OVWAN RA RHẸRẸ!
Irueru rẹ Ẹga vẹ Ofovwin vwẹ Ukraine—Die yen Baibol na Ta Kpahọn?
Ja fuẹrẹn oborẹ Ilori rẹ ẹga ri titiri ruẹ kpahẹn ofovwin rọhẹ Ukraine enẹna:
“Olori rẹ ẹga ri Russian Orthodox Church re se Patriarch Kirill, je rhe ta ota vuọvo kpahẹn ofovwin rẹ Russian kpare bru Ukraine ra na-a. . . . Ikuegbe rẹ efian rẹ ẹga rọyen ta kpahẹn Ukraine yen usun rẹ erọnvwọn ri Putin ghwobọ kpahen vwọ họnrọn Ukraine enẹna.”—EUobserver, March 7, 2022.
“Patriarch Kirill . . . ni ofovwin ri Russia phiẹ vwẹ Ukraine enẹna kirobo ri yovwirin, ọ tobọ rhọnvwe phiyọ—o dje ofovwin na phiyọ ohọnre vwọso umwemwu.”—AP News, March 8, 2022.
“Vwẹ Monday osun rẹ ẹga rẹ Orthodox Church vwẹ Ukrain re se Metropolitan Epiphanius I ri Kyiv, nẹrhovwo kẹ isodje rayen nẹ ‘ovwan họnre vwọso isodje ri Russia re kpare ofovwin rhe na’ . . . [Ọ] je tanẹ ọ dia umwemwu ayen vwo hwe isodje ri Russia-a.”—Jerusalem Post, March 16, 2022.
“Avwanre [Ukrainian Council of Churches and Religious Organizations (UCCRO)] hẹ obuko rẹ Isodje ri Ukrain vẹ otu ri biẹcha ovwan eje vwẹ ofovwin na, ovwan họnre vwo sivwin ẹkuotọ rẹ Ukraine, kidie ẹrhovwo avwanre che nene ovwan eje.”—UCCROa Statement, February 24, 2022
Die yen wo rorori? Ofori nẹ ẹga rọ vwẹ odẹ ri Kristi yan jiro kẹ inene rayen nẹ ayen kpo ofovwin? Die yen Baibol na tare?
Ikuegbe rẹ ẹga ri vwobọ vwẹ ofovwin
Ikuegbe djerephia nẹ ẹga rhọnvwan phiyọ ofovwin, ayen tobọ brẹ kẹ itu ri vwobọ vwẹ ofovwin ji titi ofovwin dede, ẹkẹvuọvo ayen mi me ru kerẹ ihwo re djonẹ rẹ ufuoma. Ikpe buebun re wanre na yen Iseri ri Jihova vwo djephia kẹ ihwo nẹ ẹga tiọyena dia ọ rẹ uyota-a. Roro kpahen idje evo vwe ẹbe rẹ avwanre
“The Crusades—A ‘Tragic Illusion’ ” dje obo rẹ Ẹga ri Fada ru te vwẹ ohwekufia re ruru vwẹ odẹ rẹ Ọghẹnẹ vẹ Jesu.
“Catholic Church in Africa” djudje rẹ ẹga re sa da obọ rẹ ifovwin jẹ-ẹ, ihwo evo tobọ vwobọ vwẹ ohwekufia rẹ ọsoso orere rọ kẹrẹ ayen dede.
Iyovwinreta nana “Is Religion to Blame?,” “Religion’s Role in Man’s Wars,” kugbe “Religion Takes Sides” djekpahen oborẹ Ilori rẹ ẹga rẹ Catholic, Orthodox, kugbe Protestant biẹcha tobonẹ tobonẹ rẹ ofovwin.
O fori nẹ Ẹga rẹ Inenikristi bicha ofovwin?
Obo ri Jesu yonori: “Guọnọ ọrivẹ wẹn kirobo wọ guọnọ oma wẹn.” (Matiu 22:39) Ovwan rha “guọnọ ivwighrẹ” rẹ ovwan.—Matiu 5:44-47.
Di roro: Ẹga ghene sa vwobọ sa udu nẹ ayen nene iji ri Jesu ro shekpahen ẹguọnọ jẹ ayen jiro kẹ ihwo rehẹ ẹga rayen nẹ ayen re hwe ihwo vwẹ ofovwin? Wọ sa mrẹ ẹkpahọnphiyọ na siẹrẹ wo de se iyovwinreta na “True Christians and War” vẹ “Is It Possible to Love One’s Enemies?”
Obo ri Jesu tare: “Uvie mẹ dia ọ rẹ akpọ nana-a; ọ dianẹ uvie mẹ ọ rẹ akpọ nana, manẹ idibo mẹ họnre, re de ji uvwe emuo.” (Jọn 18:36) “Kidie ohwo ro nyavwe ohwo hwe, ọlọkọ ọ je wa kpo.”—Matiu 26:47-52.
Di roro: Ọ da dianẹ ọ chọre Inenekristi vwọ họnre vwo sivwin Jesu nẹ abọ rẹ ivwighrẹn, o vwo emu ọfa ro se mu ayen vwọ họnre? Se uyovwinrota na “Is War Compatible With Christianity?” rere wọ mrẹ oborẹ Inenikristi rẹ ikpe ujorin rẹsosuọ nene udje vẹ iyono ri Jesu wan.
Die yen cha phia kẹ ẹga ri titi ofovwin?
Baibol yono avwanre nẹ Ọghẹnẹ cha sen ẹga ri mu odẹ ri Jesu yan jẹ ayen ruẹ nene iyono rọye-en.—Matiu 7:21-23; Taitọs 1:16.
Ọbe rẹ Ẹvwọphia djerephia nẹ Ọghẹnẹ cha yọnre ẹga tiọyena so ọbara rẹ “otu re hweri vwẹ akpọ na.” (Ẹvwọphia 18:21, 24) Wọ vwọ riẹn oboresorọ, se uyovwinrota na “What Is Babylon the Great?”
Jesu djerephia nẹ a cha ghwọrọ ẹga rẹ Ọghẹnẹ senre eje fikirẹ erharhe rẹ iruo rayen, kidie “Urhe kurhe rọ mọ emamọ esiri-i, ke she vwo mu erhanre.” (Matiu 7:15-20) Se uyovwinrota na “The End of False Religion Is Near!” wọ vwọ mrẹ oborẹ ọnana cha phia wan.
Ihwo ri vwo ifoto na, obohwẹre kpo obọnrhe: Ifoto rẹ Sefa Karacan/Anadolu Agency/Getty Images; Maxym Marusenko/NurPhoto via Getty Images
a Ẹga 15 ri kuomagbe vwọ dia ukoko re se UCCRO yẹrẹ Ukrainian Council of Churches and Religious Organizations nẹ ẹga rẹ Orthodox, Greek vẹ Roman Catholic, Protestant, kugbe Evangelical ọtiọyen jẹ ẹga ri Jew kugbe Muslim rhe.