Te Bibilia: te hoê pu no te tamahanahanaraa e te tiaturiraa i roto i te hoê ao arepurepu
1 Te farerei ra te huitaata nei e rave rahi mau fifi i teie mahana; te hinaaro nei oia i te tamahanahanaraa e te tiaturiraa. O te Bibilia anaˈe te horoa mai i te hoê tamahanahanaraa mau. Te horoa mai ra no tatou i te tiaturiraa o te hoê ao apî e te parau-tia (Roma 15:4; Petero 2, 3:13). Te parau nei te Buka tauturu (farani), i te api 207 e: “Ahiri e aita e Bibilia, eita tatou e ite e o vai o Iehova, eita atoa te mau haamaitairaa faahiahia roa no roto mai i te tusia taraehara o te Mesia; ahiri aita te reira, eita tatou e taa i te mau titauraa ia noaa mai te ora mure ore i roto i te Basileia tia o te Atua aore ra i raro aˈe i ta ˈna faatereraa.”
2 I te avaˈe novema, e huti taa ê tatou i te ara-maite-raa o te mau taata i nia i te tiaraa o te Parau a te Atua, te Bibilia, no te tauturu ia ratou ia faaruru i te mau fifi no roto mai i teie nei ao. E pûpû atu tatou Te mau Papai moˈa—Tatararaa a te ao apî (farani) e te buka Te Bibilia: Parau na te Atua aore ra na te taata? Eaha ta tatou e nehenehe e parau no te tauturu i te mau taata farii maitai ia ite i te faufaaraa o te Bibilia?
3 I muri iho i te faaiteraa ˈtu e o vai tatou, e nehenehe tatou e parau mai teie e:
◼ “Te farii nei paha oe i te parau e te haapeapea nei te mau fifi e haaati ra ia tatou i te hau o to tatou feruriraa. Ihea tatou e ite ai i te aˈoraa ohie o te faaite mai nafea ia faaruru i taua mau fifi ra? [A vaiiho ia pahono.] Ua ite au e te tamǎrû mai ra te Bibilia no te mea te haapii ra oia ia tatou e nafea ia ite i te oaoa. [Taio Luka 11:28.] Te tapao o ta matou ohipa o te faaitoitoraa ïa i te mau taata ia taio i te Bibilia e ia haafaufaa i ta ˈna haapiiraa. E nehenehe teie buka haapiiraa o te Bibilia, Te Bibilia: Parau na te Atua aore ra na te taata?, e tauturu ia oe. A hiˈo na eaha ta ˈna e parau ra no nia i te tumu o te rahiraa o te mau fifi o te ao nei. [Taio i te toru o te pereota o te paratarapha 9, i te api 187.] Mai te peu e e hinaaro oe e taio i teie buka, e oaoa vau i te vaiiho mai na oe.”
4 E nehenehe tatou e maiti i te faaohipa i te hoê faaiteraa ohie mai teie:
◼ “Te tutava nei matou i te faaitoito i te mau taata ia anaanatae hau atu â i te Parau a te Atua, te Bibilia. Te hinaaro nei au e horoa na oe teie api parau iti No te aha e tiaturi ai i te Bibilia. Te faaitehia ra no te aha e nehenehe tatou e huri atu i nia i te Bibilia no te ite i te hoê tiaturiraa papu o te hoê ao maitai aˈe. [A hiˈo i te api 6 e a taio i te Salamo 37:29 e te paratarapha hopea.] Te titau nei au ia oe ia taio i teie api parau iti e ia hoˈi faahou mai au e parau mai oe ia ˈu eaha to oe manaˈo no nia i te tiaturiraa ta te Bibilia e pûpû ra.”
5 E hinaaro paha te tahi atu feia poro e faaohipa i teie faaiteraa no te haamata i te hoê haapiiraa bibilia:
◼ “Te haere mai nei au e farerei ia oe no te pûpû atu i te hoê haapiiraa bibilia i to oe fare. E mea faauruahia te Bibilia e te Atua e e nehenehe ta ˈna haapiiraa e tauturu ia tatou ia faatitiaifaro i te mau mea. E tano maitai te reo apî o teie nei tau o te mau Papai moˈa—Tatararaa a te ao apî no te hoê haapiiraa tataitahi. Ua matau-maitai-hia teie huriraa e te tahi tau mirioni taata na te ao atoa nei. A vaiiho na ia ˈu ia faaite poto noa e nafea oe e faaohipa ˈi. [A hiˈo i te api 1659 e a huti i te ara-maite-raa i nia i te omuaraa parau 36A. Ia au i te anaanatae, a hiˈo hoê aore ra e piti o te mau irava horoahia e a tauaparau no nia i te manaˈo e matara mai. A faataa e eaha ta te tuatapaparaa i teie mau irava e faaite mai no nia i ta te Atua e opua e faatupu na roto i to ˈna Basileia.] E oaoa vau i te hoˈi mai no te tauaparau faahou no nia i te tiaturiraa o te Basileia.”
6 Ua riro te Bibilia ei pu no te tamahanahanaraa e te tiaturiraa, e to roto te parau mau o te aratai ia tatou i te ora mure ore (Ioane 17:3, 17). Ma te tufa i te ite o te Bibilia e to tatou taata-tupu, te faaoaoa ra tatou ia Iehova, “o tei hinaaro i te taata atoa ia ora, e ia noaa te ite i te parau mau.”—Tim. 1, 2:4.