E turui anaˈe i nia ia Iehova no te “faatupu”
1 “A tahi ra [vau i ite ai] i te oaoa e apiti i te haamauraa i te hoê amuiraa apî. Ua titauhia hau atu i te piti matahiti ohipa tuutuu ore, te pure e te tiaturiraa ia Iehova, ‘na ˈna e faatupu.’” O ta te hoê ïa pionie haapao maitai i parau, o tei haapii i te faufaaraa ia turui i nia ia Iehova no te “faatupu.” (Kor. 1, 3:5-9) Ia imi anaˈe tatou i te mau taata e anaanatae ra i te mau tumu parau pae varua, e hinaaro atoa tatou e ia turu mai te Atua ia tatou, mai te peu e e hinaaro tatou e ia hotu ta tatou taviniraa.—Mas. 3:5, 6.
2 E titauhia ia atuatu: No te faatupu i te mau huero o te parau mau, e tia ia atuatu i te reira. Te ite-pinepine-hia ra te mau faahopearaa maitatai ia hoˈi-anaˈe-hia e hiˈo i te hoê taata hoê aore ra e piti mahana i muri iho i te farereiraa matamua. E faaite tatou i te huru mahanahana e te auhoa. Eiaha tatou e faahuru ê i te taata. Eiaha e na tatou noa e paraparau. E vaiiho tatou ia ˈna ia haamatau ia tatou, e e faaite tatou ia ˈna e te anaanatae ra tatou ia ˈna iho.
3 I te roaraa o te avaˈe Atete, e tamau noa tatou i te pûpû i te mau vea iti huru rau mai i te avaˈe Tiurai ra. Tera râ, e tia atoa ia tatou ia hoˈi e hiˈo i te mau taata o tei anaanatae aore ra tei rave i te hoê vea iti. Nafea? Na roto i te raveraa i te mau hoˈi-faahou-raa e farerei e te pûpûraa ˈtu i te mau haapiiraa Bibilia. (Mat. 28:19, 20) No reira, e nehenehe tatou e faaohipa i te vea iti ra Titau e i na manaˈo e maha i muri nei no te tauturu ia tatou.
4 Mai te peu e ua paraparau tatou i te hoê taata o te uiui ra e te haere ra te ao nei ihea, e nehenehe tatou e tamau â i te aparauraa e:
◼ “Papu maitai e te haapeapea nei oe, mai ia ˈu nei, i te toparaa o te huru morare o te totaiete taata. Te faarooroo nei tatou i te mau parau riaria no nia i te haavîraa uˈana i te fare, te hinaaro ra vau e parau no nia i te mau tamarii, te mau metua aore ra te mau hoa faaipoipo e rave-ino-hia ra. Hau atu, te manaˈo nei e rave rahi e mea tano iho â ia haavare aore ra ia eiâ no te haamâha i to ratou mau hinaaro. I to oe manaˈoraa, e mea faufaa anei te huru oraraa o te taata no te Atua? [A vaiiho i te taata ia pahono.] Ua haamau te Atua i te tahi mau ture no te taata nei, e e ere teie mau ture i te mea fifi ia haapao.” A taio i te Ioane 1, 5:3. I muri iho, a pûpû atu i te vea iti ra Titau e a iriti i te haapiiraa 10. A huti i te ara-maite-raa i nia i te mau peu e ravehia ra, o tei papai-faaopa-hia i te omuaraa o te mau par. 2-6, e a ani i te taata e teihea te peu ino roa, i to ˈna manaˈoraa, no te totaiete taata. A taio i te paratarapha e faataa ra i te reira, e i te hoê aore ra e piti irava, ia au i te mau huru tupuraa. A faaoti na roto i te taioraa i te par. 7, e a faaau i te hoê taime no te paraparau faahou.
5 E nehenehe tatou e parau atu i te feia e tapitapi ra no to ratou oraraa utuafare e:
◼ “I to oe manaˈoraa, e mea tano anei ia tiaturi i nia i te Poiete no te patu ma te manuïa i to ˈna oraraa utuafare?” A vaiiho i te taata ia pahono. A iriti i te vea iti ra Titau i te haapiiraa 8, e a faataa e te vai ra te mau faaueraa tumu a te Bibilia i roto, no te melo tataitahi o te utuafare. A faaite e nafea ia faaohipa i te vea iti, e te Bibilia atoa, no te huti mai i te haapiiraa maitai roa ˈˈe. A faaohipa i te mau faaueraa i te api 2. A rave i te mau faanahoraa no te hoˈi e faaoti i te haapiiraa aore ra, mai te peu e ua oti, no te hiˈopoa i te tahi atu haapiiraa o ta te taata i maiti.
6 Teie te hoê ravea no te pûpû roa ˈtu i te hoê haapiiraa Bibilia. Oia hoi a faaite atu i te vea iti ra “Titau” e a parau atu e:
◼ “Te vauvau ra teie vea iti i te mau haapiiraa tumu a te Bibilia. I te mau api atoa, e ite oe i te mau pahonoraa i te mau uiraa e haapeapea ra i te mau taata mai te mau senekele mai â. Ei hiˈoraa: Eaha te opuaraa a te Atua no te Fenua?” A hiˈo i te haapiiraa 5, e a taio i te mau uiraa i faahitihia i te omuaraa. A ani i te taata e teihea te uiraa anaanatae roa no ˈna, e a taio i te (aore ra te mau) paratarapha e pahono ra i te uiraa, e te mau irava e tano. A faataa ia ˈna e nehenehe atoa oia e ite ohie i te mau pahonoraa tano i te tahi atu â mau uiraa. A ani i te taata e e hoˈi mai outou no te tuatapapa i te tahi atu uiraa.
7 Mea au aˈe paha na tatou teie ravea ohie roa no te haamata i te hoê haapiiraa Bibilia:
◼ “Ua ite anei oe e i roto noa tau minuti, e noaa mai ia oe i te pahonoraa i te hoê uiraa Bibilia faufaa? Ei hiˈoraa . . .” A faahiti i te hoê uiraa e vai ra i te omuaraa o te hoê o te mau haapiiraa o te vea iti e o ta te taata, i to tatou manaˈoraa, e uiui ra. No te ite i te tahi mau uiraa, a hiˈo i te mau par. 15 e te 16 o te tumu parau hau ra “Ia itoito â tatou i te raveraa i te mau hoˈi-faahou-raa e farerei,” o Te taviniraa o te Basileia no Mati 1997.
8 Ua riro te fariiraa ma te oaoa i te tautooraa e rave i te mau hoˈi-faahou-raa e farerei e e faatere i te mau haapiiraa Bibilia, ei hoê o te mau ohipa e ravehia ra e te mau “hoa rave ohipa” a te Atua. (Kor. 1, 3:9) E tutava anaˈe ïa i te atuatu i te anaanatae, e e turui anaˈe i nia i te Atua no te “faatupu.” Ia na reira tatou, e ite tatou i te mauruuru mau, o te ore e itehia i roto i te tahi atu ohipa.