E horoa tatou i te ravea no ratou ia “faaroo faahou”
1 “E faaroo faahou atu matou ia oe i tena na parau.” (Ohipa 17:32). O ta te tahi mau taata i parau i muri aˈe i te oreroraa parau tuiroo a Paulo i nia i te aivi ra no Mars. I teie mahana atoa, te hinaaro ra vetahi e faaroo rahi atu â i te poroi o te Basileia o ta tatou i paraparau atu ia ratou i to tatou tere matamua.
2 Te rave ra tatou i te tuhaa faufaa roa ˈˈe o ta tatou haapiiraa na roto i te hoˈi-faahou-raa e farerei i te mau taata no te atuatu i to ratou anaanatae. Ma te faaineine maitai ia tatou, e noaa ia tatou i te mau faahopearaa maitatai. Te horoa nei te Buka no te Haapiiraa i te mau aˈoraa i muri nei i te api 49: “A faaau na mua te mau haapapuraa i horoahia no te turu i te faataaraa parau. A tamata i te taa e no te aha râ e mea nafea. A tutava i te faahiti te mau manaˈo na roto i ta outou iho mau parau. A haapii no te taa maitai i te mau haapapuraa bibilia o te mau tuhaa tei faahitihia. A faaineine ia outou no te faaohipa ohie te mau irava tei horoahia.”
3 Mai te peu e ua vaiiho tatou i te buka ra “Te Bibilia: Parau na te Atua aore ra na te taata?”, e nehenehe tatou e parau mai teie e:
◼ “I roto i ta tâua aparauraa i mairi aˈenei, ua aparau na tâua no nia i te mau tumu e tuu ai tatou i to tatou tiaturiraa i nia i te Bibilia? Te faahiti ra te buka ta ˈu i vaiiho atu i te uiraa e: ‘No te aha e taio ai i te Bibilia?’ [A taio i te omuaraa parau i te api 5 e a vaiiho i te taata ia pahono i te uiraa hopea.] Te parau ra te Bibilia ia tatou e e fatata roa te Atua iho i te faatitiaifaro i te mau fifi atoa o te faateimaha nei i te huitaata nei e te aratai ra oia ia tatou na nia i te eˈa o te tia ia tatou ia haere no te fanaˈo i te mau haamaitairaa ta taua tau oaoa mau ra e afai mai. [A taio Salamo 119:105.] E buka tauturu tei faataahia no te hoê haapiiraa Bibilia tataitahi e e te utuafare. E oaoa vau i te faaite ia oe e nafea ia faaohipa.”
4 Ia hoˈi faahou tatou e farerei i te feia ta tatou i vaiiho te api parau iti “No te aha e tiaturi ai i te Bibilia”, e nehenehe tatou e parau e:
◼ “Te tapitapi nei tatou paatoa no nia i te mau mea e tupu a muri aˈe. Ia hiˈohia râ te tupuraa na te ao nei i teie mahana, eaha te tupu i to oe manaˈoraa? [A vaiiho ia pahono.] E horoa noa paha te mau taata i te mau manaˈo no nia i te mea e tupu, area te Atua ua ite oia eaha te tupu. [A taio Isaia 46:10.] E maere paha oe ia haapii e te tǎpǔ ra te Bibilia e fatata tatou i te ora ma te oaoa i roto i te hoê ao apî mai te paradaiso ra te huru. [Taio i te paratarapha matamua i te api 5.] A vaiiho na ia ˈu ia tauaparau hau atu â no nia i teie parau tǎpǔ faahiahia roa.”
5 Ia hoˈi faahou tatou e farerei i te taata o ta tatou i vaiiho atu i te “Tatararaa a te ao apî”, peneiaˈe e haafaufaa tatou i teie manaˈo:
◼ “Ua vaiiho mai au i te hoê Bibilia e ua tǎpǔ vau e hoˈi faahou mai au no te tauturu ia oe ia faaohipa maitai. Ua uiui na paha tatou e nafea tatou e atuatu ai i te mau taairaa auhoa e to tatou taata-tupu. Te horoa maira te Bibilia i te mau aˈoraa faufaa roa, e na roto i te Tatararaa a te ao apî e mea ohie ia ite i te mea ta tatou e hinaaro ra. [A hiˈo i te mau api 1543-4 i te parau ra “here”. A huti i te ara-maite-raa o te taata i nia i te mau irava mai te Korinetia 1, 13:4; Kolosa 3:14 e Petero 1, 4:8. A faataa poto noa e nafea te faaohiparaa i teie mau faaueraa tumu e horoa mai i te mau faahopearaa faahiahia roa.] Teie te hoê hiˈoraa o te faaite ra eaha te mau ravea ohie ta te Bibilia e pûpû ra no te faaruru i to tatou mau fifi. I te tahi taime ê, e oaoa vau i te faaite ia oe nafeâ te Bibilia e tauturu ia tatou ia ite i te oaoa e te hau o te feruriraa.”
6 Aita e faufaa rahi atu â ta tatou e nehenehe e tufa e to tatou taata-tupu o te ite mau o te Parau a te Atua. E horoa teie ite i te mau taata te mǎtaˈu ia Iehova e e faaitoito ia ratou ia haere na nia i to ˈna eˈa, o te haafanaˈo i te mau haamaitairaa mure ore.—Mas. 2:20, 21.