Mahana tairururaa taa ê: te porotarama apî

E niu bibilia papu to te tumu parau o te mahana tairururaa taa ê no te matahiti taviniraa i mua nei: “E auraro atu outou i te Atua. E patoi atu i te Diabolo.” (Iak. 4:7) E aˈoraa paari mau â tera i to tatou tau fifi! No te mea e auraro tatou i te mau faaueraa a te Atua e faaruru ïa tatou i te mau aroraa a Satani. E haapii mai te tairururaa ia tatou nafea ia mau maite i mua i te mau opuaraa a te Diabolo e haaparuparu i to tatou faaroo. Eaha te tahi mau faufaa pae varua ta tatou e fanaˈo?

I roto i te oreroraa parau “A auraro i te Atua ei melo utuafare,” e faaite mai te tiaau haaati nafea ia haapuai i to tatou utuafare ia patoi atu i te mau faaheporaa a te ao. E faataa mai te taeae orero ratere i roto i ta ˈna oreroraa parau matamua, “Te auraa e patoi atu i te Diabolo,” no te aha e nafea ia patoi uˈana ˈtu ia Satani o te imi i te faaino i to tatou ea pae varua. No te feia apî iho â râ e piti tuhaa, e tia atoa hoi ia ratou ia vai ara i te mau raveraa a te Diabolo. Ua faarue e rave rahi Kerisetiano e mau taata paari i teie mahana i te mau hinaaro o te ao a vai apî noa ˈi ratou. Mea au na tatou i te faaroo vetahi o ratou ia paraparau mai no nia i te reira.

Te auraroraa i te feia mana, no te mau taata atoa ïa. No reira, e vauvau mai te taeae orero ratere, i roto i te oreroraa parau hopea, e maha tuhaa e tia ˈi ia tatou ia auraro i te Atua: (1) i te mau faatereraa; (2) i roto i te amuiraa; (3) i roto i ta tatou mau ohipa i roto i te ao; (4) i roto i te utuafare. Tera te hoê haapiiraa e au ia faaohipahia!

Ia faaara oioi te feia e hinaaro ra e bapetizo i taua tairururaa ra i te tiaau peretiteni o ta ratou amuiraa. E faanaho anaˈe i te haere mai i te tairururaa taatoa e e tapao anaˈe i te taio mahana i nia i ta tatou tarena. E hopoi mai to tatou auraroraa mure ore ia Iehova i te mau maitai mure ore.