwakululuchila ŵane. Ŵandu ŵangakusamtumichila Yehofa pasiweni ndamo syetu syambone, mpaka yalimbikasye kuti atande kulijiganya ya jwalakwe. (1 Pet. 2:12) Achinangolo Ŵachiklistu akusosekwa kwalela ŵanache ŵawo mpela mwakusatendela Yehofa pakumsamalila mundu jwalijose. Kutenda yeleyi, kuchakamuchisya ŵanache ŵawo kuti amnonyelejesoni Yehofa.

13. Ana tukusosekwa kutenda chichi kuti tuŵe ŵakulimba mtima?

¹³ Ŵanache ŵachinyamata akusiŵanyadila baba ŵawo soni akusanonyela kuŵecheta yindu yambone yakusatenda baba ŵawowo. M’wejisoni tusanyadila Atati ŵetu ŵakwinani Yehofa, soni kwakamuchisya ŵane kuti ŵamanyilile. M’mitima jetu tukusalipikana mpela mwaŵapikanilaga Mwenye Daudi jwaŵalembile kuti, “Ngupoka mwa Ambuje.” (Sal. 34:2) Nambi wuli naga tuli ŵasooni? Ana mpaka tutende wuli kuti tuŵe ŵakulimba mtima? Tukusalimba mtima patukuganichisya mwampaka asangalalile Yehofa patukwajiganya ŵane ya jwalakwe, soni patukuganichisya mwampaka asangalalile ŵandu ŵatukwajiganyawo. Yehofa chachitukamuchisya kuti tuŵe ŵakulimba mtima. Tukuŵecheta yeleyi ligongo lyakuti jwalakwe ŵakamuchisyesoni abale ni alongo ŵa m’yaka 100 yandanda kuti aŵe ŵakulimba mtima.​—1 Ates. 2:2.

14. Ana ni magongo gapi gagakulosya kuti kukamula nawo masengo gakwajiganya ŵandu kuli kwakusosekwa?

¹⁴ Yehofa jwangali lusagu, mwamti akusasangalala pakutuwona tuli mkwanonyela ŵane mwangasamala kandu ya mtundu wawo. (Mase. 10:34, 35) Litala limo lyampaka tulochesye kuti tukusiŵanonyela ŵane lili kwalalichila ngani syambone. (Mat. 28:19, 20) Ana masengo gelega mpaka gakole yakuyichisya yamtuli? Ŵandu ŵakusapikanila utenga wetu mpaka achenje umi wawo ni kukola chembecheyo cha umi wangamala m’Paladaiso.​—1 Tim. 4:16.

TWANONYELEJE ATATI ŴETU SONI TUŴEJE ŴAKUSANGALALA

15-16. Ana tukwete magongo gapi gakututendekasya kuŵa ŵakusangalala?

¹⁵ Yehofa ali Mtati jwachinonyelo, myoyo akusasakaga kuti ŵandu ŵakwe aŵeje ŵakusangalala. (Yes. 65:14) Pana magongo gejinji gampaka gatutendekasye kuŵa ŵakusangalala apanopano atamose kuti tukusimana ni yakusawusya. Mwachisyasyo, tukusasimichisya kuti Atati ŵetu ŵakwinani akusatunonyela mnope. Kupwatika pelepa, tukusagamanyilila chenene Maloŵe ga Mlungu. (Yel. 15:16) Tuli m’liŵasa lya ŵandu ŵakusamnonyela Yehofa, ŵelesoni akusasinonyela ndamo syakwe syapenani. Kupwatika pelepa ŵandu ŵakwe akusanonyelana.​—Sal. 106:4, 5.

¹⁶ Mpaka tuŵe ŵakusangalala ndaŵi syosope ligongo lyakuti tukwete chembecheyo chakuti msogolomu umi uchiŵa wambone. Tukumanyilila kuti pachangakaŵapa Yehofa chatyosye yakusakala yosope. Soni jwalakwe chachichiwuchisya chilambo chapasichi kuti chiŵe Paladaiso mwakulongoleledwa ni Uchimwene wakwe. Tukwetesoni chembecheyo chakusangalasya chakuti ŵakunonyelwa ŵetu ŵaŵawile chachijimuka soni tuchitamaga nawo. (Yoh. 5:28, 29) Yeleyitu yichiŵa yakusangalasya. Nambo chakusosekwa mnope chili chakuti, tuli ŵakusimichisya kuti pachangakaŵapa jwalijose chinga kwinani kapena pachilambo chapasi chachachimbichisyaga soni kwalambila Atati ŵetu ŵachinonyelo.