Inenikristi vẹ Ofovwin​—Die Yen Baibol na ta Kpahọn?

Kirobo rẹ avwanre mrẹre vwẹ ofovwin re phi vwẹ Ukraine, ilori rẹ ẹga buebun vuẹ ihwo nẹ ayen vwobọ vwẹ ofovwin. Vwo oniso rẹ ẹbẹre sansan rẹ ilori rẹ ẹga kare vwẹ ofovwin na:

• “Ọghọ vẹ akpẹvwẹ dia kẹ ituofovwin rẹ avwanre eje re họnra chochọ rẹ emotọ ri Ukraine vrabọ rẹ ivwighrẹn rayen . . . Ẹrhovwo ro nẹ otọ rẹ ubiudu rhe vẹ obicha rẹ avwanre vẹ ovwan herọ.”​—Metropolitan Epiphanius I ri Kyiv, kirobo ra niyẹnrẹn rọyen vwẹ The Jerusalem Post, March 16, 2022.

• “Osun rẹ ẹga rẹ ishọshi rẹ Orthodox vwẹ Russia vẹ isodje rẹ Russia ro aguare rẹ oghẹresan vwẹ ẹdidjana rode, o de phiuduphiyọ ayen awọ nẹ ayen chochọ rẹ ẹkuotọ rayen, ọ vwọ dianẹ ayen ọvo yen riẹn oborẹ ayen se vwo ru ọtiọyen rẹ ofovwin na je vwọ herọ na.”​—Reuters, April 3, 2022.

Ofori nẹ Inenikristi vwobọ vwẹ ofovwin? Die yen Baibol na tare?

Obo ri Baibol na ghene ta

Baibol na djerephia nẹ Inenikristi rẹ uyota vwobọ vwẹ ofovwi-in.

• “Phi ọlọkọ wẹn vwọ hẹ ako: kidie ohwo rọ nyavwe ohwo hwe, ọlọkọ ọ je wa kpo.”​—Matiu 26:52.

  Ohwo ro phi ofovwin yẹrẹ no nẹ ofovwin chọre-e ghene kerhọ ri Jesu?

• “Urhi ọkpokpọ mi ji kẹ ovwan nẹ, ovwan guọnọ ohwohwo; kirobo rẹ me guọnọ ovwan na rere ovwan je guọnọ ohwohwo rhe. Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.”​—Jọn 13:​34, 35.

  Ohwo ro biẹcha ofovwin dje oka rẹ ẹguọnọ ri Jesu tare nẹ ọyen e che vwo vughe idibo rọyen phia?

Vwọ kẹ evuẹ efa, se uyovwinrota na “Is War Compatible With Christianity?”

Inenikristi vẹ ofovwin nonẹna

Ọyen obo ri shephiyọ rẹ Inenikristi vwo jẹ obọ e vwo vwẹ ofovwin nonẹna? E. Baibol na mraro rọyen phiyotọ nẹ vwẹ ọke rẹ avwanre na rọ dia “ukuko rẹ ẹdẹ na,” o che vwo ihwo evo vwẹ ẹgborho na eje re “cha kpare ofovwi ọfa-a,” vwo nene obo ri Jesu yonori.​—Aizaya 2:​2, 4, eta rehẹ obotọ na.

• Se Uwevwin Orhẹrẹ na ro vwo uyovwinrota na “How Does God View War?” wọ sa vwọ mrẹ evuẹ efa.

Vwẹ ọmọke krẹn, Jihovaa rọ dia “Ọghẹnẹ rẹ ufuoma” na cha vwẹ Uvie rọyen rọhẹ odjuvwu vwo sivwin ihwo rọyen vwo “nẹ oshenyẹ vẹ ogbarogba.”​—Filipae 4:9; Une Rẹ Ejiro 72:14.

• Wọ sa vwọ riẹn obo ro che ruo wan, ni ividio na Die Yen Uvie rẹ Ọghẹnẹ?