کہانی نمبر ۸۶
ایک چمکدار ستارہ
کیا آپ کو تصویر میں ایک بہت ہی چمکدار ستارہ نظر آ رہا ہے؟ دیکھیں، ایک آدمی اُس کی طرف اشارہ کر رہا ہے۔ یہ آدمی ایک ایسے ملک سے آئیں ہیں جو شہر یروشلیم سے بہت دُور ہے۔ وہ نجومی ہیں اور ستاروں کا علم رکھتے ہیں۔ اِن نجومیوں کو لگتا ہے کہ یہ ستارہ اُن کو ایک اہم شخص کے پاس لے جائے گا اِس لئے وہ اِس کے پیچھے پیچھے چل رہے ہیں۔
جب نجومی یروشلیم پہنچے تو اُنہوں نے لوگوں سے پوچھا: ”وہ بچہ کہاں ہے جو یہودیوں کا بادشاہ بنے گا؟“ اسرائیلیوں کو یہودی بھی کہتے ہیں۔ نجومیوں نے کہا: ”جب ہم اپنے ملک میں تھے تو ہم نے اِس بچے کا ستارہ دیکھا تھا۔ ہم اِس بچے کو سجدہ کرنے کے لئے آئے ہیں۔“
اُس وقت ہیرودیس شہر یروشلیم کے بادشاہ تھے۔ جب اُنہوں نے نجومیوں کی بات سنی تو وہ بہت پریشان ہو گئے۔ وہ نہیں چاہتے تھے کہ کوئی اَور شخص اُن کی جگہ بادشاہ بنے۔ اِس لئے اُنہوں نے سردارکاہنوں کو بلایا اور اُن سے پوچھا کہ ”یہودیوں کا بادشاہ کہاں پیدا ہوگا؟“ اُنہوں نے جواب دیا: ”پاک کلام میں لکھا ہے کہ وہ بیتلحم میں پیدا ہوگا۔“
پھر بادشاہ ہیرودیس نے نجومیوں کو بلایا اور کہا: ”جائیں، اُس بچے کو ڈھونڈیں۔ جب وہ آپ کو مل جائے تو مجھے خبر دیں۔ مَیں بھی جا کر اُس کو سجدہ کروں گا۔“ لیکن یہ جھوٹ تھا کیونکہ اصل میں بادشاہ ہیرودیس اُس بچے کو مار ڈالنا چاہتے تھے۔
جب نجومی یروشلیم سے روانہ ہوئے تو اُن کو پھر وہی چمکدار ستارہ نظر آیا۔ یہ ستارہ اُن کے آگے آگے چلا اور اُن کو بیتلحم لے گیا۔ پھر ستارہ اُس گھر کے اُوپر رُک گیا جہاں یسوع رہتے تھے۔ نجومی گھر کے اندر گئے اور مریم اور یسوع سے ملے۔ اُنہوں نے یسوع کو بہت سارے تحفے دئے۔ بعد میں یہوواہ خدا نے نجومیوں کو خواب میں کہا: ”ہیرودیس کے پاس واپس مت جانا۔“ اِس لئے نجومی دوسرے راستے سے اپنے ملک واپس چلے گئے۔
جب بادشاہ ہیرودیس کو پتہ چلا کہ نجومی واپس اپنے ملک چلے گئے ہیں تو اُن کو بہت غصہ آیا۔ اُنہوں نے حکم دیا: ”بیتلحم میں اُن سب لڑکوں کو مار ڈالو جو دو سال کے ہیں یا اِس سے چھوٹے ہیں۔“ لیکن یہوواہ خدا نے یوسف کو ایک خواب میں پہلے سے یہ بتا دیا کہ ”ہیرودیس، یسوع کو مارنا چاہتا ہے۔ اِس لئے یسوع اور مریم کو لے کر مصر چلے جاؤ۔“ یوسف نے ایسا ہی کِیا۔ بعد میں جب یوسف کو پتہ چلا کہ بادشاہ ہیرودیس مر گئے ہیں تو وہ مریم اور یسوع کو لے کر اپنے ملک آ گئے اور شہر ناصرت میں رہنے لگے۔ یسوع اِسی شہر میں بڑے ہوئے۔
آپ کے خیال میں چمکدار ستارہ کس کی طرف سے تھا؟ یاد ہے، یہ ستارہ نجومیوں کو پہلے کہاں لے کر گیا تھا؟ وہ اُن کو یروشلیم لے گیا تھا جہاں بادشاہ ہیرودیس رہتے تھے۔ اصل میں شیطان چاہتا تھا کہ یسوع مر جائیں۔ اُس کو پتہ تھا کہ بادشاہ ہیرودیس، یسوع کو جان سے مارنے کی کوشش کریں گے۔ اِس سے پتہ چلتا ہے کہ چمکدار ستارہ شیطان کی طرف سے تھا۔
متی ۲:۱-۲۳؛ میکاہ ۵:۲۔