Mahana tairururaa taa ê: te porotarama apî
“Ei taata paari outou i te puai maramaramaraa,” tera te tumu parau o te mau mahana tairururaa taa ê e tupu mai te avaˈe Setepa 2000 atu. (Kor. 1, 14:20) No te aha tatou e faufaahia ˈi ia tae mai tatou? Te ora nei tatou i roto i te hoê ao tei î roa i te ino. No te patoi i te reira, e tia ia tatou ia faahotu i to tatou puai maramaramaraa pae varua ia vî te ino ia tatou maoti te maitai. O ta te mahana tairururaa taa ê ïa e tauturu ia tatou ia rave.
I te rururaa matamua, e vauvau te tiaau haaati i te tumu parau ra “Te tahi mau tauturu no te riro ei taata paari i te puai maramaramaraa i te Bibilia.” E faaite mai oia nafea ia mau papu i roto i te faaroo Kerisetiano. I roto i te oreroraa parau “A paruru i to outou huru pae varua ma te faaohipa i to outou puai feruriraa,” e haamataratara te taeae orero ratere e mea faufaa ia faaohipa i te mau faaueraa tumu Bibilia no te faahotu i to tatou haroaroaraa.
E tia atoa i te feia apî ia faaohipa i to ratou puai maramaramaraa. O te reira te vauvauhia i roto i te mau tuhaa ra “No te aha ei tamarii aruaru i te ino” e “Te feia apî i noaa te maramarama i teie iho nei.” A faaroo i te tahi feia apî ia faataa nafea ratou e haapuai ai ia ratou i te pae varua no te tinai i to ratou hinaaro e tamata i te mau ohipa viivii matauhia i roto i te ao e no te ape i te mau haafifiraa.
Nafea ia ite i te oaoa rahi roa ˈˈe? Na te taeae orero ratere e faataa mai i te reira i roto i te oreroraa parau hopea “Te faufaaraa ia faaohipa i te mau faaueraa tumu Bibilia ma te maramarama.” E horoa mai oia i te tahi mau hiˈoraa o te faaite e e tauturu te faaohiparaa i te Parau a te Atua ia tatou ia faaruru i te mau fifi, ia rave i te tahi mau faaotiraa e ia haafaufaa roa i ta Iehova e haapii ra ia tatou.
Te feia e hinaaro e faataipe i ta ratou euhe i te Atua na roto i te bapetizoraa i roto i te pape i taua tairururaa ra, e faaite oioi atu ïa ratou i te tiaau peretiteni. Ia faaarahia mai te taio mahana o te tairururaa taa ê, a tapao i te reira i nia i ta outou tarena e a rave i te mau faanahoraa taa maitai ia fanaˈo outou i taua porotarama haamaitai mau ra. Eiaha tatou e mairi i te hoê noa ˈˈe tuhaa o ta tatou tairururaa! E faaitoito mai te reira ia faaoromai tatou i te faanahoraa ino e ia ore e taiva ia Iehova.