Otọ rọ ya Vrẹka—Die Yen Baibol na ta Kpahọn?

“China niyẹnrẹn nẹ ukpe nana yen otọ ‘ma rhoro kparobọ,’ ọyen jẹ ma ya kparobọ vwẹ ọke uvo, vwẹ usun rẹ ivẹ rẹ phia wanre.”—The Guardian, September 7, 2022.
“Greater Horn of Africa tarọ phiyotọ nẹ ẹbẹre ọvo rẹ Africa cha rioja rẹ otọ rọ ya vrẹka vwẹ ọsoso ẹgbukpe iyorin.”—UN News, August 26, 2022.
“Ẹkẹn ivẹ rẹ ẹkẹn erha ri Europe yen hirharokuẹ imuoshọ rẹ otọ ọyaya, ọ họhọre nẹ ọnana yen cha ma bra kparobọ vwẹ usun rẹ e re phiare vwẹ ikpe 500 re wanre na.”—BBC News, August 23, 2022.

Ewena buebun tarọ phiyotọ nẹ Otọ ọyaya na cha rha ya je braphiyọ braphiyọ. Iphiẹrophiyọ herọ nẹ obaro na che yovwin? Die yen Baibol na tare?

Otọ ọyaya kugbe aroẹmrẹ ri Baibol

Baibol na ta obo re cha phia vwẹ ọke avwanre na:

“Owẹvwe che fi vwẹ asan buebu.”—Luk 21:11.

Otọ ọyaya ghwa ọkanrovwẹ rẹ emu cha. Ọkanrovwẹ rẹ emu tiọyena vẹ oja kugbe ughwu rọ sua, ghwa orugba rẹ aroẹmrẹ ri Baibol.—Ẹvwọphia 6:6, 8.

Oboresorọ rẹ otọ ọyaya vwọ braphiyọ

Baibol na vuẹ avwanrẹ iroro ọvo kiriguo, rọ dia oboresorọ otọ ọyaya vwo dje ẹphiẹphia. Ọ da ta:

“Ohwo sa vwẹ ogangan rẹ omobọ rọye kpọ oma rọye vi-i.”—Jerimaya 10:23.

Ọnana mudiaphiyọ nẹ ihworakpọ cha sa “kpọ oma [rayen] vi-i,” yẹrẹ sun omobọ raye-en. Ọke buebun na yen erhiẹn echọchọ rẹ ayen brẹ vwọ nẹrhẹ otọ na ya je ghwa ọkanrovwẹ rẹ ame cha.

Egberianriẹn evo rhọnvwere nẹ erọnvwọn rẹ ihworakpọ ruẹ nẹrhẹ ewene vwomaphia vwẹ aruọke na, e me rhe so imuoshọ kẹ akpọ na, ọnana me rhe nẹrhẹ otọ na ya vwẹ asan sansan vwẹ akpọ na.
Ihwo ri vwo urhuru ri ji vwo uruemu re vwo jẹ eroro kpahen obo ri che nẹ obuko rẹ orọnvwọn rhe gbọ irhe rehẹ eghwaghwo she, ji ruẹ erọnvwọn ri miovwo otọ vẹ ame yẹrẹ reyọ ekaukua rẹ Ọghẹnẹ mare vwẹ otọrakpọ na vwo ruiruo vwẹ idjerhe ri je fo, ọnana me rhe so ọkanrovwẹ rẹ ame.

Ẹkẹvuọvo, Baibol na kẹ avwanre iphiẹrophiyọ.

Iphiẹrophiyọ herọ kpahen obaro na?

Baibol na veri nẹ Ọghẹnẹ cha rhuẹrẹ ebẹnbẹn rẹ ọkanrovwẹ rẹ ame. Vwẹ idjerhe vo?

1. Ọghẹnẹ cha “ghwọrọ ọghwọrọ rẹ akpọ na.” (Ẹvwọphia 11:18) O che si irumwemwu rẹ dia evwurhuru re vwẹ uruemu rayen vwo miovwo akpọ na nọ, kidie ayen yen ru obo re ghwa ọkanrovwẹ rẹ ame vwọ cha.—2 Timoti 3:1, 2.
2. “Ehavwo re rhorha ki hirhe phihọ oku.” (Aizaya 35:1, 6, 7) Ọghẹnẹ cha rhuẹrẹ ebẹnbẹn rẹ otọ ọyaya sorọ phiyọ, o mi ru akpọ na hirhephiyọ iparadaisi rẹ ame cha dia.
3. “Wẹ ri nẹ akpọ na wọ me vwẹ ame ruọrhuọ, wẹ re nẹrhẹ oyovwi emu gangan.” (Une rẹ Ejiro 65:9) Womarẹ ebruphiyọ rẹ Ọghẹnẹ, akpọ na cha vọn vẹ omamo rẹ emu vẹ ame vwọ kẹ ihwo ejobi.