Ọke vọ Yen Ohọnre na Che Vwo Vwoba?​—Die Yen Baibol na Tare?

United Nations Secretary-General António Guterres vwọ ta ota kpahan ofovwin rẹ Iran kpare vwọso Israel vwẹ Saturday, April 13, 2024, ọ da ta: “Ọnana yen ọke re vwo siobọ rẹ ohọnre na kpotọ ji vwo omaẹriẹnsuon.”

Ohọnre ra họnra vwẹ Middle East enẹna ghwa udje obo re phia vwẹ akpọ na eje.

“Ifovwin re phia vwẹ akpọ na enẹna pha buebun siẹrẹ a da reyọ vwọ vwanvwe e re phiare rhanvwe ofovwin rẹ akpọeje rivẹ, ifovwin nana djobọte ihwo ri bun te oduima ivẹ, kọyen o djobọte ohwo ọvo vwẹ asan rẹ ihwo ẹne hepha.”​—United Nations Security Council, January 26, 2023.

Evo usun rẹ ẹkuotọ re họnra nonẹna yen Israel, Gaza, Syria, Azerbaijan, Ukraine, Sudan, Ethiopia, Niger, Myanmar, vẹ Haiti.a

Ọke vọ yen ohọnre na che vwo vwoba? Isun rẹ akpọ na sa ghwa ufuoma rhe? Die yen Baibol na tare?

Akpọ na hẹ ẹdia rẹ ofovwin

Ifovwin re phia vwẹ akpọ na nonẹna ghwa odjephia nẹ ofovwin eje che vwoba kẹrẹkpẹ. Ifovwin nana ghwa orugba rẹ aroẹmrẹ ri Baibol kpahen ọke avwanre de yerẹn na. Baibol na sere “okuphiyọ rẹ eyeren na.”​—Matiu 24:3.

• “Ovwan che nyo kpahen ifovwin kugbe iyẹnrẹn rẹ ifovwin. . . . Ẹkuotọ cha vwọso ẹkuotọ, uvie cha vwọso uvie.”​—Matiu 24:​6, 7.

Se uyovwinrota na “Die Yen Oka rẹ “Ẹdẹ re Koba na,” Yẹrẹ “Ọke rẹ Oba Na”?” wọ mrẹ oborẹ ifovwin rẹ ọke nana vwọ dia orugba rẹ aroẹmrẹ ri Baibol na.

Ofovwin ro che phioba phiyọ ifovwin eje

Baibol na ta ota kpahen ọke ifovwin che vwo vwoba. Mavọ yen ọ cha phia wan? Ọ dia ẹgbaẹdavwọn rẹ ohworakpọọ, ẹkẹvuọvo womarẹ Amagidọn, “ofovwin rẹ ẹdẹ rode rẹ Ọghẹnẹ Ọromevwẹgba na.” (Ẹvwọphia 16:​14, 16) Ofovwin na de vwoba nu, Ọghẹnẹ ko che ru ive rọyen vwọ kẹ ihworakpọ gba womarẹ ọ cha vwọ kẹ ayen ufuoma ri bẹdẹ.​—Une rẹ Ejiro 37:​10, 11, 29.

Wo se vwo yono kpobarophiyọ kpahen ofovwin rẹ Ọghẹnẹ ro che phioba phiyọ ifovwin na eje, se uyovwinrota na “Die Yen Ofovwin rẹ Amagidọn?”