Ofovwin re Phiẹ Vwẹ Middle East—Die Yen Baibol na Ta Kpahọn?

Akpọ na eje ruẹ ẹnwan kpahen obo re phia vwẹ uvwre rẹ United States, Israel, vẹ Iran. Ẹdia na cha gan vrẹ obo rọ hepha ọ me hirhephiyọ ofovwin rode? Ihwo ri suẹn sa dobọrẹ ofovwin na ji je nẹrhẹ ufuoma ri bẹdẹ dia?

Ihwo re riẹn kpahen aroẹmrẹ ri Baibol se roro nẹ obo re phia vwẹ Middle East sa dia ọtonphiyọ rẹ Amagidọn rẹ ọbe Ẹvwọphia ta ota kpahen na.

Die yen Baibol na tare?

Ihwo ri suẹn che phioba phiyọ ofovwin re phiẹ vwẹ Middle East?

Baibol na tare nẹ: “Wọ vwẹ ẹro wẹn so isu-un, ọmọ rẹ ohwo, rọ vwo ọchuko ọvuọvo-o.”—Une rẹ Ejiro 146:3.

Vwọ kpahen ofovwin re phiẹ vwẹ Middle East na, avwanre riẹnre sẹ igọmẹti se ruo rere ufuoma vwọ diaa. Ẹkẹvuọvo, Baibol na djere fiotọ nẹ o vwo osun rẹ oseghe rẹ usuon, usuon rẹ ihworakpọ yẹrẹ ẹko rẹ ihwo vuọvo ri se phioba phiyọ ofovwin je ghwa ufuoma ri bẹdẹ rhee. Ọghẹnẹ ọvo yen se phioba phiyọ “ofovwin . . . re te oba rẹ akpọ na.”—Une rẹ Ejiro 46:9.

• Wọ da guọnọ evuẹ efa, se Uwevwin Orhẹrẹ ro vwo uyovwinrota na “Ofovwin Che Vwoba—Vwẹ Idjerhe Vọ?”

Ofovwin re phiẹ vwẹ Middle East na ru orugba rẹ aroẹmrẹ ri Baibol?

Baibol na tare nẹ: “Ovwan che nyo kpahen ifovwin kugbe iyẹnrẹn rẹ ifovwin. . . . Ẹkuotọ cha vwọso ẹkuotọ, uvie cha vwọso uvie.”—Matiu 24:6, 7.

Ofovwin re phiẹ vwẹ Middle East na ọyen oka ọfa nẹ avwanre yerẹn vwẹ “okuphiyọ rẹ eyeren na” rẹ Baibol na seri nẹ “oba rẹ ẹdẹ na.” (Matiu 24:3; 2 Timoti 3:1) Ifovwin rẹ avwanre mrẹ nonẹna, ọyen odjephia nẹ kẹrẹkpẹ Ọghẹnẹ che phioba phiyọ ofovwin kugbe erọnvwọn eje re sua ebẹnbẹn kẹ ihworakpọ.

• Wọ da guọnọ evuẹ efa, se uyovwinrota na “Die Yen Oka rẹ “Ẹdẹ re Koba na,” Yẹrẹ “Ọke rẹ Oba Na”?”

Amagidọn cha tonphiyọ vwẹ Middle East?

Baibol na tare nẹ: “Ayen de koko ayen kpo asan ra vwẹ Hibru se nẹ Amagidọn.”—Ẹvwọphia 16:16.

Ofovwin rẹ Amagidọn dia ofovwin rẹ usuon rẹ ihworakpọ phiẹ vwẹ Middle East naa. Ọyen ofovwin rẹ igọmẹti rẹ akpọeje vẹ Ọghẹnẹ che phi.

• Wọ da guọnọ evuẹ efa, se uyovwinrota na “Die Yen Ofovwin rẹ Amagidọn?”

Die yen sa nẹrhẹ ẹwẹn avwanre totọ vwẹ ọke rẹ ofovwin?

Baibol na tare nẹ: “Ovwan rua ẹnwan kpahan orọnvwọn vuọvo-o, ẹkẹvuọvo vwẹ erọnvwọn eje, womarẹ ẹrhovwo kugbe oyare kugbe akpẹvwẹ, ovwan rha ta ọdavwẹ rẹ ovwan kẹ Ọghẹnẹ.”—Filipae 4:6.

Jihovaa Ọghẹnẹ guọnọre nẹ avwanre nẹrhovwo rhe. Kidie nẹ Ọghẹnẹ vwo ọdavwẹ rẹ avwanre, o che nyo ẹrhovwo avwanre je cha avwanre uko vwo yeren ghene ẹnwan rẹ avwanre. (1 Pita 5:7) Idjerhe ọvo o vwo ruẹ ọtiọyen yen, ọ vwọ vwẹ ukẹcha kẹ avwanre vwọ riẹn oboresorọ ofovwin vwọ hẹrọ vẹ obo ro che vwo vwoba. Ọ je nẹrhẹ avwanre riẹn obo ro che vwo phioba phiyọ ọmiaovwẹ vẹ ojaẹriọ rẹ avwanre.—Ẹvwọphia 21:3, 4.

• Wọ da guọnọ evuẹ efa kpahen ukẹcha rẹ Ọghẹnẹ vwọ kẹ avwanre, se uyovwinrota na “Wọ Sa Mrẹ Eta rẹ Uchebro Vwẹ Baibol Na.”