E haapii anaˈe ia vetahi ê e eaha ta te Atua e titau ra ia tatou
1 Mea rahi â te taata o tei ore ‘i faaroo aˈenei i te parau a Iehova.’ (Amo. 8:11) Te tiaturi nei vetahi e te vai ra te hoê Atua tera râ, aita ratou i ite i ta ˈna mau opuaraa e i ta ˈna mau titauraa. No reira, e tia ia tatou ia haapii ia ratou i te parau mau faaora o te Basileia. Mai te peu e te vai ra ta tatou mauhaa e ua ineine tatou i te faaite i te poroi i te mau taime atoa, e farerei ïa tatou i te mau taata e hinaaro e haapii e eaha ta te Atua e titau ra ia tatou.
2 I te mau avaˈe Eperera e Me, e opere tatou i Te Pare Tiairaa e i te A ara mai na! o te vauvau i te mau tumu parau tano maitai. Hau atu, e pûpû tatou no te taime matamua i te vea iti ra Eaha ta te Atua e titau ra ia tatou? Na roto i ta ˈna mau hohoˈa nehenehe mau e ta ˈna mau uiraa o te haaferuri, e tano ïa oia no te mau taata e rave rahi. Teie vetahi mau manaˈo no te tauturu ia tatou ia faaohipa maitai i teie mau vea.
3 E imi anaˈe i te taata: I roto i te mau tuhaa fenua i reira aita te mau taata i ǒ ratou ia poro anaˈe tatou na te mau fare, e mea tano aˈe paha ia imi ia ratou e ia paraparau atu ia ratou noa ˈtu e teihea roa ratou. Ua faaitoito mai te tumu parau hau o Te taviniraa o te Basileia no Setepa 1996 ia tatou, ia poro i te parau apî maitai na te mau vahi atoa: na nia i te aroâ, i nia i te mau faurao huiraatira, i roto i te mau aua faafaaearaa, i te mau vahi tapearaa pereoo e i te mau vahi tapihooraa. Ua haamatara atoa teie tumu parau i te faufaaraa ia imi i te mau ravea no te poro i te taime faanaho-ore-hia e te amuiraa. Ei hiˈoraa, ua haere atu te hoê tuahine pionie i te hoê aua animala e te tahi mau A ara mai na! o te 8 no Atete 1996 (Farani) teie hoi te upoo parau “Te mau animala e mou: no te aha e tapitapi ai?” I roto i te hoê noa hora, ua opere oia e 40 vea na te mau taata mea au na ratou te animala! Ua noaa aˈena anei ia tatou i te mau faahopearaa maitatai, na roto i te pororaa i te parau apî maitai na te mau vahi atoa? Ua tano maitai Te Pare Tiairaa, te A ara mai na! e te vea iti ra Titau, no te mau huru raveraa atoa no te faaite i te poroi, no te mea no nia ta ratou mau tumu parau i te oraraa o te taata, e te turai nei hoi ia feruri.
4 E haamata anaˈe i te mau aparauraa: Te horoa ra te api hopea o Te taviniraa o te Basileia no Atopa 1996, i te mau haamaramaramaraa papu maitai e faataa ra e nafea ia faaineine i ta tatou iho faaiteraa o Te Pare Tiairaa e te A ara mai na! E tano atoa teie mau manaˈo no te faaineineraa i te tahi faaiteraa no te vea iti ra Titau. E nehenehe tatou e haapoto noa i te parau, tau pereota noa, aore ra e faaroa ˈtu â no te faaite i te hoê manaˈo no roto mai i te hoê irava o te mau Papai. E mea faufaa ia maiti maitai i te mau parau matamua, no te mea na te reira paha e turai i te taata ta tatou e paraparau atu, ia faaroo mai i ta tatou parau aore ra eita. Te manuïa nei vetahi na roto i teie omuaraa parau: “Ua taio vau i te hoê tumu parau o tei faaitoito ia ˈu e te hinaaro nei au e faaite atoa ˈtu ia oe.” E nehenehe atoa tatou e faahiti i te hoê uiraa anaanatae no te faaô mai i te taata i roto i te aparauraa.
5 I roto i ta tatou mau faaiteraa no teie nei avaˈe, mai te peu e e tano ia na reira i roto i ta tatou tuhaa fenua, e nehenehe tatou e tamata i te ui i te mau uiraa mai teie te huru:
◼ “I teie mahana, te ite-pinepine-hia nei te mau papaipairaa i nia i te pǎpai, te mau pehu e te haaviiviiraa. Eaha te tia ia ravehia no te tamâ i te fenua e no te haamaitai i to tatou vahi nohoraa?” E vaiiho tatou i te taata ia pahono mai e i muri iho, e faataa ˈtu tatou e ua ite papu tatou e mea nafea e afea râ te fenua taatoa e riro mai ai ei aua rahi nehenehe. E faaite tatou i roto i te hoê o te mau vea apî i te hoê parau papu maitai, te hoê irava e i te hoê hohoˈa anaanatae mau, e e pûpû atu tatou i teie vea ia taio oia. Hou tatou e faaoti ai i te aparauraa, e tamata anaˈe i te faaau atu e hoˈi mai e farerei i te taata.
◼ “I to oe manaˈoraa, ua opua anei te Atua e ia roohia tatou i te mau fifi mai ta tatou e farerei nei i teie mahana?” Ia pahono mai te taata, e nehenehe tatou e parau atu e: “Peneiaˈe ua ite oe i te pure ta Iesu i haapii i ta ˈna mau pǐpǐ, i reira to ˈna aniraa e ia tae mai te Basileia o te Atua. Ua feruri anei oe e eaha mau na te Basileia o te Atua?” E iriti anaˈe i te vea iti ra Titau i te haapiiraa 6 e e taio atu tatou i te mau uiraa i faahitihia i te omuaraa o te haapiiraa. I muri iho, ia taio tatou i te paratarapha 1, e huti tatou i te ara-maite-raa o te taata i nia i te pahonoraa i te uiraa matamua. E faaite anaˈe e mea poto atoa te pahonoraa i te tahi atu mau uiraa. E pûpû tatou i te vea iti e e ani atu tatou i te taata e hoˈi mai no te faahohonu atu â i te aparauraa no nia i te Basileia.
◼ “Mea rahi te taata e feruri nei o te ite nei e, o te mau haapaoraa o te ao nei te tumu o te mau fifi e farereihia nei e te taata, aita râ ratou e imi ra i te mau ravea. Eaha to oe iho manaˈo?” I muri aˈe i to tatou faarooraa i te manaˈo o te taata, e faataa ˈtu tatou i te tahi parau no roto i te hoê vea apî e nehenehe e faaara i to ˈna anaanatae no nia i te manuïa-ore-raa o te haapaoraa, aore ra to ˈna toparaa e fatata maira. E ani atu tatou e e hinaaro anei oia e taio i te vea. E horoa ˈtu tatou i to tatou iˈoa e e ani atu tatou i to ˈna, e e faaau atu tatou no te haere mai e hiˈo ia ˈna no te faataa ˈtu e eita te haapaoraa mau e faaino i te huitaata nei.
◼ “No te mau fifi e rave rahi e roohia nei i nia i te utuafare fetii, aita anei oe i aniani aˈenei e eaha te ravea e itehia ˈi te oaoaraa i roto i te utuafare?” E vaiiho tatou i te taata ia pahono mai e e faaite atu tatou e te faaite ra te Atua i roto i te Bibilia, i te ravea mau e itehia ˈi te oaoaraa i roto i te utuafare. Peneiaˈe e nehenehe tatou e taio i te Isaia 48:17. I muri iho, e iriti tatou i te vea iti ra Titau i te haapiiraa 8 e e haamatara tatou i te tahi mau irava Bibilia e faahitihia ra, e horoa ra i te mau aˈoraa e tano ia apeehia no te mau melo tataitahi o te utuafare. E taio tatou i te mau uiraa e faahitihia ra i te omuaraa o te haapiiraa. E ani tatou i te taata mai te peu e e hinaaro anei oia e taio i te mau pahonoraa. E faaau atu e hoˈi mai e hiˈo ia ˈna no te paraparau â no nia i te mau aˈoraa tano maitai a te Bibilia no te hoê oraraa utuafare oaoa.
6 Ua faaitoito mai te tumu parau hau o Te taviniraa o te Basileia no Mati 1997 ia tatou, ia itoito â i te raveraa i te mau hoˈi-faahou-raa e farerei. Ua faaitoitohia mai tatou ia faaohipa i te vea iti ra Titau no te haamata i te mau haapiiraa Bibilia mai te peu e e nehenehe i te farereiraa matamua, aore ra i te hoˈi-faahou-raa e farerei. Te hiaai rahi roa ˈˈe o te huitaata nei, o te haapiiraa ïa e eaha ta te Atua e titau ra ia tatou e, i muri iho, e faaohipa ˈtu ai. (Kol. 1:9, 10) E tauturu rahi tatou i to tatou taata-tupu i te mau avaˈe Eperera e Me, mai te peu e e haamata tatou i te haapii atu ia ˈna i te mau mea o ta tatou i ite no nia i te mau titauraa a Iehova no te ora.—Kor. 1, 9:23.