گواہی دینے کے کام میں اپنی مہارتوں کو نکھاریں—‏بات‌چیت شروع کرنے میں پہل کریں

یہ مہارت پیدا کرنا ضروری کیوں ہے؟‏ جب ہم گھرگھر مُنادی کرتے ہیں تو اکثر بہت سے لوگ ہمیں گھر پر نہیں ملتے۔ لیکن ہو سکتا ہے کہ اِن لوگوں سے ہماری ملاقات دوسرے موقعوں پر ہو جائے جیسے کہ بس یا ٹرین میں سفر کے دوران، کسی کلینک پر اپنی باری کا اِنتظار کرتے وقت یا پھر کام پر یا سکول میں وقفے کے دوران۔ یہوواہ خدا چاہتا ہے کہ سب لوگوں تک بادشاہت کی خوش‌خبری پہنچے۔ (‏1-‏تیم 2:‏3، 4‏)‏ لیکن لوگوں کو گواہی دینے کے لیے اکثر ہمیں بات‌چیت شروع کرنے میں پہل کرنی پڑتی ہے۔‏

آپ کیا کر سکتے ہیں؟‏

سوچ‌سمجھ کر اِنتخاب کریں کہ آپ کس سے بات کریں گے۔ کیا آپ کو لگتا ہے کہ جس شخص سے آپ بات کرنا چاہتے ہیں، وہ خوش‌مزاج ہے اور آپ کی بات سنے گا؟ کیا ماحول ایسا ہے کہ آپ اُس سے سکون کے ساتھ بات کر سکتے ہیں؟ بعض مبشر جب کسی سے بات کرنا چاہتے ہیں تو وہ پہلے اُس کی طرف دیکھ کر مسکراتے ہیں۔ اگر دوسرا شخص بھی اُنہیں دیکھ کر مسکرائے تو پھر وہ بات‌چیت شروع کرنے کی کوشش کرتے ہیں۔‏
اگر آپ بات شروع کرنے سے گھبرا رہے ہیں تو دل میں چھوٹی سے دُعا کریں۔—‏نحم 2:‏4؛‏ اعما 4:‏29‏۔‏
ایک سادہ سے جملے سے بات‌چیت شروع کریں جیسے کہ سلام دُعا لینے سے۔ یسوع مسیح نے سامری عورت کے ساتھ بات‌چیت کا آغاز بادشاہت کے پیغام سے نہیں کِیا تھا۔ (‏یوح 4:‏7‏)‏ بعض اوقات ہم کسی کو داد دینے سے گفتگو شروع کر سکتے ہیں، مثلاً آپ والدین سے کہہ سکتے ہیں کہ ”‏آپ کے بچے بہت تمیزدار ہیں۔“‏ آپ کوئی سوال پوچھنے سے بھی بات‌چیت شروع کر سکتے ہیں جیسے کہ ”‏کیا آپ نے رات کو ٹی‌وی پر فلاں خبر سنی تھی؟“‏
جب بات‌چیت شروع ہو جائے تو اِس کا رُخ خوش‌خبری کی طرف موڑنے کی کوشش کریں مگر جلدبازی سے کام نہ لیں۔ گفتگو کو اپنے آپ آگے بڑھنے دیں۔ شاید آپ کوئی ایسی بات کہہ سکتے ہیں جس سے اُس شخص میں تجسّس پیدا ہو جائے اور وہ مزید جاننے کے لیے آپ سے سوال پوچھنے لگے۔ مثال کے طور پر اگر آپ گھریلو زندگی کے بارے میں بات کر رہے ہیں تو آپ کہہ سکتے ہیں:‏ ”‏مَیں نے بچوں کی پرورش کے بارے میں ایک بہت ہی اچھی بات پڑھی ہے۔“‏ اگر آپ کسی حالیہ خبر کے بارے میں بات کر رہے ہیں تو آپ کہہ سکتے ہیں:‏ ”‏اکثر ہمیں بُری خبریں ہی ملتی ہیں لیکن حال ہی میں مَیں نے ایک بہت اچھی خبر پڑھی ہے۔“‏ اگر گواہی دینے سے پہلے ہی بات‌چیت ختم ہو جاتی ہے تو بے‌حوصلہ نہ ہوں۔‏
اپنے پاس پرچے یا کتابیں اور رسالے رکھیں جو آپ دلچسپی رکھنے والے لوگوں کو دے سکتے ہیں۔‏

اِس مہینے یہ کریں:‏

غیرمنظم گواہی دینے کے لیے ہر ہفتے کم‌ازکم ایک بار کسی کے ساتھ بات‌چیت شروع کرنے میں پہل کریں۔‏