“Ovwan Che Nyo Kpahen Ifovwin”

“Omarẹ ẹgbukpe 60 re me vwọ niyẹnrẹn cha re, ifovwin re vrẹ 40 yen me niyenrẹn rọyen re. Me mrẹ ọke rẹ ofovwin ro sheri vwẹ uvwre rẹ United State vẹ Soviet Union vwọ gan mamọ vẹ ọke rẹ ofovwin na vwo re kpregede. Ẹkẹvuọvo me je rhe rua ẹnwan rọ gan te ọ rẹ ukpe ri 2025 jovwoo—kidie ẹkuotọ sansan yen e de phi ifovwin, jẹ ọnana se djobọte oseghe rẹ usuon rẹ akpọ na vwẹ idjerhe ra vwẹ ẹwẹn roroo.”—John Simpson, BBC world affairs editor.

Ihwo rua ẹnwan kpahen ifovwin re phiẹ vwẹ akpọ na eje. Kẹ ayen roro sẹ ifovwin na ghini se vwoba. Die yen Jesu yono avwanre?

Oborẹ Jesu yono avwanre

Jesu ta ota kpahen obo re phia vwẹ akpọ na nonẹna. Ọ vwẹ orhọesio vwọ kẹ idibo rọyen nẹ: “Ovwan che nyo kpahen ifovwin kugbe iyẹnrẹn rẹ ifovwin.”—Matiu 24:6.

Dede nẹ ifovwin vẹ ozighi rẹ avwanre mrẹ nonẹna nẹrhẹ ofu dje avwanre, ẹwẹn rẹ avwanre totọ fikirẹ iphiẹrophiyọ re avwanre vwori. Diesorọ? Kidie Jesu tare nẹ ifovwin buebun re phiẹ nonẹna, erọnvwọn efa re phia, kugbe erhare iruemu rẹ ihwo djephia vwẹ akpọ na, enana “oka” re che vwo vughe “okuphiyọ rẹ eyeren na.” (Matiu 24:3; Luk 21:7) Ọnana mudiaphiyọ nẹ ọke cha rẹ Jesu che vwo phioba phiyọ ofovwin. Vwẹ idjerhe vọ?

Oborẹ Jesu che ru

Vwẹ ọke rọ cha vwẹ obaro na, Jesu rọ dia Ovie rẹ Uvie rẹ Ọghẹnẹ, che “Phioba phiyọ ifovwin vwẹ akpọ na ejobi.”— Une rẹ Ejiro 46:9.

Wo se vwo yono kpobarophiyọ kpahen akpọ rẹ ufuoma nana, obo rọ cha phia wan vẹ oborẹ akpọ na cha dia vwẹ obaro na, se uyovwinrota na “Oborẹ Ofovwin vẹ Ozighi Egbe Che Vwo Vwoba.”