Vwẹ Akpọneje Aruọke na Rha Rhorha Vrẹn Obo ri Jovwo​—Die yen Baibol na tare?

Vwẹ uvwre ri July 2022, a niyẹnrẹn rẹ aruọke rọ rhorha vrẹn obo ri jovwo vwẹ akpọneje:

• “Ọna yen ọ vwọ gba abọ ivẹ rẹ China vwọ reyọ orhọesio vwọ kẹ ihwo nẹ aruọke rẹ irere ri joma te 70 cha rhorho vrẹn obo ri jovwo.”​—July 25, 2022, CNN Wire Service.

• “Kidie ẹkuotọ rẹ Europe eje, aruọke rayen rhoma rhorha vrẹn obo ri jovwo. Vwẹ ẹkuotọ buebun, erhanre ke rha torhẹ oghwaghwo rayen.”​—July 17, 2022, The Guardian.

• “Vwẹ Sunday rọ wanre na, aruọke rẹ irere buebun vwẹ United States rhe rhorho vrẹn obo ri jovwo.”​—July 24, 2022, The New York Times.

Die yen enana eje mudiaphiyọ? Enana eje re phia na cha nẹrhẹ ọ bẹn a vwọ dia otọrakpọ na? Die yen Baibol na tare?

A mraro rọyen phiyọ Baibol na nẹ oheri ọgangan cha dia?

E. Oheri ọgangan rọ vwomaphia vwẹ akpọneje na ghwe shephiyọ vẹ oborẹ Baibol tare nẹ ọ cha phia vwẹ ọke rẹ avwanre na. Kerẹ udje, Jesu mraro rọyen phiyotọ nẹ avwanre che rhiẹromrẹ “uguegue rode” yẹrẹ “erọnvwọn ra je mrẹ dẹvo-o kugbe i ri muoshọ.” (Luk 21:11; Good News Translation) Aruọke rọ rhorha vrẹn ẹka na ri nẹrhẹ oshọ mu ihwo nẹ ihworakpọ cha guọghọ otọrakpọ na.

Otọrakpọ na che hirhe phiyọ asan re che jẹ ẹdia?

Ẹjo. Ọghẹnẹ ma otọrakpọ na rere ihworakpọ sa vwọ dia bẹdẹ. (Une Rẹ Ejiro 115:16; Aghwoghwo 1:4) Ukperẹ ọ vwọ vwẹ uphẹn kẹ ihworakpọ nẹ ayen guọghọ akpọ na, ọ cha “ghwọrọ ọghwọrọ rẹ akpọ na” kirobo ro veri.​—Ẹvwọphia 11:18.

Roro kpahen oborẹ Ọghẹnẹ veri nẹ o che ru vwẹ otorakpọ na:

• “Aghwa na kugbe otọ ọyaya na ke cha ghọghọ, aton na cha ghọghọ ro de di ẹbe gbidigbidi; kerẹ igbodigbo.” (Aizaya 35:1) Ọghẹnẹ cha rhọnvwe nẹ otọrakpọ na hirhe phiyọ ato-on. Ukperẹ ọtiọyen, ọ cha rhuẹrẹ ẹbẹre sansan rẹ akpọ na ra guọghọ totọ na.

• “Wẹ ri nẹ akpọ na wọ me vwẹ ame ruọrhuọ, wẹ re nẹrhẹ oyovwi emu gangan.” (Une Rẹ Ejiro 65:9) Ọghẹnẹ che ru akpọ na phiyọ paradaisi.

Wọ da guọnọ yono evuẹ efa kpahen orugba rẹ aroẹmrẹ ri Baibol ro shekpahen ewene vwẹ aruọke na, se uyovwinrota na “Climate Change and Our Future​—What the Bible Says.”

Wọ da guọnọ yono evuẹ efa kpahen ive ri Baibol rọ tare nẹ a cha rhoma rhuẹrẹ otọrakpọ na, ni uyovwinrota na “Who Will Save the Earth?”