Pahonoraa i ta outou mau uiraa

◼ Eaha te tia ia tuuhia i roto i te vairaa buka a te Haapiiraa o te Taviniraa Teotaratia?

Mea rahi te mau papai Bibilia e horoahia ra na te nunaa o te Atua, no to ˈna ïa maitai. No te mea e aita ta te rahiraa o te feia poro teie mau papai atoa, na te vairaa buka ïa a te Haapiiraa o te Taviniraa Teotaratia, i te Piha no te Basileia, e tauturu ia ratou ia rave i te mau maimiraa i roto i te mau papai o ta ratou paha e ore e nehenehe e tuatapapa ahiri e aita teie nei ravea. No reira, e tia ia î maitai teie vairaa buka: te mau huriraa huru rau o te Bibilia, te mau papai hopea a te Taiete, te mau Taviniraa o te Basileia e te mau buka tamatahiti o Te Pare Tiairaa e te A ara mai na!, e tae noa ˈtu te mau Index o te mau papai. E tano atoa ia tuu atu i te hoê titionare maitai no teie nei tau. E tauturu atoa paha te mau buka parau paari, te mau buka fenua, aore ra te tahi atu mau buka faahororaa no nia i te tarame aore ra te aamu. Teie râ, ta tatou fa matamua, o te haaputuraa mai ïa i te mau papai i vauvauhia e “te tavini haapao maitai e te paari.”—Mat. 24:45.

E au ra e ua tuuhia na te tahi mau buka tei ore i tano i roto i te vairaa buka a te Haapiiraa o te Taviniraa Teotaratia. Eita hoi e tano ia tuu mai i te mau buka parauhia roman a teie nei ao, te mau tatararaa Bibilia no ǒ mai i te feia faahapa i te Bibilia, e te mau buka philosopho aore ra no nia i te peu hiˈohiˈo. E tia ia tuuhia i roto i te vairaa buka a te Haapiiraa o te Taviniraa Teotaratia, te mau buka anaˈe o te tauturu i te feia e tuatapapa i te reira ia haere noa i mua i te pae varua.—Tim. 1, 4:15.

Na te tiaau i te haapiiraa e haapao i teie vairaa buka, noa ˈtu e e nehenehe e faataa i te tahi atu taeae no te tauturu ia ˈna i roto i teie nei hopoia. E tia ia ˈna ia ara e ia tuu-noa-hia te mau papai apî ia matara anaˈe mai i roto i te vairaa buka. E tia ia papai-maitai-hia te iˈoa o te amuiraa na ˈna te vairaa buka i nia i te mau api matamua o te buka tataitahi. I te mau matahiti atoa, e tia ia hiˈopoahia te mau buka no te ite e e tia anei ia tataˈihia vetahi aore ra ia monohia.

E nehenehe te taata tataitahi e rave i ta ˈna tuhaa na roto i te atuatu-maitai-raa i te vairaa buka. E tia ia haapao maitai ia faaohipa anaˈe tatou i te mau buka. Eiaha e vaiiho i te mau tamarii ia hauti e te mau buka e eiaha atoa tatou e papaipai i roto. E nehenehe e tuuhia te hoê nota papu maitai no te faahaamanaˈo e eiaha te mau buka e afaihia i rapaeau i te Piha no te Basileia.

I te mea e te haamau-pinepine-hia nei te mau amuiraa apî, eita e ore e aita te mau buka atoa i roto i te mau vairaa buka e rave rahi. Peneiaˈe e nehenehe vetahi feia poro te vai ra ta ratou te mau buka tahito e opua e pûpû i te tahi na te amuiraa. E faaoti paha te mau matahiapo e ani i te mau buka tamatahiti a Te Pare Tiairaa i nenei-faahou-hia. No reira, e riro te vairaa buka a te Haapiiraa o te Taviniraa Teotaratia ei mauhaa faufaa, ia nehenehe te taata tataitahi e ite i te mau taoˈa huna o te Parau a te Atua e horoa mai i te ite, te paari e te maramarama.—Mas. 2:4-6.