Sìpia un pastor che tende ben dele piégore

1-2. (a) Come che i ansiani i ne giuta? (b) Come che Geovà el ne ga assà sicuri che gavarìssino el aiuto che ne ocore? (Varda anca el quadro “Pastori nei tempi dela Bìblia”.)

TE TE ricordi de un momento dela to vita che un ansiano amoroso el te ga giutà? Fursi el te ga dato consili dela Bìblia par giutarte a far una dessision giusta o fursi el te ga consolà dopo che qualchedun che te amei l’è morto. O pol esser che el te ga ricordà quanto che Geovà el te ama, anca se ti te pensei che no te meritei el so amor. Una sorela dela Spagna che ga nome Maríaa la dise: “Quando i ansiani i me giuta e i me protege come un pastor el fà cole so piégore, mi sò che lori i se importa pròpio con mi. Le so vìsite le me mostra che lori i vol cognosserme e i vol capir la meio maniera de giutarme.”

² Geovà el sa che ghemo bisogno del aiuto dei ansiani. Par quela, lu el ga prometesto dar ‘pastori che i ndarà pròpio tender dele piégore’. Lu el volea doperar òmini che, de acordo cola so volontà, i doperaria la cognossensa e la sabedoria dela Bìblia par tender del so pòpolo. (Ger. 3:15; 23:4) E Dio el ga realisà questa promessa dela meio maniera quando el ga mandà Gesù ala Tera. Dopo, Gesù el ga fato che ghen fusse ansiani par tender dei so dissìpoli nela congregassion. (Efe. 4:7, 8, 11) In questo stùdio, prima, ndaremo veder parché che Gesù l’è un bon pastor e come che i ansiani i pol far compagno a lu. Dopo, ndaremo veder arquante qualità e abilità che giuta i ansiani a deventar pastori meio. Anca, ndaremo veder le ricompense che un bravo pastor el ga quando el se interessa de verità nele piégore.

COSSA CHE I ANSIANI I POL IMPARAR DEL “BON PASTOR”?

3. Parché che Gesù l’è “el bon pastor”? (Gioani 10:11, 14)

³ Gesù el ga parlà de lu stesso come “el bon pastor”. (Ledi Gioani 10:11,b 14.c) Parché? Parché lu el amea tanto i so dissìpoli che lu el ga dato “la so vita par le piégore”. Gesù el ga dito: “Mi cognosso le me piégore, e le me piégore le me cognosse”. Lu el capia i problemi de cada un dei so dissìpoli, e el ga dito che el ghe daria forsa. (Mat. 11:28, 29) Par quela, lori i se sentia darente de Gesù e i se fidea in lu.

4-5. (a) Parché che Marta e Maria le ga domandà aiuto a Gesù? (b) Che sforso Gesù el ga fato par giutarle?

⁴ Nel capìtolo 11 de Gioani, vedemo come Gesù l’è stà un bon pastor quando l’è ndato catar Marta e so sorela Maria in Betània. So fradel Làsaro l’era morto fea pochi giorni, e lore le gavea bisogno del consolo de Gesù. Lu el amea tanto quela fameia. (Gio. 11:5) Marta e Maria fursi le ze restade disgustade parché Gesù el gavea assà Làsaro morir, ma le se fidea che Gesù ndaria consolarle in quel momento. Parché? Parché Gesù el restea tante volte nela casa de lori e lori i era tanto amighi. Quando i ansiani i fà compagno a Gesù e i ze amighi dei fradei e dele sorele, lori i ze boni de giutarli de pi.

⁵ Gesù el ga fato arquanti sacrifissi par giutar Marta e Maria. Par ndar a Betània, lu el ga bio de viaiar intorno de due giorni, e in quel viaio ghen’era perìcoli. Poco tempo vanti, el pòpolo de quela region gavea proà coparlo. (Gio. 11:8) Ma lu l’era disposto a far quel che ghe ocorea par giutar i so fradei e sorele. E l’è pròpio quel lì che i ansiani i fà par le piégore che le ga bisogno de aiuto.

6. Come che Gesù el ga consolà Marta?

⁶ Quando Gesù l’è rivà darente de Betània, Làsaro l’era morto fea belche quatro giorni. Marta la ghe ga domandà parché lu no l’era vegnesto prima par salvar el so fradel. (Gio. 11:21) Gesù el savea che ela la se sentia triste, e la ga giutada a pensar in quel che lu el ndaria far nel futuro par giutar so fradel. Gesù el ghe ga dito cossita par assarla sicura: “To fradel el tornarà a viver”. (Gio. 11:23) Alora, Gesù el ga scoltà con atension quel che Marta la ga dito e el ghe ga ricordà che Dio el ga el poder de ressussitar i morti. (Gio. 11:24, 25) Ancoi, i ansiani i incoraia i fradei quando li scolta con passiensa e li assa sicuri che i pol fidarse nele promesse de Dio.

7. Come che Gesù el se ga sentio quando el ga visto che la fameia e i amighi de Làsaro i era tristi? (Varda anca la stampa dela prima pàgina.)

⁷ Vanti de ressussitar Làsaro, Gesù el ga vardà le persone che le era intorno dela tomba. La sorela de Làsaro, Maria, e i altri i era drio piander. Come che Gesù el se ga sentio quando el ga visto quel lì? “Lu l’è restà tanto triste e disgustà”. E “el ga scominsià a piander”. (Gio. 11:33, 35) Che bel esémpio de meterse nel posto dei altri! Lu el sentia el dolor de lori nel so cuor. Quando le persone le ga visto quel lì, le ga capio che Gesù el se preocupea pròpio con lore. (Gio. 11:36) Un bon pastor el proa capir quel che i fradei e sorele i ze drio sentir. — Rom. 12:15.

8. Cossa che Gesù el ga fato par esser sicuro che ghen saria òmini che i ndaria tender dele so piegorete quando lu el ndesse al cielo?

⁸ Gesù el ga dato un bel esémpio de come esser un pastor amoroso e el ga insegnà i so dissìpoli a far compagno. Dopo dela so ressuression, Gesù el ga dito a Piero e ai altri apòstoli de seitar a tender dele so piégore. Gesù el ga assà ciaro che le so piégore le gavea bisogno de esser tendeste.d (Gio. 21:15-17) Piero no’l se ga mai desmentegà de quel che Gesù el ghe gavea dito. Ani dopo, lu el ga suplicà ai altri ansiani che i seitesse a tender de quele piegorete che le era pressiose par Gesù. — 1 Pie. 5:1, 2.

COSSA CHE UN ANSIANO EL POL FAR PAR ESSER UN BON PASTOR?

9. Parché che podemo dir che i pastori i ga una responsabilità tanto granda? (Ati 20:28)

⁹ El apòstolo Paolo el ga dito ai ansiani de Èfeso che tender dele piégore de Geovà l’era una granda responsabilità. (Ledi Ati 20:28.e) Ancoi, i ansiani i ga ricevesto la medèsima responsabilità. Un ansiano che el ga nome Davi el ga dito: “L’è come se Gesù el me disesse a mi: ‘Védito queste piegorete? Lore le ze mie, ma vui che te me giuti a ténderle.’” Questa la ze una responsabilità tanto granda. Dele volte, un ansiano el pol pensar che no l’è bon de consolar quei che i ga perso qualchedun nela morte, giutar quei che i ga una fede fiaca, o incoraiar quei che i ze deprimidi. (1 Tes. 5:14) L’è vera che i ansiani i sa che lori i ze boni de tender dei fradei sol parché Geovà el ghe dà la forsa. (Fil. 4:13) Ma cada ansiano el pol far meio le so abilità e qualità par esser un pastor cada volta pi bravo. Ndemo veder arquante de queste abilità e qualità.

10. Cossa che i ansiani i ga de far par tender ben dele piégore, e parché? (Proverbi 27:23 e la nota nela Bìblia in portoghese)

¹⁰ I ansiani i ga de cognosser ben le piégore. (Ledi Proverbi 27:23f e la nota nela Bìblia in portoghese.) Questo versìcolo el ga anca nantra tradussion: “Impara tuto quel che te pol sora le to piégore.”g L’è sicuro che ghen’è robe dei nostri fradei e sorele che no ne ocore saver, par quela no ghemo de domandarghe. (1 Pie. 4:15) Ma varda quel che ga dito David, che ghemo parlà vanti: “Prima, ne toca capir i problemi che i nostri fradei e sorele i ga. Dopo, podemo scòlier i testi giusti par giutarli.”

11. Come che i fradei e le sorele i se sente quando un ansiano li scolta con atension?

¹¹ I ansiani i ga de scoltar con atension. I ansiani sol i pol capir quel che i fradei e le sorele i ga pròpio de bisogno se lori li scolta. (Tia. 1:19) Varda quel che ga sucedesto con una sorela che ga nome Catherine. El so omo el ga abandonà ela e so fioi. Ela la dise: “I ansiani i me ga fato bone domande e i ga scoltà cada parola che mi go dito. Cossita, lori i me ga fato sentirme pressiosa, amada e valiosa. Questo me ga assà sicura che lori i volea capir del bon come che mi ero drio sentirme. L’era come se lori i proesse sentir el me dolor. Questa vìsita me ga mostrà che Geovà no’l me gavea abandonà.”

12. Come che i ansiani i pol doperar ben la Bìblia quando i fà vìsite par incoraiar i fradei?

¹² I ansiani i ga de doperar i testi giusti par cada persona. (Tito 1:7, 9) Dopo che un ansiano el capisse i problemi che i fradei i ze drio infrontar, lu el pol giutarli meio.h Un ansiano de nome Andrew el dise: “Mi proo mostrar ai fradei e le sorele testi dela Bìblia che li giute coi problemi che i ga. Tante volte, vao in serca de versìcoli dela Bìblia par meso del libro Princípios Bíblicos para a Vida Cristã.” Un ansiano speriente che el ga nome Elihú el dopera el medèsimo libro. Lu el dise: “Tante volte, vao in serca dele parole ‘Ansiedade’ e ‘Desânimo’ par pareciar le vìsite par i fradei, parché tanti de lori i ze drio infrontar questo tuti i giorni. E go catà tanti versìcoli par incoraiarli.” Catherine, che ghemo parlà vanti, la dise: “Un ansiano me ga ledesto Isaia 26:3. Mi e le me fiole ghemo ledesto queste parole tante volte. Questo testo ne ga giutà a darghene fora coi giorni pi bruti.”

13. Come che i ansiani i pol assar i fradei tranquili par parlar con lori? (Varda anca la stampa e el quadro “Tuti valtri sì fradei”.)

¹³ I ansiani no i ga de dar la idea che i ga massa de far par parlar coi fradei. Anca se Gesù el gavea tanto de far, lu sempre se tolea el tempo par parlar cole persone, anca coi toseti. (Luc. 18:15, 16) Cossa che podemo imparar? Un bon pastor no’l dà mia la idea che el ga sempre massa de far par parlar con qualchedun, sìpia un toseto o una persona pi vècia. Quando i ansiani i se tol el tempo par parlar coi fradei e sorele vanti o dopo dela riunion, anca se par poco tempo, i fradei i sentirà che lori i ze so amighi. Una sorela che la ga nome Lauren la ga dito: “Par mi l’è pi fàcile parlar con un ansiano che sempre me domanda come che la va e che me giuta sempre che mi go de bisogno. Alora, quando sucede un problema pi bruto, no go mia paura de parlar con lu, parché mi sò che el se importa con mi e el vol giutarme.”

14. Cossa che te ghè imparà cola speriensa de Juan?

¹⁴ I ansiani i ga de sempre mostrar amor ale piégore. Gesù el ga dito che tuti i saveria che semo so dissìpoli par meso del amor che dimostremo. (Gio. 13:35) Un ansiano l’è un vero pastor quando el ama le piégore de Geovà. Juan, che adesso l’è un ansiano, el ga ricevesto aiuto de un pastor amoroso. Lu el ga dito: “Quando go scominsià a studiar la Bìblia, ghen’era momenti che mi me sentia triste e no me sentia darente de Geovà. Ma el amor de un ansiano me ga giutà a seitar a studiar e a ndar ale riunion. El so amor me ga giutà a no far el sbàlio de assar Geovà. Come quel ansiano l’era tanto passiente e amoroso, go imparà che Geovà me ama e el me capisse, e questo me ga incoraià a mai desister.”

PARCHÉ CHE I ANSIANI I RESTA FELICI QUANDO I TENDE DELE PIÉGORE?

15. Parché che un ansiano el pol esser felice quando el tende dele piégore? (Ati 20:31, 35)

¹⁵ El laoro de un pastor no l’è sempre fàcile. Paolo el ga dito che el amor e la preocupassion cole piégore ghe fea vegner fora ansietà e dele volte gnanca el dormia de note. (2 Cor. 11:27, 28) Ma quando lu el pensea in tuto quel che el fea par i fradei e le sorele, lu el se ricordea de quel che Gesù el gavea dito: “Ghen’è de pi felicità in dar che in ricever.” (Ledi Ati 20:31,i 35.j) Javier, che l’è ansiano fà de pi de 30 ani, el ga dito: “Tender dei me fradei e sorele fà la me fede restar pi forte e me fà amar de pi a Geovà. Quando visito i fradei e le sorele, resto sicuro che Geovà el se importa con tuti quei che i lo ama e che i vol contentarlo.”

16. Parché che Paolo el se ga comparà a una mama?

¹⁶ Un bon ansiano el ama i fradei e le sorele cossita come una mare ama so fiol. Paolo el se ga comparà con una mare quando el se ga ricordà del laoro che el ga fato nela congregassion de Tessalònica. (1 Tes. 2:7, 8) Una mare la fà tanti sacrifissi par tender del so bambin, ma la sente anca tanta alegria. E cossita come una mare la se stima de veder so fiol vegner grando, Paolo el se stimea de veder che la fede de quei de Tessalònica la era drio cresser. (2 Tes. 1:3, 4) Ancoi, i ansiani che i dopera el so tempo e forsa par giutar i fradei i resta tanto contenti de veder che la so fede la cresse cada volta de pi. Miguel, el ansiano che el ga giutà Juan, che ghemo parlà vanti, el dise: “L’è stà tanto bel giutar Juan a far meio le so qualità, e adesso me stimo tanto de veder che lu l’è deventà un ansiano.”

17. Parché che te sì grato che Geovà el te ga dato ansiani?

¹⁷ Tuti noantri infrontemo dificoltà nela vita, ma semo tanto grati a Geovà che el ne ga dato boni pastori che i ne giuta. Lori i laora tanto par giutar i fradei e le sorele, e i se sforsa par far compagno a Gesù. Semo grati par i so sforsi de far meio le so qualità e abilità. Cossita, lori i pol darne boni consili, farne pi forti e consolarne. Lori i ze tanto pressiosi par noantri e par Geovà! — 1 Tes. 5:12, 13.