E poro anaˈe i te parau apî maitai o te Basileia maoti te mau vea iti
1 Auê te oaoa e, i te iteraa i te parau mau e te riroraa ei feia poro itoito o te parau apî maitai! Te hiaai uˈana nei te feia aita i roto i te faanahonahoraa a te Atua e faaroo i te parau apî maitai o te Basileia. Ua faataa-ohie-hia te parau mau no nia i te Basileia i roto i te mau vea iti ra E oaoa oe i te fenua e a muri noa ˈtu! “Inaha, te faaapî nei au i te mau mea atoa nei” e Te faatereraa o te haamau i te Paradaiso. Te faataa nei teie mau vea iti, mai te huru ra e to reira tatou, i te oraraa i nia i te fenua nei i raro aˈe i te faatereraa a te Basileia o te Atua e, ia au i te haamaramaramaraa a Ta ˈna Parau, te aratai nei te reira i te feia taio i te mau mea mau o te Basileia. Parau mau, te vaiihoraa i te hoê vea iti na te tahi taata o te anaanatae ra, e haamataraa noa ïa. (Kor. 1, 9:23) E hoˈi oioi anaˈe e hiˈo i te mau taata atoa tei farii i te hoê vea iti, ma te tapao e pûpû atu i te hoê haapiiraa maoti te buka ra Te ite e aratai i te ora mure ore. Nafea ïa tatou ia na reira i te avaˈe Atete?
2 E nehenehe e pûpû i te vea iti ra “E oaoa oe i te fenua e a muri noa ˈtu!” i muri aˈe i te hoê omuaraa parau poto. Teie ta tatou e nehenehe e parau ma te faaite atu i te api matamua:
◼ “Te hinaaro nei au e faaite atu ia oe i te tahi mea e poroi nehenehe roa to roto.” A iriti i te vea iti E oaoa e a muri noa ˈtu e a taio i te paratarapha matamua o te omuaraa parau. A parau i muri iho: “Te pahono atoa ra teie vea iti i te uiraa [a taio i te upoo parau iti i nia mai i te hohoˈa n° 8], ‘No te aha te taata e pohe ai?’ E ite oe e mea anaanatae roa ia hiˈopoa i te mau hohoˈa e ia taio i te mau irava tei horoahia ei faahororaa i roto i teie vea iti. Mai te peu e e hinaaro oe, e nehenehe oe e rave i teie vea iti no te hoê tino moni e 40 tara.”
3 Eaha ta tatou e parau ia hoˈi tatou e hiˈo i te hoê taata tei farii i te vea iti ra “E oaoa e a muri noa ˈtu”? E nehenehe tatou e tamata i teie omuaraa parau:
◼ A faaite i te hohoˈa n° 49 o te vea iti ra E oaoa e a muri noa ˈtu e a ani e: “E hohoˈa nehenehe mau â teie, e ere anei? [A faaroo i te pahonoraa.] O te vea iti ïa ta ˈu i vaiiho mai i te taime i mairi aˈenei. Te hinaaro nei au e ui atu ia oe i te uiraa i te api i muri iho.” A taio i te uiraa o te hohoˈa n° 50: “‘Te hinaaro ra anei oe e ora e a muri noa ˈtu i roto i teie paradaiso nehenehe?’ [A vaiiho i te taata ia pahono.] Mai te peu e te reira iho â to oe hinaaro, a hiˈo na i te mea te tia ia oe ia rave: ‘A haapii hau atu â ïa oe i ta te Atua e parau nei.’ [A taio Ioane 17:3.] E oaoa ïa vau i te haapii e o oe i te Bibilia ma te tamoni ore. Eaha to oe manaˈo?” A faanaho i te hoê taime farereiraa papu.
4 Mai te peu e e pûpû tatou i te vea iti ra “Inaha, te faaapî nei au i te mau mea atoa nei,” e nehenehe ta tatou e faaite i te hohoˈa o te api matamua ma te hohora roa i te vea iti e ma te parau e:
◼ “I to oe manaˈoraa, eaha te tia ia rave ia riro te fenua taatoa mai teie te huru?” A faaroo i te pahonoraa. A haamatara i te tahi mau huru faufaa o te hohoˈa i faahitihia i te api 3. A parau i muri iho: “Te manaˈo nei te rahiraa o te mau taata e eita e nehenehe e taui taatoa i te ao nei. E nehenehe râ ta te Atua. [A tatara i te paratarapha 43; e a taio i muri iho i te Isaia 9:6, 7.] Ua tǎpǔ te Atua e e haamau oia i te hoê ao apî, te hoê paradaiso nehenehe i reira te mau taata no te mau nunaa atoa e ora ˈi. Te hinaaro nei au ia taio oe i teie vea iti. E faaite oia ia oe e nafea oe e to oe utuafare e nehenehe ai e ite maoti te Atua i te hoê oraraa faahiahia roa a muri aˈe.”
5 I te tere i muri iho, e nehenehe ta tatou, ma te faaohipa i te vea iti ra “Inaha,” e faataa e no te aha e mea faufaa ia ite hau atu â no nia i te Bibilia. Ei hiˈoraa, e navai noa ia faaite faahou i te api matamua e ia parau e:
◼ “I te taime i mairi aˈenei, i to ˈu faaiteraa ˈtu ia oe i teie hohoˈa, ua farii tâua toopiti atoa, e te hinaaro nei tâua e ora i roto i te hoê ao nehenehe roa. Ia riro te reira ei mea mau, e tia ïa ia tâua ia rave i te tahi mea.” A iriti i te vea iti ra “Inaha” e a taio i te paratarapha 52 e oia atoa te Ioane 17:3. A faatuati i teie manaˈo i te faaauraa o te paratarapha 53 no nia i te hoê haapiiraa Bibilia e tano, a faataa i muri iho e te pûpû nei te mau Ite no Iehova i teie huru haapiiraa, ma te tamoni ore e i te fare o te taata. A ani i te taata e e faaite atu outou ia ˈna i te hoê faahiˈoraa no nia i ta tatou ravea haapiiraa, maoti te buka ra Te ite.
6 Mai te peu e e pûpû tatou i te vea iti ra “Te faatereraa o te haamau i te Paradaiso,” e nehenehe ta tatou e parau mai teie:
◼ “Te faaroo nei au e rave rahi taata ia parau e te hinaaro nei ratou e ora i raro aˈe i te hoê faatereraa o te nehenehe mau â e faatitiaifaro i te mau fifi rahi. [A faahiti te mau fifi e tupu ra i to tatou nei fenua, mai te ereraa i te ohipa, te taparahiraa taata e maraa ra aore ra te raau taero.] No teie huru tupuraa, te uiui nei tatou e eaha te huru o to tatou oraraa a muri aˈe e to te mau taata ta tatou e here nei. I to oe manaˈoraa, e itehia anei te mau ravea e te hoê faatereraa ia tae i te hoê mahana? [A faaroo i te pahonoraa.] Peneiaˈe ua faahiti aˈena oe i te pure To matou Metua. Mai te peu e e, ua ite anei oe e i taua taime ra, te pure ra ïa oe no te hoê faatereraa tia?” A iriti i te vea iti ra Faatereraa i te api 3 e a taio i na paratarapha matamua e piti. A pûpû i te vea iti i muri iho.
7 Mai te peu e ua vaiiho tatou i te vea iti ra “Te faatereraa o te haamau i te Paradaiso,” e nehenehe tatou e haamata i te aparauraa i te taime i mua nei mai teie:
◼ “I te taime i mairi aˈenei, ua tauaparau tâua no nia i te faufaaraa o te hoê faatereraa tia o te nehenehe e faatitiaifaro i te mau fifi o te totaiete taata nei. Te faataa ra te vea iti ta ˈu i vaiiho atu i te Basileia o te Atua mai te ravea hoê no tatou. Te uiui nei vetahi mau taata e eaha ta teie faatereraa e nehenehe e rave no te haamaitai i to tatou huru oraraa. Te faaite ra te Bibilia e ua haapapu aˈena te Mesia e e manuïa oia i te mau vahi aita te mau tia faatere i manuïa.” A iriti i te vea iti ra Faatereraa i te api 29 e a taio i na paratarapha hopea e maha. A parau faahou: “Auê ïa oraraa faahiahia e, e ere anei? E hinaaro anei oe e ite atoa i te reira?” A faaroo i te pahonoraa. A taio i te Ioane 17:3. A faaitoito i te taata ia haapii hau atu â na roto i te hoê haapiiraa o te Bibilia i to ˈna fare.
8 Mai te peu e e pûpû tatou i te tahi atu mau vea iti, e nehenehe ta tatou e faaohipa i te mau hiˈoraa i nia nei no te faaineine i ta tatou iho mau omuaraa parau. E faaineine maitai anaˈe ia tatou e e ani anaˈe i te haamaitairaa a Iehova a poro noa ˈi tatou i te parau apî maitai o te Basileia.